“Agosto 19–25. 1 Mga Taga-Corinto 1–7: ‘Mausa Unta Hinoon Kamo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Agosto 19–25. 1 Mga Taga-Corinto 1–7,” Dali, Sunod Kanako—Alang sa mga Indibidwal ug mga Pamilya: 2019
Corinto, Habagatang Gresya, ang Forum ug Civic Center, gipintal ni Balage Balogh
Agosto 19–25
1 Mga Taga-Corinto 1–7
“Mausa Unta Hinoon Kamo”
Irekord ang imong mga impresyon samtang magbasa ka sa 1 Mga Taga-Corinto 1–7. Kini nga mga impresyon mahimong maglakip sa mga pag-aghat sa pagtuon og dugang nga ideya, sa pagpaambit sa uban sa butang nga imong nakat-unan, o sa paghimo og mga kausaban sa imong kinabuhi.
Irekord ang Imong mga Impresyon
Sa mga bulan nga gigahin ni Pablo sa Corinto, “daghan sa mga taga-Corinto nga naminaw [kaniya] mituo, ug gibautismohan” (Mga Buhat 18:8). Tingali sakit kaayo alang ni Pablo nga makadungog, pipila lang ka tuig ang nakalabay, nga dihay “pagkabahinbahin” ug “pakiglalisay” taliwala sa mga Santos nga taga-Corinto ug nga sa iyang pagkawala nagsugod sila sa pagpatalinghug sa “kaalam nga iya sa kalibutan” (1 Mga Taga-Corinto 1:10–11, 20). Agig tubag, gisulat ni Pablo ang sulat nga karon gitawag nato nga 1 Mga Taga-Corinto. Puno kini sa talagsaong doktrina, ug gani sa samang higayon, si Pablo ingon og nahigawad nga ang mga Santos dili andam sa pagdawat sa tanang doktrina nga iyang gusto nga ihatag ngadto kanila. “Apan ako, mga igsoon, dili makahimo sa pagsulti kaninyo ingon sa paagi sa pagsulti ko ngadto sa mga tawo nga espirituhanon,” nasubo siya, “sanglit kamo kalibutanon pa man gihapon” (1 Mga Taga-Corinto 3:1–3). Samtang kita mangandam sa pagbasa sa mga pulong ni Pablo, tingali makatabang ang pagsusi sa atong kaugalingong pagkaandam sa pagdawat sa kamatuoran—lakip sa atong pagkaandam sa pagpatalinghug sa Espiritu ug pagpaningkamot alang sa panaghiusa uban sa atong mga pamilya, uban sa atong isig ka Santos, ug uban sa Dios.
Mga Ideya alang sa Personal nga Pagtuon sa Kasulatan
1 Mga Taga-Corinto 1:10–17; 3:1–11
Ang mga miyembro sa Simbahan ni Kristo nagkahiusa.
Wala kita makahibalo sa tanang detalye mahitungod sa kakulang sa panaghiusa sa mga Santos nga taga-Corinto, apan nakahibalo kita mahitungod sa kakulang sa panaghiusa sa atong kaugalingong mga relasyon. Hunahunaa ang usa ka relasyon sa imong kinabuhi nga makabenepisyo gikan sa panaghiusa; dayon pangitaa unsa ang gitudlo ni Pablo diha sa 1 Mga Taga-Corinto 1:10–17; 3:1–11 mahitungod sa kakulang sa panaghiusa sa mga Santos nga taga-Corinto. Unsa nga mga pagsabut ang imong makuha mahitungod kon unsaon sa pagpalambo og dakong panaghiusa sa uban?
Tan-awa usab sa Mosiah 18:21; 4 Nephi 1:15–17; Doktrina ug mga Pakigsaad 38:23–27; 105:1–5; “Unity,” Gospel Topics, topics.lds.org.
Aron sa pagtuman sa buhat sa Dios, nagkinahanglan ko sa kaalam sa Dios.
Samtang maayo—gani giawhag—sa pagpangita og kaalam bisan asa nato kini makit-i (tan-awa sa 2 Nephi 9:29; DP 88:118), mihatag si Pablo og grabe nga mga pasidaan mahitungod sa depektuso nga kaalam sa tawo, nga iyang gitawag nga “ang kaalam nga iya niining kalibutana.” Samtang magbasa ka sa 1 Mga Taga-Corinto 1:17–25, pamalandunga unsay gipasabut niini nga mga pulong. Unsa kaha ang gipasabut ni Pablo sa “kaalam sa Dios”? Ngano nga nagkinahanglan kita sa kaalam sa Dios sa pagtuman sa buhat sa Dios?
Sa imong mga paningkamot sa pagtuman sa imong mga responsibilidad sa pagtuman sa buhat sa Dios, ikaw nakasinati na ba sa “kahadlok, ug … hilabihan nga pagkurog” nga gibati ni Pablo sa dihang nagtudlo siya sa mga Santos nga taga-Corinto? (1 Taga-Corinto 2:3). Unsay imong nakita sa mga bersikulo 1–5 nga nakahatag kanimo og kaisug? Ikonsiderar unsaon nimo sa pagpakita nga ikaw misalig sa “gahum sa Dios” labaw “sa kaalam sa tawo.”
Tan-awa usab sa Doktrina ug mga Pakigsaad 1:17–28.
Nagkinahanglan ko sa Espiritu Santo aron makasabut sa mga butang sa Dios.
Kon ikaw gusto nga makat-on og dugang mahitungod sa usa ka butang sama sa proseso sa sakyanan o karaang arkitektura, unsaon nimo sa pagbuhat niini? Sumala sa 1 Mga Taga-Corinto 2:9–16, sa unsa nga paagi nga ang pagkat-on “sa mga butang sa Dios” lahi gikan sa pagkat-on sa “mga butang sa tawo”? Ngano nga kinahanglan gayud nga makabaton kita sa Espiritu Santo aron makasabut sa mga butang sa Dios? Human makabasa niini nga mga bersikulo, unsay imong gibati nga kinahanglan nimong buhaton aron mas hingpit nga makasabut sa espirituhanong mga butang? Sa unsa nga paagi nga ang mga pulong ni Pablo makatabang sa usa ka tawo nga nakigbisog sa iyang pagpamatuod?
Ang akong lawas sagrado.
Kadaghanan sa mga tawo sa Corinto mibati nga ang sekswal nga imoralidad madawat ug nga ang ilang mga lawas gihimo alang lang sa kalipay. Sa laing mga pulong, ang Corinto dili lahi gikan sa kalibutan karon. Unsa ang gitudlo ni Pablo sa 1 Mga Taga-Corinto 6:13–20 nga makatabang nimo sa pagpasabut ngadto sa uban ngano nga ikaw gusto nga magpuyo og putli nga kinabuhi?
Makapaikag usab siguro nga mahibaloan kon sa unsa nga paagi si Sister Wendy W. Nelson, sama ni Pablo, miawhag sa mga Santos nga magmaputli sa iyang pakigpulong sa “Gugma ug Kaminyoon” (Tibuok Kalibutan nga Debosyunal alang sa mga Young Adult, Ene. 8, 2017, broadcasts.lds.org). Sa unsa nga paagi nga ang mga kamatuoran nga gihulagway ni Sister Nelson lahi gikan sa mga mensahe sa kalibutan?
Tan-awa usab sa Mga Taga-Roma 1:24–27; “Chastity,” Gospel Topics, topics.lds.org.
Nagtudlo ba si Pablo nga mas maayo nga dili maminyo kay sa magminyo?
Daghang mga bersikulo sa 1 Mga Taga-Corinto 7 ingon og nagsugyot nga samtang ang kaminyoon madawat, ang pagpabilin nga single ug hingpit nga paglikay sa sekswal nga mga relasyon maoy gipaboran. Hinoon, ang Hubad ni Joseph Smith Translation, 1 Mga Taga-Corinto 7:29–33 (tan-awa sa Giya ngadto sa mga Kasulatan) makatabang nato nga makasabut nga si Pablo nagpasabut niadtong gitawag nga mahimong full-time nga mga misyonaryo, nag-obserbar nga mas nakaserbisyo sila sa Dios kon sila magpabilin nga single atol sa ilang mga misyon. Ang Ginoo mitudlo pinaagi sa Iyang mga sulugoon, lakip ni Pablo, nga ang kaminyoon kabahin sa Iyang mahangturong plano ug kinahanglanon alang sa kahimayaan (tan-awa sa 1 Mga Taga-Corinto 11:11; DP 131:1–4).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Samtang ang mga sakop sa imong pamilya mobasa niini nga mga bersikulo, dapita sila sa pagpangita sa gipasabut nga makatabang nila nga mas mahiusa.
Tingali mabasa nimo kini nga mga bersikulo samtang nangaon og snack sa gatas ug karne, ug mahimong imong itandi ang paagi nga ang mga masuso motubo ngadto sa pagkahamtong sa paagi nga kita motubo sa espirituhanon.
Gitandi ni Pablo ang iyang misyonaryo nga mga paningkamot ngadto sa pagtanom og mga liso. Unsa ang gisugyot niini nga pagkatandi mahitungod kon unsaon nato sa pagpakigbahin sa ebanghelyo ngadto sa uban?
Ang pagtandi sa atong lawas ngadto sa mga templo, sama sa gihimo ni Pablo, mahimong epektibo nga paagi sa pagtudlo mahitungod sa kasagrado sa atong lawas. Tingali makapakita ka og mga litrato sa mga templo, sama niadtong anaa niini nga outline. Ngano nga ang mga templo sagrado? Sa unsang paagi nga ang atong mga lawas maisip nga sama sa mga templo? Unsay atong mahimo sa pagtagad sa atong lawas nga sama sa mga templo? (Tan-awa usab sa “Sekswal nga Kaputli,” Alang sa Kalig-on sa Kabatan-onan, 35–37.) Kon posible, adto kamo sa templo o bisita sa nataran sa templo; makapalambo kini sa inyong panaghisgutan mahitungod sa kasagrado sa templo ug sa atong lawas.
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pagmapailubon sa inyong kaugalingon. Gitudlo ni Pablo nga ang gatas mag-una sa dili pa ang karne kon kita nagkat-on sa ebanghelyo (tan-awa sa 1 Mga Taga-Corinto 3:1–2). Kon imong makaplagan nga ang pipila ka doktrina lisud masabtan karon, pagmapailubon. Salig nga ang mga tubag moabut kon magpakita ka og pagtuo ug magkugi sa pagtuon.
Gitandi ni Pablo ang atong lawas ngadto sa kasagrado sa templo. Gikan sa wala sa ibabaw nga bahin padulong sa tuo: Tijuana Mexico Temple, Taipei Taiwan Temple, Tegucigalpa Honduras Temple, Houston Texas Temple.