"Roksinkil Kim, Taaqehin—Choq’ reheb’ li komon ut li junkab’al," Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
"Roksinkil Kim, Taaqehin—Choq’ reheb’ li komon ut li junkab’al," Kim, Taaqehin—Choq’ reheb’ li komon ut li junkab’al: 2019
Roksinkil Kim, Taaqehin—Choq’ reheb’ li komon ut li junkab’al
Ani aj-e li hu a’in?
Li hu a’in, a’an choq’ reheb’ chixjunil li komon ut li junkab’al sa’ li Iglees. Yiib’anb’il re aatenq’ankil chixtzolb’al li evangelio—maak’a’ naxye wi aajunes malaj rik’in laa junkab’al. Wi ink’a’ ak wanjenaqat chixtzolb’al li evangelio chi kok’ aj xsa’, li hu a’in tatxtenq’a chixtikib’ankil. Wi ak yookat chixtzolb’al li evangelio, li hu a’in tatxtenq’a chixtawb’al chik aana’leb’ sa’ xb’aanunkil.
Chan ru naq twoksi li hu a’in?
Taawoksi li hu a’in yalaq chanru nakak’oxla naq tatxtenq’a. Naru nakatxtenq’a jo’ jun k’amol b’e re xtzolb’aleb’ li loq’laj hu aajunes ut rik’in laa junkab’al. Naru ajwi’ taawoksi choq’ re li q’ojyin re junkab’al. Eb’ li tusleb’ aatin neke’xk’ut junjunq li xninqal ru na’leb’ neke’tawman sa’ li Ak’ Chaq’rab’, ut naxye resil li tzolok ut li k’a’ chik ru naru neke’xb’aanu li komon ut li junkab’al, ut wan ajwi’ chi sa’ li na’ajej re taatz’iib’a li k’a’ru nakak’oxla.
Maare laa’at ut laa junkab’al ak yookex chixtzolb’al li evangelio chi kok’ aj xsa’. Maare wan aawajom rilb’al ru chixjunil lix Hu laj Mormon. Malaj ut maare yookat chirilb’al ru jun chik li loq’laj hu choq’ re jun tzoleb’aal re Instituto malaj re Seminario. Ink’a’ na’ajman naq Kim, Taaqehin tixk’ul xna’aj malaj tixram li k’a’ru chaab’il ak yookat chixb’aanunkil. Naru taataw chan ru naq tattzoloq sa’ li Ak’ Chaq’rab’ chi kok’ aj xsa’, ut toj taab’aanu ajwi’ li tzolok sa’eb’ li loq’laj hu li ak yookat chixb’aanunkil. Jo’ jun eetalil, naru tatwanq chirilb’al xsa’ lix Hu laj Mormon sa’ li tzolok nakab’aanu aajunes, ut taawil li Ak’ Chaqr’ab’ rik’in laa junkab’al (malaj chi jaljo xna’aj). Malaj ut naq yookat chirilb’al xsa’ li Ak’ Chaq’rab’, taaruuq taataweb’ li raqal sa’ lix Hu laj Mormon li neke’xxaqab’ xwankil li k’a’ru yookat chixtzolb’al. Kanab’ li Musiq’ej chixk’amb’al aab’e re xnawb’al chan ru naq taatzol li raatin li Dios.
Chan ru nak’anjelak li hu a’in sa’ li k’a’ru na’uxman sa’ li Iglees?
Eb’ li tusleb’ aatin sa’ li hu a’in wan chi tustu re taatzolmanq jun jachal rajlal xamaan. Eb’ li tzoleb’aal sa’ li Tzoleb’aal reheb’ li Kok’al ut sa’ li Dominkil Tzoleb’aal te’wanq ajwi’ chi tusb’il chi jo’kan. Re aatenq’ankil chixtzolb’al ut chixyu’aminkil li evangelio sa’ laa wochoch, eb’ laa k’utunel tate’xkanab’ chixwotzb’al li k’a’ru xak’ul ut xak’oxla, ut eb’ laa patz’om chirixeb’ li raqal reheb’ li loq’laj hu li yookat chixtzolb’al chiru li xamaan.
Sa’ Kim, Taaqehin—Choq’ re li Tzoleb’aal reheb’ li Kok’al ut Kim, Taaqehin—Choq’ re li Dominkil Tzoleb’aal wankeb’ li tusleb’ aatin choq’ re li junjunq xamaan sa’ li chihab’, ka’ajwi’ li wiib’ domingo neke’xb’aanu wi’ li jolomil ch’utub’aj-ib’ ink’a’. Naq maak’a’eb’ li ch’utam re li Iglees xb’aan li ch’utub’aj-ib’ re oqech malaj xb’aan jalan chik na’leb’, us naq toj taatzol li Ak’ Chaq’rab’ sa’ laa wochoch. Sa’ laa tzoleb’aal sa’ li Iglees, naru naq taaq’ax ru li kutan a’an, malaj naq taajunaji wiib’ li tzolom re naq ink’a’ tex’elq sa’ li tusleb’ kutan.
Ma aajel ru naq tintaaqe li tusleb’ kutan?
Li tusleb’ kutan tatxtenq’a chixtaaqenkil li na’leb’ k’utb’il sa’eb’ li tzoleb’aal re domingo, a’ut moko minb’il ta aawu chixtaaqenkil, a’an yal k’amol b’e re aatenq’ankil chi tzolok. Li k’a’ru aajel ru a’an naq yookat chixtzolb’al li evangelio aajunes ut aawochb’een laa junkab’al.