“Agosto 12–18. Mga Taga-Roma 7–16: ‘Dag-a ang Dautan pinaagi sa Maayo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Agosto 12–18. Mga Taga-Roma 7–16,” Dali, Sunod Kanako—Alang sa mga Indibidwal ug mga Pamilya: 2019
Agosto 12–18
Mga Taga-Roma 7–16
“Dag-a ang Dautan pinaagi sa Maayo”
Pipila lang ka mga baruganan sa ebanghelyo sa Mga Taga-Roma 7–16 mahimong iapil niini nga outline, mao nga ayaw limitahe ang imong kaugalingon unsay gihisgutan dinhi. Pagbantay sa inspirasyon nga imong madawat samtang ikaw magtuon.
Irekord ang Imong mga Impresyon
Sa imong pag-abli niini nga sulat sa Mga Taga-Roma, si Pablo mitimbaya sa mga miyembro sa Simbahan sa Roma pinaagi sa pagtawag nila “sa Dios gihigugma” kinsa “gipanagtawag aron mahimong mga balaan.” Misulti siya nga ang ilang “pagtuo [na]dungog man sa tibuok kalibutan” (Mga Taga Roma 1:7–8). Bisan og si Pablo migahin og daghang panahon sa iyang epistola [sulat] sa pagkorihir og mini nga mga ideya ug sayop nga mga kinaiya, ingon og gusto usab niya nga siguroon nga kining bag-ong Kristiyano nga mga kinabig nga sila tinud-anay nga mga Santos kinsa gihigugma sa Dios. Sa usa ka mapainubsanon nga pagpakita og empatiya, si Pablo miila nga siya mibati sama sa usa ka “alaut nga tawo” usahay (Mga Taga-Roma 7:24), apan ang ebanghelyo ni Jesukristo mihatag kaniya og gahum sa pagbuntog sa sala (tan-awa sa Hubad ni Joseph Smith, Mga Taga-Roma 7:22–27 [sa Giya ngadto sa mga Kasulatan]). Mipadayon siya sa pagpaambit sa mahigugmaon nga tambag alang kanatong tanan kinsa nakigbisog nga mobati nga gihigugma ug ingon og ang pagkasantos dili makab-ot. “Ayaw pagpadaug sa dautan,” miingon siya—sa dautan sa kalibutan ug dautan sa atong kaugalingon—“apan dag-a ang dautan pinaagi sa maayo” (Mga Taga-Roma 12:21).
Mga Ideya alang sa Personal nga Pagtuon sa Kasulatan
Kon mosunod ko sa Espiritu, mabuntog nako ang sala ug mag-andam og kabilin uban sa Dios.
Bisan human mosulod sa “kabag-o sa kinabuhi” pinaagi sa ordinansa sa bunyag (Mga Taga-Roma 6:4), tingali gibati nimo ang panagsumpaki sa kaugalingon nga gihulagway ni Pablo sa Mga Taga-Roma 7—ang “nagapakig-away” tali sa kinaiyanhon nga tawo ug sa atong matarung nga mga tinguha (Mga Taga-Roma 7:23). Apan si Pablo namulong usab sa paglaum sa Mga Taga-Roma 8:23–25. Unsa nga mga rason alang niini nga paglaum ang imong nakita sa kapitulo 8? Mahimo usab ikaw nga mangita sa mga panalangin nga moabut gikan sa pagbaton “sa Espiritu sa Dios nga nagapuyo diha sa sulod ninyo” (Mga Taga-Roma 8:9). Unsaon ninyo pagtinguha ang pagpakig-uban sa Espiritu Santo nga mas hingpit sa imong kinabuhi?
Ang mahangturong himaya nga naghulat sa matinud-anon mas labaw pa kay sa mga pagsulay sa pagka-mortal.
Pipila lang ka tuig human misulat si Pablo niini nga epistola [sulat], ang mga Santos sa Roma nag-antus sa makalilisang nga pagpanggukod. Unsay imong makit-an sa Mga Taga-Roma 8:17–39 nga tingali nakatabang niini nga mga Santos kon moabut ang pagpanggukod? Sa unsa nga paagi nga kini nga mga pulong imong magamit ug ang mga pagsulay nga imong giatubang karon?
Pangitaa ang koneksyon tali niini nga mga bersikulo ug niini nga tambag gikan ni Sister Linda S. Reeves: “Wala ko masayud nganong daghan kita og mga pagsulay, apan kini ang akong personal nga gibati nga ang ganti dako kaayo, hilabihan ka mahangturon ug walay katapusan, hilabihan ka malipayon ug lapas pa sa atong panabut nga nianang adlaw sa pagganti, atong bation nga moingon ngadto sa atong maloloy-on, mahigugmaong Amahan, ‘Kadto lang ba ang tanan nga gikinahanglan?’ Ako nagtuo nga kon kada adlaw mahinumdom ug maila nato ang kadako sa gugma sa atong Langitnong Amahan ug sa atong Manluluwas alang kanato, andam kitang mobuhat sa bisan unsa aron mahibalik og usab sa Ilang presensya, gilibutan sa Ilang gugma sa kahangturan. Unsay kapuslanan … sa atong giantus dinhi kon, sa katapusan, kadtong mga pagsulay mao gayud ang mga butang nga mopasarang kanato alang sa kinabuhing dayon ug kahimayaan didto sa gingharian sa Dios uban sa atong Amahan ug Manluluwas?” (“Angayan sa Gisaad Kanato nga mga Panalangin,”Liahona, Nob. 2015, 11).
Paghukom unsay imong buhaton sa “inadlaw nga paghinumdom ug pag-ila” sa gugma sa Dios alang nimo.
Unsa ang gipasabut ni Pablo sa “gikabut-an niyang daan,” “pagpili,” ug “giila niyang daan”?
Gigamit ni Pablo kini nga mga termino aron sa pagtudlo nga ang pipila sa mga anak sa Dios gikabut-an nang daan, o gitudlo nang daan, sa pagdawat og espesyal nga mga panalangin ug mga katungdanan aron nga sila mopanalangin sa tanang nasud sa kalibutan (tan-awa sa Giya ngadto sa mga Kasulatan, “Kapilian”). Gibase kini sa kahibalo nang daan sa Dios sa pagkaandam sa Iyang mga anak nga mosunod ni Jesukristo ug mahimong sama Kaniya (tan-awa usab sa Mga Taga-Efeso 1:3–4; 1 Pedro 1:2). Hinoon, gihatagan og gibug-aton ni Pablo diha sa Mga Taga-Roma 9–11 bisan unsa pa ang paagi sa atong pag-anha sa balay ni Israel—o mahimong miyembro sa Simbahan ang—tanang mga tawo kinahanglang indibidwal nga modawat sa kaluwasan pinaagi sa pagtuo kang Jesukristo ug pagsunod sa Iyang mga sugo.
Gidapit ako ni Pablo nga mahimong tinuod nga Santos ug sumusunod ni Jesukristo.
Ang katapusang lima ka mga kapitulo sa Mga Taga-Roma naglakip sa dinosena nga piho nga mga instruksyon kabahin kon sa unsa nga paagi magpuyo ang mga Santos. Dili tingali dayon nimo magamit kini nga tambag, apan paminaw sa Espiritu, ug Siya makatabang nimo sa pagpangita og usa o duha nga imong masugdan karon. Ipaambit ang imong mga tinguha uban sa imong Langitnong Amahan pinaagi sa pag-ampo, ug pangayo sa Iyang tabang.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Aron matabangan ang imong pamilya nga makasabut pa og dugang mahitungod sa “pakig-away” nga gihulagway ni Pablo niini nga bersikulo, ikonsiderar ang pagpakigbahin sa istorya mahitungod sa mga lobo sa artikulo ni Elder Shayne M. Bowen “Agency and Accountability” (New Era, Sept. 2012, 8–9).
Ang mensahe ni Elder Wilford W. Andersen “Ang Musika sa Ebanghelyo” (Liahona, Mayo 2015, 54–56) makatabang sa paghulagway unsa ang gitudlo ni Pablo mahitungod sa balaod, mga buhat, ug pagtuo. Tingali malingaw ang imong pamilya sa paghisgot sa iyang pakigpulong ug pagsulay sa pagsayaw uban sa naay musika ug walay musika. Sa unsa nga paagi nga ang pagsayaw nga walay musika sama sa pagsunod sa ebanghelyo nga walay pagtuo?
Si Elder Wilford W. Andersen mitudlo, “Ang musika sa ebanghelyo mao ang [usa ka] malipayong espirituhanon nga pagbati.”
Sa unsa nga paagi nga ang pagtuon sa pulong sa Dios nakahatag nato sa mga panalangin nga gihulagway niini nga mga bersikulo? Tingali ang mga sakop sa pamilya mopaambit og pipila sa ilang paborito nga mga kasulatan (tan-awa usab sa 2 Nephi 25:26).
Unsa ang gipasabut sa paghimo sa atong kaugalingon nga “usa ka halad nga buhi, balaan, hinangponon sa Dios”? (Mga Taga-Roma 12:1).
Ang imong pamilya tingali makabenepisyo gikan sa pagtuon sa tambag ni Pablo mahitungod sa paghukom ug pakiglalis mahitungod sa personal nga pagpili sa uban. Tingali mahisgutan nimo ang tukma nga mga paagi sa pagtubag kon ang mga pagpili sa uban lahi sa imong mga pagpili. Unsaon nato nga mas maghunahuna kon sa unsa nga paagi nga ang atong kaugalingong mga pagpili makaapekto sa uban?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Tuguti ang mga bata nga mopadayag sa ilang pagkamamugnaon. “Kon imong dapiton ang mga bata sa pagmugna og usa ka butang nga may kalabutan sa usa ka baruganan sa ebanghelyo imo silang gitabangan nga mas makasabut sa baruganan. … Tugoti sila sa paghimo, pagdrowing, pagkolor, pagsulat, ug pagmugna” (tan-awa sa Pagtudlo sumala sa Pamaagi sa Manluluwas, 25).
Pakig-uban Kanako, ni Del Parson