Li na’leb’ re xchaab’ilob’resinkil li tzolok aajunes

A’in junjunq li na’leb’ re xchaab’ilob’resinkil chan ru naq nakatzol li raatin li Dios sa’eb’ li loq’laj hu.

Sik’ li yaalil na’leb’ chirix li Jesukristo

Sa’eb’ li loq’laj hu naxye naq chixjunil li k’a’aq re ru wan naxch’olob’ xyaalal li Kristo (chi’ilmanq sa’ 2 Nefi 11:4; Moises 6:63); chi jo’kan, sik’ li Kristo sa’eb’ li esilal, li seraq’, ut li k’a’ru k’utb’il sa’ li Ak’ Chaq’rab’. Wi taawaj, naru taak’eheb’ reetalil malaj taatz’iib’aheb’ li raqal li neke’xk’ut chirix li Kolonel ut chan ru xtaaqenkil.

Sik’eb’ li aatin li neke’musiq’ank aawe

Maare wan naq taataw naq junjunq li aatin sa’eb’ li loq’laj hu neke’xtoch’ aach’ool, chanchan tz’iib’anb’il choq’ aawe laa’at. Maare taaweek’a naq neke’aatinak chawix ut neke’reek’asi aach’ool. Naru taak’e reetalil sa’eb’ laa loq’laj hu, malaj taatz’iib’a resil sa’ jun chik li hu re tzolok.

Sik’ li yaalil na’leb’ chirix li evangelio

Wan naq li yaalil na’leb’ chirix li evangelio (wan naq tzol’leb’ nayeeman reheb’) wankeb’ chi yeeb’il, malaj wankeb’ chi k’utb’il sa’ jun li seraq’ malaj jun jaljookil ru aatin. Patz’ aawib’, "K’a’ru li junelikil yaalil na’leb’ li yoo chi k’utmanq sa’eb’ li raqal a’in?"

Ab’i li Musiq’ej

K’e reetal li yookat chixk’oxlankil ut chireek’ankil, us ta maare jalan wi’ rik’in li aatin li yookat chirilb’al. Wan naq li k’a’ru nakak’ul chi jo’kan a’an ajwi’ li taaraj laa Choxahil Yuwa’ naq taatzol.

Juntaq’eetaheb’ li loq’laj hu aawik’in

K’oxla chan ru naq li k’a’ru yeeb’il resil malaj k’utb’il nak’anjelak sa’ laa yu’am. Jo’ jun eetalil, naru taapatz’ aawib’, "K’a’ru xink’ul laa’in li chanchan ajwi’ li yookin chirilb’al?" malaj "Chan ru naru tinb’aanu jo’ xb’aanu li kristiaan a’in sa’eb’ li loq’laj hu?"

Patz’ li patz’om naq yookat chi tzolok

Naq nakatzoleb’ li loq’laj hu, naru nachal li patz’om sa’ laa k’a’uxl. Maare taawanq li patz’om chirix li k’a’ru yookat chirilb’al, malaj chirix li k’a’ru yoo chi k’ulmank sa’ laa yu’am. K’oxlaheb’ li patz’om a’in, ut sik’ lix sumenkileb’ naq yookat chixtzolb’aleb’ li loq’laj hu.

Oksiheb’ li k’anjeleb’aal re tzolok

Re xtawb’al chik li na’leb’ chirixeb’ li raqal li nakawil,naru taawoksiheb’ li aatin toj rub’el li junjunq chi perel, li K’utul Raqal reheb’ li Loq’laj Hu, ut xkomoneb’ chik li k’anjeleb’aal.

Tz’iib’a li k’a’ru nakak’oxla ut nakaweek’a

K’iila paay chan ru naq naru taatz’iib’a resil li na’leb’ nakak’ul naq yookat chi tzolok. Jo’ jun eetalil, naru taak’e reetalil jun aatin malaj jun ch’uut chi aatin, ut taatz’iib’a li k’a’ru nakak’oxla chiru li loq’laj hu. Naru ajwi’ taatz’iib’a sa’ jalan chik li hu li k’a’ru nakak’oxla, nakaweek’a, ut li na’leb’ nakak’ul.

Tzoleb’ li raatineb’ li profeet ut apostol re roso’jikeb’ li kutan

Naru taawil li k’a’ru xe’xye li profeet ut li apostol sa’eb’ li kutan a’in chirixeb’ li na’leb’ nakataw sa’eb’ li loq’laj hu (qayehaq, chi’ilmanq conference.lds.org ut eb’ li Liahona).

Wotz li xatzol

Li aatinak chirix li na’leb’ xak’ul naq yookat chi tzolok aajunes nak’anjelak chixtzolb’aleb’ laa komon, a’ut jo’kan ajwi’ naxkawob’resi aana’leb’ chirix li k’a’ru xawil.

Yu’ami li k’a’ru nakatzol

Li xtzolb’aleb’ li loq’laj hu ink’a’ ka’ajwi’ nokoxmusiq’a—tento ajwi’ naq tooreek’asi chixjalb’al chan ru naq nokowan. Ab’i li k’a’ru naxye li Musiq’ej naq yookat chi tzolok, ut k’e aach’ool chixb’aanunkil li k’a’ru naxye.

Li Awa’b’ej Thomas S. Monson kixye: “Naq naqil ut naqak’oxlaheb’ li loq’laj hu, taqak’ul lix sahil hasb’ li Musiq’ej sa’ li qaam. Taaruuq taqataw xsumenkil li qapatz’om. Nokotzolok chirixeb’ li osob’tesink li neke’chal rik’in xpaab’ankil lix chaq’rab’ li Dios. Naqataw jun xnawom qach’ool chi tz’aqal chirix li qaChoxahil Yuwa’ ut aj Kolol qe, li Jesukristo, ut chirix lix rahomeb’ choq’ qe. Xtzolb’aleb’ li loq’laj hu rochb’een li tijok tixk’e chiqanaw chi tz’aqal naq tz’aqal yaal lix evangelio li Jesukristo. ... Naq najultiko’ qe li tijok ut naqak’e xhoonal xtzolb’aleb’ li loq’laj hu, li qayu’am taa’osob’tesiiq chi q’axal wi’chik ut taaseeb’anq li qiiq” (“Nunca caminamos solos,” Liahona, noviembre 2013,  122).