21–27 octubre

1 ut 2 Tesalonicenses

“Meejal eek’a’uxl sa’ junpaat, chi moko chexib’e eerib’ ”

Naq nakawil ru 1 ut 2 Tesalonicenses rik’in tijok ut rik’in xk’oxlankileb’ li kok’al, taataweb’ li na’leb’ tento te’xtaw ru.

Xtz’iib’ankil li nakak’oxla

Xkanab’ankileb’ chi wotzok

Ma xab’oqeb’ li kok’al chiru li tzolok sa’ li xamaan xnume’ chixk’anjelankil li k’a’ru xe’xtzol? Kanab’eb’ li kok’al chiroksinkil wiib’ oxib’ k’asal sa’ li tzolok re li xamaan a’in chixwotzb’aleb’ lix numsihomeb’.

Xk’utb’al li tzol’leb’

Kok’al toj ka’ch’ineb’ xyu’am

1 Tesalonicenses 5:1–6

Wi nintaaqeheb’ lix taqlahom li Dios, kawresinb’ilaqin choq’ re li xkab’ xk’ulunik li Jesukristo.

Li na’leb’ kixk’e laj Pablo naru chiqatenq’ankil chi wank chi kawresinb’ilaqo choq’ re li nimla kutan naq li Kolonel taak’ulunq wi’chik sa’ li ruchich’och’.

Kok’ k’anjel naru chi b’aanumank

• B’oq jun na’b’ej chi aatinak chirix chan ru xwan choq’ re a’an royb’eninkil lix yo’lajik lix k’uula’al chi ink’a’ naxnaw jo’q’e taak’ulmanq. Il ru 1 Tesalonicenses 5:2–3, ut ye reheb’ li kok’al naq li Jesukristo taachalq wi’chik sa’ li ruchich’och’, a’b’an maa’ani nanawok re jo’q’e tz’aqal, jo’ jun li na’b’ej ink’a’ naxnaw jo’q’e tz’aqal taayo’laaq lix k’uula’al.

• Kanab’eb’ li kok’al chi aatinak chirix junaq hoonal b’ar wi’ xe’xkawresi rib’ re xik chi b’eek malaj re junaq k’anjel. K’a’ru xe’xb’aanu re xkawresinkileb’ rib’? K’am jun li maleet malaj jun li b’oolx ut kanab’eb’ li kok’al chixk’oxlankil naq yookeb’ chixkawresinkileb’ rib’ re xik chi b’eek malaj re jun k’anjel. Ch’olob’ naq naqakawresi qib’ choq’ re naq li Jesukristo taachalq wi’chik naq nokotijok, naq naqileb’ ru li loq’laj hu, naq naqataaqeheb’ li profeet, ut naq nokowan sa’ tiikilal rajlal kutan. Kanab’eb’ li kok’al chixyiib’ankileb’ xjalam-uuch chan ru naru neke’xb’aanu ut k’eheb’ sa’ li maleet.

• Il ru 1 Tesalonicenses 5:6 choq’ reheb’ li kok’al ut ch’olob’ naq wi ink’a’ yooko chixkawresinkil qib’ choq’ re naq li Jesus taak’ulunq wi’chik, a’an chanchan ta wi’ naq warenaqo ut ink’a’ kawresinb’ilaqo chixk’ulb’al. Kanab’eb’ li kok’al chixk’oxlankil naq yookeb’ chi wark. Ch’olob’ naq wi naqakawresi qib’, a’an chanchan naq aj-ooko ut yooko chiroyb’eninkil. Kanab’eb’ chi ajk. B’ichahomaq sa’ komonil “Naq taak’ulunq li Kolonel” (B’ichleb’aal choq’ reheb’ li Kok’al, 46–47).

2 Tesalonicenses 2:1–3

Laj Pablo kixk’ut naq taak’ulmanq jun li q’etok paab’ank naq maji’ nak’ulun wi’chik li Jesukristo.

Rik’in xnumik li hoonal, li Iglees kixk’ojob’ li Jesukristo kit’ane’ sa’ q’etok paab’ank, li naraj naxye naq lix wankilal li tijonelil ut eb’ li yaalil na’leb’ re li evangelio ke’isiik sa’ li ruchich’och’. Laj Pablo kixye rik’in profeetil aatin naq li q’etok paab’ank a’in, malaj li “xtz’eqtaanankil li paab’ank,” taak’ulmanq naq maji’ nak’ulun wi’chik li Kolonel.

Kok’ k’anjel naru chi b’aanumank

• Chirix rilb’al ru 2 Tesalonicenses 2:3 rik’ineb’ li kok’al, yiib’omaq jun nimla kab’l rik’ineb’ kok’ sek’ malaj kok’ kaaxukuut. Ye reheb’ li kok’al naq eb’ li kok’ sek’ malaj eb’ li kaaxukuut neke’reetali xcha’alil li Iglees tz’aqal yaal li aajeleb’ ru, jo’eb’ li yaalil na’leb’ re li evangelio, li tijonelil, li tz’ape’k sa’ junajil sa’ li santil ochoch, ut eb’ li profeet. Chirix naq laj Pablo ut eb’ lix komoneb’ chik li apostol ke’kam, eb’ li k’a’aq re ru a’an ke’sach, ut li Iglees tz’aqal yaal ink’a’ kitawman sa’ li ruchich’och’ chiru k’iila chihab’. Kanab’ jun li ch’ina al chixt’anb’al li nimla kab’l ut ch’olob’ naq a’an kik’ab’a’iman li Q’etok Paab’ank malaj xtz’eqtaanankil li paab’ank. Naq li Jesukristo kixxaqab’ wi’chik lix Iglees, kik’ab’a’iman li K’ojob’ank wi’chik. (Chi’ilmanq “Apostasia”, Leales a la Fe, 17–18).

• K’e chi kutankil jun lix Hu laj Mormon ut xjalam-uuch li profeet ut jun li santil ochoch. Kanab’eb’ li kok’al chixyeeb’al “Q’etok Paab’ank” naq taamuqeb’ li k’a’aq re ru sa’ jun li b’oolx, ut “K’ojob’ank wi’chik” naq taawisiheb’ wi’chik.

• B’ichahomaqeb’ li b’ich neke’xk’ut li yaal ke’isiik chiru xhoonalil li Q’etok Paab’ank ut ke’k’ojob’aak wi’chik sa’eb’ li qakutan, jo’ “Laa’in jun ralal li Dios,” “Lix Iglees li Jesukristo,” ut “Sa’ li santil ochoch” (B’ichleb’aal choq’ reheb’ li Kok’al, 2–3, 48, 99).

Xk’utb’al li tzol’leb’

Kok’al ak ninqeb’

1 Tesalonicenses 5:1–6

Wi nintaaqeheb’ lix taqlahom li Dios, kawresinb’ilaqin choq’ re li xkab’ xk’ulunik li Jesukristo.

Li na’leb’ kixk’e laj Pablo naru chiqatenq’ankil chi wank chi kawresinb’ilaqo ut chiroyb’eninkil li nimla kutan naq li Kolonel taak’ulunq wi’chik sa’ li ruchich’och’.

Kok’ k’anjel naru chi b’aanumank

• Kanab’ jun li ch’ina al chirilb’al ru 1 Tesalonicenses 5:1–6 ut lix komoneb’ li kok’al te’ril ajwi’ ru chi ch’anch’o. Chirix li junjunq chi raqal, kanab’ jun li ch’ina al chixk’osb’al ru li k’a’ru naxk’oxla naq naxye li raqal. Maare taawaj xch’olob’ankil naq “lix kutankil li Qaawa’ ” naraj naxye li xkab’ xk’ulunik li Jesukristo. K’a’ut neke’xk’oxla li kok’al naq li xkab’ xk’ulunik li Qaawa’ najuntaq’eetiman rik’in jun aj elq’ sa’ q’ojyin malaj jun li ixq li ak ok re chi yo’laak xk’uula’al?

• Ye reheb’ li kok’al naq te’xk’oxla naq li Kolonel taarula’ani li tzoleb’aal sa’ junaq hoonal chiru li kutan a’in. Chan ru naru naqakawresi li tzoleb’aal re li rula’anihom? Tenq’aheb’ li kok’al chixk’oxlankil li k’a’ru naru naqab’aanu re xkawresinkil qib’ choq’ re li kutan naq li Jesukristo taaq’ajq chaq. Qayehaq, naru naqajal qak’a’uxl, nokokuyuk maak, naqachaab’ilob’resi li qawanjik rik’in li qajunkab’al, naqataaqe li profeet, ut naqapaab’eb’ li qasumwank. Waklesiheb’ xch’ool li kok’al chixsik’b’al ru junaq k’a’aq re ru te’xb’aanu re xkawresinkileb’ rib’ re xk’ulb’al li Kolonel sa’ lix k’ulunik.

2 Tesalonicenses 2:1–3

Laj Pablo kixk’ut naq taak’ulmanq jun li q’etok paab’ank naq maji’ nak’ulun wi’chik li Jesukristo.

Wi eb’ li kok’al neke’xtaw ru naq lix Iglees li Jesukristo ut lix evangelio ke’isiman sa’ li ruchich’och’ chiru li Nimla Q’etok Paab’ank, te’xtaw ru chi us k’a’ut naq aajel ru naq kiwan jun K’ojob’ank wi’chik.

Kok’ k’anjel naru chi b’aanumank

• Kanab’ jun reheb’ li kok’al chirilb’al ru 2 Tesalonicenses 2:1–3. Jo’ chanru neke’xye li raqal a’an, k’a’ru tento naq kik’ulman naq maji’ nawulak lix “kutankil li Qaawa’,” li naraj naxye li xkab’ xk’ulunik li Qaawa’? Ma neke’xnaw junjunqeb’ li kok’al k’a’ru naraj naxye “xtz’eqtaanankil li paab’ank”? K’e reetal chi us naq eb’ li kok’al neke’xtaw ru naq a’an naraj naxye li Nimla Q’etok Paab’ank, li kik’ulman chirix naq ke’kam lix apostol li Kolonel. Maare taawaj xwotzb’al li esil re “Apostasía,” Leales a la Fe, 17–18.

• Tenq’aheb’ li kok’al chixtz’iib’ankil sa’ li pizarron junjunq reheb’ li yaal ut li osob’tesihom naqayal xsahil sa’ xk’ab’a’ li evangelio. (Sa’ xyanqeb’ li eetalil naru neke’tawman li santil ochoch, eb’ li profeet, li tijonelil, ut li maatan re li Santil Musiq’ej.) Sacheb’ chi junjunqal ut patz’ reheb’ li kok’al chan raj ru naq jalanaq lix yu’ameb’ wi ta maak’a’eb’ li yaal a’an. Ch’olob’ naq eb’ li yaal a’an ke’sach sa’ li Nimla Q’etok Paab’ank. K’a’ut naq aajel ru naq lix Iglees li Jesukristo kik’ojob’aman wi’chik sa’ li ruchich’och’ sa’ li roso’jikeb’ li kutan a’in? Kanab’eb’ li kok’al “chixk’ojob’ankil wi’chik” malaj xtz’iib’ankileb’ wi’chik li yaal ut li osob’tesihom chiru li pizarron.

2 Tesalonicenses 3:7–13

Li qaChoxahil Yuwa’ naraj naq tintrab’ajiq.

Chan ru naru nakatenq’aheb’ li kok’al chirilb’al li trab’aaj jo’ jun osob’tesihom, ut ink’a’ jo’ k’a’ru ink’a’ raj taaqaj xb’aanunkil?

Kok’ k’anjel naru chi b’aanumank

• Kanab’eb’ li kok’al chixk’eeb’al xhoonaleb’ chirilb’aleb’ ru raqal sa’ 2 Tesalonicenses 3:7–13 re xsik’b’al li ch’a’ajkilal yookeb’ chaq chixnumsinkil laj santil paab’anel. K’a’ut naq li qaChoxahil Yuwa’ naraj naq tootrab’ajiq? K’a’ raj ru taak’ulmanq wi ta ink’a’ taqatzol trab’ajik chi kaw? Kanab’eb’ li kok’al chixk’eeb’al xhoonaleb’ chixk’utb’esinkileb’ kok’ trab’aaj ut eb’ lix komon li kok’al te’xq’ehi k’a’ru yookeb’ chixb’aanunkil.

• Kanab’eb’ li kok’al chi aatinak chirix junaq hoonal b’ar wi’ xe’k’anjelak chi kaw sa’ junaq k’anjel, k’uub’anb’il k’anjel, malaj jayalihom. K’a’ru xe’reek’a naq xe’raqe’? K’a’ru naraj naxye “mextitz’ chixb’aanunkil li us”? (2 Tesalonicenses 3:13).

Xb’oqb’aleb’ chi tzolok sa’ kab’l

Kanab’eb’ li kok’al chixyeeb’al re junaq li komon sa’ lix junkab’aleb’ malaj re jun li ramiiw k’a’ut naq neke’xb’antioxi naq li evangelio wan sa’ li ruchich’och’ anajwan (li perel re kok’ k’anjel re li xamaan a’in naru naxtenq’aheb’ chixjultikankil).

Xchaab’ilob’resinkil li qak’utum

Tenq’aheb’ lix na’ xyuwa’eb’ li kok’al. “Eb’ li na’b’ej yuwa’b’ej a’aneb’ laj k’utenel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ Iglees, sik’ rik’in tijok chan ru taatenq’aheb’ lix na xyuwa’ sa’ lix k’anjeleb’ li aajel ru.” (Li k’utuk jo’ li Kolonel, 25).