Li Kristo kixq’ax ru laj Satanas, xb’aan laj Robert T. Barrett

4–10 febrero.

Mateo 4; Lukas 4–5

”Lix Musiq’ li Qaawa’ wank sa’ inb’een”

Re xtikib’ankil lix kawresinkil aawib’ choq’ re li tzolok a’in, il ru Mateo 4 ut Lukas 4–5. Kim, Taaqehin—Choq’ reheb’ li komon ut li junkab’al naru chatenq’ankil chixtawb’al ruheb’ li ch’ol a’in, ut li tusleb’ aatin naru naxk’eheb’ laa na’leb’ re li k’utuk.

Xtz’iib’ankil li nakak’oxla

Xkanab’ankileb’ chi wotzok

Patz’ reheb’ li kok’al naq te’xnumsi li jalam-uuch re li Jesus chirib’ileb’ rib’. Naq li junjunq chi kok’al yoo chixk’ulb’al li jalam-uuch, kanab’eb’ chixwotzb’al k’a’ruhaq chirix li Jesus naq kiwan sa’ li ruchich’och’.

Xk’utb’al li tzol’leb’

Kok’al toj ka’ch’ineb’ xyu’am

Mateo 4:1–11; Lukas 4:1–13

Naru ninsik’ ru li us jo’ li Jesus.

Eb’ li kok’al toj ka’chineb’ xyu’am “ink’a’ neke’ru chi maakob’k” (Tz. ut S. 29:47). A’b’anan, li seraq’ chirix naq li Jesus kixkuy xnumsinkileb’ li raalehom laj tza naru naxwaklesiheb’ xch’ool li kok’al chixtikib’ankil xsik’b’al ru li chaab’il.

Kok’ k’anjel naru chi b’aanumank

• Seraq’i li resilaleb’ li aaleek kixk’ul li Jesus sa’ Mateo 4:1–11. (Chi’ilmanq ajwi’ “Ch’ol 11: Na’aaleek li Jesus”, Eb’ li Esilal sa’ li Ak’ Chaq’rab’, 30–31, malaj li video wan sa’ LDS.org). Sa’ jun chaab’il hoonal sa’ li seraq’, patz’: “K’a’ru nekek’oxla naq tento raj tixb’aanu li Jesus?”

• K’ut jun li jalam-uuch re li Jesukristo ut chirix a’an ch’olob’ li k’a’ raj ru tixsik’ ru xb’aanunkil jun li ch’ina al. Rik’in li junjunq chi chaab’il b’aanuhom, patz’ reheb’ li kok’al naq te’nach’o’q jun yokb’ chiru li jalam-uuch. Rik’in li junjunq chi b’aanuhom ink’a’ chaab’il, patz’ reheb’ naq te’xk’e jun xyokb’ chi ixb’ej.

• Tenq’aheb’ li kok’al chixtzolb’al li raatinul li “Tinsik’ ru li us,”, B’ichleb’aal choq’ reheb’ li Kok’al, 82–83; re xb’aanunkil a’an, oksiheb’ li jalam-uuch, k’a’aq re ru malaj jalan chik li tenq’ ilb’il li wan rilom rik’in li raatinul li b’ich.

Lukas 4:18–19

Li Jesukristo a’an lin Kolonel

Lukas 4:18–19 naxtus rajlil xcha’alil lix k’anjel li Jesus. Chan ru naru nakatenq’aheb’ li kok’al chixb’antioxinkil li k’a’ru kixb’aanu li Jesus choq’ reheb’?

Kok’ k’anjel naru chi b’aanumank

• Il ru Lukas 4:18–19 choq’ reheb’ li kok’al, ut ch’olob’ k’a’ru aj-e naq kitaqlaak chaq li Jesukristo sa’ li ruchich’och’ (chi k’utuk, chi k’ojob’ank ch’oolej ut chixk’irtesinkileb’ li kristiaan). Wotz li k’a’ru xb’aanuhom a’an choq’ aawe.

• Kanab’eb’ junjunq li kok’al chi wank chanchan naq sachsookeb’ xch’ool, raheb’ xch’ool malaj yajeb’. Patz’ reheb’ lix komon naq te’xk’utb’esi li k’a’ raj ru naru te’xb’aanu re xtenq’ankileb’. Ch’olob’ xyaalal naq li Jesukristo kichal chi k’utuk, chi k’ojob’ank ch’oolej, ut chi k’irtesink, ut naq tento taqataaqe lix b’aanuhom.

• K’uteb’ li jalam-uuch b’ar wi’ li Jesus yoo chixtz’aqob’resinkil ru junjunq lix k’anjel (chi’ilmanq Libro de obras de arte del Evangelio) ut patz’ reheb’ li kok’al naq te’xch’olob’ li k’a’ru yoo chixb’aanunkil li Jesus. K’uteb’ ajwi’ li jalam-uuch reheb’ li kristiaan li yookeb’ chixyalb’al wank jo’ li Jesus (naru nakataweb’ junjunq sa’eb’ li puktesinb’il hu re li Iglees).

• Tz’iib’a sa’ junjunqeb’ li kok’ setb’il hu eb’ li ch’ol aatin neke’tikla rik’in “Sa’ xk’ab’a’ li Jesukristo” (qayehaq “B’antiox re li Jesukristo, lin junkab’al naru taawanq chi junelik”). Kanab’eb’ li junjunq chi kok’al chixsik’b’al ru jun reheb’ li kok’ setb’il hu ut tenq’aheb’ chirilb’al ru li ch’ol aatin.

Mateo 4:18–22; Lukas 5:1–11

Li Jesukristo nokoxb’oq chi wank jo’ “aj sik’onel reheb’ li qas qiitz’in choq’ ruuchil li kar.”

Lix b’oqom li Qaawa’, “Chineetaaqe ut tink’e naq eb’ lee ras eeriitz’in chik teesik’ choq’ ruuchil li kar” (Mateo 4:19), a’an choq’ reheb’ chixjunil, jo’eb’ ajwi’ li kok’al.

Kok’ k’anjel naru chi b’aanumank

• Kanab’eb’ wiib’ li kok’al chi wank chanchan naq a’aneb’ laj Simon Pedro ut laj Andres naq yookat chirilb’al ru Mateo 4:18–22. Tenq’aheb’ li kok’al chixk’eeb’al reetal li k’a’ru ke’xtz’eqtaanaheb’ li winq’ a’in re xtaaqenkil li Jesus.

• Kanab’eb’ li kok’al chixk’eeb’aleb’ xhoonal chirib’ileb’ rib’ re xseraq’inkileb’ li seraq’ sa’eb’ li raqal a’an rik’in roksinkil li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al.

• B’ichahomaq sa’ komonil “Tintaaqe li kixkʼuubʼ choqʼ we,”108> B’ichleb’aal choq’ reheb’ li Kok’al, 86–87. K’a’ru naru naqatzol sa’ li b’ich a’an chirix xtaaqenkil li Jesukristo?

• Oksi li perel re kok’ k’anjel re li xamaan a’in re aatinak rik’ineb’ li kok’al chirix chan ru naru naq te’wanq choq’ “aj sik’onel reheb’ li qas qiitz’in choq’ ruuchil li kar” sa’ xtaaqenkil li Jesus. Naru ajwi’ teeb’anu jun li b’atz’unk re xk’ulb’aleb’ rib’: set wiib’ reetalil li junjunq chi kar, kanab’ chi huphu, ut kanab’eb’ li kok’al chixb’alq’usinkil junjunq sa’ jun sut re xtawb’al li neke’xk’ul rib’.

Li Kristo naxb’oqeb’ lix tzolom xb’aan laj Gary Ernest Smith.

Xk’utb’al li tzol’leb’

Kok’al ak ninqeb’

Mateo 4:1–11; Lukas 4:1–13

Li Jesus kixk’am inb’e re xnumsinkil li aaleek.

Li Jesukristo ajwi’ ki’aaleek xb’aan laj tza, a’b’an maajun wa kixkanab’ rib’. Chan ru naru nakatenq’aheb’ li kok’al chixtaaqenkil lix b’aanuhom li Jesus?

Kok’ k’anjel naru chi b’aanumank

• Yiib’ jun li kaaxukuut sa’ li pizarron rik’ineb’ lix jolomil na’leb’ a’in Aaleek naxb’aanu laj tza ut Lix sumenkileb’ xb’aan li Jesus. Tenq’aheb’ li kok’al chixnujob’resinkil li kaaxukuut rik’in roksinkil Mateo 4:1–11 ut Lukas 4:1–13. Patz’ reheb’ li kok’al chan ru naru neke’xtaaqe lix b’aanuhom li Jesus.

• Tz’iib’a resilal junjunq reheb’ li hoonal naq jun li ch’ina al naru na’aaleek chixsik’b’al ru li ink’a’ us. Kanab’ jun li ch’ina al chixsik’b’al ru jun re rilb’al ru, ut aatinanqex jo’ tzoleb’aal chirix chan ru naru neke’xnumsi li aaleek.

Mateo 4:1–2

Li kuyuk sa’ naru nikinixtenq’a chireek’ankil naq nach’in rik’in li qaChoxahil Yuwa’.

Naq maji’ naxtikib’ lix k’anjel, li Jesus kixkuy xsa’ ut “ki’aatinak rik’in li Dios” (Mateo 4:2. chi jaltesinb’il ru xb’aan laj Jose Smith). Tenq’aheb’ li kok’al chirilb’al chan ru naq li kuyuk sa’ naru naxk’e xkawilaleb’ sa’ musiq’ej ut naru naxtenq’aheb’ chireek’ankileb’ rib’ chi nach’ rik’in li qaChoxahil Yuwa’.

Kok’ k’anjel naru chi b’aanumank

• Kanab’ jun li ch’ina al chirilb’al ru chi kaw xyaab’ xkux Mateo 1 li wan’ sa’ JJS, ut Mateo 2 li wan sa’ li Ak’ Chaq’rab’. K’a’ru kixb’aanu li Jesus re “wank rik’in li Dios”? Wotz chan ru naq li kuyuk sa’ nakatxtenq’a chireek’ankil aawib’ chi nach’ rik’in li qaChoxahil Yuwa’.

• Kanab’eb’ li kok’al li ak xkuyumeb’ xsa’ chi rub’elaj chixwotzb’al li k’a’ru xe’reek’a. Chan raj ru te’xch’olob’ li kuyuk sa’ chiru anihaq maajun wa xkuyum xsa’?

• Tz’iib’aheb’ li patz’om chirix li kuyuk sa’ (qayehaq, k’a’ut, jo’q’e, malaj chan ru naqakuy qasa’) chiruheb’ kok’ setb’il hu ut k’eheb’ sa’ junaq li sek’. Kanab’eb’ li kok’al chixsik’b’al ru junaq li patz’om ut chixyalb’al xsumenkil. K’a’ru li numsihom naru nakawotz laa’at ut eb’ li kok’al chirix li kuyuk sa’?

Lukas 4:16–22, 28–30

Li Jesukristo a’an lin Kolonel.

K’oxlan chirix chan ru naq li Kolonel narosob’tesi laa yu’am. Chan ru naru nakatenq’aheb’ li kok’al chixb’antioxinkil chi us li naxk’anjela li Jesus sa’eb’ lix yu’am?

Kok’ k’anjel naru chi b’aanumank

• Kanab’eb’ li kok’al chi chalk chi kawresinb’ileb’ re xyeeb’al chi k’osb’il ru Lukas 4:16–30. Maare us roksinkil “Ch’ol 17: Xjosq’ileb’ li tenamit sa’ Nazaret,” Eb’ li Esilal sa’ li Ak’ Chaq’rab’,”42–43; li video sa’ ( LDS.org); malaj li video “Jesús declara que Él es el Mesías” (LDS.org).

• Il ru Lukas 4:18 chi kaw xyaab’ aakux ut eb’ li kok’al te’ril ajwi’ ru chi ch’anch’o. Patz’ reheb’ naq te’xtz’iib’a jun xtusulal li k’a’aq re ru li kichal chixb’aanunkil li Kolonel. Kanab’eb’ li kok’al chixyeeb’al resil chan ru naq li Kristo kixb’aanu li k’a’aq re ru a’an, sa’eb’ li loq’laj hu malaj sa’eb’ lix yu’am.

Mateo 4:18–22; Lukas 5:1–11

Li Jesukristo nokoxb’oq chixtaaqenkil ut chi wank jo’ “aj sik’onel reheb’ li qas qiitz’in choq’ ruuchil li kar.”

Wan naab’al paay ru chan ru naq eb’ li kok’al naru neke’xtaaqe li Kolonel ut wank jo’ “aj sik’onel reheb’ li ras riitz’in choq’ ruuchil li kar” (Mateo 4:19). Chan ru taatenq’aheb’ li kok’al chirilb’al li chaab’ilal naru neke’xk’utb’esi chiruheb’ li jun siir chik?

Kok’ k’anjel naru chi b’aanumank

• Kanab’eb’ li kok’al chirilb’al ru Mateo 4:18–22 ut Lukas 5:1–11. Chan ru ke’sumen lix tzolom li Jesus naq kixb’oqeb’ chixtaaqenkil? K’a’ru naru naqab’aanu re xtaaqenkil lix b’aanuhom?

• K’ut chiruheb’ li kok’al li k’anjeleb’aal re karab’k malaj lix jalam-uuch jun aj kar. K’a’ru naraj naxye wan jo’ “aj sik’onel reheb’ li qas qiitz’in choq’ ruuchil li kar”? K’a’ru li k’anjeleb’aal wan qe re qatenq’ankil chi wank jo’ aj sik’onel reheb’ li qas qiitz’in choq’ ruuchil li kar?

Xb’oqb’aleb’ chi tzolok sa’ kab’l

B’oqeb’ li kok’al chixwotzb’al rik’ineb’ lix junkab’al li k’a’ru xe’xtzol chirix li wank jo’ aj sik’onel reheb’ li qas qiitz’in choq’ ruuchil li kar.

Xchaab’ilob’resinkil li qak’utum

Eb’ li kok’al naru neke’xk’e reetal lix wankil li Musiq’ej. K’ut chiruheb’ li kok’al naq eb’ li eek’ahom re tuqtuukilal, rahok, ut sahilal li neke’xk’ul naq neke’aatinak malaj naq neke’b’ichan chirix li Jesukristo ut lix evangelio neke’chal rik’in li Santil Musiq’ej. Eb’ li eek’ahom a’an naru neke’xkawob’resi lix nawomeb’ xch’ool.