“Agosto 5–11. Mga Taga-Roma 1–6: ‘Ang Gahum sa Dios alang sa Kaluwasan’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Agosto 5–11. Mga Taga-Roma 1–6,” Dali, Sunod Kanako—Alang sa mga Indibidwal ug mga Pamilya: 2019
Agosto 5–11
Mga Taga-Roma 1–6
“Ang Gahum sa Dios alang sa Kaluwasan”
Ang pagrekord sa mga pag-aghat makatabang nimo sa paghinumdom unsa ang gitudlo sa Espiritu kanimo. Ikonsiderar usab ang pagrekord kon unsay imong gibati mahitungod niini nga mga pag-aghat.
Irekord ang Imong mga Impresyon
Sa panahon nga gisulat ni Pablo ang iyang Sulat [Epistola] ngadto sa mga miyembro sa Simbahan sa Roma, sa nagkalain-laing grupo sa mga Judeo ug mga Hentil, ang Simbahan ni Jesukristo midaghan pag-ayo labaw sa gamay nga grupo sa mga tumutuo gikan sa Galilea. Mga 20 ka tuig human sa Pagkabanhaw sa Manluluwas, dihay mga kongregasyon sa mga Kristiyano hapit bisan asa nga mabiyahian sa mga Apostoles—lakip sa Roma, ang kapital sa dako nga gingharian. Apan samtang ang tumong nga tigpaminaw sa epistola ni Pablo mao ang mga Santos nga taga-Roma, ang iyang mensahe alang sa tanan, ug naglakip kini natong tanan karon: “Ang maayong balita … mao ang gahum sa Dios alang sa kaluwasan sa matag usa nga nagatuo” (Mga Taga-Roma 1:16).
Mga Ideya alang sa Personal nga Pagtuon sa Kasulatan
Mga Taga-Roma–Filemon
Unsa ang mga sulat [epistola] ug giunsa kini sa pag-organisar?
Ang mga epistola [sulat] mao ang mga sulat nga gisulat sa mga lider sa Simbahan ngadto sa mga Santos sa lain-laing bahin sa kalibutan. Si Apostol Pablo misulat sa kadaghanan sa mga epistola [sulat] diha sa Bag-ong Tugon—sugod sa Mga Taga-Roma ug nahuman sa Filemon. Ang iyang mga epistola giorganisar pinaagi sa gitas-on. Bisan og ang Mga Taga-Roma mao ang unang sulat [epistola] sa Bag-ong Tugon, sa tinuod gisulat kini sa hapit na mahuman ang misyonaryo nga panaw ni Pablo. Alang sa dugang nga impormasyon mahitungod sa mga epistola, tan-awa sa Giya ngadto sa mga Kasulatan, “Epistola [Sulat] ni Pablo, Mga.”
Kon magpakita ko og pagtuo sa Manluluwas pinaagi sa pagtuman sa Iyang mga sugo, ako mahimong matarung pinaagi sa Iyang grasya.
Ang mosunod nga mga kahulogan makatabang nimo nga mas makasabut sa Epistola [Sulat] ngadto sa Mga Taga-Roma:
-
Ang balaod:Sa dihang si Pablo nagsulat “sa lagda,” nagpasabut siya sa lagda ni Moises. Sa samang paagi, ang pulong “mga buhat” sa mga sinulat ni Pablo sa kasagaran nagpasabut sa mga seremonya ug mga ritwal sa balaod ni Moises. Gitandi ni Pablo kini nga balaod “sa lagda sa pagtuo” (tan-awa sa Mga Taga-Roma 3:27–31), o sa doktrina ni Jesukristo, kinsa mao ang tinuod nga tinubdan sa atong kaluwasan.
-
Sirkunsisyon, walay sirkunsisyon:Sa karaan, ang sirkunsisyon mao ang usa ka timailhan o simbolo sa pakigsaad sa Dios nga gihimo uban ni Abraham. Gigamit ni Pablo ang termino nga “sirkunsisyon” nga nagpasabut sa mga Judeo (ang katawhan sa pakigsaad) ug “walay sirkunsisyon” nga nagpasabut ngadto sa mga Hentil (kadtong kinsa walay labut sa pakigsaad ni Abraham). Ang sirkunsisyon wala na kinahanglana isip usa ka timailhan sa pakigsaad sa Dios uban sa Iyang mga katawhan (tan-awa sa Mga Buhat 15:23–29).
-
Kapaangayan, paghatag og kaangayan, nahatagan og kaangayan:Kini nga mga termino nagpasabut sa kapasayloan, o pagpasaylo, sa sala. Kon kita nahatagan og kaangayan, kita gipasaylo, gipahayag nga walay sala, ug gawasnon gikan sa mahangturong silot alang sa atong mga sala. Sumala sa gipasabut ni Pablo, nahimo kining posible pinaagi ni Jesukristo (tan-awa sa Giya ngadto sa mga Kasulatan, “Kapaangayan, Paghatag og kaangayan,” scriptures.lds.org; tan-awa usab sa D. Todd Christofferson, “Justification and Sanctification,” Ensign, Hunyo 2001, 18–25). Sa Mga Taga-Roma, ang mga pulong sama sa matarung ug pagkamatarung makita nga mga synonym alang sa mga pulong sama sa makiangayon ug kapaangayan.
-
Grasya:Ang grasya mao ang “balaang … tabang o kalig-on, gihatag pinaagi sa buhong nga kalooy ug gugma ni Jesukristo.” Pinaagi sa grasya, ang tanang tawo mabanhaw ug makadawat og pagka-imortal. Agig dugang, “Kini nga grasya mao ang makaabag nga gahum nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa ilang labing maayo nga kaugalingong mga paningkamot.” Dili nato maangkon ang grasya pinaagi sa atong mga paningkamot; hinoon, ang grasya maoy naghatag nato og “kalig-on ug panabang sa pagbuhat og maayong buhat nga dili [nato] mahimo nga imentinar” (Bible Dictionary, “Grasya”; tan-awa usab sa Dieter F. Uchtdorf, “Ang Gasa sa Grasya,” Liahona, Mayo 2015, 107; 2 Nephi 25:23).
Ang akong mga aksyon kinahanglang magpakita ug magdugang sa pagkakabig sa kaugalingon.
Ang mga pagtulun-an ni Pablo nagpakita nga ang pipila sa mga Kristiyano nga Judeo didto sa Roma nagtuo gihapon nga ang pagsunod sa mga seremonya ug mga ritwal sa balaod ni Moises makahatag og kaluwasan. Ingon og kini usa ka problema nga dili na magamit tungod kay wala na kita magsunod sa balaod ni Moises. Apan samtang magbasa ka sa mga sinulat ni Pablo, ilabi na sa Mga Taga-Roma 2:17–29, hunahunaa ang imong kaugalingong mga paningkamot sa pagsunod sa ebanghelyo. Ang imo bang mga binuhatan, sama sa pag-ambit sa sakrament o pagtambong sa templo, paingon sa imong pagkakabig ug paglig-on sa imong pagtuo diha ni Kristo? (tan-awa sa Alma 25:15–16). Unsaon nimo sa pagsiguro nga ang imong mga aksyon paingon ngadto sa kausaban sa kasingkasing?
Pinaagi ni Jesukristo, Ako mapasaylo sa akong mga sala.
Ang pipila ka tawo mobati nga nawad-an og paglaum sa isug nga deklarasyon ni Pablo nga “walay matarung, wala, bisan usa” (Mga Taga-Roma 3:10). Apan adunay malaumon nga mga mensahe sa Mga Taga-Roma. Pangitaa kini sa mga kapitulo 3 ug 5, ug ikonsiderar ngano nga ang paghinumdom nga “sanglit nakasala man ang tanan, ug nakabsan sa himaya sa Dios” (Mga Taga-Roma 3:23) usa ka importante nga lakang sa pagkat-on sa “nagakalipay sa paglaum” pinaagi ni Jesukristo (Mga Taga-Roma 5:2).
Ang ebanghelyo ni Jesukristo nagdapit kanako sa “managgawi diha sa kabag-o sa kinabuhi.”
Gitudlo ni Pablo nga ang ebanghelyo kinahanglan mousab sa paagi sa atong pagpuyo. Unsa nga mga pamahayag sa Mga Taga-Roma 6 ang imong gamiton sa pagtabang og usa ka tawo nga makasabut kon sa unsa nga paagi nga ang ebanghelyo nakatabang nimo nga “managgawi diha sa kabag-o sa kinabuhi”? (bersikulo 4). Unsa nga personal nga mga kasinatian ang imong ipaambit?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Unsaon nato sa pagpakita nga “wala igakaulaw ang maayong balita”?
Ang ubang mga tawo tingali moingon nga tungod kay kita “pagamatarungon pinaagi sa grasya sa [Dios]” (Joseph Smith Translation, Romans 3:24), walay mga kinahanglanon alang nato aron modawat sa grasya. Bisan og kita dili gayud makahimo og igo aron “maangkon” ang grasya sa Dios, ang Dios nagsugo nato sa pagbuhat og piho nga mga butang sa pagdawat niini. Unsay atong mahimo aron makadawat og grasya?
Unsa nga mga kalisdanan ang atong nasinati? Sa unsa nga paagi nga kini nga mga kalisdanan nakatabang nato sa pagpalambo og pailub, kasinatian, ug paglaum?
Unsa ang gisulti ni Pablo niini nga mga bersikulo mahitungod sa mga simbolo sa bunyag? Tingali ang imong pamilya makaplano sa pagtambong sa umaabut nga bunyag. O usa sa imong pamilya mopaambit og mga litrato o mga handumanan gikan sa iyang bunyag. Sa unsa nga paagi nga ang paghimo ug pagtuman sa atong mga pakigsaad sa bunyag makatabang nato nga “managgawi diha sa kabag-o sa kinabuhi”?
Ang bunyag nagsimbolo sa sinugdanan sa bag-o nga kinabuhi isip usa ka disipulo ni Kristo.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangutana samtang ikaw magtuon. Samtang magtuon ka sa mga kasulatan, tingali dunay mosulod nga mga pangutana sa hunahuna. Palandunga kini nga mga pangutana ug pangita sa mga tubag. Pananglitan, sa Mga Taga-Roma 1–6 makapangita ka og mga tubag sa pangutana “Unsa ang grasya?”
Ayaw Kahadlok, ni Greg K. Olsen