xMaria ut xElisabet

7–13 enero

Mateo 1; Lukas 1

”Chi’uxq we jo’ laa waatin”

Re xtikib’ankil, il sa’ Mateo  1 ut Lukas 1. Kim, Taaqehin—Choq’ reheb’ li komon ut li junkab’al naru tatxtenq’a chixtawb’aleb’ ru li ch’ol a’an, ut li tusleb’ aatin a’in naru tixk’e aana’leb’ re li k’utuk. Wi nakawaj xkomon aatenq’ankil re xtzolb’aleb’ li kok’al toj ka’ch’ineb’ xyu’am, sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ xtiklajik li k’anjeleb’aal a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chi chunlaak sa’ jun sirso ut chirix a’an patz’ re jun reheb’ naq tixwotz k’a’ruhaq kixtzol sa’eb’ li loq’laj hu sa’ li xamaan a’in malaj sa’ junaq chik hoonal. Li ch’ina al a’an naru naxrum jun li b’olotz’ chiru junaq chik ch’ina al sa’ li sirso malaj yal tixk’ut chi ru’uj ruq’; li ch’ina al k’utb’il tixchap xhoonal re wotzok ajwi’.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 1:18–25; Lukas 1:26–38

Eb’ li anjel ke’xye resil lix yo’lajik li Jesus.

Li xMaria ut laj Jose ke’ula’aniik xb’aan jun li anjel chi junjunqal, ut kixye resil xyo’lajik li Jesukristo reheb’. Eb’ li numsihom a’an naru naxtenq’aheb’ li kok’al chirilb’al x’aajelil ru lix yo’lajik li Kristo.

Kok’ k’anjel naru chi b’aanumank

• B’oqeb’ lix na’ xyuwa’ junaq li ch’ina al chi wulak sa’ li tzoleb’aal rik’ineb’ li raq’ jo’ li xMaria ut laj Jose. Patz’ reheb’ naq te’xwotz lix numsihomeb’ jo’ yeeb’il resil sa’ Mateo 1:18–25 ut sa’ Lukas 1:26–38.

• Seraq’i li resilal lix k’utb’aleb’ rib’ li anjel chiru li xMaria ut laj Jose, jo’ yeeb’il resil sa’eb’ li raqal a’an. (Chi’ilmanq ajwi’ “Ch’ol 2: Li xMaria ut li anjel” ut “Ch’ol 4: Laj Jose ut li anjel”, Eb’ li Esilal sa’ li Ak’ Chaq’rab’, 8–9, 12, malaj eb’ li video sa’ LDS.org). Naru nakak’uteb’ li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al . Kanab’eb’ li kok’al chixka’sutinkil li seraq’.

• Kanab’eb’ li kok’al chixyiib’ankileb’ li jalam-uuch chirixeb’ li seraq’ li neke’tawman sa’ Mateo 1:18–25 ut Lukas 1:26–38.

Lukas 1:5–20, 57–63

Li qaChoxahil Yuwa’ naxsumeheb’ lin tij.

Maare chan naq laj Zakarias ut li xElisabet ke’xpatz’ jun li ralal sa’ tij chiru naab’al chihab’. Rik’in xnumik li hoonal li qaChoxahil Yuwa’ kixsume lix tijeb’ ut kixtaqla chaq jun xyumeb’, laj Jwan aj Kub’sihom Ha’. Chan ru naru nakawoksi li seraq’ a’in re xk’utb’al chiruheb’ li kok’al naq li qaChoxahil Yuwa’ naxsumeheb’ li tij?

Kok’ k’anjel naru chi b’aanumank

• Wotz li seraq’ re Lukas 1:5–20, 57–63 rik’in tz’aqal laa waatin. Maare us naq taaka’suti li seraq’ naab’al sut. K’eheb’ junjunqaq li kok’al chi elk jo’ li anjel, laj Zakarias, ut li xElisabet, ut che’xk’utb’esi li seraq’. Aatinan chirix naq li qaChoxahil Yuwa’ kixsumeheb’ lix tij li xElisabet ut laj Zakarias, ut wotz junaq aanumsihom naq li qaChoxahil Yuwa’ kixsume junaq aatij.

• Oksi “At inYuwa’, tuqtuuqin,” B’ichleb’aal choq’ reheb’ li Kok’al, 10, malaj jalan chik li b’ich li tixk’ut chiruheb’ li kok’al chanru li tijok. Naru ajwi’ nekeb’icha sa’ komonil “Natijok jun ch’ina al,” B’ichleb’aal choq’ reheb’ li Kok’al, 6–7. Naq eb’ li kok’al neke’xb’ichaheb’ li aatin “tijok”malaj “tijon” malaj “tij,” kanab’eb’ chixxulub’ankil lix jolomeb’ ut chixq’alunkileb’ lix tel.

• Patz’ reheb’ li junjunq chi kok’al naq te’xb’aanu li eek’asink-ib’ li tixk’utb’esi k’a’ruhaq li naru te’xpatz’ sa’ li tij. Kanab’eb’ li jun siir chik chi kok’al naq te’xq’ehi k’a’ru neke’xk’utb’esi li eek’asink-ib’ a’an. Naru te’xtaweb’ li na’leb’ sa’ li hu re li kok’ k’anjel re li xamaan a’in.

Lukas 1:31–35

Li Jesukristo a’an li Ralal li Dios.

Li Jesukristo a’an li Ralal li qaChoxahil Yuwa’ ut li xMaria. K’a’ru naru nakab’aanu re xtenq’ankileb’ li kok’al chixtzolb’al mas wi’chik chirix li Jesus?

Kok’ k’anjel naru chi b’aanumank

• Ye reheb’ li kok’al naq li anjel kixye re li xMaria naq lix k’uula’al tixk’ab’a’in li Ralal li Dios (chi’ilmanq Lukas 1:35). Tenq’aheb’ li kok’al chixka’sutinkil li ch’ol aatin “Li Jesukristo a’an li Ralal li Dios.” Tenq’aheb’ li kok’al chixtawb’al ru aniheb’ lix na’ xyuwa’ li Jesus rik’in xkanab’ankileb’ chixyiib’ankileb’ lix na’ xyuwa’eb’ a’an sa’ junaq jalam-uuch. Naq yooqeb’ chixb’aanunkil, ye reheb’ naq kiwan ajwi’ xna’ xyuwa’ li Jesus—xMaria ut li qaChoxahil Yuwa’. Jo’kan ajwi’, kipatz’e’ re laj Jose naq tixkol rix ut tixk’aak’ale li Jesus naq wanq sa’ xb’een li ruchich’och’.

• K’e lix nawom aach’ool naq b’antiox re naq li Jesus a’an li Ralal li Dios, kiru chi kamk sa’ xk’ab’a’eb’ li qamaak ut chi q’ajk sa’ li yu’am. K’uteb’ li jalam-uuch re lix kamik li Jesus chiru li krus ut lix waklijik chi yo’yo(chi’ilmanq Libro de obras de arte del Evangelio, ajl 57, 59).

reetalil li k’utuk

Xk’utb’al li tzol’leb’

Kok’al ak ninqeb’

Mateo 1:18–25; Lukas 1:5–37

Rik’in li Dios, maak’a’ ch’a’aj.

Lix yo’lajikeb’ li Jesus ut laj Jwan aj Kub’sihom Ha’ ke’uxman ka’ajwi’ rik’in lix wankilal li Dios. Li tzolok chirixeb’ li sachb’a-ch’oolej a’an naru chixkawob’resinkil lix paab’aaleb’ li kok’al naq li Dios wan lix wankilal re xb’aanunkil li sachb’a-ch’oolej sa’eb’ lix yu’am.

Kok’ k’anjel naru chi b’aanumank

• Naq laa’at ut eb’ li kok’al yookex chirilb’al ru Mateo 1:18–25 ut Lukas 1:5–37, patz’ reheb’ li kok’al li patz’om jo’ “K’a’ raj ru teeye laa’ex wi ta laa’ex li xMaria?” malaj “Chan raj ru teereek’a wi ta laa’ex laj Zakarias?”

• Rik’in aatin li moko ch’a’aj ta xtawb’al ru, seraq’i li resilal lix yo’lajikeb’ laj Jwan aj Kub’sihom Ha’ ut li Jesukristo. Patz’ reheb’ li kok’al naq te’xtaqsi li ruq’eb’ naq neke’rab’i k’a’ruhaq li ink’a’ raj taaruuq chi uxmank chi maak’a’ lix wankilal li Dios. K’a’ru chik xkomon li seraq’ naru neke’xwotz li kok’al b’ar wi’ li Dios kixb’aanu li chanchan raj naq ink’a’ naru chi uxmank?

• Tenq’aheb’ li kok’al chixkanab’ankil sa’ xk’a’uxleb’ Lukas 1:37. Re xb’aanunkil a’in, naru taatz’iib’a li raqal sa’ li pizarron ut taakanab’eb’ li kok’al chixyaab’asinkil k’iila sut. Rajlal sut naq neke’xyaab’asi, taasach jun reheb’ li aatin.

Mateo 1:21–25; Lukas 1:30–35, 46–47

Li Jesukristo a’an li Ralal li Dios.

Li Jesukristo a’an li Ralal li qaChoxahil Yuwa’ ut li xMaria. Chan ru naru taatenq’aheb’ li kok’al chixtzolb’al li yaal a’an?

Kok’ k’anjel naru chi b’aanumank

• Kanab’eb’ li kok’al chirilb’al ru Lukas 1:30–35 ut chixsik’b’al xsumenkileb’ li patz’om a’in: “Ani lix na’ li Jesus?” ut “Ani lix yuwa’ li Jesus?” Tenq’aheb’ chixtawb’al ru naq ka’ajwi’ li Jesukristo kiwan jo’ ralal li qaChoxahil Yuwa’ sa’ tib’elej (chi’ilmanq ajwi’ 1 Nefi 11:18–21).

• Naq yooqat chirilb’aleb’ ru li raqal a’in, kanab’eb’ li kok’al chixsik’b’al k’ab’a’ej malaj xjolomil k’ab’a’ej re li Jesukristo. K’a’ru naraj neke’xye li k’ab’a’ej a’an ut k’a’ru neke’xk’ut chiqu chirix li Jesus?

• Wotz lix nawom aach’ool chirix li Jesukristo ut kanab’eb’ li kok’al chixwotzb’aleb’ ajwi’ li reheb’.

Laj Gabriel naq kixk’utb’esi rib’ chiru li xMaria.

Lix k’utunik laj Gabriel, xb’aan laj John Scott.

Lukas 1:5–25, 57–80

Li qaChoxahil Yuwa’ narab’iheb’ ut naxsumeheb’ lin tij.

Li Dios junelik naxsumeheb’ li tij, us ta ink’a’ junelik jo’ chanru naqoyb’eni laa’o. Chan ru naru nakawoksi li seraq’ chirix laj Zakarias ut xElisabet re xk’utb’al chiruheb’ li kok’al li yaal a’an?

Kok’ k’anjel naru chi b’aanumank

• Patz’ reheb’ li kok’al k’a’ raj ru te’xye re anihaq li kixpatz’ junaq li rosob’tesinkil sa’ jun li tij a’b’an toj maji’ naxk’ul. Kanab’eb’ chixk’oxlankil li patz’om, naq neke’ril ru sa’ komonil Lukas 1:5–25, 57–80. (Chi’ilmanq ajwi’ “Ch’ol 1: Li xElisabet ut laj Zacarías” ut “Ch’ol 3: Nayo’la laj Jwan aj Kub’sihom Ha’,” Eb’ li Esilal sa’ li Ak’ Chaq’rab’, 6–7, 10–11, malaj eb’ li video sa’ LDS.org). K’a’ raj ru te’xye laj Zakarias ut xElisabet re anihaq nareek’a naq maji’ sumenb’il lix tij?

• Chi rub’elaj, kanab’eb’ wiib’ oxib’ li kok’al chixwotzb’al xnumsihomeb’ naq li qaChoxahil Yuwa’ kixsumeheb’ lix tij. Wotz junaq aanumsihom naq aaweek’ahom naq eb’ laa tij xe’sumeek jo’ chanru ink’a’ aawoyb’enihom.

• Kanab’eb’ li kok’al chixyiib’ankil junaq li jalam-uuch chirix jun sut naq li qaChoxahil Yuwa’ xsume junaq li tij—li reheb’ ajwi’ a’an. Kanab’eb’ chixwotzb’aleb’ lix jalam-uuch sa’ li tzoleb’aal.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’al eb’ li jalam-uuch ke’xyiib’ ut chirix a’an chixpatz’b’al reheb’ li komon sa’ lix junkab’aleb’ naq te’xwotz junaq hoonal naq li Dios kixsumeheb’ lix tij.

Xchaab’ilob’resinkil li qak’utum

Tenq’aheb’ li kok’al toj ka’ch’ineb’ xyu’am chixtzolb’aleb’ li loq’laj hu. Re xtenq’ankileb’ li kok’al toj ka’ch’ineb’ xyu’am chixtzolb’aleb’ li loq’laj hu, aatinan chirix junaq ajwi’ li raqal reheb’ li loq’laj hu malaj junaq ajwi’ li ch’ol aatin. Naru nakakanab’eb’ li kok’al chi xaqliik malaj chixtaqsinkil li ruq’eb’ naq te’rab’i li aatin a’an malaj li ch’ol aatin. (Chi’ilmanq Li k’utuk jo’ li Kolonel, 21.)

perel re kok’ k’anjel: li qaChoxahil Yuwa’ naxsumeheb’ lin tij