“Jun eetalil re k’utuk,” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2019 (2019)
“Jun eetalil re k’utuk,” Kim, Taaqehin—Choq’ re li Tzoleb’aal reheb’ li Kok’al: 2019
Jun eetalil re k’utuk
Sa’ li hu a’in, taataw li k’utb’il eetalil a’in sa’ li junjunq chi tusleb’ aatin: xkanab’ankileb’ chi wotzok, xk’utb’al li tzol’leb’, ut xb’oqb’aleb’ chi tzolok sa’ kab’l. K’iila sut naq yookat chi k’utuk, eb’ li oxib’ raqal a’in te’xjunaji rib’, malaj te’xjal xna’aj. Jo’ jun eetalil, k’e reetal naq rik’in li wotzok naru na’ux xk’utb’al li tzol’leb’, ut naq naqak’ut li tzol’leb’, tento taa’uxq xkanab’ankileb’ chi wotzok. Jo’kan ajwi’, naru taab’oqeb’ chi tzolok sa’ kab’l yalaq jo’q’e naq yookex chi aatinak jo’ tzoleb’aal. Kanab’ a’in chi k’ulmank jo’ chanru eek’asinb’il xb’aan li Musiq’ej, re te’tenq’aaq li ani tzolb’ileb’ aab’aan.
Xkanab’ankileb’ chi wotzok
Jo’ jun raqal sa’ li junjunq tzoleb’aal, kanab’eb’ li kok’al chixwotzb’al li neke’reek’a ut li k’a’ru xe’xk’ul chirix xtzolb’al li xb’eenileb’ na’leb’ sa’ li tusleb’ aatin. Sa’ li raatineb’ naru neke’xye li xe’xk’ul chaq naq yookeb’ chaq chi tzolok sa’ li rochocheb’. Jo’kan ajwi’ naru nakanumsi li k’a’ru xe’xtzol sa’ li xamaan xnume’ ut nakapatz’ reheb’ chan ru naq nak’anjelak sa’ lix yu’ameb’.
Xk’utb’al li tzolʼlebʼ
Kim, Taaqehin—Choq’ reheb’ li komon ut li junkab’al naru tatxtenq’a chixtawb’al ru li tzol’leb’ li taak’ut chiruheb’ li kok’al. K’oxla k’a’ chi raqal reheb’ li loq’laj hu, ch’ol aatin, numsihom, patz’om, ut xkomon chik li k’anjeleb’aal naru taawotz re xtenq’ankileb’ li kok’al chixtzolb’al li xb’eenileb’ na’leb’ re li evangelio ut chixb’aanunkil jo’ chanru neke’xye. Sik’ xyaalal xtenq’ankileb’ re naq sahaqeb’ xch’ool rik’in li yookeb’ chixtzolb’al.
Xb’oqb’aleb’ chi tzolok sa’ kab’l
Xb’aan naq li kab’l a’an tz’aqal li na’ajej re tzolok chirix li evangelio, jun reheb’ laa wajom jo’ aj k’utunel re li Tzoleb’aal reheb’ li Kok’al a’an xb’oqb’aleb’ chi tzolok sa’ kab’l. Chan ru nakatru chixtenq’ankileb’ li kok’al chixwotzb’al rik’ineb’ lix junkab’al li k’a’ru neke’xtzol sa’ li tzoleb’aal? Chan ru naru nakab’oqeb’ li kok’al ut eb’ lix yuwa’ chixtzolb’al li Ak’ Chaq’rab’ sa’ kab’l?