Tzoleb’aal reheb’ kok’al

Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am

Eb’ li kok’al toj ka’ch’ineb’ xyu’am wankeb’ xch’ool ut ratawom chixtzolb’al li evangelio wi nak’utman chiruheb’ jo’ chanru naru te’xtaw ru. Wi nakatzoleb’ li kok’al toj ka’ch’ineb’ xyu’am, k’e reetal li kok’ k’anjel a’in li naru naxtenq’aheb’ li kok’al chi tzolok (eb’ li kok’al ak ninqeb’ maare naru neke’tz’aqon ajwi’ sa’ li kok’ k’anjel a’in):

• Rab’inkil malaj xk’utb’al jun seraq’. Eb’ li kok’al neke’wulak chiruheb’ li seraq’—chirix li k’a’ru wan sa’eb’ li loq’laj hu, chirix laa yu’am, chirix li resilal li Iglees, malaj li wan sa’eb’ lix huhil li Iglees. Sik’ chan ru te’ruuq chi tz’aqonk sa’ xk’utb’al li seraq’. Neke’ru chixchapb’al li k’anjeleb’aal malaj li jalam-uuch, naru te’xyiib’ jun li jalam-uuch chirix li yookeb’ chirab’inkil, neke’ru chixb’aanunkil li na’uxman sa’ li seraq’, ut neke’ru ajwi’ chixyeeb’al li seraq’. Tenq’aheb’ li kok’al chixtawb’al ru li yaalil na’leb’ chirix li evangelio sa’eb’ li seraq’ nakawotz rik’ineb’.

• Yaab’asi jun raqal sa’eb’ li loq’laj hu. Eb’ li kok’al maare ink’a’ neke’xnaw chi us ilok ru hu, a’ut naru taatenq’aheb’ chi tz’aqonk sa’ li tzolok rik’ineb’ li loq’laj hu. Maare taa’ajmanq ru naq teeril yal jun raqalaq, jun ch’uut chi aatin malaj yal jun aatin. Naq taayaab’asi junaq li raqal sa’ eb’ li loq’laj hu, naru taab’oqeb’ li kok’al chi xaqliik malaj chixtaqsinkil li ruq’ naq neke’rab’i junaq li aatin malaj raqal li taawaj wi’ aatinak. Te’ruuq ajwi’ chixtzolb’al sa’ xch’ooleb’ jun ch’ina jachal reheb’ li loq’laj hu wi te’xye jarub’aq sut. Naq neke’rab’i li raatin li Dios, te’reek’a li Musiq’ej.

• Wank chi aj aj-u. Xb’aan naq eb’ li kok’al toj ka’ch’ineb’ xyu’am mas aj ajeb’ ru, k’uub’ chan ru naru taakanab’eb’ chi eek’ank—b’eek, pisk’ok, wutzlaak, ut xkomon chik li eek’asink-ib’ li wan rilom rik’in lix na’leb’ malaj seraq’ yookat chixk’utb’al. Chaab’ilaq ajwi’ li eek’asink-ib’ naq yookex chi b’ichank sa’ komonil.

• Ilomaq jun jalam-uuch malaj jun video. Naq nakak’ut chiruheb’ li kok’al jun jalam-uuch malaj jun video chirix jun na’leb’ sa’ li evangelio malaj jun seraq’ sa’eb’ li loq’laj hu, patz’eb’ li patz’om li te’tenq’anq reheb’ chi tzolok rik’in li k’a’ru yookeb’ chirilb’al. Qayehaq, taaruuq raj taapatz’, “K’a’ru yoo chi k’ulmank sa’ li jalam-uuch a’in, malaj sa’ li video a’in? K’a’ru naxk’e chaweek’a?” Naru taataweb’ li video sa’, VideosdelaBiblia.lds.org, medialibrary.lds.org ,ut children.lds.org

• B’ichanqex.Li b’ichleb’aal Eb’ li b’ich jo’ ajwi’ li B’ichleb’aal choq’ reheb’ li Kok’al neke’xk’ut li tzol’leb’ rik’in wankilal. Oksi li tusleb’aal na’leb’ li natawman sa’ xraqik li B’ichleb’aal choq’ reheb’ li Kok’al re xtawb’aleb’ li b’ich li neke’aatinak chirix li na’leb’ re li evangelio li yookat chixk’utb’al. Tenq’aheb’ li kok’al chixjuntaq’eetankil li esil sa’ li b’ich rik’in lix yu’ameb’ a’an. Jo’ jun eetalil, naru taapatz’eb’ li patz’om chirix junaq li aatin re li b’ich. Rochb’een b’ichank, eb’ li kok’al neke’ru chireek’asinkil rib’ naq yookeb’ chi b’ichank, malaj naru neke’rab’i xyaab’ li b’ich naq yookeb’ chixb’aanunkil li k’a’aq chik re ru.

• Xwotzb’al li nak’ulman. Eb’ li kok’al toj ka’ch’ineb’ xyu’am maare maak’a’ xk’ihal li k’a’ru raj te’xwotz jo’ eb’ li ak ninqeb’, a’b’an wi nakak’ameb’ xb’e, naru neke’xwotz li reek’ahomeb’ ut li neke’xk’ul chirix li yookeb’ chixtzolb’al.

• Yiib’anqex. Eb’ li kok’al neke’ru chixyiib’ankil, chixtz’iib’ankil xjalam-uuch, malaj chixb’onb’al reetalil li seraq’ malaj li na’leb’ li yookeb’ chixtzolb’al. Waklesiheb’ xch’ool chixk’amb’al li k’a’ru neke’xyiib’ sa’ li rochoch ut chixwotzb’al rik’ineb’ li komon sa’ lix junkab’aleb’ re xtenq’ankileb’ li kok’al chixjultikankil li neke’xtzol.

• Roksinkil li k’anjeleb’aal. Jun ch’ina k’anjeleb’aal naru chixtenq’ankileb’ li kok’al chixtawb’al ru jun na’leb’ chirix li evangelio li ch’a’aj xtawb’al ru. Naq nakawoksiheb’ li k’anjeleb’aal, k’oxla chan ru naq te’ruuq chi tz’aqonk li kok’al. Eb’ a’an mas wi’chik naq te’tzoloq rik’in xb’aanunkil k’a’ruhaq chiru yal rilb’al.

• Xb’aanunkil li yeeb’il sa’ li seraq’. Naq eb’ li kok’al neke’xb’aanu li k’a’ru naru neke’xk’ul sa’ lix yu’ameb’, mas wi’chik naq te’ruuq chixtawb’al ru chan ru naq jun na’leb’ re li evangelio nak’anjelak sa’ xyu’ameb’.

• Xka’sutinkileb’ li kok’ k’anjel. Wan naq taa’ajmanq ru naq eb’ li kok’al te’rab’i k’iila sut jun li na’leb’ re te’ruuq chixtawb’al ru. Matk’oxlak wi yookat chiroksinkil chi kok’ aj xsa’ junaq seraq’ malaj junaq k’anjel, us ta sa’ ajwi’ li tzolok a’an. Jo’ jun eetalil, naru taawotz jun esilal sa’eb’ li loq’laj hu k’iila sut chi jalan chik chan ru, rik’in rilb’al sa’eb’ li loq’laj hu, rik’in xyeeb’aal rik’in tz’aqal aawaatin, rik’in xk’utb’al jun li video, rik’in xkanab’ankileb’ li kok’al chatenq’ankil sa’ xyeeb’al li seraq’, rik’in xb’aanunkil li k’a’ru na’uxman sa’ li seraq’, ut xkomoneb’ chik li na’leb’. Wi nab’aanuman junaq li ch’ina k’anjel sa’ li tzolok ut nab’aanuman wi’chik sa’ li kab’l, li ka’sutink a’an tixtenq’aheb’ li kok’al chi tzolok ut chi jultiko’k reheb’.

• Aatinak rik’ineb’ li kristiaan. Eb’ li kok’al yookeb’ chixk’iresinkil lix seeb’aleb’ re aatinak ut chi kok’ aj xsa’ neke’xyal xsahil li tzolok ut b’atz’unk rik’ineb’ li rochb’een. Sik’ li hoonal re naq te’ruuq chi wotzok, te’xjali rib’, ut te’xtenq’a rib’ naq yookeb’ chi tzolok.

• Tz’aqonk sa’ k’iila kok’ k’anjel. Eb’ li kok’al toj ka’ch’ineb’ xyu’am yal b’ab’ay lix seeb’aleb’ re ab’ink ut jalan jalanq naq neke’tzolok. Oksi k’iila paay chi kok’ k’anjel ut k’eheb’ reetal li eetalil naq eb’ li kok’al neke’raj ru jun lix jalb’al li tzolok. Qayehaq, maare aajelaq ru xjalinkil chi k’ok’ aj xsa’ li kok’ k’anjel re li wank chi ch’anch’o ut li re eek’asink-ib’.

Xkomon laa k’anjel jo’ aj k’utunel reheb’ li kok’al toj ka’ch’ineb’ xyu’am—moko ka’ajwi’ ta xk’utb’aleb’ li xb’eenil na’leb’ re li evangelio —a’an aj b’an wi’ xtenq’ankileb’ li kok’al chixtzolb’al chan ru li tz’aqonk chi ch’olch’o ru sa’ jun li tzolok sa’ li Iglees. Jo’ jun eetalil, maare aajelaq ru naq te’xtzol chirix chan ru xk’eeb’aleb’ xhoonal chirib’ileb’ rib’, wotzok, roxloq’inkileb’ li komon, ut wan chik xkomon. Wankeb’ laj k’utunel li neke’xyiib’ li jalam-uuch wankeb’ wi’ junjunq li kok’ k’anjel re naq eb’ li kok’al te’tz’aqonq sa’ li tzolok rik’in junaq na’leb’ (jo’ li tijok, xchapb’al junaq li jalam-uuch, malaj xjek’inkil li hu). Li kok’ k’anjel a’an naru naq jalan jalanq rajlal xamaan. A’an naxtenq’aheb’ li kok’al chixk’eeb’aleb’ xhoonal li jun siir chik ut chixtzolb’al li wank sa’ li tzoleb’aal.

Eb’ li kok’al—mas wi’chik li toj kok’eb’—neke’tzolok chi us wi neke’xnaw chan ru naq taa’uxmanq li tzolok. Xb’aan naq eb’ li kok’al toj ka’ch’ineb’ xyu’am yal b’ab’ay xseeb’aleb’ chi ab’ink, ut ch’a’aj chiruheb’ rab’inkil chixjunil jun k’utuk, us naq wi sa’ li k’anjel wanq junaq lix jalajik rik’in li k’anjel jun chik. Qayehaq, li tzolok naru naxk’am junjunqaq li hilank re tz’aqonk sa’ junaq li b’atz’unk, xb’onb’al junaq li jalam-uuch, xb’ichankil junaq li b’ich, malaj xkomon chik.

Tzoleb’aal reheb’ kok’al