“21–27 enero. Jwan 1: Xqataw li Mesias,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“21–27 enero. Jwan 1,” Kim, Taaqehin—Choq’ reheb’ li komon ut li junkab’al: 2019
21–27 enero
Jwan 1
Xqataw li Mesias
Naq nakawil ut nakak’oxla Jwan 1, tz’iib’a li musiq’anb’il na’leb’ nakak’ul. K’a’ru li esilal nakataw li mas taak’anjelaq choq’ aawe ut choq’ re laa junkab’al? K’a’ru tatruuq chixwotzb’al sa’ laa tzoleb’aal sa’ li Iglees?
Xtz’iib’ankil li nakak’oxla
Ma xak’oxla jun sutaq ma xanaw raj naq li Jesus aj Nazaret a’an Ralal li Dios wi ta xatwan chi yo’yo naq yoo a’an chi k’anjelak sa’ li ruchich’och’? Chiru naab’al chihab’, eb’ laj Israelita li tiikeb’ chi paab’ank, jo’ laj Andres, laj Pedro, laj Felipe, ut laj Natanael, yookeb’ chaq chiroyb’eninkil ut chixtz’aamankil naq chichalq li Mesias li yeechi’inb’il. Naq ke’ril a’an, chan ru naq ke’xnaw naq a’an li yookeb’ chixsik’b’al? Jo’ chanru ajwi’ naq laa’o noko’ok chixnawb’al ru li Kolonel—rik’in xk’ulub’ankil qajunes li b’oqom, “kimqex ut toxeeril” (Jwan 1:39). Naqil resil sa’eb’ li loq’laj hu. Naqab’i lix tzol’leb’. Naqak’e reetal chan ru lix yu’am. Naqeek’a lix Musiq’. Ut naq yooko chixb’aanunkil, naqak’e reetal, jo’ kixb’aanu laj Natanael, naq li Kolonel naxnaw qu ut nokoxra, ut naraj qakawresinkil re taqak’ul “xkomon chik xninqal ru na’leb’ ” (Jwan 1:50).
Li na’leb’ re xtzolb’aleb’ li loq’laj hu aajunes
Lix Hu laj Jwan
Ani laj Jwan?
Laj Jwan a’an chaq jun xtzolom laj Jwan aj Kub’sihom Ha’, ut moqon a’an ki’ok chixtaaqenkil li Jesukristo, ut kiwan choq’ jun reheb’ lix Kab’laju chi Apostol. Kixtz’iib’a lix hu laj Jwan, junjunq chik li kok’ taqlanb’il hu, ut li hu Apokalipsis. Sa’ lix Hu laj Jwan, naxye naq a’an li tzolom li “raaro xb’aan li Jesus” ut li “rech tzolonelil” (Jwan 13:23; 20:3). Laj Jwan q’axal anchal xch’ool chixjultikankil li evangelio, jo’kan naq kixtz’aama naq a’an chikanaaq sa’ li ruchich’och’ toj reetal li xkab’ xk’ulunik li Kolonel, re taaruuq chixk’amb’aleb’ chaq li aamej rik’in li Kristo (chi’ilmanq Tz. ut S. 7:1–6).
Chi’ilmanq ajwi’ sa’ li K’utul Raqal reheb’ li Loq’laj Hu, “Jwan, ralal laj Sebedeo.”
Li Jesukristo “sa’ xtiklajik...wan chaq rik’in li Dios.”
Laj Jwan kixtikib’ lix hu rik’in xyeeb’al resil li k’anjel kixb’aanu li Kristo naq maji’ nayo’la: “Sa’ xtiklajik ... li Aatin [li Jesukristo] wan chaq rik’in li Dios.” K’a’ru nakatzol sa’eb’ li raqal 1–5 chirix li Kolonel ut lix k’anjel? Naru taataw chik xkomon aana’leb’ sa’ JJS Jwan 1:1–5 (li wan sa’ xraqik li roxichal chi loq’laj hu). Naq nakatikib tzolok chirix lix yu’am li Kolonel, k’a’ut naq aajel ru xnawb’al chirix lix k’anjel naq maji’ nayo’la?
Chi’ilmanq ajwi’ “Jesukristo: Xwanjik li Kristo rub’elaj li yu’am a’in,” sa’ li K’utul Raqal reheb’ li Loq’laj Hu.
Eb’ lix tzolom li Jesukristo neke’xch’olob’ xyaalal a’an.
Laj Jwan kimusiq’aak chixsik’b’al li Kolonel sa’ xk’ab’a’ lix ch’olob’ahom laj Jwan aj Kub’sihom Ha’, li kixch’olob’ naq a’an “taqlanb’il chaq chixyeeb’al ani ... li tz’aqal saqenk” (Jwan 1:8–9, 15–18). Jo’kan ajwi’ laj Jwan kixch’olob’ xnimal lix nawom xch’ool chirix lix yu’am ut lix k’anjel li Kolonel.
Us raj tana’ xtz’iib’ankil chi tzoltzo li yaal kixk’ut laj Jwan sa’ xtiklajik lix ch’olob’ahom chirix li Kristo (eb’ li raqal 1–18; chi’ilmanq ajwi’ li jaltesinb’il xb’aan laj Jose Smith, JJS, Jwan 1:1–19 [sa’ xraqik li roxichal chi loq’laj hu]). K’a’ut nakak’oxla naq laj Jwan kixtikib’ lix hu rik’ineb’ li yaalil na’leb’ a’in? K’oxla maare xtz’iib’ankil aach’olob’ahom chirix li Jesukristo—k’a’ raj ru taawaj laa’at xwotzb’al? K’a’ru li xak’ul laa’at li xatxtenq’a chixnawb’al ru ut chixtaaqenkil li Kolonel? Ani taaruuq chi osob’tesiik rik’in rab’inkil laa ch’olob’ahom?
K’a’ru naraj naxye “wank choq’ ralal xk’ajol li Dios”?
Us ta chiqajunilo wanko choq’ ralal ut xrab’in li Dios sa’ li musiq’ej, naq nokomaakob’ nokokana chi jachb’il qu rik’in a’an. Li Jesukristo naxyeechi’i jun b’e re toosutq’iiq rik’in. Rik’in lix mayej re xtojb’al rix li maak, wi noko’ab’in chiruheb’ li sumwank re li evangelio, a’an naxk’e qe “wank choq’ ralal xk’ajol li Dios” jun sut chik. Nokoyo’la wi’chik ut nokok’ame’ wi’chik sa’ usilal rik’in li qaYuwa’, re naq qak’ulub’aq lix junelikil ochoch ut toowanq choq’ aj eechanihom re chixjunil li k’a’ru re (chi’ilmanq Romanos 8:14–18; Jakob 4:11).
Ma wan ani x’ilok re li Dios?
Li Najter Chaq’rab’ naxye resil junjunq li winq li ke’ilok re li Dios (chi’ilmanq Genesis 32:30; Exodo 33:11; Isaias 6:5). K’a’ut b’i’ naq kixye laj Jwan aj Kub’sihom Ha’, “Li Dios maajun sut ki’ile’k ru xb’aan anihaq”? Li raqal a’in chi jaltesinb’il ru xb’aan laj Jose Smith (chi’ilmanq JJS Jwan 1:19) naxch’olob’ naq li Dios Yuwa’b’ej wan naq naxk’ut rib’ chiruheb’ li winq, ut naq naxb’aanu, naxch’olob’ xyaalal li Ralal. Jo’ jun eetalil, naq kixk’ut rib’ chiru laj Jose Smith sa’ li loq’laj k’iche’, kixye re laj Jose, “A’in li Walal, Raaro Inb’aan. Chawabʼi aʼan!” (Jose Smith—Resilal 1:17; chi’ilmanq ajwi’ Tz. ut S. 76:23). Wan chik li sut naq tz’iib’anb’il resil naq wankeb’ li ke’ilok re li Dios Yuwa’b’ej sa’ k’utb’esinb’il matk’ (chi’ilmanq Hechos 7:55–56; Apokalipsis 4:2; 1 Nefi 1:8; Tz. ut S. 137:1–3) malaj ke’rab’i lix yaab’ xkux chixch’olob’ankil xyaalal li K’ajolb’ej (chi’ilmanq Mateo 3:17; 17:5; 3 Nefi 11:6–7).
Ani laj Elias, ut ani “li profeet”?
Eb’ lix jolomileb’ laj Judio ke’raj xnawb’al ma yoo laj Jwan aj Kub’sihom Ha’ chixtz’aqob’resinkil ru li najteril profeetil aatin chirixeb’ li profeet li te’chalq sa’ junaq kutan chi wank sa’ xyanqeb’ li tenamit. Ke’xpatz’ re ma a’an laj Elias, a’an sa’ Griego li k’ab’a’ej Eliyah, sa’ Hebreo, a’an xk’ab’a’ li profeet li tixk’ojob’ wi’chik chixjunil li k’a’aq re ru (chi’ilmanq Malakias 4:5–6). Ke’xpatz’ ajwi’ ma a’an “li profeet,” ut maare yookeb’ chixk’oxlankil li “profeet” yeeb’il resil sa’ Deuteronomio 18:15. Laj Jwan kixch’olob’ naq maawa’eb’ a’in, a’an b’an li profeet li kixye laj Isaias naq tixkawresi li b’e choq’ re lix k’ulunik li Qaawa’ (chi’ilmanq Isaias 40:3).
Chi’ilmanq ajwi’ sa’ li K’utul Raqal reheb’ li Loq’laj Hu, “Elias” ut “Eliyah.”
Li na’leb’ re xtzolb’aleb’ li loq’laj hu sa’ junkab’al ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Naq naqatzoleb’ li loq’laj hu, taqak’ul li musiq’anb’il na’leb’ choq’ re li qayu’am.
Chan ru naq tatruuq chixtenq’ankileb’ li komon sa’ laa junkab’al chixtawb’al ru li k’a’ru neke’ril chirix li saqen sa’eb’ li raqal a’in? Taaruuq raj taakanab’eb’ li komon sa’ laa junkab’al chixk’utb’al chixjunjunqaleb’ jun saqen naq q’ojyin sa’ kab’l, ut taawotz chan ru naq li Kolonel wan choq’ saqen sa’ xyu’ameb’. Chirix a’an, naq teeyaab’asi Jwan 1:4–10, eb’ li komon sa’ li junkab’al maare te’wanq chik xna’leb’ chirix li raatin laj Jwan chirix li Jesukristo, lix Saqenkil li ruchich’och’.
K’e reetal lix ch’olob’ahom laj Jwan aj Kub’sihom Ha’ sa’ raqal 36. K’a’ru ki’ux xb’aan lix ch’olob’ahom? (chi’ilmanq eb’ li raqal 35–46). K’a’ru neke’xtzol li komon sa’ laa junkab’al rik’ineb’ li ani yeeb’ileb’ resil sa’eb’ li raqal a’in, chirix xwotzb’al li evangelio?
K’a’ru kixb’aanu laj Natanael li kitenq’ank re chixk’ulb’al xnawom xch’ool chirix li Kolonel? Chan ru naq xqak’ul laa’o lix nawom qach’ool
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Xk’utb’al li k’anjeleb’aal. K’e xb’oqb’aleb’ li komon sa’ li junkab’al naq te’xtaw li k’a’aq re ru taatenq’anq reheb’ chixtawb’al ru li na’leb’ li natawman sa’eb’ li loq’laj hu li yookex chirilb’al jo’ junkab’al. Qayehaq, maare te’roksi jun li kandeel choq’ reetalil lix Saqenkil li Kristo (chi’ilmanq Jwan 1:4).
Li Jehovah kixyo’ob’tesi li ruchich’och’, xb’aan laj Walter Rane