oxib’ li ixq xaqxookeb’ chirix li santil ochoch

28 octubre–3 noviembre

1 ut 2 Timoteo; Tito; Filemon

“Chayal aaq’e chixk’amb’al xb’eheb’ laj paab’anel”

Rik’in tijok, tzoleb’ 1 ut 2 Timoteo; Tito; ut Filemon re xnawb’al chan ru naru nakawoksiheb’ li hu a’an re xtzolb’aleb’ li kok’al sa’ tiik ruhil na’leb’ (chi’ilmanq 2 Timoteo 3:16).

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chi aatinak chirix anihaq li nawan jo’ chaab’il “aj k’amol xb’eheb’ laj paab’anel” choq’ reheb’ a’an. K’a’ru yookeb’ chixb’aanunkil re wank jo’ jun chaab’il aj k’amol xb’eheb’ li ras riitz’ineb’?

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

1 Timoteo 3:1–2; Tito 1:7–9

Eb’ li obiisp neke’xb’eresi li teep jo’ xmoos li Dios.

Laj Pablo kixk’ut chiru laj Timoteo ut laj Tito chirix lix aajelil ruheb’ li obiisp. Chan ru naru nakak’ut chiruheb’ li kok’al chirix li k’a’ru naxb’aanu li obiisp? (Jun awa’b’ej re li uq’ej chanchan ajwi’ jun li obiisp.)

Kok’ k’anjel naru chi b’aanumank

• Yiib’ chiru li pizarron jun xjalam-uuch laa obiisp. Kanab’eb’ li kok’al chixyeeb’al li k’a’ru neke’xnaw chirix li obiisp. Chan ru a’an? K’a’ru naxb’aanu? Chan ru narosob’tesi li teep? (Sa’ 1 Timoteo 3:1–2 ut Tito 1:7–9 neke’yeeman chan ru tento taawanq jun li obiisp.) Naq eb’ li kok’al te’xwotz lix na’leb’eb’, tz’iib’aheb’ chiru kok’ hu ut kanab’eb’ li kok’al chixk’eeb’al chiru li pizarron chixk’atq li jalam-uuch.

  jun li obiisp na’aatinak rik’in jun li saaj sa’ lix oficiin

  Eb’ li obiisp b’oqb’ileb’ chixk’eeb’al xb’eresinkileb’ li komon sa’ li teep.

• Tz’iib’aheb’ lix k’anjel li obiisp chiruheb’ kok’ hu, jo’ xk’ulb’aleb’ li lajetqil ut li mayej re kuyuk sa’, k’ehok b’oqb’il k’anjel, raatinankileb’ li komon, xtenq’ankileb’ li neb’a’ ut li wankeb’ raajelil, ut tijok chirixeb’ li ras riitz’in. K’eheb’ li kok’ hu sa’ jun li sek’ ut kanab’eb’ li kok’al chixsik’b’al ru junaq. Chirix a’an tenq’a li ch’ina al chixb’aanunkileb’ li k’anjel a’an aawik’in. Ch’olob’ xyaalal naq laa obiisp b’oqb’il xb’aan li Dios.

• Kanab’eb’ li kok’al chixyiib’ankil jun xjalam-uuch li obiisp naq yoo chi k’anjelak chiruheb’ li komon re lix teep. Ye reheb’ naq wi neke’raj naru te’xk’e lix jalam-uucheb’ re li obiisp jo’ jun b’antioxihom choq’ re a’an. K’a’ru naru naqab’aanu re xtenq’ankil a’an?

1 Timoteo 4:12

Naru nikinwan jo’ “aj k’amol xb’eheb’ laj paab’anel.”

K’a’ru naru nakab’aanu re xwaklesinkileb’ xch’ool li kok’al chixkawob’resinkil lix nawomeb’ naq naru neke’wan jo’ “aj k’amol xb’eheb’ laj paab’anel”?

Kok’ k’anjel naru chi b’aanumank

• B’icha rik’ineb’ li kok’al “Jo’ ninb’aanu, chab’aanu laa’at” (B’ichleb’aal choq’ reheb’ li Kok’al, 147). Kanab’eb’ li kok’al chixtaaqenkil li eek’asink-ib’ nakab’aanu laa’at. Kanab’eb’ li kok’al chixk’eeb’aleb’ xhoonal re xb’eresinkileb’ lix komoneb’ sa’ li tzoleb’aal re xtaaqenkileb’ li eek’asink-ib’ te’xb’aanu ajwi’ eb’ a’an. Il ru 1 Timoteo 4:12, ut patz’ reheb’ li kok’al k’a’ru naru te’xb’aanu re wanq jo’ jun chaab’il eetalil choq’ reheb’ li ras riitz’in.

• Wotz jun aanumsihom b’ar wi’ laa’at xayal wank jo’ jun chaab’il aj k’amol b’e choq’ re anihaq malaj b’ar wi’ naq anihaq xwan jo’ jun chaab’il aj k’amol b’e choq’ aawe. Tenq’aheb’ li kok’al chixtawb’al ru naq rik’in naq neke’wan jo’ jun chaab’il aj k’amol b’e, naru neke’xtenq’a lix junkab’aleb’ ut li ramiiweb’.

2 Timoteo 3:14–17

Eb’ li loq’laj hu tine’xtenq’a chixtzolb’al li yaal.

Wi nakatru chixtenq’ankileb’ li kok’al chixraab’aleb’ li loq’laj hu, taawosob’tesiheb’ lix yu’am chiru naab’al chihab’.

Kok’ k’anjel naru chi b’aanumank

• K’e chi kutankil jun ch’uut li loq’laj hu ut tenq’aheb’ li kok’al chixnawb’aleb’ ru rik’in xk’utb’al chiruheb’ li perel re xjolomil aatin re li Santil Hu, re lix Hu laj Mormon, re li Tzol’leb’ ut Sumwank, ut re li Q’ol Nim Xtz’aq. Kanab’ jun li ch’ina al chixchapb’aleb’ li tasal hu a’an naq yooqat chirilb’al ru 2 Timoteo 3:15–17. Ch’olob’ naq li qaChoxahil Yuwa’ naxtaqlaheb’ chaq profeet chalen chaq xtiklajik li ruchich’och’ li neke’xtz’iib’a li yaal naxk’utb’esi a’an. Naru naqatzoleb’ li yaal a’an naq naqileb’ ru li loq’laj hu.

• Kanab’eb’ li kok’al chi aatinak chirix junaq k’a’aq re ru wan reheb’ jwal aajel ru choq’ reheb’. K’a’ru neke’xb’aanu rik’in? Kanab’eb’ chixk’eeb’al xhoonaleb’ re xchapb’aleb’ li loq’laj hu ut xb’alq’usinkileb’ li perel rik’in oxloq’. K’a’ru aj-e naqoksiheb’ li loq’laj hu? K’a’ut naq tento te’qoksi rik’in oxloq’? Tenq’aheb’ li kok’al chixk’oxlankileb’ eek’asink-ib’ li te’xk’am rib’ rik’ineb’ li b’ich neke’aatinak chirixeb’ li loq’laj hu, jo’ “Lix Hu laj Mormon naxk’ut” malaj “Tintzol, tink’oxla, tintijoq” (B’ichleb’aal choq’ reheb’ li Kok’al 62, 66).

reetalil li k’utuk

Xk’utb’al li tzol’leb’

Kok’al ak ninqeb’

1 Timoteo 4:12

Naru nikinwan jo’ “aj k’amol xb’eheb’ laj paab’anel.”

Laj Timoteo toj saaj chaq re taawanq raj jo’ aj jolominel re li Iglees, a’b’an laj Pablo kiraj xk’eeb’al chixnaw naq toj chi jo’kan naru nawan jo’ jun chaab’il aj k’amol b’e. Laa’at naru nakatenq’aheb’ li kok’al li nakatzoleb’ chixkawob’resinkil lix nawomeb’ naq naru neke’wan jo’ jun chaab’il aj k’amol b’e.

Kok’ k’anjel naru chi b’aanumank

• Ilomaq ru sa’ komonil 1 Timoteo 4:12, ut kanab’eb’ li kok’al chixtawb’aleb’ waqib’ chan ru naq laj Pablo kixye naq naru nokowan jo’ “aj k’amol xb’eheb’ laj paab’anel.” Ch’utub’eb’ li kok’al chi ka’kab’il ut kanab’eb’ li junjunq chi ch’uut chixk’oxlankil junaq hoonal b’ar wi’ naru neke’wan jo’ chaab’il aj k’amol b’e. Kanab’eb’ chixk’utb’esinkil li hoonal a’an choq’ reheb’ lix komon sa’ li tzoleb’aal.

• Patz’ reheb’ li kok’al ma taawulaq raj chiruheb’ xwotzb’al resil junaq numsihom b’ar wi’ xe’xyal wank jo’ jun chaab’il aj k’amol b’e choq’ reheb’ li ras riitz’in. Ye reheb’ chan ru naq a’aneb’ neke’wan jo’ aj k’amol b’e choq’ aawe ut chan ru nakawil laa’at naq yookeb’ chi wank jo’ chaab’il aj k’amol b’e choq’ reheb’ li ras riitz’in.

1 Timoteo 6:7–12

Tento tinra li k’a’ru ink’a’ na’oso’ mas wi’chik chiru li tumin.

Sa’ jun ruchich’och’ b’ar wi’ naraaman chi us li k’a’ru na’oso’, chan ru naru nakatenq’aheb’ li kok’al chixkanab’ankil li rilob’aaleb’ ut lix rahomeb’ rik’in li qaChoxahil Yuwa’ ut rik’in li Jesukristo?

Kok’ k’anjel naru chi b’aanumank

• Kanab’eb’ li kok’al chi aatinak chirix li te’xloq’ raj wi ta wanqeb’ mas naab’al xtumineb’. Kanab’eb’ li kok’al chirilb’al ru 1 Timoteo 6:7–12, ut kanab’eb’ xkomoneb’ li kok’al chixk’osb’al ru li kixk’ut laj Pablo re laj Timoteo chirix li tumin. Chirix a’an kanab’eb’ li kok’al chirilb’aleb’ wi’chik ru li raqal re xsik’b’al li k’a’ru mas aajel wi’chik ru chiru li tumin jo’ kixye laj Pablo.

• K’eheb’ chi kutankil xjalam-uucheb’ li k’a’aq re ru re ruchich’och’ (jo’ li tumin, b’atz’uul malaj numsib’aal hoonal) ut reheb’ li junelikil k’a’aq re ru (jo’eb’ li junkab’al malaj eb’ li santil ochoch). Kanab’eb’ li kok’al chixtusb’aleb’ li jalam-uuch sa’ wiib’ ch’uut—k’a’aq re ru nokoxnach’ob’resi rik’in li Dios ut k’a’aq re ru naru nokoxnajtob’resi chiru li Kristo wi jwal neke’qara wi’chik chiru li qarahom choq’ re a’an. K’a’ut naq “lix xe’ chixjunil li maa’usilal a’an li xrahinkil ru li tumin”?

2 Timoteo 3:14–17

Li qaChoxahil Yuwa’ kixk’eheb’ qe li loq’laj hu re qatenq’akil chixnawb’al ru li yaal ut li ink’a’ yaal.

Eb’ li kok’al naru neke’xyal li osob’tesihom naq neke’rileb’ ru li loq’laj hu. Naq yookat chixtzolb’aleb’ li kok’al chirixeb’ li loq’laj hu, sik’ chan ru naru nakawaklesiheb’ xch’ool chixsik’b’aleb’ xnumsihom ajwi’ a’aneb’ rik’in raatin li Dios.

Kok’ k’anjel naru chi b’aanumank

• Kanab’eb’ li kok’al chirilb’al ru 2 Timoteo 3:15–17. K’am jun jalam-uuch li taareetali jun esil wan sa’eb’ li junjunq chi hu reheb’ li loq’laj hu, ut keheb’ li jalam-uuch sa’ jun kaxon li tz’aptz’o xb’een. Kanab’eb’ li junjunq chi kok’al chixsik’b’al ru jun li jalam-uuch ut chixseraq’inkil li esil. Patz’ reheb’ li kok’al ma wan k’a’ruhaq chik naru neke’xwotz chirix li hu a’an reheb’ li loq’laj hu. Chan ru naq eb’ li loq’laj hu naru “xk’eeb’al [qana’leb’] li nak’amok sa’ li kolb’a-ib’?”

• Kanab’eb’ li kok’al chixwotzb’al li raqal jwal nawulak chiruheb’ sa’eb’ li loq’laj hu malaj jun li numsihom b’ar wi’ jun li yaal wan sa’eb’ li loq’laj hu xtenq’an reheb’. Maare nakawaj ajwi’ xwotzb’al laa raqal malaj laa numsihom laa’at.

• Kanab’ jun li ch’ina al chirilb’al ru Moroni 10:4–5. K’a’ru kixyeechi’i laj Moroni sa’eb’ li raqal a’an? Patz’ reheb’ li kok’al k’a’ru ak xe’xb’aanu re xtawb’al jun xnawom xch’ooleb’ naq eb’ li loq’laj hu tz’aqal yaaleb’. Kanab’eb’ chirilb’al ru malaj chirab’inkileb’ li loq’laj hu chi kok’ aj xsa’.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’aleb’ li k’a’ru xe’xtzol chirixeb’ li loq’laj hu ut chixtawb’al junaq li raqal sa’eb’ li loq’laj hu li naru neke’xwotz sa’ li tzoleb’aal sa’ li xamaan chal re (rik’in xtenq’eb’ lix na’eb’ ut xyuwa’eb’, wi na’ajman ru).

Xchaab’ilob’resinkil li qak’utum

Oksiheb’ li kok’ k’anjel re xb’aanunkil li nak’anjelak. Sa’ xna’aj rilb’aleb’ li tusleb’ aatin a’in jo’ na’leb’ tento taataaqe, oksiheb’ jo’ jun xyo’leb’aal na’leb’ li taatenq’anq aawe re taak’ul aamusiq’ankil naq nakak’oxla li rajomeb’ ru li kok’al nakatzoleb’. Eb’ li kok’ k’anjel naru neke’oksiman re xtzolb’aleb’ li kok’al a’ yaal jarub’ chihab’ wan reheb’.

perel re kok’ k’anjel: eb’ li loq’laj hu neke’xk’ut chiqu li yaal