laj Jwan aj Kub’sihom Ha’ naq yoo chixkub’sinkil xha’ li Jesus

B’onb’il lem sa’ li Santil Ochoch re Nauvoo, Illinois, xb’aan laj Tom Holdman.

28 enero – 3 febrero

Mateo 3; Markos 1; Lukas 3

”Tuqub’omaq lix b’e li Qaawa’ “

Naq yookat chirilb’al ru li esil chirix laj Jwan aj Kub’sihom Ha’ ut lix kub’iha’ li Jesukristo, tz’iib’aheb’ yalaq musiq’anb’il na’leb’ nakak’ul. Kim, Taaqehin—Choq’ reheb’ li Komon ut li Junkab’al naru chatenq’ankil chixtawb’aleb’ ru li raqal a’an reheb’ li loq’laj hu ut tatxtenq’a chixtz’aqob’resinkil li neke’xtzol li komon sa’ laa tzoleb’aal yal xjuneseb’ rib’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xk’eeb’al reheb’ li kok’al li hoonal re xwotzb’al li k’a’ru xe’xtzol, k’ut jun li jalam-uuch re lix kub’iha’ li Jesus ut patz’ reheb’ naq te’xye li nak’ul’lman sa’ li jalam-uuch, jo’ ajwi’ li reek’ahomeb’ chirix li kub’siik ha’.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 3:13–17

Naru nakub’siman inha’ jo’ li Jesus.

Chan ru naru nakawoksi li seraq’ re lix kub’iha’ li Jesus re xtenq’ankileb’ li kok’al chixkawresinkileb’ rib’ choq’ re li kub’iha’?

Kok’ k’anjel naru chi b’aanumank

• K’os ru li seraq’ re lix kub’iha’ li Kolonel (chi’ilmanq Mateo 3:13–17; chi’ilmanq ajwi’ “Ch’ol 10:Nakub’e xha’ li Jesus,” Eb’ li Esilal sa’ li Ak’ Chaq’rab’, perel 26–29, malaj li video wan sa’ LDS.org). Ye li seraq’ chi naab’al sut ut kanab’eb’ li kok’al chixwotzb’al chixjunil li k’a’ru najultiko’ reheb’. Ch’olob’ naq li Jesus kikub’siik xha’ chi sub’b’il xb’aan junaq lix wan xwankilal li tijonelil rik’in.

• K’ut jun li jalam-uuch re lix kub’iha’ li Jesus ut li perel re li kok’ k’anjel re li xamaan a’in. Kanab’eb’ li kok’al chixk’utb’al lix juntaq’eetileb’ li wiib’ chi jalam-uuch.

• Wi nakawaj, il wi’chik li yeechi’ihom te’xb’aanu li kok’al naq te’kub’eeq xha’ (chi’ilmanq Mosiah 18:8–10; Tz. Ut S. 20:37; Leales a la Fe, perel 28). Patz’ reheb’ b’ar wan reheb’ li k’a’aq re ru a’an ak yookeb’ chixb’aanunkil.

• B’oq junaq li komon re li obispil chi aatinak rik’ineb’ li kok’al chirixeb’ li patz’om re li kub’iha’ li te’b’aanumanq re naq maji’ neke’kub’e xha’.

• B’icha rik’ineb’ li kok’al “Li kub’iha’,”, B’ichleb’aal choq’ reheb’ li Kok’al, 54–55. K’oxla xpatz’b’al re jun li ch’ina al li naxnaw chi us li b’ich naq tixb’eresiheb’ li xkomoneb’ li kok’al naq yookeb’ chi b’ichank.

lix kub’iha’ jun li ch’ina xqa’al

Naru naqataaqe lix b’aanuhom li Jesukristo naq nakub’e qaha’.

Mateo 3:11, 16

Li Santil Musiq’ej nikinxtenq’a.

Chirix naq neke’xkawresi rib’ re li kub’iha’, eb’ li kok’al neke’xkawresi ajwi’ rib’ re xk’ulb’al li maatan re li Santil Musiq’ej. Chan ru naru nakatenq’aheb’?

Kok’ k’anjel naru chi b’aanumank

• Oksi Mateo 3:11, 16 re xk’utb’al chiruheb’ li kok’al naq li Santil Musiq’ej kikub’e sa’ xb’een li Jesus naq kikub’siik xha’ (jun li mukuy kixk’utb’esi rib’ jo’ reetalil naq ki’uxman a’an). K’ut li jalam-uuch El don del Espíritu Santo (Libro de obras de arte del Evangelio, 105), ut ch’olob’ naq naqak’ul li maatan re li Santil Musiq’ej naq nokok’ojob’aak.

• K’am chaq jun li kaxon wankeb’ wi’ li k’a’aq re ru jo’ jun xjalam-uuch li Jesus, jun li isb’ q’un ru ut jun li k’utleb’aal b’e. Kanab’eb’ li kok’al chixsik’b’al ru jun li k’a’aq re ru ut chirix a’an chixwotzb’al chan ru naq li junjunq chi k’a’aq re ru a’an naxk’utb’esi chan ru naq li Santil Musiq’ej naru nokoxtenq’a—naxch’olob’ xyaalal li Jesus, naxk’ojob’ li qach’ool (chi’ilmanq Jwan 15:26) ut naxk’ut chiqu b’ar wan li chaab’il b’e (chi’ilmanq2 Nefi 32:5).

• Wotz li xak’ul ajwi’ laa’at chirix xk’ulb’al lix tenq’ li Santil Musiq’ej.

• Kanab’eb’ li kok’al chixk’eeb’al reetal chan ru naq li Santil Musiq’ej nokoxtenq’a naq yookex chixb’ichankil “Li Santil Musiq’ej,” B’ichleb’aal choq’ reheb’ li Kok’al, 56.

reetalil li k’utuk

Xk’utb’al li tzol’leb’

Kok’al ak ninqeb’

Mateo 3

Osob’tesinb’ilin rik’ineb’ li k’ojob’anb’il k’anjel re li Tijonelil re Aaron.

Laj Jwan aj Kub’sihom Ha’ kiwan li Tijonelil re Aaron rik’in, jo’kan naq a’in jun li chaab’il hoonal re xtzolb’aleb’ li kok’al chirix li Tijonelil re Aaron ut xtenq’ankileb’ chixk’eeb’al reetaleb’ li osob’tesiik ut li wankilal neke’xk’ul li winq jo’eb’ ajwi’ li ixq rik’in li tijonelil a’in.

Kok’ k’anjel naru chi b’aanumank

• Kanab’eb’ li kok’al chixtz’iib’ankil chi tzoltzo resilal li k’anjel sa’ li Tijonelil re Aaron jo’ chanru nayeeman sa’ Tzol’leb’ ut Sumwank 20:46, 58–60; 84:111. Ch’olob’ naq eb’ laj tij sa’ li Tijonelil re Aaron neke’ru chi “kub’sink ha’ ut chixk’anjelankil li loq’laj wa’ak.” Eb’ laj tij, laj tzolonel ut eb laj tenq’anel tento naq “te’k’utuq ut te’xb’oqeb’ chixjunil chi chalk rik’in li Kristo” (Tz. Ut S. 20:46, 59). Patz’ reheb’ li kok’al naq te’xsik’ sa’ Mateo 3 chan ru naq laj Jwan kixtz’aqob’resi ru li k’anjel a’an. Chan ru naru naqab’oqeb’ li kristiaan chi chalk rik’in li Kristo, jo’ kixb’aanu laj Jwan?

• K’ut junjunq li jalam-uuch reheb’ laj k’amol re li Tijonelil re Aaron li yookeb’ chixb’aanunkil li k’ojob’anb’il k’anjel re li kub’iha’ ut re li loq’laj wa’ak (chi’ilmanq Libro de obras de arte del Evangelio, 103, 108). Aatinan chirix chan ru naq eb’ li k’ojob’anb’il k’anjel a’an nokohe’xkawresi re xk’ulb’al li Jesukristo ut lix tojb’al rix li maak xb’aan a’an.

• Ilomaq sa’ komonil Tzol’leb’ ut Sumwank 13:1 ut ch’olob’ naq laj Jwan aj Kub’sihom Ha’ kixk’ojob’ wi’chik li Tijonelil re Aaron re laj Jose Smith. Patz’ reheb’ li kok’al chan ru naq ak osob’tesinb’ileb’ sa’ xk’ab’a’ naq li Tijonelil re Aaron kik’ojob’aak wi’chik.

Mateo 3:13–17; Lukas 3:2–18

Naru nink’uulaheb’ lin sumwank re li kub’iha’.

Sa’ li seraq’ chirix lix kub’iha’ li Jesus wan jun li chaab’il hoonal re xtenq’ankileb’ li kok’al chixjultikankileb’ lix sumwank re li kub’iha’ ut chixteneb’ankileb’ wi’chik rib’ chixk’uulankileb’.

Kok’ k’anjel naru chi b’aanumank

• Patz’ reheb’ wiib’ chi kok’al naq te’ril sa’ Lukas 3:7–9, 15–17, ut naq jun taaril ru li raatin laj Jwan aj Kub’sihom Ha’ ut li jun chik taaril ru lix komoneb’ li aatin. Chirix li junjunq chi raqal, xaqlinqex chiru junpaat ut tenq’aheb’ li kok’al chixtawb’al ru li k’a’ru naraj naxye li raqal.

• Numsihomaqeb’ wi’chik li sumwank li ke’xb’aanu li kok’al naq ke’kub’e xha’, li natawman sa’ Mosiah 18:8–10 ut Tzol’leb’ ut Sumwank 20:37 (chi’ilmanq ajwi’ Leales a la Fe, 28–31). Kanab’eb’ li kok’al chixtz’iib’ankileb’ li raqal a’an sa’ li perel re li kok’ k’anjel re li xamaan.

• Kawresiheb’ k’iila sumal li kok’ hu rik’ineb’ li ch’ol aatin malaj li jalam-uuch li neke’xk’ul rib’ ut neke’reetaliheb’ li qasumwank re li kub’iha’. K’eheb’ li kok’ hu chi huphu Kanab’eb’ li kok’al chixk’eeb’aleb’ xhoonal re xb’alq’usinkileb’ wiib’ chi kok’ hu sa’ jun sut, re xyalb’al xtawb’al wiib’ li neke’xk’ul rib’. Naq te’xch’utub’ wiib’ oxib’ chi sumal, kanab’eb’ li kok’al chixwotzb’al chan ru naq xk’uulahomeb’ li sumwank a’an.

• Aatinan chirix chan ru naq xat-osob’tesiik rik’in xk’uulankileb’ laa sumwank re li kub’iha’.

Mateo 3:11, 16

Li Santil Musiq’ej naru nikinixb’eresi.

Eb li kok’al yookeb’ chixtzolb’al xk’eeb’al reetal ut xtaaqenkil lix b’eeresihom li Santil Musiq’ej. Chan ru naru nakak’ut chiruheb’ naq lix k’uulankileb’ lix sumwank re li kub’iha’ tixtenq’aheb’ chi wank chi saq ruheb’ re xk’ulb’al li b’eeresiik a’an?

Kok’ k’anjel naru chi b’aanumank

• Patz’ re li junjunq chi kok’al naq te’xsik’ ru jun reheb’ li raqal a’in reheb’ li loq’laj hu re rilb’al ru ut xch’olob’ankil chan ru naq nokoraatina li Santil Musiq’ej: Tzol’leb’ ut Sumwank 6:23; 8:2–3.

• Patz’ re jun li ch’ina al naq taaril ru Mateo 3:11. Chan ru naq li Santil Musiq’ej a’an chanchan li xam? Qayehaq, li xam naq’ixnob’resin ut naxk’e li saqen re xk’amb’al qab’e (chi’ilmanq Jwan 15:26; 2 Nefi 32:5).

• Kanab’eb’ li kok’al chixmutz’b’al li ruheb’ ut chixye’b’al li ruq’eb’, Chirix a’an numsi chi timil junaq li xik’ malaj junaq li k’aam sa’ xyi li ruq’eb’. Kanab’eb’ chixyeeb’al resil naq te’reek’a. K’a’ru naxk’ut li ch’ina k’anjel a’in chirix xk’eeb’al reetal lix musiq’ahom li Santil Musiq’ej?

• Kanab’eb’ li kok’al chixwotzb’al li k’a’ru xe’xk’ul rik’in li Santil Musiq’ej. K’a’ut naq lix k’uulankil li qasumwank nokoxtenq’a chixk’ulb’al lix b’eeresihom li Santil Musiq’ej?

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixpatz’b’al reheb’ lix na’ xyuwa’ malaj reheb’ jalan chik xkomoneb’ lix junkab’al chirixeb’ lix kub’iha’.

Xchaab’ilob’resinkil li qak’utum

Sik’ laa musiq’anb’il na’leb’ ajwi’ laa’at. Maawil li tusleb’ aatin a’in jo’ li ch’olob’ahom li tento taataaqe naq nakatk’utuk. Oksi b’an jo’ li na’leb’ li nakatxtenq’a chixk’ulb’al laa musiq’anb’il na’leb’ ajwi’ laa’at naq taatz’il rix li ajb’il ru chiruheb’ li kok’al li nakatzoleb’. (Chi’ilmanq Li k’utuk jo’ li Kolonel, perel 7).

perel re li kok’ k’anjel: Naru nakub’siman inha’ jo’ li Jesus.