“4–10 febrero. Mateo 4; Lukas 4–5; “Lix Musiq’ li Qaawa’ wank sa’ inb’een” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“4–10 febrero. Mateo 4; Lukas 4–5,” Kim, Taaqehin—Choq’ reheb’ li komon ut li junkab’al: 2019
Li Kristo kixq’ax ru laj Satanas, xb’aan laj Robert T. Barrett
Febrero 4–10
Mateo 4; Lukas 4–5
“Lix Musiq’ li Qaawa’ wank sa’ inb’een”
Re xtikib’ankil, chawil sa’ Mateo 4 ut Lukas 4–5, ut k’e reetal k’a’ru li na’leb’ nakataw. Li na’leb’ re tzolok sa’ li hu a’in naru nakatxtenq’a chixk’eeb’al reetal li xninqal ru na’leb’ sa’eb’ li ch’ol a’in.
Xtz’iib’ankil li k’a’ru nakak’oxla
Chalen chaq xka’ch’inal, chanchan naq li Jesus ak kixnaw naq wan jun li loq’laj k’anjel kawresinb’il choq’ re. Naq yoo chaq li Jesus chixkawresinkil lix k’anjel sa’ li ruchich’och’, laj tza kiraj xch’ikb’al xkab’il rix xch’ool li Kolonel. “Wi laa’at Ralal li Dios,” chan laj Satanas (Lukas 4:3, tiqb’il xkawilal li aatin). A’b’an li Kolonel ak wanjenaq chi aatinak rik’in lix Yuwa’ li wan sa’ Choxa. A’an kixnaweb’ ru li loq’laj hu, ut kixnaw ani a’an. Choq’ re a’an, lix yeechi’ihom laj Satanas—“Tink’e aawe chixjunil a’ wankilal ut a’ loq’al a’in” (Lukas 4:6)—maak’a’ ru, xb’aan naq rik’in naq kixkawresi rib’ chiru chixjunil lix yu’am, li Kolonel kiru chixk’ulb’al lix wankil li Musiq’ej (Lukas 4:14). Chi jo’kan, us ta kixk’ul li aaleek, lix yalb’al rix, ut li tz’eqtaanaak, li Jesukristo maajo’q’e ki’eek’an sa’ li k’anjel xaqab’anb’il choq’ re: “Tento tinpuktesi lix Chaab’il Esil lix nimajwal awa’b’ejihom li Dios ... xb’aan naq a’in aj-e naq xintaqlaak chaq” (Lukas 4:43).
Li na’leb’ re xtzolb’aleb’ li loq’laj hu aajunes
Li aatinak rik’in li Dios nikinxkawresi chi k’anjelak chiru.
Re xkawresinkil rib’ choq’ re lix k’anjel, li Jesus xko’o sa’ li yamyookil ch’och’ “re taawanq rik’in li Dios” JJS, Mateo 4:1. K’oxla k’a’ru nakab’aanu re naq nach’ taaweek’a aawib’ rik’in li Dios. Chan ru naq a’in nakatxkawresi choq’ re li k’anjel taaraj a’an naq taab’aanu?
Li Jesukristo kixk’ut li chaab’il b’e chiwu rik’in xq’axb’al ru li aaleek.
Wan naq neke’reek’a li kristiaan naq wankeb’ xmaak wi yal neke’aaleek chi maakob’k. A’b’anan li Kolonel, us ta kiwan chi maak’a’ xmaak sa’ xyu’am (Hebreos 4:15), kixk’ul li aaleek. Naru nak’ojob’aak qach’ool rik’in xnawb’al naq, rik’in naq li Kristo ajwi’ kixk’ul ut kixq’ax ru li aaleek, a’an naxnaw ru li aaleek naqak’ul laa’o, ut naru nokoxtenq’a chixq’axb’al ru (chi’ilmanq Hebreos 2:18; Alma 7:11–12).
Naq nakawil Mateo 4:1–11 ut Lukas 4:1–13, k’a’ru nakatzol li taatenq’anq aawe naq taak’ul li aaleek? Taaruuq raj taatusub’ li na’leb’ sa’ jun kaaxukuut jo’ a’in:
|
Jesukristo |
Laa’in |
|---|---|
Jesukristo K’a’ru li kiraj laj Satanas naq tixb’aanu li Kristo? Roksinkil lix wankil re xsahob’resinkil xtz’okajik. | Laa’in K’a’ru nikinraale laj Satanas re tinb’aanu? |
Jesukristo Chan ru naq li Kristo kixkawresi rib’ chixq’axb’al ru li aaleek? Kikuyuk sa’; xko’o chi wank rik’in li Dios; kixnaweb’ ru li loq’laj hu. | Laa’in Chan ru naru ninkawresi wib’ chixq’axb’al ru li aaleek? |
Jesukristo | Laa’in |
K’a’ chik ru li na’leb’ nakak’ul rik’in Mateo 4 jo’ jaltesinb’il ru xb’aan laj Jose Smith? (Chi’ilmanq chixjunileb’ li raqal sa’ Mateo 4 li wan sa’ lix jaltesihom ru laj Jose Smith.)
Chi’ilmanq ajwi’ 1 Korintios 10:13; Alma 13:28; Moises 1:10–22; “Aaleek, Aalenk” sa’ li K’utul Raqal reheb’ li Loq’laj Hu.
Li Jesukristo a’an li Mesias li yeeb’il chaq resil najter.
Wi taapatz’manq aawe k’a’ru kitaqlaak li Jesukristo sa’ ruchich’och’ chixb’aanunkil, k’a’ raj ru taaye? Sa’ Lukas 4:18–19, li Kolonel kixye xyaalal jun raqal lix k’anjel rik’in xyaab’asinkil jun reheb’ lix profeetil aatin laj Isaias chirix li Mesias (chi’ilmanq Isaias 61:1–2). K’a’ru nakatzol chirix lix k’anjel naq nakawileb’ li raqal a’in?
Li Jesukristo kixch’olob’ xyaalal naq a’an li Mesias.
Us ta eb’ laj Judio chiru naab’al cient chihab’ yookeb’ chiroyb’eninkil naq taatz’aqloq ru lix profeetil aatin laj Isaias, naab’al reheb’ ink’a’ ke’xpaab’ naq li Jesus a’an li Mesias naq kixye, “Li tz’iib’anb’il aatin a’in li toja’ xerab’i xtz’aqlok ru anajwan” (Lukas 4:21). Naq nakawil Lukas 4:20–30 (chi’ilmanq ajwi’ Markos 6:1–6, k’oxla k’a’ raj ru taak’oxla wi ta wankat sa’ xna’ajeb’ li tenamit aj Nazaret. Ma wan k’a’ru li taaramoq raj aawe chixk’ulb’al li Kristo chi anchal aach’ool jo’ aj Kolol aawe?
Chi’ilmanq ajwi’ Mosiah 3:5–12; “Jesus declara que Él es el Mesías” (video, LDS.org).
Wi ninkanab’ wib’ chiru li Qaawa’, a’an naru nikixtenq’a chixtawb’al li diosilal li chalel we.
Li Awa’b’ej Ezra Taft Benson kixye, “Eb’ li winq ut ixq li neke’xq’axtesi lix yu’ameb’ chiru li Dios te’xtaw naq a’an q’axal nim wi’chik ru li taaruuq chixb’aanunkil rik’in lix yu’ameb’ chiru li ke’ru raj chixb’aanunkil eb’ a’an” (Enseñanzas de los Presidentes de la Iglesia: Ezra Taft Benson [2014], 47). A’in li kixk’ul laj Pedro, ut eb’ li rech aj kar. Li Jesus kixtenq’aheb’ chixtawb’al ru naq k’a’jo’ wi’chik li ke’ru chixb’aanunkil chiru chapok kar—taaruuq te’wanq chi sik’ok winq ruuchil kar (Mateo 4:19; chi’ilmanq ajwi’ Lukas 5:10). Re xtenq’ankileb’ chirilb’al a’in, li Jesus kixtzoleb’ rik’in li k’a’aq re ru ak nawb’il ru xb’aaneb’.
Jo’q’e xaweek’a naq li Kolonel yoo chab’oqb’al re taataaqe? Chan ru naru taak’ut chiru li Qaawa’ naq wan aach’ool “chixkanab’ankil chixjunil” (Lukas 5:11) re xtaaqenkil? K’oxlaheb’ li patz’om a’in naq nakawil sa’ Mateo 4:18–22 ut Lukas 5:1–11.
Chi’ilmanq ajwi’ “Kim, taaqehin,” Eb’ li B’ich, ajl 66.
Li na’leb’ re xtzolb’aleb’ li loq’laj hu sa’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taab’aanu:
Li Jesus yoo chaq chi kuyuk sa’ naq kichal laj tza chiraalenkil. K’a’ru li na’leb’ naru naqak’ul sa’ li esil a’in chirix lix wankil li kuyuk sa’? Li na’leb’ chirix li aatin “Kuyuk sa’ ” sa’ li K’utul Raqal reheb’ li Loq’laj Hu naru nakatxtenq’a sa’ aatinak sa’ junkab’al chirix li kuyuk sa’. Naru taapatz’ reheb’ li komon sa’ li junkab’al chixyeeb’al k’a’ru xe’xk’ul rik’in li kuyuk sa’. Maare texruuq chixb’aanunkil sa’ junkab’al li kuyuk sa’ choq’ re junaq ajom.
Naq laj Satanas kiraale li Kristo re tixjaltesiheb’ li pek choq’ wa, a’an kixyal rix lix diosilal li Kristo naq kixye, “Wi laa’at Ralal li Dios” (Mateo 4:3, tiqb’il xkawilal li aatin). K’a’ut naq laj Satanas naxyal xq’e re taawiib’anq qach’ool chirix li qadiosilal? Chan ru naq naxb’aanu a’in? (Chi’ilmanq ajwi’ Moises 1:10–23.)
Chirix naq li Jesus kiyale’ rix sa’ tz’ejwalej ut sa’ musiq’ej, ki’ok chixk’oxlankil laj Jwan aj Kub’sihom Ha’, li wan sa’ tz’alam: “Anajwan ut li Jesus kixnaw naq laj Jwan tz’apb’il sa’ tz’alam, ut kixtaqlaheb’ li anjel, ut k’ehomaq reetal, ke’chal ut ke’k’anjelak chiru” (JJS Mateo 4:11). Chan ru naq noko’osob’tesiik naq naqataaqe li Kristo rik’in xk’oxlankileb’ li qas qiitz’in xb’een wa chiqu laa’o? Chan ru naru taqab’aanu jo’ kixb’aanu a’an?
Ma naqanaw ru anihaq li rahob’tesinb’il, malaj li taaraj ru “ach’ab’aak”? (Lukas 4:18). Chan ru naq naru naqatenq’aheb’ li qas qiitz’in chixk’ulb’al lix k’irtesinkileb’ ut li rach’ab’ankileb’ xb’aan li Kolonel? Naru ajwi’ nekex’aatinak chirix chan ru naq xb’aanunkileb’ li k’uub’anb’il k’anjel sa’eb’ li santil ochoch natenq’an chixk’amb’al chaq li kole’k chiruheb’ “li wankeb’ sa’ tz’alam” (Lukas 4:18).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Xyu’aminkil lix evangelio li Jesukristo. Jo’ na’b’ej yuwa’b’ej malaj jo’ aj k’utunel, “li q’axal aajel ru a’an ... xyu’aminkil li evangelio chi anchal aach’ool. ... A’an a’in li tz’aqal b’e re taaruuq taawanq aawik’in li Santil Musiq’ej. Moko aajel ta ru naq tz’aqalaq aawe aawu, yal tento xyalb’al aaq’e chi yaal—ut xsik’b’al lix kuyb’al laa maak rik’in lix tojb’al rix li maak xb’aan li Kolonel wi nakattichk’ok” (Li k’utuk jo’ li Kolonel, 13).
Li b’oqok, xb’aan laj Jorge Cocco