jun li ixq yoo chixwotzb’al li evangelio sa’ jun terminal

21-27 enero

Jwan 1

Xqataw li Mesias

Naq nakawil ru Jwan 1, tz’iib’a li musiq’anb’il na’leb’ nakak’ul. Li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al naru chatenq’ankil chixtawb’al ru li ch’ol a’in. Eb’ li reetalileb’ kok’ k’anjel a’in naru neke’xk’e aana’leb’ chirix chan ru xtenq’ankileb’ li kok’al chixtzolb’aleb’ li na’leb’ wankeb’ sa’ Jwan 1. Eb’ li kok’ k’anjel choq’ reheb’ li kok’al ak ninqeb’ naru neke’jalman wi na’ajman ru, choq’ reheb’ li kok’al toj ka’ch’ineb’ xyu’am.

Xtz’iib’ankil li nakak’oxla

reetalil li wotzok

Xb’oqb’aleb’ chi wotzok

Re xtenq’ankileb’ li kok’al chixwotzb’al li neke’xnaw chirix li Jesus, naru nakak’ut chiruheb’ lix jalam-uuch a’an b’ar wi’ yoo chixb’aanunkil junjunq lix k’anjel jo’ yeeb’il resil sa’ Jwan 1. Chirix a’an patz’ reheb’ naq te’xch’olob’ li yoo chi k’ulmank (jo’ lix yo’ob’tesinkil li ruchich’och’ malaj lix k’utb’al li evangelio).

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Jwan 1:1–2

Li Jesus kiwan chaq rik’in li qaChoxahil Yuwa’ naq maji’ nayo’la.

Laj Jwan kixk’ut naq li Jesukristo kiwan chaq rik’in li Dios naq maji’ nachal chi wank sa’ li ruchich’och’. Laa’o ajwi’ koowan rik’in li Dios naq maji’ nokoyo’la (chi’ilmanq “Li Junkab’al: Jun Jek’inb’il Aatin choq’ re li Ruchich’och’,” Liahona, noviembre 2010, 129). Chan ru taak’ut chiruheb’ li kok’al li yaal a’an?

Kok’ k’anjel naru chi b’aanumank

• Ch’olob’ naq “li aatin” natawman sa’ Jwan 1:1 na’aatinak chirix li Jesus. Il ru li raqal chi kaw xyaab’ aakux ut patz’ reheb’ li kok’al naq te’xye “Jesus” rajlal sut naq taayaab’asi “li Aatin.” K’ut li jalam-uuch La vida preterrenal (LDS.org). Ch’olob’ naq li Jesukristo kiwan chaq rik’in li qaChoxahil Yuwa’ naq maji’ nachal sa’ li ruchich’och’.

• K’ut chiruheb’ li kok’al naq laa’o ajwi’ koowan chaq rik’in li Dios naq maji’ nokochal sa’ li ruchich’och’. Wi nakawaj, oksi “Xtikib’ankil: Lix k’uub’anb’il na’leb’ li qaChoxahil Yuwa’,” Eb’ li Esilal sa’ li Ak’ Chaq’rab’,65 perel 1–5; li video (LDS.org); malaj li K’utul Raqal reheb’ li Loq’laj Hu, “Yu’am naq maji’ nokoyo’la,” escrituras.lds.org.

• B’oq jun li yuwa’b’ej malaj jun li na’b’ej chixk’amb’al chaq junaq li k’uula’al sa’ li tzoleb’aal, ut oksi li hoonal a’an re xk’utb’al naq koowan chaq sa’ choxa rik’in li qaChoxahil Yuwa’ jo’ alalb’ej yo’ob’tensinb’ilo sa’ musiq’ej naq maji’ nokoyo’la.

Jwan 1:3

Li Jesus kixyo’ob’tesi chixjunil li k’a’aq re ru.

Ak reheb’ naab’al li kok’al xyalb’al xsahil li wank sa’ xyanq lix yo’ob’tesihom li Qaawa’. Lix nawb’al ru lix k’anjel li Kristo jo’ aj Yo’ob’tesinel naru naxtenq’aheb’ chixnimob’resinkil li roxloq’eb’ choq’ re a’an.

Kok’ k’anjel naru chi b’aanumank

• Il ru Jwan 1:3 rik’ineb’ li kok’al ut k’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al. Tenq’aheb’ li kok’al chixkanab’ankil sa’ xk’a’uxleb’ li ch’ol aatin “chixjunileb’ li k’a’aq re ru sa’ xk’ab’a’ li [Jesukristo] kiyo’ob’tesiman.”

• K’ameb’ li kok’al chi b’eek chirix kab’l. Kanab’eb’ naq te’xk’e xhoonal chixch’olob’ankil junaq li yo’ob’tesihom te’ril ut patz’ reheb’ lix komoneb’ naq te’xq’ehi li yookeb’ chixch’olob’ankil.

• Patz’ reheb’ li kok’al naq te’xk’oxla xyaalal chanru naru neke’xkol rix li yoob’tesihom wankeb’ sa’ xsutameb’ (qayehaq, li wank sa’ chaab’ilal rik’ineb’ li xul).

saqew sa’ jun li k’iche’

Li Jesukristo kixyo’ob’tesi li ruchich’och’ ut chixjunil li k’a’ru wan chi sa’.

Jwan 1:35–51

Naru ninb’oqeb’ lin komon chi chalk chiru li Jesukristo ut tzolok chirix a’an.

Sa’Jwan 1 wan li seraq’ chirixeb’ li tzolom li ke’xb’oqeb’ li kristiaan chi chalk ut chirilb’al naq li Jesus a’an li Ralal li Dios. Eb’ li kok’al toj ka’ch’ineb’ xyu’am naru ajwi’ neke’xtaaqe li b’aanuhom a’an.

Kok’ k’anjel naru chi b’aanumank

• Ch’olob’ chan ru naq laj Jwan kixtzol laj Andres chirix li Jesus, ut chan ru naq laj Andres ajwi’ kixtzol laj Pedro (chi’ilmanq Jwan 1:35–42). Wotz chan ru naq xattzolok chirix li iglees, malaj b’oq jun li ak’ komon chixwotzb’al chan ru naq kitzolok chirix li iglees.

• Wotz li seraq’ naq laj Felipe kixk’e lix b’oqom re laj Natanael “chi chalk ut chirilb’al” (Jwan 1:43–51). Muq jun li jalam-uuch re li Jesus sa’ jun li kaxon ut kanab’ jun li ch’ina al “chi chalk ut chirilb’al” re naq chirix a’an tixye reheb’ lix komoneb’ li kok’al k’a’ru li xril.

• Kanab’eb’ li kok’al chixb’onb’al li perel re li kok’ k’anjel re li xamaan a’in ut waklesiheb’ xch’ool chiroksinkil re xb’oqb’al junaq chik chi tzolok chirix li Jesus.

• Patz’ re jun li ch’ina al naq taa’aatinaq chirix jun li hoonal naq xwotz k’a’ruhaq, jo’ jun li b’atz’uul malaj jun li maatan, rik’in anihaq chik. Chan ru naru naqawotz li evangelio? Seraq’i li resil jun li ch’ina al li xwotz li evangelio rik’in jun li ramiiw, jo’ li seraq’ re li Elder M. Russell Ballard chirix laj Joshua (“Xtaaqenkil li k’a’ru nakawaj,” , Jolomil Ch’utub’aj-ib’ re abril 2014).

reetalil li k’utuk

Xk’utb’al li tzol’leb’

Kok’al ak ninqeb’

Jwan 1:1–5

Li Jesukristo kiwan chaq rik’in li qaChoxahil Yuwa’ naq maji’ nayo’la.

Jo’kan ajwi’ naq maji’ nayo’la, li Jesukristo kiwan chaq lix k’anjel mas aajel ru sa’ lix k’uub’anb’il na’leb’ li qaChoxahil Yuwa’. Naq nakawil Jwan 1:1–5, K’a’ru naxsachb’esi aach’ool chirix lix k’anjel li Kristo naq maji’ nayo’la?

Kok’ k’anjel naru chi b’aanumank

• Patz’ reheb’ li kok’al ma neke’xnaw k’a’ruhaq chirix li kixb’aanu chaq li Jesus naq maji’ nayo’la. Kanab’eb’ chixsik’b’al lix sumenkil sa’ Jwan 1:1–5. Maare us raj xsik’b’al sa’Lix Jaltesinkil ru li Santil Hu xb’aan laj Jose Smith, Jwan 1:1–5

• Wotz rik’ineb’ li kok’al“Xtikib’ankil: Lix k’uub’anb’il na’leb’ li qaChoxahil Yuwa’,”Eb’ li Esilal sa’ li Ak’ Chaq’rab’, perel 1–5; malaj k’ut li video chirix a’an (LDS.org). Patz’ reheb’ li kok’al k’a’ru neke’xtzol chirix li Jesukristo.

• Kanab’eb’ junjunq li kok’al chi wulak sa’ li tzoleb’aal chi kawresinb’ileb’ re xk’utb’al malaj xch’olob’ankil k’a’ruhaq xyo’ob’tesihomeb’. K’uteb’ li jalam-uuch re junjunq lix yo’ob’tesihom li Qaawa’ ut oksi Jwan 1:3 re xch’olob’ankil naq li Jesus kixyo’ob’tesi chixjunil li k’a’aq re ru.

Jwan 1:4–9

Li Jesukristo a’an lin saqen.

Li reetalil li saqen naru naxtenq’aheb’ li kok’al chixtawb’al ru li Kolonel ut lix evangelio. Chan ru naru taawaklesiheb’ xmusiq’ li kok’al chixsik’b’al lix saqen li Kolonel naq li ruchich’och’ chanchan naq mas q’ojyin ru?

Kok’ k’anjel naru chi b’aanumank

• Kanab’eb’ li kok’al chirilb’al ru Salmos 27:1; Jwan 1:4–9; Mosiah 16:9; ut Tzol’leb’ ut Sumwank 39:1–2, ut chixsik’b’al li ch’ol aatin li juntaq’eeteb’ sa’eb’ li raqal a’an. Chan ru naq li Jesukristo chanchan jun li saqen?

• K’ut jun lix jalam-uuch li Kolonel ut junjunq k’a’aq re ru li neke’xk’e li saqen, jo’ jun li pook. Chan ru naq li Jesukristo chanchaneb’ li k’a’aq re ru a’an? Chan ru naq naru naqawotz lix saqen rik’ineb’ li kristiaan? B’ichahomaq sa’ komonil “Laa’at lin saqen,” Eb’ li B’ich,  47, malaj jalan chik li b’ich chirix lix saqen li evangelio.

• Patz’ reheb’ li kok’al k’a’ru neke’xb’aanu naq neke’wan sa’ li aak’ab’ ut neke’reeka xxiweb’. Ch’olob’ xyaalal naq junelik naru neke’xsik’ li Kolonel naq wankeb’ xxiw.

Jwan 1:35–51

Jo’ aj taaqenel re li Jesukristo, ninb’oqeb’ li jun ch’ol chik chixtaaqenkil.

Il chan ru naru nakawoksiheb’ li eetalil sa’ Jwan 1:35–51 re xwaklesinkileb’ xch’ool li kok’al chixb’oqb’aleb’ li komon chi tzolok chirix li Kolonel.

Kok’ k’anjel naru chi b’aanumank

• Tenq’aheb’ li kok’al chixsikb’al sa’ Jwan 1:35–51 li k’a’ru ke’xye li kristiaan re xb’oqb’aleb’ li komon chi tzolok chirix li Kolonel. Kanab’eb’ chixyalb’al xyeeb’al li k’a’ raj ru te’xye re xb’oqb’al jun li ramiiweb’ chi tzolok chirix li Jesus.

• Patz’ reheb’ li kok’al naq te’roksi li perel re li kok’ k’anjel re li xamaan a’in re xyiib’ankil junaq li b’oqom li naru te’roksi re xb’oqb’al jun li ramiiweb’ malaj jun komon sa’ xjunkab’aleb’ chixtzolb’al xkomon xna’leb’eb’ chirix li Jesukristo.

• K’e xhoonaleb’ li kok’al chi aatinak chiru li tzoleb’aal chirix k’a’ruhaq li mas nawulak chiruheb’. Tenq’aheb’ li kok’al chirilb’al chan ru naq xwotzb’al li evangelio naru naq chanchanaq ajwi’ xwotzb’al li k’a’ruhaq mas nawulak chiqu. Wi nakawaj, k’ut li video “Cosas buenas para compartir” (LDS.org).

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixb’oqb’aleb’ anihaq li mas neke’xra chixtzolb’aleb’ xkomon xna’leb’ chirix li Jesukristo.

Xchaab’ilob’resinkil li qak’utum

Tenq’aheb’ li kok’al chixk’oxlankil li seraq’. Sik’ xyaalal chan ru xyiib’ankil junaq lix jalam-uuch li seraq’, maare rik’ineb’ ajwi’ li jalam-uuch re li evangelio, eb’ li video, eb’ li kok’ b’atz’uul malaj li k’utb’esink.

Perel re kok’ k’anjel: tzolon chirix li Jesukristo.