Roksinkil Kim, Taaqehin—Choq’ re li Tzoleb’aal reheb’ li Kok’al

Kawresink-ib’ re k’utuk sa’ li Tzoleb’aal reheb’ li Kok’al

Li junkab’al tento raj naq taawanq choq’ xch’oolil li tzolok chirix li evangelio. Yaal a’in choq’ aawe laa’at jo’ ajwi’ choq’ reheb’ li kok’al tzolb’ileb’ aab’aan. Naq nakakawresi aawib’ chi k’utuk, tikib’ rik’in li k’a’ru nakak’ul laa’at rik’ineb’ li loq’laj hu. Li kawresink-ib’ li q’axal aajel ru taak’ulmanq naq taasik’ aamusiq’ankil xb’aan li Santil Musiq’ej.

Kim, Taaqehin—Choq’ reheb’ li Komon ut li Junkab’al taak’anjelaq ajwi’ re aakawresinkil. Tatxtenq’a chixtawb’al chik aana’leb’ chirixeb’ li tzol’leb’ re li evangelio li neke’tawman sa’eb’ li loq’laj hu.

Naq yookat chixkawresinkil aawib’, te’chalq li na’leb’ ut li eek’ahom aawik’in chirixeb’ li kok’al yookat chixtzolb’aleb’. Taak’ul aamusiq’ankil chirix chan ru naq eb’ li na’leb’ sa’eb’ li loq’laj hu taarosob’tesiheb’ xyu’am a’an. B’eresinb’ilaqat chixmusiq’ankileb’ re xtawb’aleb’ li na’leb’ a’an naq yookeb’ chixtzolb’aleb’ li loq’laj hu xjuneseb’ ut rik’ineb’ lix junkab’al. Chijultiko’q aawe naq lix wanjikeb’ li kok’al sa’ lix junkab’al maare ink’a’ naxkanab’eb’ chixtzolb’aleb’ li loq’laj hu jo’ junkab’al

Li na’leb’ re k’utuk

Naq yookat chixk’uub’ankil aana’leb’ re k’utuk, naru taataw chik aana’leb’ rik’in li aatin li tusub’anb’il sa’ li hu a’in. Maak’oxla naq tento xtaaqenkileb’ li aatin a’in chi tzoltzo jo’ tz’iib’anb’il; a’an b’an tenq’ re tat-ok chixk’ulb’al li na’leb’ chi musiq’anb’il. Laa’at nakanaweb’ ru li kok’al tzolb’ileb’ aab’aan, ut li Qaawa’ ajwi’ naxnaweb’ ru—naxnaw ajwi’ li neke’raj ru ut li k’a’ru naru neke’xtaw ru. A’an tatxmusiq’a re xnawb’al chan ru us xtzolb’aleb’ ut rosob’tesinkileb’ li kok’al.

Wankeb’ chik li k’anjeleb’aal li te’ruuq chatenq’ankil naq yookat chixkawresinkil awib’, jo’eb’ li na’leb’ sa’ Kim, Taaqehin—Choq’ reheb’ li komon ut li junkab’al ut sa’eb’ li Liahona. Re xtawb’al chik li na’leb’ chirixeb’ li k’anjeleb’aal a’in, chi’ilmanq “Xkomon chik li k’anjeleb’aal.”

Junjunq li na’leb’ li tento taawanq sa’ aach’ool

• Teneb’anb’il sa’ xb’eeneb’ li yuwa’b’ej xtzolb’aleb’ lix kok’al. Jo’ aj k’utunel, wan jun aanimla k’anjel xkawresinkil, xwaklesinkil, ut kab’lak sa’ xb’een li tzolok chirix li evangelio li na’ux sa’ li junkab’al. Weent taab’aanu rik’ineb’ li kok’al li ink’a’ tzolb’ileb’ xb’aaneb’ lix na’ xyuwa’ chirix li evangelio sa’ kab’l. Kanab’eb’ chi tz’aqonk chixjunileb’ li kok’al chi aatinak chirix li evangelio, maak’a’ naxye chan ru lix wanjikeb’ sa’ lix junkab’aleb’.

• Li ka’sutink a’an chaab’il. Eb’ li kok’al neke’xtzol xyaalil li evangelio chi chaab’il naq li yaal a’an k’utb’il chi naab’al sut rik’in k’iila kok’ k’anjel. Wi nakak’e reetal naq junaq li ch’ina k’anjel chaab’il choq’ reheb’ li kok’al, naru taaka’suti, mas wi’chik naq nakatzoleb’ li kok’al toj ka’ch’ineb’ xyu’am. Maare taanumsi wi’chik junaq li ch’ina k’anjel re li tzolok xnume’.

• Li qaChoxahil Yuwa’ taaraj naq us tat-elq jo’ aj k’utunel. A’an xk’e k’iila k’anjeleb’aal re aatenq’ankil chi usaak, jo’eb’ li ch’utam reheb’ laj k’utunel. Sa’eb’ li ch’utam a’in naru taak’ul aana’leb’ rik’ineb’ li jun ch’ol chik chi aj k’utunel chirixeb’ li ch’a’ajkilal li yookat chirilb’al. Naru ajwi’ tex’aatinaq chirix li k’utuk jo’ chanru li Kristo, ut teeyal xb’aanunkil.

• Wi nakatzoleb’ li kok’al toj ka’ch’ineb’ xyu’am ut nakawaj xkomon aatenq’ankil, sik’ sa’ “ Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ li k’anjeleb’aal a’in.

• Wankeb’ sa’ li hu a’in li tusleb’ aatin choq’ re li junjunq xamaan re li chihab’, ka’ajwi’ li wiib’ xamaan li na’ux wi’ li jolomil ch’utub’aj-ib’ maak’a’. Sa’eb’ li domingo maak’a’ wi’ jun li Dominkil Tzoleb’aal sa’ xk’ab’a’ jun li ch’utub’aj-ib’ re oqech malaj jalan chik li na’leb’, eb’ li junkab’al toj te’ruuq chirilb’al li Ak’ Chaq’rab’ sa’ rochocheb’ jo’ chanru tz’iib’anb’il resil. Re naq ink’a’ texb’ayq sa’ laa tzoleb’aal re li Tzoleb’aal reheb’ li Kok’al, naru taaq’ax ru jun li tzolom, malaj taajunaji wiib’ tzolom. Re naq ink’a’ te’sachq xna’leb’, us naq eb’ li awa’b’ej re li Tzoleb’aal reheb’ li Kok’al te’xye resil reheb’ laj k’utunel chi rub’elaj naq taajalmanq li kutan.