Li aatin jultikanb’il chiru li tzuul, xb’aan laj Jorge Cocco

18-24 febrero

Mateo 5; Lukas 6

“Us xaq eere”

Re xtikib’ankil, il ru Mateo 5 ut Lukas 6. Kim, Taaqehin—Choq’ reheb’ li Komon ut li Junkab’al naru chatenq’ankil chixtawb’al ruheb’ li ch’ol a’an, ut li tusleb’ aatin a’in naru naxk’eheb’ laa na’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Patz’ reheb’ li kok’al naq te’aatinaq chirix k’a’ruhaq xe’xb’aanu chiru li xamaan a’in re xwotzb’al lix saqen li Qaawa’ rik’in anihaq.

Xk’utb’al li tzol’leb’

Kok’al toj ka’ch’ineb’ xyu’am

Mateo 5:9

Naru nikinwan jo’ aj k’amol tuqtuukilal.

Eb’ li kok’al li nakatzoleb’ k’a’jo’ naq neke’ru chixchaab’ilob’resinkil li wank sa’ li rochocheb’ wi neke’raatinaheb’ lix komoneb’ rik’in rahok ut chaab’ilal.

Kok’ k’anjel naru chi b’aanumank

• Il ru Mateo 5:9 choq’ reheb’ li kok’al ut ch’olob’ naq eb’ laj k’amol tuqtuukilal neke’xk’am lix tuqtuukilal a’ yaal b’ar li na’ajej wankeb’ wi’. Seraq’i rix junjunq li hoonal yal yoob’anb’il ut tenq’aheb’ li kok’al chixk’eeb’al reetal wi li kristiaan sa’ li hoonal a’an yookeb’ chixk’eeb’al li tuqtuukilal

• Kanab’eb’ lix yuwa’eb’ junjunq li kok’al chirula’aninkil li tzoleb’aal ut chixwotzb’al reetalil jo’q’ehaq naq lix kok’aleb’ ke’xk’e li tuqtuukilal sa’ li rochocheb’.

• Tz’iib’a chiru kok’ hu naab’al reetalil li naru nak’uman ch’a’aj raj li maare te’xnumsi li kok’al (qayehaq, rech alalb’ej rib’ neke’pleetik xb’aan jun b’atz’uul). Kanab’eb’ li junjunq chi kok’al chixsik’b’al ru jun li ch’ina hu. Naq yookat chirilb’al ru reetalileb’ li naru nak’ulman, patz’ reheb’ naq te’xwotz chan raj ru te’xk’am li tuqtuukilal sa’ li hoonal a’an.

Mateo 5:14–16

Li Jesus naraj naq laa’aqin jun li saqen choq’ reheb’ li kristiaan.

Eb’ li kok’al toj ka’ch’ineb’ xyu’am k’a’jo’ naq neke’ru chixchaab’ilob’resinkil lix yu’ameb’ li kristiaan. Chan ru naru nakamusiq’aheb’ chixkanab’ankil chi lemtz’unk lix saqenkeb’?

Kok’ k’anjel naru chi b’aanumank

• K’ut chiruheb’ li kok’al naab’al paay chi k’a’aq re ru li neke’xk’e li saqen, jo’ ajwi’ jun li jalam’uuch wankeb’ wi’ kok’al. Il ru Mateo 5:14–16 ut ye reheb’ li kok’al naq chiqajunilo wan li qasaqen. Chan ru naru naqoksi li qasaqen re xk’amb’aleb’ jalaneb’ chik rik’in li Dios?

• Loch’ xsaqen junaq li pook sa’ li tzoleb’aal. Chan ru nokoxtenq’a li saqen? Chan ru naru nokowan choq’ xsaqen li ruchich’och’? Tz’ap ru li pook. K’a’ru nak’ulman wi ink’a’ naqawotz li qasaqen malaj naq naqamuq?

• Muq jun li pook sa’ li tzoleb’aal ut chupeb’ li saqen. Kanab’eb’ li kok’al chixyalb’al xtawb’al. Il wi’chik ru Mateo 5:15 ut aatinan chirix lix yaalal naq tento naq ink’a’ taqamuq li qasaqen.

• K’e lix saqen li pook chiru li tz’ak ut kanab’eb’ li kok’al chixtaaqenkil li saqen rik’in xnaq’eb’ ru. Oksi li saqen re xk’amb’al xnaq’eb’ ru toj sa’ lix jalam-uuch li Kolonel. Patz’ reheb’ li kok’al naq te’xwotz chan ru naru naq te’wanq jo’ jun saqen li taak’amo’q reheb’ li kristiaan rik’in li Jesukristo.

• Tenq’aheb’ li kok’al chixtawb’al ut chixb’onb’al li kanteel muqmuukeb’ sa’ li perel re kok’ k’anjel re li xamaan a’in.

• B’icha rik’ineb’ li kok’al “Kristo taaraj naq tinlemtz’unq,”, “Chanchanin laa’in jun chahim,” malaj “Lemtz’un,” B’ichleb’aal choq’ reheb’ li Kok’al, 38–39, 84, 96.

Mateo 5:44–45

Li Jesukristo naraj naq chixjunil tinraheb’.

Eb’ li kok’al toj ka’ch’ineb’ xyu’am naru neke’xtikib’ chalen anajwan xyalb’al xk’utb’al li rahok, us ta ink’a’ us neke’ile’ xb’aaneb’ li rochb’eeneb’ malaj eb’ li ras riitz’ineb’. Naq yookat chirilb’al ru Mateo 5:44–45, tz’il rix chan ru naq lix k’utum li Kolonel nak’anjelak choq’ reheb’ li kok’al nakatzoleb’.

Kok’ k’anjel naru chi b’aanumank

• Ye wi’chik Mateo 5:44 rik’ineb’ aatin ut na’leb’ li te’xtaw ru li kok’al ut rik’in li naru neke’xtaw wi’ rib’. Patz’ reheb’ li kok’al naq te’xwotz junjunq hoonal b’ar wi’ xk’utumeb’ li rahok choq’ re anihaq us ta mas ch’a’aj. Chan ru xe’reek’a rik’ineb’ li numsihom a’an?

• Jo’ tzoleb’aal, b’ichahomaq “Aawik’in tinb’eeq laa’in,” B’ichleb’aal choq’ reheb’ li Kok’al,78–79. K’a’ru naqatzol sa’ li b’ich a’an chirix xraab’aleb’ li kristiaan?

• K’e reheb’ li kok’al kok’ huhil aamej rik’in li aatin a’in “Tink’ut lin rahom choq’ re chixjunil.” Patz’ reheb’ naq te’ruutz’u’ji ru li kok’ huhil aamej a’an ut naq te’xt’uyub’ sa’ li rochocheb’ jo’ xjultikankil reheb’ xraab’aleb’ li komon.

• Tenq’aheb’ li kok’al chixyoob’ankileb’ eek’asink-ib’ li te’xk’ul rib’ rik’in li raatinul li b’ich “Li rahok cherib’il eerib’,”, B’ichleb’aal choq’ reheb’ li Kok’al, 74, jo’ yeeb’il sa’ li B’ichleb’aal choq’ reheb’ li Kok’al.

Xk’utb’al li tzol’leb’

Kok’al ak ninqeb’

Mateo 5:3–12

Naru tinwanq chi sa inch’ool naq nikinwan jo’ kixk’ut li Jesus.

Naq yookat chirilb’al ru Mateo 5:3–12, k’a’ru li aatin malaj li ch’ol aatin nawulak chawu? Chan ru naq li k’utum a’an taarosob’tesiheb’ xyu’am li kok’al li nakatzoleb’?

Kok’ k’anjel naru chi b’aanumank

• Yiib’ jun li kaxukuut chiru li pizarron chi wiib’ yiijach, rik’in li jolomil na’leb’ Us xaq eere… ut Osob’tesihom. Kanab’eb’ li kok’al chixsik’b’al sa’ Mateo 5:3–12 aniheb’ naxye li Jesus naq useb’ xaq re ut li osob’tesihom naxyeechi’i reheb’.

• Tz’iib’aheb’ sa’ kok’ hu li junjunq chi chaab’ilal a’an ut li rosob’tesihom, ut kanab’eb’ naq li kok’al te’xtus ru li chaab’ilal rik’ineb’ li osob’tesihom toj reetal te’xk’ul rib’. Patz’ reheb’ li kok’al naq te’xsik’ ru jun reheb’ li chaab’ilal sa’eb’ li raqal a’an li te’raj raj xk’anjelankil.

Mateo 5:9, 21–24, 38–47

Naru nikinwan jo’ aj k’amol tuqtuukilal

Li Jesus kixk’ut naq eb’ laj k’amol tuqtuukilal te’k’ab’a’iiq jo’ ralal li Dios. Chan ru naru nakawaklesiheb’ xch’ool li kok’al chi wank jo’ aj k’amol tuqtuukilal?

Kok’ k’anjel naru chi b’aanumank

• Kanab’ jun li ch’ina al chirilb’al ru Mateo 5:9 Chirix a’an patz: K’a’ru a’an jun laj k’amol tuqtuukilal? Chan ru naq naru nokowan choq’ aj k’amol tuqtuukilal rik’in li qajunkab’al ut eb’ li qamiiw? (Re xtawb’al chik li na’leb’, chi’ilmanq eb’ li raqal 21–24, 38–47.)

• Patz’ reheb’ li junjunq chi kok’al naq te’xk’oxla jun li hoonal li taa’ajmanq raj wi’ ru lix tenq’ jun aj k’amol tuqtuukilal. K’a’ raj ru tixb’aanu jun aj k’amol tuqtuukilal sa’ li hoonal a’an?

• Kanab’eb’ kok’al chixwotzb’aleb’ resil li hoonal naq xe’xk’ut lix rahom chiru anihaq, us ta li kristiaan a’an jalanaq chiruheb’ a’an malaj ch’a’aj xraab’al.

Mateo 5:14–16

Lin b’aanuhom naru naxk’e xsaqen li b’e re naq jalaneb’ te’xtaaqe li Jesus.

K’oxlaheb’ li kok’al li nakatzoleb’ naq yookat chirilb’aleb’ ru li raqal a’an. K’a’ru li esil wan re li Qaawa’ choq’ reheb’ li kok’al sa’ li raqal a’in?

Kok’ k’anjel naru chi b’aanumank

• Tenq’aheb’ li kok’al chixkanab’ankil sa’ xk’a’uxleb’ Mateo 5:16. Tz’iib’a li raqal sa’ li pizarron. Ilomaq ru sa’ komonil chi naab’al sut, xsachb’al jun reheb’ li aatin rajlal sut. Naq ak xe’xkanab’ sa’ lix k’a’uxleb’ li raqal, naru ajwi’ nekeb’icha “Lemtz’un,” B’ichleb’aal choq’ reheb’ li Kok’al,130> 96.

• Patz’ reheb’ li kok’al naq te’xyiib’ xjalam-uuch li k’a’aq re ru neke’xk’e li saqen. Il ru Mateo 5:14–16. Patz’ reheb’ k’a’ut naq li Jesus naraj naq toowanq jo’ jun saqen choq’ re li ruchich’och’.

• Kanab’eb’ li kok’al chixyiib’ankil xjalam-uuch k’a’ruhaq li naru neke’xb’aanu re naq te’wanq jo’ jun saqen choq’ reheb’ jalan. Naru nakak’ut li video “Ilumina el Mundo” (mormon.org). Kanab’eb’ wiib’ li kok’al chi xaqliik ut chirilb’all li ru chirib’ileb’ rib’, ut patz’ re jun naq tixyal xk’eeb’al chi se’ek li jun chik chi ink’a’ tixch’e’. Aatinan chirix lix wankilaleb’ li kok’al re xk’eeb’al xsahileb’ xch’ool li jalaneb’.

Xb’oqb’aleb’ chi tzolok sa’ kab’l

B’oqeb’ li kok’al chi ilok chi us re xtawb’al anihaq li yoo chi wank jo’ aj k’amol tuqtuukilal chiru li xamaan a’in. Sa’ xtikib’ankil li tzolok sa’ li xamaan chal re, kanab’eb’ chi aatinak chirix ani xe’ril ut k’a’ru xe’ril.

Xchaab’ilob’resinkil li qak’utum

Tenq’aheb’ li kok’al chi wank chi aj-o. “Naq nakatzoleb’ li kok’al, kanab’eb’ naq te’kab’laq, te’xyiib’ li jalam-uuch, te’b’onoq, te’tz’iib’aq ut te’yo’ob’tesinq. Eb’ li k’a’aq re ru a’in moko ka’ajwi’ ta a’an li kok’ k’anjel re se’ek— a’aneb’ b’an aajel ru re tzolok” (chi’ilmanq Li k’utuk jo’ li Kolonel, perel 25).