18–24 marzo

Mateo 13; Lukas 8;  13

“Ani wan xxik, chi’ab’inq”

Naq nakawil sa’ Mateo 13 ut Lukas 8; 13, k’oxla chan ru naq taakawresi aawib’ re “rab’inkil” ut xtawb’al ru li raatin li Kolonel sa’eb’ li jaljookil ru aatin a’in. K’a’ru taab’aanu re xk’anjelankil li aatin a’in sa’ laa yu’am?

Xtz’iib’ankil li nakak’oxla

Jun paay reheb’ lix yehom li Kolonel li q’axal jultikanb’il a’aneb’ li kok’ seraq’, jaljookil ru aatin yeeb’il reheb’. Maawa’eb’ yal kok’ seraq’ chirix li k’a’aq re ru re wulaj wulaj. Sa’eb’ a’an wan li yaalil na’leb’ chirix lix awa’b’ejihom li Dios choq’ reheb’ li ani kawresinb’ileb’ xmusiq’. Jun reheb’ li xb’een jaljookil ru aatin li tz’iib’anb’il sa’ li Ak’ Chaq’rab’—li jaljookil ru aatin chirix laj awinel (chi’ilmanq Mateo 13:3–23—naxk’e qab’oqb’al chixtz’ilb’al rix chan ru qach’ool naq naqab’i li raatin li Dios. “Xb’aan naq ani nak’uluk,” chan li Jesus, “re a’an taak’eemanq, ut taawanq re xnimal chik li naab’alil (Mateo 13:10, chi jaltesinb’il ru xb’aan laj Jose Smith).  Chi jo’kan, naq noko’ok chixtzolb’aleb’ li jaljookil ru aatin re li Kolonel—malaj k’a’ruhaq chik li kixk’ut—us naq tootiklaaq rik’in xtz’ilb’al rix li qach’ool, ut xk’eeb’al reetal ma “chaab’il li ch’och’ ” yooko chirawb’al wi’ li raatin li Dios, re taaruuq chi nimank, chi atz’umak, chi q’ano’k, ut chiruuchininkil li k’a’ru taa’osob’tesinq qe laa’o ut re li qajunkab’al chi naab’al (Mateo 13:8).

Li na’leb’ re xtzolb’aleb’ li loq’laj hu aajunes

Mateo 13

K’a’ru “lix nimajwal wankilal li choxa” li yeeb’il resil xb’aan li Kristo sa’ Mateo 13?

Sa’ li ch’ol a’in, “lix nimajwal wankilal li choxa” a’an lix tz’aqal Iglees li Kristo, a’an li awa’b’ejihom re choxa arin sa’ ruchich’och’. Re xtawb’al chik li na’leb’, chi’ilmanq li K’utul Raqal reheb’ li Loq’laj Hu, “Awa’b’ejihom re choxa malaj rawa’b’ejihom li Dios.”

Mateo 13:3–23; Lukas 8:4–15

Tento taawanq inch’ool chi kawresinb’il re xk’ulb’al li raatin li Dios.

K’a’ut naq wankeb’ li neke’xk’ul li yaal sa’ xch’ooleb’, ut wankeb’ chik li ink’a’ neke’k’uluk re? Naq nakawil li jaljookil ru aatin chirix laj awinel, naru nakatxtenq’a chixk’oxlankil chan ru naq nakak’ul li yaalil na’leb’ rik’in li Qaawa’. Maare us xb’een wa rilb’al li aatin sa’eb’ li raqal 3–8 re Mateo 13 rochb’een li wan sa’eb’ li raqal 18–23, b’ar wi’ ch’olob’anb’il xyaalal. K’a’ru naru taab’aanu re taawanq “chaab’il ch’och’ ” aawik’in? K’a’ruheb’ li “k’ix” li neke’ramok aawe chirab’inkil ut chixtaaqenkil chi yaal li raatin li Dios?

Chi’ilmanq ajwi’ Lukas 13:34; Mosiah 2:9; 3:19; Alma 12:10–11; 32:28–43; Dallin H. Oaks, “Li jaljookil ru aatin chirix laj awinel,” Jolomil Ch’utub’aj-ib’ re abril 2015.

Mateo 13:24–35, 44–52

Eb’ li jaljookil ru aatin re li Jesus nikine’xtenq’a chixtawb’al ru lix k’iijik lix Iglees, ut li k’a’ru chalel choq’ re.

Li profeet aj Jose Smith kixk’ut naq eb’ li jaljookil ru aatin sa’ Mateo 13 neke’aatinak chirix lix k’iijik ut li k’a’ru tixk’ul li Iglees sa’ roso’jikeb’ li kutan (chi’ilmanq Enseñanzas de los Presidentes de la Iglesia: José Smith [2007], 309–321). Naq nakawileb’ li jaljookil ru aatin a’in, tz’iib’a k’a’ru neke’xk’ut chawu chirix lix Iglees li Qaawa’ (naru ajwi’ taawil li k’a’ru kixye laj Jose Smith chirix junjunq reheb’ li jaljookil ru aatin a’in):

• Li trigo ut li yib’ aj pim (13:24–30, 36–43): Eb’ laj maak ut li tiikeb’ xch’ool neke’niman sa’ wiib’al toj reetal li roso’jik li ruchich’och’.

• Li riyajil li mostaas (13:31–32):

• Lix yu li kaxlan wa (13:33):

• Li muqmuukil b’ihomal, ut li q’ol terto xtz’aq (13:44–46):

• Li yooy (13:47–50):

• Laj eechal kab’l (13:52):

Chirix xk’oxlankileb’ li jaljookil ru aatin a’in, k’a’ru nakaweek’a naq tento taab’aanu re naq mas wi’chik yooqat chi tz’aqonk sa’ xk’anjel lix Iglees li Kristo sa’eb’ li kutan a’in? K’a’ru li patz’om li neke’chal sa’ laa k’a’uxl li tate’xtenq’a chixk’anjelankileb’ li jaljookil ru aatin a’in? Qayehaq, maare taapatz’, “K’a’ru wan inch’ool chixmayejankil choq’ re li Iglees?”

Chi’ilmanq ajwi’ li K’utul Raqal reheb’ li Loq’laj Hu, “Jaljookil ru aatin.”

Lix evangelio li Jesukristo a’an jun li “lemtz’ q’ol terto xtz’aq” (Mateo 13:46).

Mateo 13:24–30, 36–43

Eb’ li tiikeb’ xch’ool tento te’nimanq sa’ xyanqeb’ laj maak toj sa’ roso’jik li ruchich’och’.

Re xtz’ilb’al rix li jaljookil ru aatin a’in, naru xk’uub’ankil jun jalam-uuch, ut xtz’iib’ankil lix ch’olob’ankil sa’ Mateo 13:36–43 ut sa’ Tzol’leb’ ut Sumwank 86:1–7. Li yib’ aj pim yeeb’il resil a’an “jun pim wan xmay, li chanchan li trigo. Ink’a’ naru natz’ile’ rix ma trigo toj reetal naq xk’iik chi tz’aqal” (K’utul Raqal reheb’ li Loq’laj Hu, “Yib’ aj pim”). K’a’ru li yaalil na’leb’ sa’ li jaljookil ru aatin a’in li nakatreek’asi chi wank chi tiik chi paab’ank, us ta wan li maa’usilal sa’ li ruchich’och’?

Lukas 8:1–3

Chan ru naq eb’ li ixq ke’k’anjelak chiru li Kolonel?

“Wankeb’ li tzolom ixq li ke’b’eek rochb’een li Jesus ut eb’ li Kab’laju, li ke’tzolok rik’in li Jesus chirix li k’a’ru re li musiq’ej, ut ke’k’anjelak chiru rik’in li k’a’ru re li yu’am a’in. ... Eb’ li ixq a’in ke’xk’ul xtenq’ankileb’ rik’in lix k’anjel li Jesus—li sahil esil re lix evangelio ut lix wankilal chi k’irtesink—a’ut jo’kan ajwi’ ke’k’anjelak chiru, ut ke’xk’e re a’an li k’a’ru reheb’ ut lix anchalileb’ xch’ool” (Hijas en mi reino [2011], 4–5). Eb’ li ixq li ke’taaqenk re li Kolonel jo’kan ajwi’ ke’xch’olob’ xyaalal a’an (chi’ilmanq Linda K. Burton, “Eb’ li ixq k’ojk’ookeb’ xnawom,” Jolomil Ch’utub’aj-ib’ re abril 2017).

Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al

Naq nakatzol li raatin li Kolonel rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq re laa junkab’al. Aʼin junjunq li naʼlebʼ naru taabʼaanu:

Mateo 13

Naq eb’ li komon sa’ li junkab’al yookeb’ chirilb’aleb’ lix jaljookil ru aatin li Kolonel, maare taawulaq chiruheb’ xyiib’ankil sa’ xk’a’uxl jun li jaljookil ru aatin chirix li k’a’ruhaq nawb’il ru xb’aaneb’, re xk’utb’al li yaalil na’leb’ chirix lix awa’b’ejihom li choxa (li Iglees).

Mateo 13:3–23; Lukas 8:4–15

K’a’ru naru naqab’aanu jo’ junkab’al re taawanq “chaab’il ch’och’ ” sa’ li qach’ool ut sa’ li qochoch? (Mateo 13:23). Wi wankeb’ li kok’al li ka’ch’ineb’ xyu’am sa’ laa junkab’al, naru xpatz’b’al reheb’ li komon naq te’xk’utatq li na’leb’ chan ru xkawresinkil li qach’ool chirab’inkil li raatin li Dios, ut eb’ li jun siir chik naru te’xq’ehi k’a’ru yookeb’.

Mateo 13:13–16

Chan ru naru nakatenq’aheb’ li komon sa’ laa junkab’al re te’xtaw ru lix aajelil ru xk’ulb’al chi anchaleb’ xch’ool li raatin li Kristo? Jo’ jun eetalil, naru taatz’ap xxik jun li komon naq nakayaab’asi chi timil lix yaab’ aakux li aatin sa’ Mateo 13:13–16. K’a’ru xtaw ru li komon sa’ li raqal a’an? K’a’ru xk’anjel lix naq’ qu, li qaxik, ut li qach’ool sa’ xk’ulb’al li raatin li Dios? Chan ru naq wan naq naqatz’ap li xnaq’ qu, li qaxik, ut li qach’ool chiru li raatin li Dios?

Mateo 13:44–46

Chan ru naq juntaq’eeteb’ li wiib’ chi winq sa’eb’ li jaljookil ru aatin a’in? Ma wan chik k’a’ru tento raj taqab’aanu qajunes ut jo’ junkab’al re naq taawanq lix awa’b’ejihom li Dios xb’een wa sa’ li qayu’am?

Lukas 13:11–17

Chan ru naru naqab’aanu li kixb’aanu li Kristo ut taqakoleb’ li tenamit chiru preexil?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil laa k’utum

Xtzolb’al jun raqal. Sik’ ru jun raqal sa’eb’ li loq’laj hu li mas nawulak chiru laa junkab’al, ut k’e xb’oqb’aleb’ li komon naq te’xtzol. Li Elder Richard G. Scott kixye, “Naq naqatzol jun raqal sa’eb’ li loq’laj hu, na’ok a’an choq’ jun qochb’een li ink’a’ nokoxkanab’ chirix xnumik li kutan” (“El poder de las escrituras,” Liahona, noviembre 2011, 6).

Jaljookil ru aatin chirix laj awinel, xb’aan laj George Soper