Xtzolb’aleb’ li kok’al

Wi wankeb’ kok’al sa’ laa junkab’al, a’an a’in junjunq li na’leb’ naru xb’aanunkil re xtenq’ankileb’:

• Rab’inkil malaj xk’utb’al jun seraq’. Eb’ li kok’al neke’wulak chiru eb’ li seraq’—chirix li wan sa’eb’ li loq’laj hu, chirix laa yu’am, chirix li resilal li Iglees, malaj eb’ li seraq’ sa’eb’ lix huhil li Iglees. Sik’ chan ru te’ruuq chi tz’aqonk sa’ xk’utb’al li seraq’. Neke’ru chixchapb’al li k’anjeleb’aal malaj li jalam-uuch, naru te’xb’aanu jun li jalam-uuch chirix li yookeb’ chirab’inkil, neke’ru chixb’aanunkil li na’uxman sa’ li seraq’, ut te’ruuq ajwi’ chixyeeb’al li seraq’. Tenq’aheb’ laa kok’al chixtawb’al ru li yaalil na’leb’ chirix li evangelio sa’eb’ li seraq’ nakawotz rik’ineb’.

• Teeyaab’asi jun raqal sa’eb’ li loq’laj hu Eb’ li kok’al maare ink’a’ neke’xnaw chi us ilok ru hu, a’ut naru taatenq’aheb’ chi tz’aqonk sa’ li tzolok rik’ineb’ li loq’laj hu. Maare taa’ajmanq naq teeril yal jun raqalaq, jun aatin malaj jun ch’uut chi aatin. Te’ruuq ajwi’ chixtzolb’al sa’ xch’ooleb’ jun ch’ina jachal reheb’ li loq’laj hu wi te’xye jarub’aq sut. Naq neke’rab’i li raatin li Dios, te’reek’a li Musiq’ej.

• Teeril jun jalam-uuch malaj jun video. Naq nakak’ut chiruheb’ laa kok’al jun jalam-uuch malaj jun video chirix jun na’leb’ sa’ li evangelio malaj jun seraq’ sa’eb’ li loq’laj hu, patz’ li patz’om li taatenq’anq reheb’ chi tzolok rik’in li k’a’ru yookeb’ chirilb’al. Jo’ jun eetalil, naru taapatz’, "K’a’ru yoo chi k’ulmank sa’ li jalam-uuch a’in, malaj sa’ li video a’in? K’a’ru naxk’e chaweek’a?" Naru taataweb’ li jalam-uuch ut eb’ li video sa’ li aplicación Biblioteca del Evangelio, Biblevideos.lds.org, medialibrary.lds.org, ut children.lds.org.

• B’ichanqex. Eb’ li b’ich ut li B’ichleb’aal choq’ reheb’ li Kok’al neke’xk’ut li tzol’leb’ rik’in wankilal. Oksi li tusleb’aal na’leb’ li natawman sa’ xraqik li B’ichleb’aal choq’ reheb’ li Kok’al re xtawb’aleb’ li b’ich li neke’aatinak chirix li na’leb’ re li evangelio li yookat chixk’utb’al. Tenq’aheb’ li kok’al chixjuntaq’eetankil li esil sa’ li b’ich rik’in lix yu’ameb’ a’an. Jo’ jun eetalil, naru taapatz’ li patz’om chirix junaq li aatin re li b’ich. Rochb’een b’ichank, eb’ li kok’al neke’ru chireek’asinkil rib’ naq yookeb’ chi b’ichank, malaj naru neke’rab’i xyaab’ li b’ich naq yookeb’ chixb’aanunkil li k’a’aq chik re ru.

• Yiib’anqex. Eb’ li kok’al neke’ru chixyiib’ankil, chixtz’iib’ankil xjalam-uuch, malaj chixb’onb’al reetalil li seraq’ malaj li na’leb’ li yookeb’ chixtzolb’al.

• Roksinkil li k’anjeleb’aal. Jun ch’ina k’anjeleb’aal naru chixtenq’ankileb’ laa kok’al chixtawb’al ru jun na’leb’ chirix li evangelio li ch’a’aj xtawb’al ru. Naq nakawoksiheb’ li k’anjeleb’aal, k’oxla chan ru naq te’ruuq chi tz’aqonk li kok’al. Eb’ a’an mas wi’chik naq te’tzoloq rik’in xb’aanunkil k’a’ruhaq chiru yal rilb’al.

• Xb’aanunkil li yeeb’il sa’ li seraq’. Naq eb’ li kok’al neke’xb’aanu li k’a’ru naru neke’xk’ul sa’ lix yu’ameb’, mas wi’chik naq te’ruuq chixtawb’al ru chan ru naq jun na’leb’ re li evangelio nak’anjelak sa’ xyu’ameb’.

• Xb’aanunkil xkab’ sut eb’ li b’aanuhom. Wan naq taa’ajmanq ru naq eb’ li kok’al te’rab’i k’iila sut jun li na’leb’ re te’ruuq chixtawb’al ru. Matk’oxlak wi yookat chiroksinkil chi kok’ aj xsa’ junaq seraq’ malaj junaq k’anjel. Jo’ jun eetalil, naru taawotz jun esilal sa’ li loq’laj hu k’iila sut chi jalan chik chan ru, rik’in rilb’al sa’eb’ li loq’laj hu, rik’in xyeeb’aal rik’in tz’aqal aawaatin, rik’in xk’utb’al jun li video, rik’in xkanab’ankileb’ li kok’al chatenq’ankil sa’ xyeeb’al li seraq’, rik’in xb’aanunkil li k’a’ru na’uxman sa’ li seraq’, ut xkomoneb’ chik li na’leb’.

  eb’ li na’b’ej yuwa’b’ej neke’xtzoleb’ li kok’al