“Hulyo 29–Agosto 4. Mga Buhat 22–28: ‘Pag-alagad ug Pagpanghimatuod’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Hulyo 29–Agosto 4. Mga Buhat 22–28,” Dali, Sunod Kanako—Alang sa mga Indibidwal ug sa mga Pamilya: 2019
Hulyo 29–Agosto 4
Mga Buhat 22–28
“Pag-alagad ug Pagpanghimatuod”
Ang mga impresyon gikan sa Espiritu Santo sa kasagaran hilom ug usahay dali. Ang pagrekord sa imong mga impresyon nagtugot nimo sa pagpamalandong niini pag-ayo. Samtang magbasa ka sa Mga Buhat 22–28, isulat ang mga hunahuna ug mga pagbati nga moabut nimo ug paggahin og panahon sa pagpamalandong niini.
Irekord ang Imong mga Impresyon
“Kon kita anaa sa buluhaton sa Ginoo,” misaad si Presidente Thomas S. Monson, “may katungod kita sa panabang sa Ginoo” (“Sa Pagkat-on, sa Pagbuhat, sa Pagkahimo,” Liahona, Nob. 2008, 62). Kita walay katungod, hinoon, sa kinabuhi nga walay pagsulay ug walay katapusang sunod-sunod nga mga kalampusan. Alang sa ebidensya niini, dili na kinahanglan nga mangita pa kita og lain kay ni Pablo ang Apostol. Ang iyang sugo gikan sa Manluluwas mao ang “pagdala sa akong ngalan sa atubangan sa mga Hentil, ug sa mga hari, ug sa mga anak sa Israel” (Mga Buhat 9:15). Sa mga kapitulo 22–28 sa Mga Buhat, makita nato nga si Pablo mituman sa gisugo kaniya ug pag-atubang sa dakong oposisyon—mga kadena, pagkabilanggo, pisikal nga pag-abuso, pagkalunod sa barko, ug gani pag-ataki sa usa ka bitin. Apan makita usab nato nga si Jesus “mitungha kaniya, ug miingon, Sumalig ka” (Mga Buhat 23:11). Ang kasinatian ni Pablo usa ka makapadasig nga pahinumdom nga kon ang mga sulugoon sa Ginoo modawat sa Iyang tawag sa “panglakaw … ug himoa ninyong mga tinun-an ang tanang kanasuran,” siya motuman sa Iyang mga saad ngadto kanila: “Tan-awa, ako magauban kaninyo sa kanunay hangtud sa katapusan sa kapanahonan” (Mateo 28:19–20).
Mga Ideya alang sa Personal nga Pagtuon sa Kasulatan
Ang mga disipulo ni Jesukristo mipaambit sa ilang mga pagpamatuod sa maisugong paagi.
Sa dihang si Pablo mihatag og gamhanang mga pagpamatuod nga narekord sa Mga Buhat 22 ug 26, gibilanggo siya sa Romano nga mga sundalo. Ang mga tawo nga iyang gipakigsultihan adunay gahum sa pagsilot niya sa kamatayon. Apan maisugon siyang mipili sa pagsaksi ni Jesukristo ug “sa langitnong panan-awon” (Mga Buhat 26:19) nga iyang nadawat. Unsay nakadasig nimo mahitungod sa iyang mga pulong? Ikonsiderar ang imong mga oportunidad sa pagpaambit sa imong pagpamatuod. Pananglitan, kanus-a ang katapusang higayon nga imong gisultihan ang imong pamilya o ang uban mahitungod sa unsa nga paagi nimo naangkon ang imong pagpamatuod sa ebanghelyo?
Ngano nga adunay mga kalainan tali sa tulo ka istorya sa panan-awon ni Pablo mahitungod kang Jesukristo?
Ang basahon sa Mga Buhat adunay tulo ka istorya sa milagroso nga panan-awon ni Pablo sa dalan padulong sa Damasco (tan-awa sa Mga Buhat 9:3–20; 22:1–21; 26:9–20). Ang matag usa niini nga mga istorya medyo lahi gikan sa uban, ug ang uban naghatag og dugang nga detalye kay sa uban. Tungod kay ang istorya giistorya ngadto sa lain-laing mga tigpaminaw alang sa lain-laing mga katuyoan, resonable lang nga si Pablo mipili sa paghatag og gibug-aton sa lain-laing mga bahin sa kasinatian alang sa matag tigpaminaw.
Sa samang paagi, si Joseph Smith mirekord og pipila ka istorya sa iyang Unang Panan-awon (tan-awa sa “First Vision Accounts,” Gospel Topics, topics.lds.org). Ang daghang mga istorya gihatag ngadto sa lain-laing mga tigpaminaw alang sa lain-laing mga katuyoan ug naghatag og panabut nga wala unta kon usa lamang ka istorya ang anaa.
Mga Buhat 23:10–11; 27:13–25, 40–44
Ang Ginoo motabang niadtong naningkamot sa pagserbisyo Kaniya.
Sama sa gipakita sa pangalagad ni Pablo, ang mga kalisud sa atong kinabuhi dili timailhan nga ang Dios wala motugot sa buhat nga atong gihimo. Gani, usahay sa panahon sa mga kalisud nga atong mabati ang Iyang hilabihan nga suporta . Tingali makapaikag ang pagribyu unsay imong nabasa karong bag-o mahitungod sa pangalagad ni Pablo ug paglista sa pipila sa mga butang nga iyang gilahutay (tan-awa, pananglitan, Mga Buhat 14:19–20; 16:19–27; 21:31–34; 23:10–11; 27:13–25, 40–44). Sa unsa nga paagi nga ang Ginoo mitabang kaniya, ug unsay gitudlo niini mahitungod sa imong kaugalingong mga paningkamot sa pagserbisyo sa Ginoo?
Mga Buhat 24:24–27; 26:1–3, 24–29; 27
Makapili ko sa pagdawat o pagsalikway sa mga pulong sa mga sulugoon sa Dios.
Sa kinatibuk-an sa iyang pangalagad, si Pablo mihatag og gamhanang pagpamatuod ni Jesukristo ug sa Iyang ebanghelyo. Daghang mga tawo midawat sa iyang saksi, apan dili ang tanan. Samtang magbasa ka sa Mga Buhat 24:24–27 ug Mga Buhat 26:1–3, 24–29, isulat ang mga pulong nga nagpakita kon unsa ang reaksyon sa mosunod nga Romano nga mga tigmando sa Judea sa mga pagtulun-an ni Pablo:
Felix
Festo
Haring Agripa
Samtang naglayag padulong sa Roma aron husayon ni Cesar, nanagna si Pablo sa “kadaot ug dakong kapildihan” nga mahitabo sa barko ug sa mga pasahero niini (Mga Buhat 27:10). Basaha ang kapitulo 27 sa pagsusi kon unsay reaksyon sa mga kauban ni Pablo sa barko sa iyang mga pasidaan. Makakita ba ikaw og bisan unsa nga leksyon alang sa imong kaugalingon niini nga kasinatian?
Aduna ka bay reaksyon sama ni bisan kinsa niini nga mga tawo sa dihang imong nadungog ang mga pagtulun-an sa mga lider sa Simbahan? Unsa man ang pipila ka posibling mga sangputanan sa ingon niini nga reaksyon? Unsay imong nakat-unan gikan niini nga mga istorya mahitungod sa pagpatalinghug sa tambag sa Ginoo pinaagi sa Iyang mga sulugoon?
Tan-awa usab sa 2 Nephi 33:1–2; Joseph Smith—Kasaysayan 1:24–25; D. Todd Christofferson, “Ang Tingog sa Pagpasidaan,” Liahona, Mayo 2017, 108–11.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Sa wala pa ang iyang pagkakabig, si Pablo adunay taas nga kasaysayan sa sayop nga binuhatan ngadto sa Dios. Apan tungod kay siya andam nga maghinulsol, nakahimo siya sa pagsulti, “Tungod niini kanunay ko gayud nga ginasingkamotan ang paghupot sa walay sambol nga kaisipan ngadto sa Dios ug sa mga tawo” (tan-awa usab sa DP 135:4). Unsaon nato nga mawala sa atong konsensya ang sayop nga binuhatan ngadto sa Dios ug sa uban?
Niini nga mga bersikulo, unsa ang gisugo sa Ginoo nga buhaton ni Pablo? Unsa ang atong mga oportunidad sa pagbuhat sa samang mga butang?
Aduna bay usa sa imong pamilya nga ganahan og mga bitin? Mahimo nimong hangyoon kana nga tawo o laing sakop sa pamilya sa paghisgot sa istorya nga nakita sa Mga Buhat 28:1–9. Ang imong mga anak tingali malingaw sa pagdrowing og litrato niini nga mga istorya o pagdrama niini. Unsa nga mga leksyon ang atong makat-unan gikan niini nga mga istorya? Tingali ang usa ka leksyon mao nga ang Ginoo mituman sa Iyang mga saad ngadto sa Iyang mga sulugoon. Pananglitan, mahimo nimong itandi ang mga saad nga gihimo sa Marcos 16:18 uban sa mga katumanan niini diha sa mga kasinatian ni Pablo. Makita usab nimo sa bag-ong pakigpulong sa kinatibuk-ang komperensya ang usa ka saad nga gihimo sa mga sulugoon sa Ginoo—tingali kanang makahuluganon sa imong pamilya—ug ipakita kini diha sa imong panimalay. Unsaon nato sa pagpakita sa atong pagtuo nga kini nga saad pagatumanon?
Gipanalipdan sa Dios si Pablo gikan sa mala-la nga bitin.
Sama sa Simbahan sa panahon ni Pablo nga (gitawag nga “pundok” sa bersikulo 22), ang Simbahan karon kanunay nga “ginasupak bisan diin.” Sa dihang ang mga tawo namulong batok sa Manluluwas ug sa Iyang Simbahan, giunsa ni Pablo pagtubag? Unsa man ang atong makat-unan gikan sa kasinatian ni Pablo?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Tutuki ang mga baruganan nga mopanalangin sa imong mga pamilya. Samtang magtuon ka sa mga kasulatan, pangutan-a ang imong kaugalingon, “Unsay akong nakita dinhi nga mahimong makahuluganon kaayo ngadto sa mga sakop sa akong pamilya?” (Tan-awa sa Pagtudlo sumala sa Pamaagi sa Manluluwas, 17.)
Maisugon diha sa Pagpamatuod ni Jesukristo, ni Daniel A. Lewis. Pablo sa atubangan ni Haring Agripa.