Laj Melkisedek kirosob’tesi laj Abram, xb’aan laj Walter Rane

11–17 noviembre

Hebreos 7–13

“Lix yuwa’il aj tij re li sahilal chalel”

Naq yooqat chixtzolb’al li tusleb’ aatin a’in ut chi k’oxlak chirix, k’eheb’ reetal li na’leb’ te’chalq sa’ laa k’a’uxl choq’ reheb’ li kok’al nakatzoleb’. Li Musiq’ej tatxtenq’a chixtawb’aleb’ li esil choq’ reheb’ a’an sa’ Hebreos 7–13.

Xtz’iib’ankil li nakak’oxla

Xkanab’ankileb’ chi wotzok

Kanab’eb’ li kok’al chixwotzb’al li neke’xb’aanu rik’ineb’ lix junkab’al re xtzolb’al li evangelio sa’ kab’l. Kanab’eb’ chixwotzb’al junjunqeb’ lix numsihom jwal nawulak chiruheb’ naq neke’xtzol li evangelio rik’ineb’ lix junkab’al.

Xk’utb’al li tzol’leb’

Kok’al toj ka’ch’ineb’ xyu’am

Hebreos 7:1–6

Li tijonelil naru nokoxtenq’a chi naab’al paay ru.

Hebreos 7:1–6 naru naxk’e laa hoonal re xk’utb’al chiruheb’ li kok’al li rosob’tesihom li tijonelil.

Kok’ k’anjel naru chi b’aanumank

• Ch’olob’ ani chaq laj Abraham, ut chirix a’an oksi Hebreos 7:1–6 ut JJS, Genesis 14:36–40 re xk’utb’al naq laj Abraham kixtoj li lajetqil re laj Melkisedek. Ch’olob’ naq laj Melkisedek kixk’ul chaq li taqenaqil tijonelil, a’an lix wankilal li Dios k’eeb’il reheb’ li winq sa’ li ruchich’och’, ut naq kiroksi re rosob’tesinkil laj Abraham. Maare taawulaq raj chiruheb’ li kok’al xk’utb’esinkil li esil rik’ineb’ kok’ k’a’aq re ru, jo’ jun li koroon ut jun li k’uuleb’aal lajetqil.

• B’oq jun aj k’amol re li Tijonelil re Aaron ut jun aj k’amol re li Tijonelil re aj Melkisedek chi wulak sa’ li tzoleb’aal chixyeeb’al reheb’ li kok’al chan ru neke’roksi li tijonelil re rosob’tesinkileb’ li ras riitz’in. Chirix a’an k’uteb’ jalam-uuch chiruheb’ li kok’al re jalan jalanq k’ojob’anb’il k’anjel re li tijonelil (naru nakataweb’ eetalil sa’eb’ li jalam-uuch 103–108 re li Libro de obras de arte del Evangelio. Tenq’aheb’ li kok’al chixk’eeb’al reetal b’ar wan li tijonelil na’ajman ru re xb’aanunkil li junjunq chi k’ojob’anb’il k’anjel, ut chixk’eeb’al li jalam-uuch re laj k’amol re li tijonelil a’an re naq tixchap.

Hebreos 11:1–32

Li paab’aal a’an xpaab’ankil li ink’a’ nokoru chirilb’al.

Us ta ink’a’ neke’ru chirilb’al li qaChoxahil Yuwa’ chi moko li Jesukristo, chi moko neke’ru chixyalb’al chixjunileb’ li rosob’tesihom li evangelio, eb’ li kok’al nakatzoleb’ naru neke’xnimob’resi lix paab’aaleb’ naq neke’tzolok chirixeb’ li eetalil wankeb’ sa’ Hebreos 11.

Kok’ k’anjel naru chi b’aanumank

• K’e chi kutankil jun xjalam-uuch li Jesus. K’eheb’ sa’ li tzoleb’aal k’iila k’a’aq re ru li te’reetali naq li Jesus tz’aqal wan, us ta ink’a’ nokoru chirilb’al (jo’eb’ li loq’laj hu, jun xjalam-uuch li xb’een k’utb’esinb’il matk’, ut jun xjalam-uuch li ruchich’och’). Kanab’eb’ li kok’al chixtawb’aleb’ li k’a’aq re ru a’an ut chirix a’an wotz’ rik’ineb’ a’an chan ru naq eb’ li k’a’aq re ru a’an nokohe’xtenq’a chixpaab’ankil naq li Jesus yo’yo.

• K’am jun waal ut kanab’eb’ li kok’al chixk’eeb’aleb’ xhoonal chireek’ankil chan ru nawulak li iq’ sa’ xnaq’eb’ ru. K’ut chiruheb’ naq ink’a’ nokoru chirilb’al li iq’, a’b’an nokoru chireek’ankil. Chi jo’kan ajwi’, ink’a’ nokoru chirilb’al li qaChoxahil Yuwa’ chi moko li Jesukristo, a’b’an naru naqeek’a lix rahomeb’ ut naru nawan qapaab’aal chirix naq tz’aqal wankeb’.

• Wotzeb’ xkomoneb’ li esilal chirix jun malaj naab’aleb’ chik kristiaan neke’yeeman resil sa’ Hebreos 11:4–32. K’oxla roksinkil Eb’ li Esilal sa’ li Najter Chaq’rab’ (che’ilmanq li ch’ol 4–6, 8–10, 15–17, 23, ut 28). K’a’ru ke’xb’aanu li kristiaan a’an re xk’utb’al naq wankeb’ xpaab’aal chirix li k’a’ru ink’a’ ke’ru chirilb’al? Ye junjunqeb’ li osob’tesihom aak’ulum laa’at sa’ xk’ab’a’ laa paab’aal.

Hebreos 13:5–6

Li qaChoxahil Yuwa’ ut li Jesukristo toohe’xtenq’a ut maajun wa toohe’xtz’eqtaana.

K’a’ru li yale’k-ix maare’ yookeb’ chixnumsinkil li kok’al? Chan ru naru neke’tenq’aak xb’aan li esil sa’ Hebreos 13:5–6?

Kok’ k’anjel naru chi b’aanumank

• Numsiheb’ junjunq li seraq’ re li Ak’ Chaq’rab’ li ak xtzolomeb’ li kok’al chiru li chihab’ a’in b’ar wi’ li Kolonel kixtenq’aheb’ li ras riitz’in, jo’ naq kixk’irtesi jun li winq sik (chi’ilmanq Lukas 5:18–26) malaj kixk’eheb’ chi wa’ak oob’ mil chi kristiaan (chi’ilmanq Mateo 14:15–21). Tenq’aheb’ li kok’al chixtzolb’al li ch’ol aatin “Li Qaawa’ a’an aj tenq’ahom we” (Hebreos 13:6).

• Kanab’eb’ li kok’al chixyiib’ankil jun xjalam-uuch junaq li hoonal b’ar wi’ xe’reek’a xxiw. Yaab’asi reheb’ Hebreos 13:5–6 ut ch’olob’ xyaalal naq li qaChoxahil Yuwa’ tooxtenq’a ut maajun wa tooxtz’eqtaana. Tenq’aheb’ li kok’al chixsetb’aleb’ aamej chiru hu chi ninq re tixram ru lix jalam-uucheb’. B’ar wan junjunq reheb’ li k’a’aq re ru li nokoxtenq’a chireek’ankil naq nach’ wanko rik’in li qaChoxahil Yuwa’? Tz’iib’a junjunq reheb’ li k’a’aq re ru a’an chiruheb’ li aamej setb’ileb’.

• K’ut chiruheb’ li kok’al li xkab’ ch’ol re li b’ich “At inYuwa’, taak’ut taxaq chiwu” (B’ichleb’aal choq’ reheb’ li Kok’al, 75). Jo’ chanru naxye li b’ich, k’a’ru li tenq’ naru naqak’ul naq li qaChoxahil Yuwa’ ut li Jesukristo nach’ wankeb’? Aatinanqex chirix junaq li hoonal b’ar wi’ naq li qaChoxahil Yuwa’ kiwan chi nach’ aawik’in ut xatxtenq’a.

Xk’utb’al li tzol’leb’

Kok’al ak ninqeb’

Hebreos 7:1–4

Eb’ laj k’amol re li tijonelil k’ulub’ejeb’ neke’xtaaqe li Kolonel.

Chan ru naru nakawoksiheb’ li raqal a’an re xtenq’ankileb’ li kok’al chixtawb’al ru naq eb’ laj k’amol re li tijonelil tento tiikaqeb’ chi paab’ank ut tento te’k’anjelaq chiruheb’ li ras riitz’in jo’ li Kolonel kixb’aanu?

Kok’ k’anjel naru chi b’aanumank

• Tenq’aheb’ li kok’al chixyeeb’al li k’a’ru neke’xnaw chirixeb’ li wiib’ chi xninqaleb’ ru winq aj k’amol re li tijonelil, laj Abraham ut laj Melkisedek. Naru neke’xtaw xtenq’ankil sa’ Hebreos 7:1–4; Abraham 1:1–2 ut JJS, Genesis 14:25–40. K’a’ru li seeb’al chanchaneb’ re li Kristo ke’wan reheb’ li winq a’an li kitenq’an reheb’ chiroxloq’inkil li tijonelil?

• Kanab’eb’ li kok’al chirilb’al ru Hebreos 7:1–2 ut chixsik’b’aleb’ li aatin neke’oksiman re xk’ab’a’inkil laj Melkisedek. Chan ru naq eb’ li k’ab’a’ej a’an neke’xjultika qe li Jesukristo? Tenq’aheb’ chixk’oxlankil chan ru naq li Jesus kiwan jo’ “xreyil li tuqtuukilal.” Ma neke’xnaw ru junaq chik aj k’amol re li tijonelil nawan jo’ eetalil sa’ xtaaqenkil li Kolonel?

• Wotz jun aanumsihom b’ar wi’ jun aj tiikil jolominel re li tijonelil xatxtenq’a chi nach’ok rik’in li Kolonel. Tenq’aheb’ li kok’al chixk’oxlankil chan ru naq neke’osob’tesiik xb’aan li tijonelil.

Hebreos 11

Li qaChoxahil Yuwa’ naxq’ajkamuheb’ li wankeb’ xpaab’aal.

Sa’ Hebreos 11 wan resil naab’aleb’ li kristiaan li ke’osob’tesiik naq ke’k’anjelak rik’in paab’aal. B’ar wankeb’ li seraq’ li mas te’xwaklesi xch’ooleb’ li kok’al nakatzoleb’?

Kok’ k’anjel naru chi b’aanumank

• Kanab’eb’ li kok’al chixyiib’ankil jun xtusulal li neke’xtzol chirix li paab’aal sa’ Hebreos 11:1–3, 6 chiru li pizarron. K’e reheb’ li junjunq chi kok’al jun k’ab’a’ej nayeeman sa’ Hebreos 11, ut kanab’eb’ chirilb’al ruheb’ li raqal neke’aatinak chirix li kristiaan a’an. Kanab’eb’ chixwotzb’al li na’leb’ chirix li kristiaan a’an, re naq lix komoneb’ li kok’al te’xq’ehi ani a’an. Chan ru naq eb’ li kristiaan a’an ke’xk’ut xpaab’aal, ut chan ru ke’q’ajkamuuk xb’aan li qaChoxahil Yuwa’? (Sa’eb’ li perel re li Najter Chaq’rab’ re li Libro de obras de arte del Evangelio neke’tawman xjalam-uucheb’ li kristiaan a’an).

• Chirix naq neke’rileb’ ru li raqal chirixeb’ li tiikil kristiaan sa’ Hebreos 11, kanab’eb’ li kok’al chixtz’iib’ankil resil jun li kristiaan neke’xnaw ru li xk’ut xpaab’aal. Kanab’eb’ wiib’ oxib’ li kok’al chixwotzb’al sa’ li tzoleb’aal ani xe’xsik’ ru.

Hebreos 12:5–11

Li Qaawa’ naxtijeb’ li ani naxraheb’.

Eb’ li raqal a’an naru naxtenq’aheb’ li kok’al chixtawb’al ru naq neke’tije’ xb’aan li qaChoxahil Yuwa’, eb’ lix na’ xyuwa’, ut xkomoneb’ chik li kristiaan xb’aan naq neke’rahe’ ut xb’aan naq neke’raj naq te’tzoloq rik’in li ink’a’ us neke’xb’aanu.

Kok’ k’anjel naru chi b’aanumank

• Ilomaq ru sa’ komonil Hebreos 12:5–11 ut kanab’eb’ li kok’al chixtawb’aleb’ k’a’ut naq li qaChoxahil Yuwa’ nokoxtij (nokoxq’us malaj nokoxch’iila). K’a’ru neke’xk’ut chiqu a’an chirix k’a’ut naq eb’ li na’b’ej yuwa’b’ej sa’ ruchich’och’ neke’xq’useb’ ajwi’ li ralal xk’ajoleb’? Chan ru naq tento toosumenq rik’in jun q’usuk nab’aanuman rik’in rahok?

• Wotz resileb’ kristiaan sa’eb’ li loq’laj hu li ke’tije’ xb’aan li Qaawa’ ut ke’xjal xk’a’uxleb’ (jo’ eetalil, che’ilmanq 1 Nefi 16:25–27; Eter 2:13–15). Chan ru naq chaab’ileb’ eetalil a’an reheb’ li na’leb’ wankeb’ sa’ Hebreos 12:5–11?

• Chirix rilb’al ru Hebreos 12:5–11, kanab’eb’ li kok’al chixtz’iib’ankileb’ k’a’aq re ru te’xyal xjultikankil naq te’q’use’q xb’aan k’a’ru ink’a’ us xe’xb’aanu.

Xb’oqb’aleb’ chi tzolok sa’ kab’l

Kanab’eb’ li kok’al chixtz’iib’ankil malaj chixb’aanunkil jun xjalam-uuch li k’a’ru xe’reek’a naq jwal aajel ru li xe’xtzol sa’ li tzoleb’aal. Waklesiheb’ xch’ool chixwotzb’al li xe’xtzol rik’ineb’ lix junkab’al.

Xchaab’ilob’resinkil li qak’utum

Oksiheb’ li perel re kok’ k’anjel. Naq eb’ li kok’al yooqeb’ chixk’anjelankileb’ li perel re kok’ k’anjel sa’ li tzoleb’aal, oksi li hoonal re xnumsinkileb’ wi’chik li na’leb’ re li tzolok a’an.