“14–20 octubre. Filipenses; Kolosenses: “Chixjunil ninkuy xnumsinkil sa’ xk’ab’a’ li nak’ehok xkawub’ inch’ool” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“14–20 octubre Filipenses, Kolosenses,” Kim, Taaqehin—Choq’ reheb’ li komon ut li junkab’al: 2019
14–20 octubre.
Filipenses; Kolosenses
“Chixjunil ninkuy xnumsinkil sa’ xk’ab’a’ li nak’ehok xkawub’ inch’ool”
Ma xwan naq xanumsi wi’chik li musiq’anb’il na’leb’ xatz’iib’a naq yookat chixtzolb’al li Ak’ Chaq’rab’? Maare us raj xnumsinkil wi’chik li musiq’anb’il na’leb’ xak’ul.
Xtz’iib’ankil li nakak’oxla
Laj Pablo kixtz’iib’a lix hu reheb’ laj Filipenses ut reheb’ laj Kolosenses naq kiwan sa’ tz’alam. A’ut sa’eb’ li hu a’in wan jun kawil ch’oolej li ink’a’ mas na’ilman rik’in junaq li wan sa’ tz’alam. Laj Pablo mas wi’chik ki’aatinak chirix li sahil ch’oolejil, li sahilal, ut li b’antioxink, chiru li kixtz’iib’a chirixeb’ li ch’a’ajkilal ut lix yalb’al rix: “Napuktesiman resil li Kristo,” chan, “a’in nasaho’k wi’ inch’ool, ut taasaho’q ajwi’ chi junelik” (Filipenses 1:18). “Us ta maa’anihin chaq sa’ eeyanq chi winqilal, a’b’an sa’ musiq’ej wankin eerik’in; k’a’jo’ naq ninsaho’k chirilb’al ... lix kawilal lee paab’aal chirix li Kristo” (Kolosenses 2:5). Ch’olch’o naq “li tuqtuukil usilal li nachal rik’in li Dios,” li kixk’ul laj Pablo sa’ xyi lix ch’a’ajkilal, “naxq’ax ru chixjunil li na’leb’ ” (Filipenses 4:7), ut a’an kik’ulman chi yaal. Sa’ xyi li qach’a’ajkilal laa’o, naru naqeek’a li tuqtuukilal a’in, ut “junelik toosaho’q rik’in li Qaawa’ ” (Filipenses 4:4). Laa’o, jo’ laj Pablo, naru naqakanab’ qib’ chi tz’aqal chiru li Jesukristo, “li naqataw wi’ qakolb’al” (Kolosenses 1:14). Naru naqaye, jo’ laj Pablo, “Chixjunil ninkuy xnumsinkil sa’ xkab’a’ li Kristo li nak’ehok xkawub’ inch’ool” (Filipenses 4:13; chi’ilmanq ajwi’ Kolosenses 1:11).
Li na’leb’ re xtzolb’aleb’ li loq’laj hu aajunes
Ma naru naqak’ul li qakolb’al rik’in li qak’anjel?
Wankeb’ li neke’yehok re naq li aatin “Chexk’anjelaq chi kaw chirix lee kolb’al” naraj naxye naq kolb’ilo yal rik’in li qak’anjel laa’o. A’b’anan moko tz’aqal ta li na’leb’ a’in, jo’ chanru naq moko tz’aqal ta xk’oxlankil naq li raatin laj Pablo—”Kolb’ilex xb’aan li rusilal li Dios, sa’ xk’ab’a’ li paab’aal (Efesios 2:8)—naraj naxye naq maajun k’anjel na’ajman ru re tookole’q. Sa’eb’ li loq’laj hu, ut sa’eb’ lix tz’iib’ahom laj Pablo, k’utb’il chi saqen ru naq na’ajman ru li rusilal li Jesukristo jo’ ajwi’ li qak’anjel laa’o re taaruuq taqak’ul li qakolb’al. Jo’ kixye laj Nefi, “A’ sa’ xk’ab’a’ li usilal naq nokokole’, chirix chixjunil li nokoru chixb’aanunkil laa’o” (2 Nefi 25:23). Us ta nokok’anjelak re xkulb’al li qakolb’al, “a’ li Dios li na’eek’asink eere” (Filipenses 2:13; chi’ilmanq ajwi’ Filipenses 1:6; K’utul Raqal reheb’ li Loq’laj Hu, “Usilal”).
Lix evangelio li Jesukristo naxk’e reeqaj chixjunil li mayej naqak’e.
Laj Pablo kixmayeja naab’al naq kixjal xch’ool re xpaab’ankil lix evangelio li Jesukristo, jo’ lix taqenaqil wanjik sa’ xtenamiteb’ laj Judio jo’ aj Fariseo. Sa’ Filipenses 3:5–14, sik’ li k’a’ru kixk’ul laj Pablo rik’in naq kiwan xch’ool chixk’eeb’al li mayej choq’ re li evangelio. K’a’ru kireek’a chirix li mayejak kixb’aanu?
Chirix a’an, k’oxla laa wanjik jo’ tzolom. K’a’ru xamayeja choq’ re lix evangelio li Jesukristo? K’a’ru li xak’ul? Ma wan chik li mayej nakaweek’a naq toj tento taak’e re tatwanq choq’ chaab’il tzolom chiru li Kolonel?
Chi’ilmanq ajwi’ 3 Nefi 9:19–20; Tzol’leb’ ut Sumwank 58:2–5; Robert C. Gay, “¿O qué recompensa dará el hombre por su alma? Liahona, noviembre 2012, 34–36.
Naru nintaw xsahil inch’ool rik’in li Kristo, maak’a’ naxye k’a’ru nink’ul.
Lix yu’am laj Pablo naxk’ut xyaalal li yaalil na’leb’ yeeb’il xb’aan li Awa’b’ej Russell M. Nelson: “Naq naqajayali li qayu’am rik’in ... li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut sa’ xk’ab’a’ a’an” (“Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016).
Naq nakawil ru Filipenses—ut mas wi’chik li ch’ol 4—sik’eb’ li aatin li naru nakate’xtenq’a chixtawb’al li sahil ch’oolejil, maak’a’ naxye k’a’ru taak’ul sa’ laa yu’am. Jo’q’e xak’ul “li tuqtuukil usilal li nachal rik’in li Dios” naq yookat chixnumsinkil li ch’a’ajkilal? (raqal 7). Jo’q’e xataw aakawilal sa’ xk’ab’a’ li Kristo re xb’aanunkil li k’a’ru ch’a’aj? (raqal 13). K’a’ut naq aajel ru wank chi “k’ojk’o qach’ool” sa’ chixjunil li naqak’ul? (raqal 11). Chan ru naq xyu’aminkil li chaab’ilal sa’ li raqal 8 tatxtenq’a chixtawb’al li sahil ch’oolejil, maak’a’ naxye k’a’ru taak’ul?
Chi’ilmanq Alma 33:23; Dieter F. Uchtdorf, “Agradecidos en cualquier circunstancia,” Liahona, mayo 2014, 70–77.
Lin paab’aal k’ojob’anb’il sa’ xb’een li Jesukristo.
A’in jun li tzolok naru taab’aanu rik’in yalaq ch’ol sa’eb’ li loq’laj hu, a’ut tz’aqal us nak’anjelak rik’in Kolosenses 1:12–23. Sik’ sa’eb’ li raqal a’in chixjunil li naru nakatzol chirix li Jesukristo, ut tz’iib’a resil li k’a’ru taataw. K’a’ut nakaweek’a naq aajel ru xnawb’al li k’a’aq re ru a’in chirix li Kolonel?
Eb’ lix tzolom li Jesukristo “neke’ak’ob’resiik” naq neke’xyu’ami lix evangelio.
Chan ru nakanaw ma yookat chi “ak’ob’resiik” xb’aan lix evangelio li Jesukristo? Jun na’leb’ re xk’eeb’al reetal a’an xtz’ilb’al rix Kolosenses 3:1–17 ut xtz’iib’ankil chi tustu eb’ lix na’leb’, lix k’oxlahom, ut lix b’aanuhom jun li “q’eel winq,” ut chirix a’an xtz’iib’ankil chi tzoltzo lix na’leb’, lix k’oxlahom, ut lix b’aanuhom jun li “ak’ winq.”
Rik’in xtzolb’aleb’ li raqal a’in, ma nakak’ul li na’leb’ chirix chan ru naq li evangelio yoo chajalb’al? Tz’iib’a li nakak’oxla re tatruuq chixnumsinkil wi’chik moqon, ut xk’oxlankil chan ru naq yookat chi usaak.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Eb’ laa junkab’al maare te’xk’e reetal naq k’iila sut natawman li aatin sa, xsahil, malaj saho’k sa’ li hu Filipenses. Rajlal sut naq nakawileb’ li aatin a’in, taaruuq texkanaaq aran re aatinak chirix li k’a’ru kixye laj Pablo chirix chan ru xtawb’al xsahil li qach’ool.
Chan ru naq nokoru chi “lemtz’unk jo’ li chahim sa’ ruchich’och’ ”?
Maare taaruuq teek’oxla sa’ komonil li k’a’aq re ru taaruuq “taawanq sa’ eech’ool,” jo’ yeeb’il sa’ li raqal a’in (chi’ilmanq ajwi’ Eb’ lix Raqalil li Paab’al 1:13). Chan ru naq taa’osob’tesiiq laa junkab’al rik’in xpaab’ankil li na’leb’ kixk’e laj Pablo?
Chan ru naru too’usaaq sa’ “xnawb’al ru li Dios”? K’a’ru “lix chamal xsasal li chaab’il k’a’uxl ut li na’leb’ ” li naqataw sa’ li evangelio?
Maare texruuq chirilb’aleb’ ru sa’ junkab’al li raqal a’in chi chunchu chirix jun toon li che’, malaj naq yookex chirilb’al xjalam-uuch jun toon che’ (jo’ li wan sa’ li tusleb’ aatin a’in). K’a’ru xyaalal naq “xe’inb’ilex” ut “kaw xaqxookex” rik’in li Kristo? Chan ru naru taqatenq’a qib’ chixkawob’resinkil li qamusiq’ejil xe’il?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Yu’ami lix nawom aach’ool. “Nakak’ut k’a’ruhat laa’at,” kixk’ut li Elder Neal A. Maxwell. “Chan ru wankat mas wi’chik taajultikamanq … chiru jun yaalil na’leb’ xak’ut sa’ jun li tzolok” (sa’ Li k’utuk jo’ li Kolonel, 13).
Laj Pablo kixk’ut naq tento taawanq li qapaab’aal chi “xe’inb’il” rik’in li Jesukristo (Kolosenses 2:7).