“14–20 enero. Lukas 2; Mateo 2: Xoochalk chixloq’oninkil,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“14–20 enero. Lukas 2; Mateo 2,” Kim, Taaqehin—Choq’ reheb’ li komon ut li junkab’al: 2019
Chalqex chixnimankil, xb’aan laj Dana Mario Wood
14–20 enero
Lukas 2; Mateo 2
Xoochalk chixloq’oninkil
Re xtikib’ankil, chawil sa’ Lukas 2 ut Mateo 2, ut k’e reetal li musiq’anb’il na’leb’ nakak’ul. Li na’leb’ taawil sa’ li hu a’in naru nakatxtenq’a chixk’eeb’al reetal junjunq li na’leb’ aajel ru ut xnimal ru sa’eb’ li ch’ol a’in.
Xtz’iib’ankil li nakak’oxla
Chalen chaq xkutankil lix yo’lajik, kik’eeman reetal naq li Jesus maawa’ jo’eb’ li xkomon li kok’al. Moko ka’aj ta wi’ xb’aan li ak’ chahim sa’ choxa malaj lix sahil ch’oolejil yehomeb’ li anjel naq jalan wi’ lix ka’ch’inal li Jesus. Wan ajwi’ li na’leb’ naq naab’al paay chi aj paab’anel, eb’ aj jalan jalanq tenamit—jalan jalanqeb’ xk’anjel, ut jalan jalanq li ke’chal wi’ chaq—sa’ junpaat ke’reek’a naq te’raj jilok rik’in. Chi maji’aq naxye li raatin, “kim, taaqehin,” ak yookeb’ chi chalk (Lukas 18:22). Yaal ajwi’ naq moko chixjunileb’ ta ke’chal rik’in—wankeb’ li ink’a’ ke’xk’e reetal, ut jun li rey sa’ xsowenil kixyal xq’e chirisinkil lix yu’am. A’b’anan eb’ li neke’sik’ok re li tiikilal chi tuulaneb’ ut saqeb’ ru xch’ool ke’xtaw rik’in a’an li k’a’ru yookeb’ chixsik’b’al. Lix anchalileb’ xch’ool naxk’e x’anchalil li qach’ool laa’o, xb’aan naq li “chaab’il esilal,” ut “xnimal sahil ch’oolej” li ke’xk’am chaq kiwan choq’ reheb’ “chixjunil li tenamit,” ut li “Kolonel, a’an li Kristo, li Qaawa’ ” kiyo’la sa’ li kutan a’an choq’ qe chiqajunil (chi’ilmanq Lukas 2:10–11).
Li na’leb re xtzolb’aleb’ li loq’laj hu aajunes
Li Jesukristo kiyo’la sa’ tuulanil.
Us ta li Jesukristo kiwan rik’in xloq’al li Dios Yuwa’b’ej “naq toj maji’ kiwank li ruchich’och’ ” (Jwan 17:5), a’an kiwan xch’ool chi yo’laak sa’ tuulanil ut chi wank sa’ qayanq laa’o arin sa’ li ruchich’och’. Naq nakawil Lukas 2:1–7, k’a’ru nakak’e reetal chirix chan ru naq kiyo’la? K’e aach’ool chirilb’al junaq na’leb’ sa’ li esilal a’in li maji’ nakak’e reetal. K’a’ru nakatzol chirix li Kolonel rik’in li na’leb’ chirix lix yo’lajik? Chan ru najale’ li nakaweek’a chirix a’an rik’in xk’oxlankil li na’leb’ a’in.
Chi’ilmanq ajwi’ li video “El nacimiento” (LDS.org).
Wankeb’ naab’al li ke’xch’olob’ xyaalal lix yo’lajik li Kristo.
Wankeb’ naab’al li ke’xch’olob’ xyaalal lix yo’lajik ut lix ka’ch’inal li Kristo ut ke’xloq’oni, ut jalan jalanq li ke’chal wi’—wankeb’ li tuulanil aj ilol xul li ke’wulak sa’ xna’ajeb’ li xul, eb’ li b’ihomal aj q’e li ke’xk’am li maatan sa’ rochoch, jun li xmalka’an li kik’anjelak sa’ li santil ochoch, ut jun li tzolom tiik xpaab’aal li yoo chaq chiroyb’eninkil li Mesias chi anchal xch’ool. Naq nakawil li resilaleb’, k’a’ru nakatzol chirix chan ru xloq’oninkil ut xch’olob’ankil xyaalal li Kristo?
|
Xch’olob’ankil xyaalal li Kristo |
K’a’ru nintzol chirix li loq’onink ut li ch’olob’ank xyaalal? |
|---|---|
Xch’olob’ankil xyaalal li Kristo Eb’ laj ilol xul (Lukas 2:8–20) | K’a’ru nintzol chirix li loq’onink ut li ch’olob’ank xyaalal? |
Xch’olob’ankil xyaalal li Kristo Laj Simeon (Lukas 2:25–35) | K’a’ru nintzol chirix li loq’onink ut li ch’olob’ank xyaalal? |
Xch’olob’ankil xyaalal li Kristo Li xAna (Lukas 2:36–38) | K’a’ru nintzol chirix li loq’onink ut li ch’olob’ank xyaalal? |
Xch’olob’ankil xyaalal li Kristo Eb’ laj q’e (Mateo 2:1–12) | K’a’ru nintzol chirix li loq’onink ut li ch’olob’ank xyaalal? |
Chi’ilmanq ajwi’ 1 Nefi 11:13–23; 3 Nefi 1:5–21; “Se anuncia a los pastores el nacimiento de Cristo” ut “El niño Jesús es presentado en el templo” (eb’ li video, LDS.org).
Eb’ li na’b’ej yuwa’b’ej naru neke’xk’ul li na’leb’ chi k’utb’esinb’il re xkolb’al rix lix junkab’aleb’.
Laj Jose maajun wa raj kiru chixb’aanunkil li patz’b’il chiru—a’an xkolb’al rix li Jesus sa’ xka’ch’inal—chi ink’a’ tenq’anb’il chaq sa’ choxa. Jo’eb’ laj q’e, kixk’ul jun na’leb’ chi k’utb’esinb’il, naq chalk re jun li rahilal. Naq nakawil resil li kixk’ul laj Jose, k’oxlaheb’ li rahilal re tz’ejwalej ut re musiq’ej li neke’wan sa’ xb’eeneb’ li junkab’al sa’ li kutan a’in. K’oxla li xak’ul naq xaweek’a naq li Dios yoo chixk’amb’al aab’e re xkolb’al aawix ut re xkolb’al rix laa junkab’al malaj eb’ laa komon. K’oxla maare xwotzb’al li k’a’ru xak’ul rik’in xkomoneb’ chik li kristiaan. K’a’ru naru taab’aanu re toj taak’ul xk’amb’al aab’e?
Jo’kan ajwi’, naru taak’oxla rilb’al li video “El espíritu de la primera Navidad” (LDS.org) re rilb’al k’a’ru tana’ kireek’a laj Jose naq kikana sa’ xb’een a’an li k’anjel re rilb’al li Ralal li Dios.
Jo’ ch’ajom, li Jesus k’eek’o xch’ool chixb’aanunkil li rajom lix Yuwa’.
Jo’ saaj winq, li Kolonel kixk’ut li evangelio rik’in nimla wankilal, toj reetal eb’ laj tzolonel sa’ li santil ochoch ke’sach xch’ool “xb’aan lix seeb’al xk’a’uxl ut lix sumehom” (Lukas 2:47). K’a’ru nakatzol sa’eb’ li raqal a’in chirix li Kolonel jo’ saaj winq? Chan ru naq eb’ li saaj komon li nawb’ileb’ ru aab’an yookeb’ chixk’eeb’aleb’ xch’ool chixb’aanunkil lix k’anjel lix Yuwa’? (Lukas 2:49). Chan ru naq eb’ li ch’ajom ut eb’ li kok’al xate’xtenq’a chixtawb’al ru li evangelio? K’a’ chik ru nakatzol rik’in li kixb’aanu li Jesus sa’ xka’ch’inal, sa’ Lukas 2:52 ut sa’ Mateo 3:24–25 jo’ jaltesinb’il ru xb’aan laj Jose Smith?
“Ma inkʼaʼ nekenaw naq tento tinwanq saʼ rochoch lin Yuwaʼ?” (Lukas 2:49).
K’a’ru li Santil Hu jaltesinb’il ru xb’aan laj Jose Smith?
Rik’in naq ke’isiman chaq sa’ li Santil Hu “k’iila na’leb’ saqen ru ut loq’eb’ ” chiru xnumik li chihab’ (1 Nefi 13:28; chi’ilmanq ajwi’ Moises 1:41), li Qaawa’ kixtaqla laj Jose Smith chixjaltesinkil ru li Santil Hu rik’in li Musiq’ej, ut a’an li Santil Hu chi jaltesinb’il ru xb’aan laj Jose Smith (JJS) nayeeman re. Wankeb’ naab’al li aatin jaltesinb’il xb’aan li profeet li wankeb’ sa’ xraqik li loq’laj hu reheb’ laj Santil Paab’anel sa’ Roso’jikeb’ li Kutan. Sa’ li Santil Hu re li Iglees sa’ Ingles wankeb’ ajwi’ li aatin sa’ roq li hu li wan wi’ li aatin jalb’il xb’aan li profeet. Li hu re Mateo 24, chi jaltesinb’il xb’aan laj Jose Smith, a’an ajwi’ Jose Smith—Mateo, naru natawman sa’ li Q’ol Nim Xtz’aq. Re rilb’al chik li na’leb’, chi’ilmanq sa’ li Tusleb’aal Na’leb’, “Jaltesinb’il xb’aan laj Jose Smith.”
Li na’leb’ re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
B’oqeb’ li komon sa’ li junkab’al re te’xsik’ ru jun kristiaan yeeb’il resil sa’ Lukas 2, re te’ril junjunq raqal chirix li xb’aanu li kristiaan a’an rik’in li Kolonel, ut re te’xwotz jun na’leb’ xe’xtzol li naxnimob’resi lix paab’aal chirix li Jesukristo. B’chanqex sa’ komonil “Lix b’ich li xMaria” malaj “B’ich re Ralankil,” B’ichleb’aal choq’ reheb’ li Kok’al, 28–29, 32–33. K’a’ru naqatzol rik’ineb’ li b’ich a’in chirix lix yo’lajik li Kolonel?
K’a’ru lix “k’anjel li Yuwa’b’ej”? (chi’ilmanq Moises 1:39). K’a’ru naqatzol chirix lix k’anjel sa’ li esilal a’in, ut rik’in li k’a’aq chik re ru kixb’aanu ut kixk’ut li Jesus chiru lix yu’am? Naru taatz’iib’a junjunq li na’leb’ chan ru naq eb’ li komon sa’ laa junkab’al te’ruuq chi tz’aqonk sa’ lix k’anjel li Yuwa’b’ej, ut taak’eheb’ sa’ jun sek’. Chiru li xamaan jun chik, naq eb’ li komon sa’ laa junkab’al yookeb’ chixsik’b’al chan ru xb’aanunkil lix k’anjel lix Choxahil Yuwa’, naru te’risi jun li na’leb’ sa’ li sek’. K’uub’ jo’q’e teewotz li k’a’ru xek’ul.
K’a’ru naru naqatzol sa’ Lukas 2:52 chirix chan ru naq li Jesus kiniman sa’ lix yu’am? Chan ru naq eb’ li komon sa’ li qajunkab’al neke’ru chi “k’iik rik’in xna’leb’ ut rik’in xteram, sa’ chaab’ilal chiru li Dios ut chiruheb’ li winq”?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Roksinkil li k’anjeleb’aal sa’eb’ li loq’laj hu. Re xtawb’al chik aana’leb’ naq yookat chixtzolb’aleb’ li loq’laj hu, naru taawoksiheb’ li k’anjeleb’aal jo’eb’ li aatin sa’ roq li perel, jo’ ajwi’ li K’utul Raqal reheb’ li Loq’laj Hu, ut xkomoneb’ chik li k’anjeleb’aal, jo’ LDS.org.
Laj Kolol re li ruchich’och’ kiyo’la sa’ tuulanil.