laj Pablo naxk’e chi tz’iib’ak jun li hu sa’ tz’alam

14–20 octubre

Filipenses; Kolosenses

“Chixjunil ninkuy xnumsinkil sa’ xk’ab’a’ li nak’ehok xkawub’ inch’ool”

Il ru Filipenses ut Kolosenses rik’ineb’ li kok’al nakatzoleb’ sa’ laa k’a’uxl. Sik’ aamusiq’ankil chirix chan ru taak’uteb’ chiru li na’leb’ wankeb’ sa’ li hu a’an.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Patz’ reheb’ li kok’al k’a’ru xe’xb’aanu chiru li xamaan xnume’ re xye’b’al li ruq’ re anihaq li naraj ru jun li ramiiw, jo’ xyeeman sa’ li tzolok re li xamaan xnume’.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Filipenses 1:3–4; Kolosenses 1:3, 9

Eb’ laj jolominel re li Iglees nikine’xra ut neke’tijok chiwix.

Laj Pablo junelik naxtikib’eb’ lix hu rik’in xyeeb’al xrahom choq’ reheb’ li komon re li Iglees ut rik’in xyeeb’al reheb’ naq natijok chirixeb’ a’an. K’oxla chan ru naru nakatenq’aheb’ li kok’al chixtawb’al ru naq neke’rahe’ xb’aaneb’ laj jolominel re li Iglees.

Kok’ k’anjel naru chi b’aanumank

• Il ru Filipenses 1:3–4 ut Kolosenses 1:3, 9 chi kaw xyaab’ aakux, ut kanab’eb’ li kok’al chixq’alunkileb’ li ruq’ ut chixxulub’ankileb’ lix jolom rajlal sut naq te’rab’i li aatin eb’ li tij, ut tijok. Ch’olob’ naq li apostol Pablo kitijok chirixeb’ li komon re li Iglees, jo’ ajwi’ naq eb’ li qajolominel re li Iglees neke’tijok chiqix laa’o sa’eb’ li kutan a’in.

• K’ut jun xjalam-uuch li Jesukristo ut wotzeb’ eetalil b’ar wi’ a’an kitijok chirix anihaq (chi’ilmanq Lukas 22:32; 3 Nefi 19:21, 23). K’a’ru kixpatz’ li Jesus naq kitijok chirixeb’ li ras riitz’in?

• Tenq’aheb’ li kok’al chixyeeb’al xk’ab’a’eb’ junjunq aj jolominel reheb’ sa’ li Iglees, jo’eb’ li awa’b’ej re li Tzoleb’aal reheb’ li Kok’al, li obiisp, ut li Awa’b’ej re li Iglees. Ch’olob’ naq eb’ laj jolominel a’an neke’xpatz’ re li qaChoxahil Yuwa’ naq taarosob’tesiheb’ li kok’al ut naq tixtenq’aheb’ chi wank sa’ tiikilal. K’oxla xyeeb’al reheb’ li kok’al k’a’ru nakaye laa’at naq nakattijok chirixeb’.

Filipenses 4:4, 8

Naru nasaho’ inch’ool rik’in li Qaawa’.

Laj Pablo kixwaklesiheb’ xch’ool laj santil paab’anel chi saho’k xch’ooleb’, us ta neke’xk’ul ch’a’ajkil yale’k ut laj Pablo ajwi’ wan chaq sa’ li tz’alam. Chan ru taatenq’aheb’ li kok’al chirilb’al naq xyu’aminkil li evangelio naxk’e xsahil qach’ool?

Kok’ k’anjel naru chi b’aanumank

• Patz’ reheb’ li kok’al naq te’ab’inq chi us naq laa’at taawil ru Filipenses 4:4 re xtawb’al jun aatin naka’sutiman. Kanab’eb’ li kok’al chixk’utb’al chawu k’a’ raj ru te’xb’aanu naq te’sahoq xch’ool. Tenq’aheb’ chixtawb’al ru naq “xsahob’resinkil qach’ool rik’in li Qaawa’ ” naraj naxye reek’ankil sahil ch’oolej xb’aan naq wan qik’in li evangelio ut xb’aan naq li Jesukristo nokoxra.

• K’ameb’ k’a’aq re ru malaj jalam-uuch li te’reetali li k’a’ru neke’tenq’an aawe laa’at “chixsahob’resinkil aach’ool rik’in li Qaawa’.” Naru nakak’am jun xchaq’al ru yo’ob’tesihom li Dios malaj xjalam-uuch junaq li santil ochoch, li Kolonel waklijenaq chi yo’yo, malaj jun li junkab’al. Kanab’eb’ li kok’al chixk’eeb’aleb’ xhoonal re xsik’b’al ru jun li jalam-uuch malaj k’a’aq re ru ut ye reheb’ k’a’ut naq a’an naxk’e xsahil aach’ool. Kanab’eb’ chixwotzb’al k’a’ru natenq’an reheb’ a’an chixsahob’resinkil xch’ooleb’ rik’in li Qaawa’.

• Ilomaq ru sa’ komonil Filipenses 4:8 ut tenq’aheb’ li kok’al chixk’oxlankileb’ li k’a’ru naxk’ul rib’ rik’ineb’ li nach’olob’aman sa’ li raqal (chi’ilmanq ajwi’ Eb’ lix Raqalil li Paab’aal 1:13). Ke reheb’ li kok’al jun li perel hu ut kanab’eb’ chixyiib’ankil xjalam-uucheb’ li k’a’aq re ru a’an re xtenq’ankileb’ chixk’oxlankileb’ li k’a’aq re ru li naxch’olob’ laj Pablo.

Kolosenses 1:23; 2:6–7

Lin paab’aal tento naq “chapchooq” rik’in li Jesukristo.

Wi eb’ li kok’al neke’ru chixkab’lankil lix yu’ameb’ ut lix paab’aaleb’ sa’ xb’een li Kolonel, te’ruuq chixkuyb’aleb’ lix kaq-sut-iq’ li yu’am.

Kok’ k’anjel naru chi b’aanumank

• K’ut jun xjalam-uuch li che’ li wan sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al naq yooqat chirilb’al ruheb’ ch’ol aatin aajeleb’ ru sa’ Kolosenses 1:23; 2:6–7. (Malaj k’ut li video “Torbellinos espirituales” sa’ LDS.org). K’a’ raj ru tixk’ul li che’ a’in wi ta jun li kaq-sut-iq’ taawulaq ut li che’ maak’a’aq raj xkawil xe’? Kanab’eb’ li kok’al chi xaqliik ut chixk’oxlankil naq a’aneb’ jun li che’ li wankeb’ xq’unil xe’ sa’ jun li kaq-sut-iq’, ut chirix a’an jun li che’ wan xkawil xe’. Chan ru naru li qapaab’aal chirix li Jesukristo qatenq’ankil chi wank jo’ jun li che’ wan xkawil xe’?

• Kanab’ jun li ch’ina al chixyiib’ankil jun xjalam-uuch li che’ chiru li pizarron. Kanab’eb’ li kok’al chixk’eeb’al xk’ab’a’eb’ junjunq li k’a’aq re ru naru neke’xb’aanu re wank “chi chapcho xxe’ ” rik’in li Jesukristo. Rajlal naq jun li ch’ina al tixye k’a’ruhaq, kanab’ chixk’eeb’al jun li xe’ sa’ li jalam-uuch.

reetalil li k’utuk

Xk’utb’al li tzol’leb’

Kok’al ak ninqeb’

Filipenses 4:4–13

Wi wan inpaab’aal chirix li Jesukristo, naru nawan xsahil inch’ool us ta wankin sa’ ch’a’ajkil hoonal.

Laj Pablo kixnumsi k’iila yale’k, a’b’an kiwan chi sa xch’ool xb’aan naq kiwan xpaab’aal chirix li Jesukristo.

Laj Pablo kixnumsi k’iila yale’k, a’b’an kiwan chi sa xch’ool xb’aan naq kiwan xpaab’aal chirix li Jesukristo.

• Kanab’eb’ li kok’al chixk’oxlankil naq wankeb’ sa’ tz’alam, jo’ li apostol aj Pablo kiwan chaq naq kixtz’iib’a li hu choq’ reheb’ laj Filipenses. Il ru rik’ineb’ li kok’al Filipenses 4:4–13 ut patz’ reheb’ naq te’ab’inq chi us re xtawb’aleb’ li aatin a’in: chexsaho’q, xsaho’k sa’ inch’ool, tuqtuukil usilal, chi k’ojk’o inch’ool. K’a’ut naq laj Pablo kiwan xsahil xch’ool ut kireek’a tuqtuukilal naq kiwan chaq sa’ tz’alam? Tenq’aheb’ li kok’al chixtawb’aleb’ li aatin Qaawa’, Dios ut Kristo sa’eb’ li raqal. Tenq’aheb’ chixtawb’al ru naq lix paab’aal laj Pablo chirix li Jesukristo kixk’e xsahil xch’ool.

• Kanab’eb’ li kok’al chatenq’ankil chixtz’aqob’resinkil ruheb’ li ch’ol aatin jo’ a’in: Naru ninwan sa’ li q’ojyin ru a’b’an ninru chi ilok wi wan jun li . Naru ninwan chirix kab’l chiru tiqwal saq’e a’b’an naru naweek’a li iq’ wi wan jun lin . Naru neke’wan inhoonal ch’a’aj ru a’b’an naru naweek’a sahil ch’oolejil wi . Tenq’aheb’ li kok’al chixk’oxlankil chan ru naru neke’xtaw sahil ch’oolejil rik’in li Jesukristo naq wanqeb’ sa’ ch’a’ajkil hoonal. Naru neke’xb’icha jun li b’ich, naru neke’ril ru jun li raqal jwal nawulak chiruheb’ sa’eb’ li loq’laj hu, naru neke’k’anjelak chiru anihaq malaj naru neke’b’antioxink sa’ jun li tij. K’a’ru naxch’olob’ Filipenses 4:4–13? Wotz rik’ineb’ li kok’al junjunqeb’ li b’ich malaj raqal sa’eb’ li loq’laj hu li neke’tenq’an aawe laa’at chixtawb’al sahil ch’oolejil naq wankat sa’ ch’a’ajkil hoonal.

Filipenses 4:8

Naru nink’oxla li k’a’ru tz’aqal yaal, maak’a’ xb’alaq’, ut saq’ ru.

Wan naq eb’ li kok’al neke’tawman chiru li k’a’ru ink’a’ us ut tz’aj. Laa’at naru nakatenq’aheb’ chixsik’b’al li k’a’ru nawaklesin aamej ut li saq ruhil na’leb’.

Kok’ k’anjel naru chi b’aanumank

• Kanab’ jun li ch’ina al chirilb’al ru Filipenses 4:8 chi kaw xyaab’ xkux ut eb’ lix komon te’xsik’eb’ aatin sa’ Eb’ lix Raqalil li Paab’aal 1:13 li juntaq’eeteb’. Kanab’ anihaq chixtz’iib’ankileb’ li aatin a’an sa’ li pizarron. Ch’olob’eb’ li aatin a’an chi moko ch’a’aj ta xtawb’aleb’ ru ut kanab’eb’ li kok’al chixk’ulinkil rib’eb’ li aatin rik’in lix ch’olob’ankileb’. K’a’ut naq tento “taawanq sa’ qach’ool” li k’a’aq re ru a’an? Chan ru naru “neke’qasik’eb’ ” a’an?

• Kanab’eb’ li kok’al chixk’eeb’al xk’ab’a’eb’ k’a’aq re ru neke’xk’ul rib’ rik’in li natawman sa’ Filipenses 4:8. Kanab’eb’ li kok’al chixyiib’ankil xtusulal k’a’aq re ru te’ril chiru li xamaan a’in li naxk’ul rib’ rik’ineb’ li ch’olob’ank a’an. Waklesiheb’ xch’ool chixk’amb’al lix tusumeb’ sa’ li Tzoleb’aal reheb’ li Kok’al chiru li xamaan jun chik ut chixwotzb’al li k’a’ru xe’xtaw.

Kolosenses 1:23; 2:6–7

Lin paab’aal tento naq “chapchooq xxe’ ” rik’in li Jesukristo.

Laj tza naxyal xq’unob’resinkil lix paab’aaleb’ li kok’al rik’in li aaleek ut b’alaq’il tzol’leb’. Chan ru naru nakawaklesiheb’ xch’ool li kok’al chixkawob’resinkil lix paab’aaleb’ chirix li Kolonel re naq “kaw xaqxooqeb’ chi oyb’enink sa’ xk’ab’a’ li evangelio”?

Kok’ k’anjel naru chi b’aanumank

• Kanab’eb’ li kok’al chixyiib’ankileb’ jalam-uuch neke’reetaliheb’ li yaal neke’tawman sa’ Kolosenses 1:23; 2:6–7. Kanab’eb’ chixwotzb’aleb’ lix jalam-uuch sa’ li tzoleb’aal ut chixch’olob’ankileb’ li yaal neke’reetali lix jalam-uucheb’.

• K’ut li video “Torbellinos espirituales.” B’ar wan junjunqeb’ li aaleek ut lix b’alaq’il aj tzol’leb’ li ruchich’och’ sa’eb’ li kutan a’in li naru naxq’unob’resi li qapaab’aal? K’a’ru naru naqab’aanu re xkawob’resinkil li qapaab’aal toj re naq “chapchooq qaxe’ ” rik’in li Jesukristo?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’al li xe’xtzol chirix li wank “chi chapchookeb’ xxe’ ” rik’in li Kristo. Naru neke’roksi li perel re kok’ k’anjel re li xamaan a’in malaj jun li raqal sa’eb’ li loq’laj hu li xe’ril ru sa’ li tzoleb’aal sa’ li kutan a’in.

Xchaab’ilob’resinkil li qak’utum

Eb’ li kok’al chixjunil neke’raj xnawb’al ut neke’tzolok rik’in li k’a’ru ak’ ut jalan jalanq. Oksiheb’ kok’ k’anjel li te’tenq’anq reheb’ chixjunileb’ li kok’al chireek’asinkileb’ rib’, chiroksinkileb’ chixjunil lix junxaqalileb’, ut chixyalb’aleb’ ak’ k’a’aq re ru. Maare te’usaaq raj choq’ aawe eb’ li na’leb’ wankeb’ sa’ “Xkomon chik li k’anjeleb’aal re xtzolb’aleb’ li kok’al” wan sa’ xtiklajik k’anjeleb’aal a’in. (Chi’ilmanq ajwi’ Li k’utuk jo’ li Kolonel, 25–26.)

perel re kok’ k’anjel: naq lin paab’aal chapcho xxe’ rik’in li Jesukristo