Chalqex chixnimankil, xb’aan laj Dana Mario Wood

14–20 enero

Lukas 2; Mateo 2

Xoochalk chixloq’oninkil

Re xtikib’ankil, chawil sa’ Mateo 2 ut Lukas 2. Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru chatenq’ankil chixtawb’aleb’ ru li ch’ol a’an, ut li tusleb’ aatin a’in naru naxk’e aana’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Patz’ reheb’ li kok’al naq te’xye li k’a’ru najultiko’ reheb’ chirix lix yo’lajik li Kristo. B’ar wan reheb’ li raqal li mas nawulak chiruheb’?

Xk’utb’al li tzol’leb’

Kok’al toj ka’ch’ineb’ xyu’am

Lukas 2:1–14

Li Jesus kiyo’la

Li Jesus kixkanab’ chaq li rochoch rik’in li qaChoxahil Yuwa’ re naq taayo’laaq sa’ li ruchich’och’ ut re naq a’anaq laj Kolol qe. Chan ru naru taatenq’aheb’ li kok’al chixjultikankil li seraq’ chirix lix yo’lajik li Kristo?

Kok’ k’anjel naru chi b’aanumank

• Naq yookat chirilb’al ru li seraq’ chirix lix yo’lajik li Kristo, kanab’eb’ li kok’al chixk’utb’esinkil li seraq’ malaj chiroksinkil li hu re li kok’ k’anjel re li xamaan a’in. Chi’ilmanq ajwi’ “Ch’ol 5: Nayo’la li Jesukristo,” Eb’ li Esilal sa’ li Ak’ Chaq’rab’, 13–15, malaj li video (LDS.org).

• Wi wan junaq reetalil lix yo’lajik li Jesus, k’am chaq ut kanab’eb’ li kok’al chixk’eeb’aleb’ lix cha’alil sa’ lix na’aj naq yookat chixseraq’inkil li resilal lix yo’lajik li Jesukristo. Naru ajwi’ taak’ut chiruheb’ junaq li jalam-uuch re lix yo’lajik li Jesus (chi’ilmanq, jo’ jun eetalil li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Ye xk’ab’a’eb’ li jalan jalanq chi kristiaan re lix yo’lajik li Jesus ut kanab’eb’ li kok’al chixwotzb’al li neke’xnaw chirix li junjunq chi kristiaan.

• B’ichahomaqeb’ sa’ komonil li b’ich li mas nawulak chiruheb’ li kok’al chirix lix yo’lajik li Jesus. Naq yookex chi b’ichank, sik’ li hoonal re xyeeb’al lix nawom aach’ool chirix li Kolonel ut kanab’eb’ li kok’al chixwotzb’al k’a’ut naq neke’xra li Jesus.

Mateo 2:1–12

Naru tink’eheb’ li chaab’il maatan re li Jesus.

Eb’ laj q’e ke’xk’e re li Jesus li maatan re li oor, li pom, ut li miir. Chan ru naru nakawoksi li seraq’ a’in re xk’utb’al chirueb’ li kok’al naq a’aneb’ naru ajwi’ neke’xk’e li maatan re li Jesus, jo’ li rahok, li k’anjelak chiru ras riitz’ineb’, ut li ab’ink chiru?

Kok’ k’anjel naru chi b’aanumank

• K’ut jun lix jalam-uucheb’ laj q’e chiruheb’ li kok’al naq yookat chirilb’al li seraq’ li natawman sa’ Mateo 2:1–12. Naru nakak’ut li jalam-uuch Los magos ofrendan presentes (LDS.org).

• Lan rix jo’ jun maatan li jalam-uuch malaj k’a’ruhaq nareetaliheb’ li maatan li naru naqak’e re li Jesus. Kanab’eb’ li kok’al chatenq’ankil chixteeb’aleb’ li maatan ut chixtz’ilb’al rix chan ru naq naqak’eheb’ li maatan a’an re li Kolonel.

• Tenq’aheb’ li junjunq chi kok’al chixyiib’ankil jun li jalam-uuch malaj chixtz’iib’ankil resilaleb’ li maatan li naru neke’xk’e re li Jesus, jo’ “li wank jo’ jun chaab’il aamiiw” malaj “li tijok.” Kanab’eb’ li kok’al chixwotzb’al li xe’xtz’iib’a sa’ li tzoleb’aal ut chixsik’b’al ru jun reheb’ li maatan li te’xyal wi’ xq’e chixk’eeb’al chiru li xamaan a’in.

Lukas 2:40–52

Li Jesus kiwan chaq ajwi’ jo jun ch’ina al, jo’ laa’in.

Li tzolok chirix lix ka’ch’inal li Kolonel naru naxtenq’aheb’ li kok’al li nakatzoleb’ chixtawb’aleb’ rib’ rik’in a’an. Patz’ reheb’ li kok’al k’a’ru neke’ru chixtzolb’al sa’eb’ li raqal a’an chirix chan ru naru neke’wan jo’ li Jesus anajwan.

Kok’ k’anjel naru chi b’aanumank

• B’oq jun li saaj re li teep chirula’aninkil li tzoleb’aal ut chixwotzb’al li seraq’ naq li Jesus kik’utuk sa’ li santil ochoch naq toj mas saaj chaq.

• Chi rub’elaj, patz’ re jun li ch’ina al naq tixk’am lix jalam-uuch naq toj k’uula’al chaq re xk’utb’al chiruheb’ lix komon. Patz’ reheb’ chan ru lix k’iijikeb’. Aatinan chirix junjunq li na’leb’ chirix chan ru naq li Jesus kik’i (chi’ilmanq Lukas 2:40, 52). B’icha rik’ineb’ li kok’al “Joʼ chʼina al li Jesus kiwan,” B’ichleb’aal choq’ reheb’ li Kok’al, 34, malaj junaq chik li b’ich chirix li Kolonel.

• Il sa’ Lukas 2:52 ut ch’olob’ k’a’ru naraj naxye “rik’in xna’leb’ ” ut “rik’in xteram.” Naru nakapatz’ reheb’ li kok’al naq te’reek’asi rib’ re xk’utb’al li naraj naxye li k’iik rik’in na’leb’ ut sa’ chaab’ilal chiru li Dios ut chiruheb’ li winq. Qayehaq, naru neke’xk’utb’esi rilb’al ru junaq li hu malaj xtenq’ankil anihaq li wan xmajelal.

Xk’utb’al li tzol’leb’

Kok’al ak ninqeb’

Lukas 2:1–21; Mateo 2:1–2

Eb’ li profeet sa’ najter kutan ke’xye resil lix yo’lajik li Kolonel.

Eb’ li profeet ut laj paab’aanel ke’royb’eni chaq lix yo’lajik li Kolonel chiru k’iila cient chihab’ chi rub’elaj. Li xtawb’al ru li yaal a’an naru naxtenq’aheb’ li kok’al chixk’ulb’al jun xrahomeb’ jwal cham wi’chik chirix lix yu’am ut lix k’anjel li Kolonel.

Kok’ k’anjel naru chi b’aanumank

• Patz’ reheb’ li kok’al naq te’aatinaq chirix k’a’ruhaq li neke’royb’eni chi rub’elaj, jo’ lix kutankil xyo’lajikeb’ malaj jun ninq’e. Patz’ reheb’ li kok’al naq te’ril ru Helaman 14:2–5 re xtawb’al k’a’ruhaq ke’royb’eni chaq li profeet.

• Ilomaq ru sa’ komonil junjunq reheb’ li profeetil aatin chirix lix yo’lajik li Kolonel (chi’ilmanq Isaias 7:14; 9:6; 1 Nefi 11:18; Helaman 14:5). Tenq’aheb’ li kok’al chixk’eeb’al rajlil li k’a’ru ch’olob’anb’il sa’eb’ li profeetil aatin a’an ut chixtawb’al lix tz’aqob’resinkileb’ ru sa’ Lukas 2:1–21 ut sa’ Mateo 2:1–2.

• Kanab’eb’ li kok’al chixb’aanunkil jun li jalam-uuch re lix yo’lajik li Jesus ut chixwotzb’al k’a’ut naq neke’xb’antioxi naq kiyo’la li Jesus.

Laj Simeon naxloq’oni li ch’ina al Jesus, xb’aan laj Greg K. Olsen.

Lukas 2:40, 52

Li Jesus kiwan chaq ajwi’ jo jun ch’ina al, jo’ laa’in.

Jo’ li Jesus, eb’ li kok’al li nakatzoleb’ wan jun lix k’anjeleb’ aajel ru li tento te’xkawresi wi’ rib’. K’a’ru naru neke’xtzol rik’ineb’ lix b’aanuhom li Jesus?

Kok’ k’anjel naru chi b’aanumank

• Naq yookat chirilb’al ru Lukas 2:40, 52, ye reheb’ li kok’al naq te’ab’inq chi us re naq te’xtaw li k’a’aq re ru kixb’aanu li Jesus. Kanab’eb’ li kok’al chixwotzb’al chan ru lix k’iijikeb’ chalen naq toj kok’eb’ chaq. Wotz li xak’ul laa’at rik’in xtzolb’al li evangelio chi b’ayatq; chirix a’an, wotz lix nawom aach’ool.

• B’aanuheb’ kok’ k’anjel li neke’xk’utb’esi li ch’ol aatin sa’ Lukas 2:40, 52. Qayehaq, naru raj taab’is xterameb’ li junjunq chi kok’al (“li Jesus yoo chi k’iik … rik’in xteram”) malaj xpatz’b’al reheb’ naq te’xwotz li raqal mas nawulak chiruheb’ sa’eb’ li loq’laj hu (“yoo … chi kawuuk, nujenaq chi chaab’il na’leb’ ”). Tenq’aheb’ li kok’al chixyiib’ankil jun resil chan ru naq yookeb’ chi k’iik ut chixwotzb’al a’an rik’ineb’ lix junkab’al.

• Chirix naq ak xeril ru Lukas 2:40, 52, kanab’eb’ li kok’al chixwotzb’al li neke’xk’oxla chirix chan chaq ru li Jesus naq wan chaq re lix chihab’eb’ a’an. Chan ta wi’ ru naq kiwan chiru lix na’? Ut chiruheb’ li ras ut eb’ li riitz’in?

Lukas 2:41–52

Naru tintaaqe lix b’aanuhom li Jesukristo.

Us ta toj saaj chaq, li Jesus kixtzoleb’ li cheek sa’ li santil ochoch. Jo’ ajwi’ a’an, wan naab’al li k’a’ru naru te’xk’ut li kok’al sa’ laa tzoleb’aal chiruheb’ li wankeb’ sa’ xsutameb’.

Kok’ k’anjel naru chi b’aanumank

• Kanab’ junaq li ch’ina al chi wulak chi kawresinb’il re xwotzb’al chi k’osb’il ru li seraq’ natawman sa’ Lukas 2:41–52. Re xtenq’ankileb’ li kok’al chixtawb’al ru li seraq’, k’ut li k’a’ru naraj naxye li “wank sa’ xk’anjel lin yuwa’.” Qayehaq, naru nakat-aatinak rik’ineb’ li kok’al chirix li k’a’ru nakab’aanu malaj li neke’xb’aanu laa na’ aayuwa’ sa’ lix trab’aajeb’. K’a’ru lix trab’aaj malaj lix k’anjel laj Jose, lix yuwa’ li Jesus sa’ ruchich’och’? (chi’ilmanq Mateo 13:55). K’a’ruheb’ lix k’anjel lix Choxahil Yuwa’? (chi’ilmanq Lukas 2:46–49; chi’ilmanq ajwi’ Moises 1:39).

• Sa’ komonil rik’ineb’ li kok’al, il ru Lukas 2:46–49 ut patz’, “Chan ru kixb’aanu chaq li Jesus lix k’anjel lix yuwa’?” Tenq’aheb’ li kok’al chixk’eeb’al rajlil malaj chixyiib’ankil jun jalam-uuch sa’ li pizarron chan ru naq a’aneb’ ajwi’ naru neke’xb’aanu lix k’anjel li qaChoxahil Yuwa’.

• Re xtenq’ankileb’ li kok’al re naq te’xnaw chi tz’aqal, naq jo’ li ch’ina saaj Jesus, naru neke’xk’ut li evangelio, tenq’aheb’ chixyalb’al xk’utb’al jun li na’leb’ chirib’ileb’ rib’ re Para la Fortaleza de la Juventud.

Xb’oqb’aleb’ chi tzolok sa’ kab’l

Kanab’eb’ li kok’al chixk’utb’al chiruheb’ lix junkab’al k’a’ruhaq xe’xtzol chirix lix yo’lajik li Kristo.

Xchaab’ilob’resinkil li qak’utum

Eb’ li kok’al chixjunil neke’xk’e reetal ut neke’tzolok chi k’iila paay ru. Eb’ li kok’al neke’xyal xsahil li tzolok rik’in li jar paay chi ak’il xnumsihomeb’. Oksiheb’ kok’ k’anjel li neke’tenq’ank reheb’ chi eek’ank, chiroksinkil chixjunil lix junxaqalileb’, chi sik’ok, ut chixyalb’al li ak’ k’a’aq re ru. (Chi’ilmanq Li k’utuk jo’ li Kolonel, 25–26).