“31 diciembre–6 enero Tento sa’ qab’een laa’o naq tootzoloq,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)

“31 diciembre–6 enero. Tento sa’ qab’een laa’o naq tootzoloq,” Kim, Taaqehin—Choq’ reheb’ li komon ut li junkab’al: 2019

Jalam-uuch

jun li junkab’al yoo chirilb’al xhuhileb’ li jalam-uuch

31 diciembre–6 enero

Tento sa’ qab’een laa’o naq tootzoloq

Lix k’anjel Kim, Taaqehin—Choq’ reheb’ li komon ut li junkab’al a’an re aatenq’ankil chi chalk rik’in li Kristo, ut re naq taakanaaq chi jalb’il wi’chik aach’ool chirix lix evangelio. Li k’anjeleb’aal a’in naru tatxtenq’a chixtawb’aleb’ ru li loq’laj hu, ut chixtawb’al sa’eb’ a’an li musiq’ejil metz’ew li taak’anjelak aawe laa’at ut re aajunkab’al. Chi jo’kan, sa’eb’ laa tzoleb’aal sa’ li Iglees, tatruuq chixwotzb’al aana’leb’ ut chixwaklesinkileb’ xch’ool laa wech aj komonil naq yookeb’ chixyalb’aleb’ xq’e chixtaaqenkil li Kristo.

Xtz’iib’ankil li nakak’oxla

“Kʼaʼru nekesik’?” li Jesus kixpatz’ reheb’ lix tzolom (Jwan 1:38). Naru nakapatz’ aawib’ li na’leb’ ajwi’ a’in—xb’aan naq taataw aana’leb’ sa’ li Ak’ Chaq’rab’ chiru li chihab’ a’in a’ yaal li k’a’ru nakasik’. “Chexsik’oq, ut teetaw” a’an li kixyeechi’i li Kolonel (Mateo 7:7). Chi jo’kan, patz’eb’ li patz’om li neke’chal sa’ aak’a’uxl naq yookat chi tzolok, ut chirix a’an k’e aach’ool chixsik’b’al lix sumenkil. Sa’ li Ak’ Chaq’rab’ taawil resil li ninqi musiq’ejil na’leb’ ke’xk’ul lix tzolom li Jesukristo. Jo’ jun xtzolom li Kolonel ut aj paab’anel, naru ajwi’ nakak’ul li xnimal ru musiq’ejil na’leb’ wi nakak’ul aab’oqb’al xb’aan li Kolonel chiru chixjunil li hu a’in, “Kim, taaqehin” (Lukas 18:22).

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Re tzolok chi yaal rik’in li Kolonel, tento tink’ulub’a li b’oq’b’ilin wi’ xb’aan a’an, “Kim, taaqehin.”

Lix b’oqom li Kolonel, “Kim, taaqehin,” a’an choq’ qe chiqajunil—maak’a’ naxye ma toja’ xoo’ok sa’ xb’ehil li wank choq’ tzolom, malaj ma xoob’eek chiru chalen chaq xtiklajik li qayu’am. A’in li kixye re li saaj winq b’ihom li yoo chaq chixyalb’al xq’e chixpaab’ankil chixjunileb’ li chaq’rab’ (chi’ilmanq Mateo 19:16–22). Li k’a’ru kixtzol a’an—ut li tento taqatzol chiqajunil—a’an naq li wank choq’ tzolom naraj naxye xq’axtesinkil chixjunil li qaam chiru li qaChoxahil Yuwa’ ut li Jesukristo. Noko’usa chi wank choq’ tzolom naq naqak’e reetal k’a’ru namaak’a’o’ qe, naq naqajal qib’, ut naq naqasik’ xtaaqenkil li Dios ut li Jesus.

Li tzolok rik’in li Kolonel natikla naq naqayal qaq’e chixtawb’al ru li k’a’ru kixk’ut. Qayehaq, chan ru naq naniman aana’leb’ chirix li jalb’a-k’a’uxlej naq nakak’oxla li na’leb’ a’in?

Lix k’utum li Kolonel (chi’ilmanq Mateo 6:14–15; 18:21–35)

Li k’a’ru kixb’aanu sa’ lix yu’am (chi’ilmanq Lukas 23:33–34)

A’ut maji’ tz’aqal li qana’leb’ toj reetal naq naqataaqe li Kolonel rik’in xyu’aminkil li k’a’ru kixk’ut. Chan ru naq mas wi’chik tatruuq chixkuyb’aleb’ xmaak aawas aawiitz’in?

Wi taawaj tzolok chik, b’aanu a’in rik’in jalan chik na’leb’ sa’ li evangelio, jo’ li rahok, malaj li tuulanil.

Tento sa’ inb’een laa’in naq tintzoloq.

Li Elder David A. Bednar kixye, “Naq yooko chi tzolok, laa’ex ut laa’in tento sa’ qab’een k’anjelak ut wank choq’ aj b’aanuhom re li aatin, ut ink’a’ ka’ajwi’ jo’ aj ab’inihom re, li ka’ajwi’ k’anjelanb’ileb’. Laa’ex ut laa’in, ma wanko choq’ aj b’aanunel li neke’sik’ok ut neke’tzolok rik’in li paab’aal, malaj ka’ajwi’ yooko chiroyb’eninkil naq tootzole’q ut wanq ani taak’anjelanq qe? ... Li ani yoo chi tzolok, wi naxk’anjela lix taql xch’ool naq nak’anjelak sa’ xyu’am jo’ chanru li tiikil ru na’leb’, naxte lix ch’ool chiru li Santil Musiq’ej, ut naxk’ul lix wankilal aj k’utunel ut aj ch’olob’anel, re xk’utb’al xyaalal. Li tzolok rik’in li paab’aal naraj naxye k’anjelak rik’in li qamusiq’, li qak’a’uxl, ut li qametz’ew, ut ink’a’ ka’ajwi’ k’uluk chi maak’a’ naqab’aanu” (“Buscar conocimiento por la fe,” Liahona, septiembre 2007, 20).

K’a’ru naraj naxye naq tento sa’ aab’een laa’at naq tattzoloq? Re xsumenkil li patz’om a’in, il li raatin li Elder Bednar, ut jo’kan ajwi’ eb’ li raqal a’in sa’eb’ li loq’laj hu: Jwan 7:17; 1 Tesalonicenses 5:21; Santiago 1:5–6, 22; 2:17; 1 Nefi 10:17–19; 2 Nefi 4:15; Alma 32:27; ut Tzol’leb’ ut Sumwank 18:18; 58:26–28; 88:118. K’a’ru nakaweek’a chi musiq’anb’il naq taab’aanu re naq tatwanq chi mas wi’chik jo’ aj b’aanunel sa’ xtzolb’al li evangelio?

Tento tinnaw li yaal injunes.

Maare wankeb’ ani nakanaw ru li chanchan maajo’q’e neke’sach xpaab’aal, maak’a’ naxye k’a’ru neke’xk’ul sa’ xyu’ameb’. Maare neke’xk’e chak’oxla eb’ li oob’ tuq’ixq li wankeb’ xna’leb’ sa’ li jaljookil ru aatin re li Kolonel (chi’ilmanq Mateo 25:1–13). Li k’a’ru maare ink’a’ nakawil a’an naq yalb’ileb’ xq’e chixkawob’resinkil lix nawomeb’ xch’ool chirix li yaal. Chiqajunil tento taqasik’ xkawob’resinkil lix nawom qach’ool chi yalb’il qaq’e, xb’aan naq jo’ ke’xtzol li tuq’ixq li maak’a’eb’ xna’leb’, ink’a’ naru naqato’ni chaq lix jalajik qach’ool rik’in anihaq chik.

Chan ru naq naqak’ul ut naqach’olani lix nawom qach’ool? Tz’iib’a li na’leb’ li nachal aawik’in naq nakak’oxlaheb’ li raqal a’in sa’eb’ li loq’laj hu: Lukas 11:9–13; Jwan 5:39; Jwan 7:14–17; Hechos 17:10–12; 1 Korintios 2:9–11; ut Alma 5:45–46. (Chi’ilmanq ajwi’ “Xnawom qach’ool,” sa’ li K’utul Raqal reheb’ li Loq’laj Hu.)

Li junjunq qe tento tixtaw xjunes rib’ xnawom xch’ool.

K’a’ru tento tinb’aanu naq wankeb’ inpatz’om?

Naq nakasik’ li musiq’ejil na’leb’, te’ok li patz’om sa’ laa k’a’uxl. Li na’leb’ a’in naru nakatxtenq’a chixsumenkileb’ li patz’om re naq taakawob’resimanq laa paab’aal ut lix nawom aach’ool:

Chasik’ aana’leb’ rik’in li ani xaqab’anb’il xb’aan li Dios. Chixjunil li yaal rik’in li Dios na’el chaq, ut a’an naxk’utb’esi li yaal rik’in li Santil Musiq’ej, eb’ li loq’laj hu, ut rik’ineb’ lix profeet ut eb’ lix apostol.
Chatk’anjelaq rik’in paab’aal. Wi ink’a’ sumenb’il sa’ junpaat aapatz’om, chiwanq aapaab’aal naq li Qaawa’ tixk’utb’esi lix sumenkil naq nawulak tz’aqal xkutankil. Sa’ li kutan a’in, maakanab’ xyu’aminkil li yaal li ak nakanaw.
Rajlal chiwanq sa’ aach’ool li junelik q’e kutan. K’e aach’ool chirilb’al li k’a’aq re ru jo’ na’ilok li Qaawa’, moko jo’ ta na’ilok li ruchich’och’. Ileb’ laa patz’om chi wank sa’ aach’ool lix k’uub’anb’il na’leb’ li qaChoxahil Yuwa’ choq’ re li qakolb’al.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Mateo 13:1–23

Jun chaab’il na’leb’ re xkawresinkil laa junkab’al chi tzolok sa’ li Ak’ Chaq’rab’ chiru li chihab’ a’in, a’an xk’oxlankil li jaljookil ru aatin chirix laj awinel. Maare texxik chirilb’al sa’ komonil li jar paay chi ch’och’ li wan chixk’atq lee rochoch re xk’eeb’al reetal li jar paay chi ch’och’ li yeeb’il resil sa’ li jaljookil ru aatin. K’a’ru naru taqab’aanu re naq “chaab’ilaq li ch’och’ ” sa’ li qajunkab’al? (Mateo 13:8).

Galatas 5:22–23; Filipenses 4:8

“Naqaye reheb’ li na’b’ej yuwa’b’ej ut reheb’ li alal k’ajolb’ej, naq te’xk’e xb’eenil xna’aj li tijok sa’ junkab’al, li q’ojyin re junkab’al, xtzolb’al ut xk’utb’al li evangelio, ut li k’a’ru us nab’aanuman sa’ junkab’al. Us ta wan naq chaab’il ut maak’a’ reek’ jalaneb’ chik li na’leb’ ut k’anjel, tento naq ink’a’ te’xk’ul xna’aj li k’anjel k’eeb’il xb’aan li Dios, li ka’ajwi’ naru neke’xb’aanu chi tz’aqal li na’b’ej yuwa’b’ej ut li junkab’al” “Hu taqlanb’il xb’aan li Xb’eenil Awa’b’ejil,” Liahona, diciembre 1999, 1).

Sa’ xtiklajik li ak’ chihab’, us naq taa’uxq jun ch’utub’aj-ib’ sa’ junkab’al re aatinak chirix chan ru naq taawanq li evangelio choq’ xch’oolil li ochoch. K’a’ru li na’leb’ nachal sa’ eech’ool naq nekeril li osob’tesink ut li na’leb’ k’eeb’il sa’ Galatas 5:22–23 ut Filipenses 4:8? Maare texruuq chixtz’iib’ankil li na’leb’ chiru hu li teet’uyub’ sa’ li ochoch, re taajultiko’q eere li xek’oxla xb’aanunkil.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Chasik’ li tzol’leb’. Jun tzol’leb’ a’an jun li yaal li wan chi junelik, ut ink’a’ najalman. Li Awa’b’ej Boyd K. Packer kixye naq “li yaalil tzol’leb’, naq tawb’il ru, naxjal li k’a’uxlej ut li b’aanuhomej” (“Los niños pequeños,” Liahona, enero 1987, 17). Naq laa’at ut laa junkab’al neketzoleb’ li loq’laj hu, sik’omaqeb’ li yaalil na’leb’ li texxtenq’a chi wank chi mas wi’chik jo’ li Kolonel.