31 diciembre–6 enero

Tento sa’ qab’een laa’o naq tootzoloq

Naq yookat chirilb’al ru li raqal sa’eb’ li loq’laj hu li yeeb’il sa’ li tusleb’ aatin a’in, tz’iib’a li na’leb’ nakak’ul rik’in li Musiq’ej. Taak’e reetal naq sa’ li junjunq chi tusleb’ aatin re li tzoleb’aal hu a’in wan li kok’ k’anjel choq’ reheb’ li kok’al to ka’ch’ineb’ xyu’am ut choq’ reheb’ li kok’al ak ninqeb’, a’b’an naru taachap a’ yaal b’ar wan re li kok’ k’anjel choq’ re laa tzoleb’aal.

Xtz’iib’ankil li nakak’oxla

Xkanab’ankileb’ chi wotzok

Sa’ xtiklajik li junjunq chi tzolok, k’eheb’ xhoonal li kok’al re te’xwotz li yookeb’ chixtzolb’al chirix li evangelio. Jo’ jun eetalil, sa’ li xamaan a’in naru taab’oqeb’ chixwotzb’aleb’ li seraq’ mas neke’wulak chiruheb’ chirix li Jesukristo.

Xk’utb’al li tzol’leb’

Kok’al toj ka’ch’ineb’ xyu’am

Li Jesukristo naraj naq tintaaqe.

Laa’at ut eb’ li kok’al teeril ru naab’aleb’ li seraq’ chirix lix yu’am li Jesukristo chiru li chihab’ a’in. Tenq’aheb’ li kok’al chixtawb’al ru naq li rajb’al naq naqatzoleb’ li seraq’ a’an, a’an naq tooruuq chixtaaqenkil chi us lix b’aanuhom li Jeuskristo.

Kok’ k’anjel naru chi b’aanumank

• Il lix b’oqom li Kolonel, “Kim, taaqehin,” li natawman sa’ Lukas 18:22. B’aanu junaq li b’atz’unk b’ar wi’ junaq reheb’ li kok’al tixb’aanu junaq li eek’asink-ib’ ut chirix a’an tixye reheb’ xkomoneb’ li kok’al: “Kim, taaqehin.” Kanab’eb’ li kok’al chixb’aanunkil ajwi’ li eek’asink-ib’ a’an.

• K’uteb’ lix jalam-uuch li kristiaan li yookeb’ chixtaaqenkil li Kolonel chi jalan jalanq, chiru lix k’anjel sa’ ruchich’och’ ut toj sa’eb’ li kutan a’in. Naru nakataweb’ li jalam-uuch sa’ li Libro de obras de arte del Evangelio malaj sa’ eb’ li puktesinb’il hu re li Iglees. Naru ajwi’ taak’ut li video “Ilumina el Mundo” (LDS.org). Kanab’ naq eb’ li kok’al te’xye chan ru naq eb’ li kristiaan yookeb’ chixtaaqenkil li Kolonel.

• Tenq’aheb’ li kok’al chixk’oxlankil k’a’ru yookeb’ chixb’aanunkil re xtaaqenkil li Kolonel. Xb’ichankil “Tinsik’ li Qaawa’ sa’ lin ka’ch’inal,” B’ichleb’aal choq’ reheb’ li Kok’al, 67, naru naxk’e junjunq xna’leb’eb’. Kanab’eb’ chixyiib’ankileb’ rib’ sa’ junaq jalam-uuch chixb’aanunkileb’ li k’a’aq re ru a’an.

Tz’aqal yaaleb’ li loq’laj hu

Eb’ li kok’al naru neke’xk’ul jun xnawomeb’ xch’ool naq tz’aqal yaaleb’ li loq’laj hu us ta naq maji’ neke’ru chirilb’aleb’ xsa’. Naq yooqat chixtzolb’aleb’ li loq’laj hu rik’ineb’ li kok’al sa’ li chihab’ a’in, naru nakatenq’aheb’ chixnawb’al xjuneseb’ rib’ naq tz’aqal yaaleb’ li loq’laj hu.

Kok’ k’anjel naru chi b’aanumank

• Kanab’eb’ li kok’al chi aatinak chirixeb’ li maatan mas neke’wulak chiruheb’ li ak xk’ulumeb’ sa’ xkutankil lix yo’lajikeb’ malaj sa’ junaq chik hoonal. K’am junaq xhuileb’ li loq’laj hu chi lanlo rix sa’ li hu re maatan, kanab’ naq jun li ch’ina al tixte, ut tixch’olob’ xyaalal naq eb’ li loq’laj hu a’an jun maatan naxk’e qe li qaChoxahil Yuwa’.

• K’uteb’ chiru li kok’al junjunq li hu re li seraq’ yal yoob’anb’il ut patz’ reheb’ b’ar wan li seraq’ mas neke’wulak chiruheb’. K’uteb’ li loq’laj hu chiruheb’ ut ch’olob’ xyaalal naq chi sa’eb’ li loq’laj hu wan li raatin li Dios choq’ qe ut naq neke’aatinak chirixeb’ li kristiaan li tz’aqal ke’wan ut chirix li k’a’aq re ru tz’aqal ki’uxman.

• Wotzeb’ li esil li natawman sa’ 2 Timoteo 3:15 ut sa’ Moroni 10:3–5, ut tenq’aheb’ li kok’al chixka’sutinkil junjunqaq li raqal. Tenq’aheb’ chixtawb’al ru naq a’aneb’ naru neke’xnaw xjuneseb’ rib’ naq tz’aqal yaaleb’ li loq’laj hu.

• Muq junaq xjalam-uuch li Kolonel ut k’eheb’ li kok’ tenq’ reheb’ li kok’al re naq te’xtaw. Tenq’aheb’ li kok’al chixtawb’al ru chan ru naq xtz’ilb’aleb’ rix li loq’laj hu nokoxtenq’a chixnawb’al ru li Jesukristo. Kanab’eb’ li kok’al naq chi junjunqal te’xk’e xhoonaleb’ re xmuqb’al li jalam-uuch ut te’xk’e li kok’ tenq’ reheb’ xkomon chik li kok’al.

• B’ichahomaq sa’ junajil “Tintzol, tink’oxla, tintijoq” ut “Tinsik’ li Qaawa’ sa’ lin ka’ch’inal,” B’ichleb’aal choq’ reheb’ li Kok’al, 66–67, ut tenq’aheb’ li kok’al chixk’oxlankil li eek’asink-ib’ li wan rilom rik’in li raatinuleb’ li b’ich. Wotz rik’ineb’ li kok’al jun malaj wiib’ reheb’ li raqal mas nawulak chawu sa’eb’ li loq’laj hu ut ye reheb’ chan ru naq xanaw naq tz’aqal yaaleb’ li loq’laj hu. Wi wankeb’ li raqal malaj li seraq’ reheb’ li loq’laj hu neke’wulak chiruheb’ li kok’al, kanab’eb’ chixwotzb’al.

Eb’ li kok’al naru te’xtaw xnawomeb’ xch’ool chirix lix yaalalileb’ li loq’laj hu.

Xk’utb’al li tzol’leb’

Kok’al ak ninqeb’

Li Jesukristo naraj naq tintzoloq chirix a’an ut naq tintaaqe.

K’oxla chan ru naq wulajenaqat chixnawb’al ru li Jesukristo. K’a’ru naru nakab’aanu re xtenq’ankileb’ li kok’al chi tzolok chirix a’an ut chixtaaqenkil?

Kok’ k’anjel naru chi b’aanumank

• Kanab’eb’ li kok’al chi aatinak chirix junaq li ramiiw ut chixseraq’inkil chan ru naq xe’wulak jo’ ramiiweb’ rib’. Ilomaq ut aatinanqex chirix Jwan 5:39 ut Jwan 14:15 re xtawb’al chan ru naru naqeek’a naq nach’ wanko rik’in li Jesus. Patz’ reheb’ li kok’al naq te’xwotz resil junaq hoonal xe’reek’a wi’ naq nach’ wankeb’ rik’in a’an.

• K’am laa tzoleb’aal xb’eeninkil li na’ajej re li ch’utleb’aal kab’l. Kanab’eb’ li kok’al chixtaqsinkileb’ li ruq’ naq te’ril k’a’ruhaq li najultikan reheb’ chan ru naru te’xtaaqe li Kolonel (jo’ li kub’sib’aal ha’ malaj junaq li jalam-uuch).

• B’ichan rik’ineb’ li kok’al “Kim, Taaqehin,” Eb’ li B’ich, 66. Kanab’eb’ li kok’al chixwotzb’al junjunqeb’ li hoonal xe’xtaaqe wi’ lix b’aanuhom li Kolonel.

Naru nintzoleb’ li loq’laj hu injunes wib’.

Naq yookat chirilb’aleb’ ru li loq’laj hu rik’ineb’ li kok’al ut nakak’e lix patz’omeb’, naru taatoch’eb’ xch’ool re te’xnaw naq naru te’tzoloq sa’eb’ li loq’laj hu ut te’xtaw li muqmuukil nawom nim xloq’al.

Kok’ k’anjel naru chi b’aanumank

• Il ru chi kaw xyaab’ aakux sa’ Jwan 5:39 ut Hechos 17:10–11, ut patz’ reheb’ li kok’al li k’a’ru neke’xtzol chirix chan ru xtzolb’aleb’ li loq’laj hu.

• Sik’ ru junjunqeb’ li raqal ninqeb’ xwankil sa’ li Ak’ Chaq’rab’, tz’iib’aheb’ chiru junjunq li kok’ hu, ut muqeb’ li kok’ hu. K’uub’eb’ li kok’ tenq’ li te’k’amoq reheb’ li kok’al sa’ jun “xsik’b’al li muqmuukil maatan” sa’ li tzoleb’aal malaj sa’ xna’aj li ch’utleb’aal kab’l re te’xtaw li raqal reheb’ li loq’laj hu. Naq te’xtaw li junjunq chi raqal, aatinanqex chirix li k’a’ru naraj naxye ut k’a’ut naq a’an jun li muqmuukil maatan mas nim xloq’al.

• Wotz junjunqeb’ li raqal reheb’ li loq’laj hu li jwal nakara ut ch’olob’ k’a’ut naq mas chaab’il xyaalaleb’ choq’ aawe. Jo’ jun tzoleb’aal, k’uulahomaq junaq xtusulaleb’ li raqal ninqeb’ xwankil re li loq’laj hu li neke’xtaw li kok’al sa’ li Ak’ Chaq’rab’ chiru li chihab’ a’in—maare sa’ kab’l malaj sa’ li Tzoleb’aal reheb’ li Kok’al.

• Aatinan rik’ineb’ li kok’al chirix k’a’ut naq wan naq ch’a’aj rilb’aleb’ ru li loq’laj hu. Patz’ reheb’ li kok’al naq te’xwotz xna’leb’eb’ chirib’ileb’ rib’ chirix xtzolb’aleb’ li loq’laj hu. Patz’ ajwi’ reheb’ naq te’xwotz yalaq xk’ulumeb’ chaab’il li wanjenaqeb’ re rik’ineb’ li loq’laj hu.

• Tenq’aheb’ li kok’al chixyiib’ankil jun li ajleb’aal kutan re naq te’ruuq chixjuch’b’al reetalil li kutan naq neke’ril ruheb’ li loq’laj hu. Eb’ li ajleb’aal kutan a’in naru neke’xjultika reheb’ rilb’al ruheb’ li loq’laj hu rajlal kutan.

Aajel ru naq taawanq lix nawom inch’ool.

Eb’ li kok’al nakatzoleb’ te’raj ru lix nawomeb’ xch’ool re taawanq chi xaqxo lix paab’aaleb’ naq taawulaq li ch’a’ajkilal. K’a’ru naru nakab’aanu laa’at re xwaklesinkileb’ xch’ool chixtzolb’al li yaal xjuneseb’ rib’?

Kok’ k’anjel naru chi b’aanumank

• Wotz li seraq’ chirixeb’ li lajeeb’ chi tuq’ixq (chi’ilmanq Mateo 25:1–13; chi’ilmanq ajwi’ “Ch’ol 47: Li lajeeb’ chi tuq’ixq,” Eb’ li Esilal sa’ li Ak’ Chaq’rab’, 118–120, malaj li video sa’ LDS.org). Patz’ reheb’ li kok’al: K’a’ru xjuntaq’eetil lix nawom qach’ool rik’ineb’ li saqen? K’a’ut naq aajel ru naq tento taawanq lix nawom qach’ool?

• Aatinanqex chirix li k’a’ru naru taqab’aanu re xkawob’resinkil lix nawom qach’ool. Re xsik’b’al chik li na’leb’, kanab’eb’ li kok’al chixtz’ilb’al rix Jwan 7:17 ut Moroni 10:3–5. Kanab’eb’ chixwotzb’al li k’a’ru neke’xnaw naq yaal.

• Patz’ reheb’ li kok’al naq tate’xtenq’a chixk’eeb’al reetalil junjunq li tz’ak re kab’lak rik’in kok’ ch’ol li tixch’olob’ li k’a’aq re ru li naqab’aanu re xk’ojob’ankil lix nawom qach’ool, jo’ li tijok. Kanab’eb’ li kok’al chixkab’lankil junaq ch’ina kab’l, reetalil li xnawom ch’oolej rik’ineb’ li tz’ak re kab’lak.

Xb’oqb’aleb’ chi tzolok sa’ kab’l

Chan ru naru nakawaklesiheb’ xch’ool li kok’al ut eb’ lix na’ xyuwa’ chixtzolb’al li Ak’ Chaq’rab’ sa’ kab’l? Qayehaq, naru raj taawaklesiheb’ xch’ool li kok’al chixk’uulankil sa’ xk’a’uxleb’ jun li raqal reheb’ li loq’laj hu li ak xe’aatinak wi’ sa’ li tzoleb’aal (naru xjachb’al ru li raqal chi kok’ raqal) ut chixwotzb’al li raqal rik’in lix junkab’aleb’.

Chanru xchaab’ilob’resinkil li qak’utum

Jaliheb’ li kok’ k’anjel a’ yaal lix chihab’eb’ li kok’al li nakatzoleb’. Eb’ li kok’al toj ka’ch’ineb’ neke’raj ru li xch’olob’ankil chi us ut neke’tzolok rik’in k’iila paay xjalanil li k’utuk. Naq eb’ li kok’al yookeb’ chi k’iik, mas neke’ru wi’chik chi tenq’ank ut naru naq moko ch’a’ajaq ta chiruheb’ xwotzb’al li neke’xk’oxla. K’eheb’ lix hoonal re wotzok, xyeeb’al lix nawomeb’ xch’ool, ut tz’aqonk, ut tenq’aheb’ wi na’ajman ru. (Chi’ilmanq Li k’utuk jo’ li Kolonel, 25–26).