Li b’an re Galahad, xb’aan xAnne Henrie

4–10 noviembre

Hebreos 1–6

Li Jesukristo, “xyo’leb’aal li kolb’a-ib’ “

K’a’ru li yaal nakataweb’ sa’ Hebreos 1–6 li nakaweek’a naq taak’uteb’ chiruheb’ li kok’al? K’eheb’ reetal li na’leb’ tixk’e aawe li Musiq’ej naq yooqat chixkawresinkil aawib’, ut k’e reetal naq taatz’iib’aheb’.

Xtz’iib’ankil li nakak’oxla

Xkanab’ankileb’ chi wotzok

Ma xe’xk’ulub’a li kok’al lix b’oqb’aleb’ sa’ xraqik li tzolok re li xamaan xnume’ re xtawb’al jun li raqal sa’eb’ li loq’laj hu li naru te’xwotz? Wi jo’kan, k’eheb’ xhoonal re xwotzb’al. Wi ink’a’, tenq’aheb’ chixk’oxlankil k’a’ruhaq xe’xtzol sa’eb’ li loq’laj hu toje’ re naru te’xwotz.

Xk’utb’al li tzol’leb’

Kok’al toj ka’ch’ineb’ xyu’am

Hebreos 1:2–10; 2:8–10, 17–18

Ninpaab’ li Jesukristo.

Eb’ li raqal a’an naru naxtenq’aheb’ li kok’al chixtzolb’al xkomon xna’leb’eb’ chirix li Jesukristo ut chixkawob’resinkil lix wanjikeb’ rik’in a’an.

Kok’ k’anjel naru chi b’aanumank

• Rik’in roksinkileb’ aawaatin laa’at, tz’iib’aheb’ chiru kok’ setb’il hu li yaal chirix li Jesukristo neke’tawman sa’ Hebreos 1:2–10; 2:8–10, 17–18, ut muqeb’ sa’ li tzoleb’aal. Kanab’eb’ li kok’al chixtawb’aleb’ li kok’ setb’il hu. Tenq’aheb’ chirilb’aleb’ ru li yaal tz’iib’anb’ileb’ chiruheb’ li kok’ hu, ut aatinanqex chirix k’a’ru naraj neke’xye li yaalil na’leb’ a’an. Wi na’ajman ru, ch’olob’ naq li Jesus nak’ab’a’iman li Ralal li Dios xb’aan naq li qaChoxahil Yuwa’ a’an lix yuwa’ lix musiq’ jo’ ajwi’ lix junxaqalil.

• Numsi jun lix jalam-uuch li Kolonel reheb’ li kok’al ut kanab’eb’ naq chixjunjunqaleb’ te’xchap li jalam-uuch naq te’xwotz k’a’ut naq neke’b’antioxin chirix li Jesukristo.

Hebreos 3:8

Li qaChoxahil Yuwa’ naraj naq “moko taqakawob’resi ta li qach’ool.”

Hebreos 3 naxye resil naq eb’ laj Israel ke’xkawob’resi li raameb’ ut ke’xtz’eqtaana li rosob’tesihom li Qaawa’. A’an ajwi’ jun li q’usuk choq’ qe laa’o chiqajunilo re naq ink’a’ taqakawob’resi li qaam.

Kok’ k’anjel naru chi b’aanumank

• K’am jun li esponja (malaj jun li ch’ina t’ikr) ut jun li pek sa’ li tzoleb’aal. Kanab’eb’ li kok’al chixche’b’aleb’ li k’a’aq re ru a’an ut chixch’olob’ankil chan ru neke’reek’a. K’e junjunq tz’uqul li ha’ chiru li junjunq chi k’a’aq re ru ut ye naq li esponja mas naxtz’ub’ wi’chik li ha’ chiru li pek. Ch’olob’ naq li qaam tento naq q’unaq ut ink’a’ kawaq re naq tooruuq chixk’ulub’ankileb’ li yaal chirix li qaChoxahil Yuwa’ sa’ li qaam.

• Set jun li aamej chiru t’ikr malaj jalan chik k’a’aq re ru q’un, ut jun chik rik’in karton malaj jalan chik k’a’aq re ru jwal kaw. Ye reheb’ li kok’al naq rik’in naq noko’ab’in ut nokopaab’an, q’un li qaam, ut naq ink’a’ noko’ab’in chi moko nokopaab’an, kaw li qaam. Rik’in tz’aqal aawaatin, wotz junjunqeb’ li eetalil sa’eb’ li loq’laj hu chirixeb’ li kristiaan li ke’xkawob’resi xch’ooleb’ malaj li q’uneb’ ajwi’ xch’ooleb’ (jo’ laj Nefi, laj Laman ut laj Lemuel [1 Nefi 2:16–19], laj Pablo [Hechos 9:1–22] malaj laj Jose Smith [Jose Smith—Resilal 1:11–20]). Naq yooqat choxwotzb’aleb’ li junjunq chi eetalil, kanab’eb’ li kok’al chixk’utb’al li q’unil aamej malaj li kawil aamej.

laj Moises naxb’oq laj Aaron sa’ li k’anjel, xb’aan laj Harry Anderson

Hebreos 5:4

Eb’ laj k’amol re li tijonelil b’oqb’ileb’ xb’aan li Dios.

Hebreos 5:4 a’an jun raqal aajel ru xb’aan naq naxkutanob’resi ru naq eb’ laj k’amol re li tijonelil—ut xkomoneb’ chik li kristiaan neke’k’anjelak sa’ li Iglees—tento naq b’oqb’ilaqeb’ xb’aan li Dios.

Kok’ k’anjel naru chi b’aanumank

• Il ru Hebreos 5:4 choq’ reheb’ li kok’al. Kanab’ jun laj k’amol re li tijonelil chixch’olob’ankil k’a’ru li tijonelil ut naq tixwotz jun xnumsihom naq xk’ul.

• Tenq’aheb’ li kok’al chixkanab’ankil sa’ xk’a’uxleb’ li ch’ol aatin re li ro’ xraqalil li paab’aal. Ch’olob’ xyaalal naq eb’ li kristiaan b’oqb’ileb’ chixk’eeb’al chi uxmank lix k’anjel li Dios b’oqb’ileb’ xb’aan a’an rik’in k’utb’esinb’il na’leb’.

Xk’utb’al li tzol’leb’

Kok’al ak ninqeb’

Hebreos 1:2–10; 2:8–10, 17–18

Ninpaab’ li Jesukristo.

Li hu choq’ reheb’ laj Hebreo kitz’iib’aman re xkawob’resinkil lix paab’aaleb’ laj santil p’aab’anel aj Hebreo chirix li Jesukristo. Naru ajwi’ naxb’aanu a’an rik’ineb’ li kok’al nakatzoleb’.

Kok’ k’anjel naru chi b’aanumank

• K’e reheb’ li junjunq chi kok’al junjunqeb’ li raqal re Hebreos 1:2–10; 2:8–10, 17–18, ut kanab’eb’ li kok’al chixsik’b’al sa’eb’ li raqal a’an li yaal chirix li Jesukristo. Kanab’eb’ chixwotzb’al malaj chixtz’iib’ankileb’ sa’ li pizarron li k’a’ru neke’xtaw. K’a’ru chik naqanaw chirix li Jesukristo? Eb’ li kok’al naru neke’xtaw junjunq li na’leb’ sa’eb’ li b’ich jo’ “Ninnaw naq yo’yo inKolonel” (Eb’ li B’ich, ajl 77) malaj “Kixtaqla li Ralal” (B’ichleb’aal choq’ reheb’ li Kok’al, 20–21).

• Kanab’eb’ li kok’al chixyiib’ankileb’ xjalam-uucheb’ a’an rik’ineb’ lix na’ xyuwa’eb’. Kanab’eb’ chixwotzb’al lix juntaq’eetalileb’ rik’ineb’ lix na’ xyuwa’eb’. Ch’olob’ naq rik’in naq sa’ Hebreos 1:3 naxye naq li Jesukristo a’an “xrepom li xnimal xloq’al ut xjalam u li Dios,” naraj naxye naq li Jesus ut li qaChoxahil Yuwa’ juntaq’eeteb’ xseeb’al ut xchaab’ilaleb’. Ch’olob’ xyaalal naq nokotzolok chirix li qaChoxahil Yuwa’ naq nokotzolok chirix li Jesukristo ut naqataaqe.

• Tenq’aheb’ li kok’al chixk’oxlankileb’ li kristiaan li naru neke’xwotz wi’ lix nawom xch’ooleb’ chirix li Jesukristo. Kanab’eb’ chixyalb’al xwotzb’al k’a’ raj ru te’xye re li kristiaan a’an chirix li Jesus.

Hebreos 3:7–19

Re xk’ulb’al lix b’eresihom ut li rosob’tesihom li qaChoxahil Yuwa’, tento naq “ink’a’ taqakawob’resi qach’ool.”

Sa’ Hebreos 3, li esil chirixeb’ laj Israel sa’ li yamyookil ch’och’ na’oksiman re xk’utb’al lix aajelil ru naq ink’a’ taqakawob’resi li qaam. Chan ru naru nakawoksi li seraq’ a’an re xk’utb’al chiruheb’ li kok’al re laa tzoleb’aal li na’leb’ a’an?

Kok’ k’anjel naru chi b’aanumank

• Kanab’eb’ li kok’al chixk’oxlankileb’ k’a’aq re ru kaw ut q’un. (Naru nakak’ameb’ junjunq li eetalil re xk’utb’al chiruheb’). Ilomaq ru sa’ komonil Hebreos 3:8. K’a’ru naraj naxye wank rik’in jun aamej kawujenaq? K’a’ut naq li Dios naraj naq q’unaq li qaam?

• Rik’in tz’aqal aawaatin, wotz li esil chirixeb’ laj Israel naq ke’xkawob’resi li raameb’ chiru li Qaawa’ sa’ li yamyookil ch’och’ (chi’ilmanq Numeros 14:1–12; Hebreos 3:7–19). Kanab’eb’ li kok’al chixk’utb’esinkil li esil. K’a’ru taak’ulmanq wi naqakawob’resi li qaam rik’in li Qaawa’ ut lix evangelio?

• Kanab’eb’ li kok’al chirilb’al ru Mateo 13:15; Hebreos 3:15; Mosiah 11:29 ut Moises 6:27. Kanab’eb’ chixyiib’ankil xjalam-uucheb’ xcha’alil li junxaqalil sa’ li pizarron li yeeb’ileb’ sa’eb’ li raqal a’an. Sa’ musiq’ej, k’a’ru naraj naxye naq li xikej ink’a’ saqen na’ab’in, naq mutz’ uhej, ut naq kawujenaq li aamej? Chan ru naru naqanaw chi tz’aqal naq li qaxik, eb’ li qu, ut li qaam kawresinb’ileb’ re xk’ulb’al li rosob’tesihom li Dios?

Hebreos 5:1–4

Eb’ laj k’amol re li tijonelil b’oqb’ileb’ xb’aan li Dios.

Hebreos 5 naxk’e jun li hoonal re k’oxlak chirix k’a’ru li tijonelil—li wankilal re k’anjelak sa’ xk’ab’a’ li Dios—ut chan ru naq nak’ulman. Naru na’oksiman chi chaab’il choq’ reheb’ li saaj al li yookeb’ chixkawresinkil rib’ re k’ojob’aak sa’ li tijonelil.

Kok’ k’anjel naru chi b’aanumank

• K’ut li jalam-uuch Moises confiere el Sacerdocio a Aaron (Libro de obras de arte del Evangelio, ajl 15) naq jun ch’ina al yooq chirilb’al ru Hebreos 5:4. Maare us raj xch’olob’ankil naq xb’aan naq laj Aaron a’an li xb’een kristiaan kik’amok re li Tijonelil re Aaron, li tijonelil a’an naxk’am lix k’ab’a’ re roxloq’inkil. Tenq’aheb’ li kok’al chixk’oxlankil li teneb’ahom neke’xb’aanu laj k’amol re li Tijonelil re Aaron (jo’ li kub’sink ha’, rosob’tesinkil ut xjek’inkil li loq’laj wa’ak, ut xb’oqb’aleb’ li ras riitz’in chi chalk chiru li Kristo).

• Tenq’aheb’ li kok’al chixk’oxlankil li k’iila paay chan ru naq jun li winq naxk’ul xwankil. Qayehaq, chan ru naq naxk’ul xwankil jun aj k’utunel, jun aj b’anonel, malaj jun aj jolominel tenamit? Chan ru naq li Dios naxk’e lix wankilal? Kanab’eb’ li kok’al chixk’oxlankil li patz’om a’an naq yooqeb’ chirilb’al ru Hebreos 5:4 ut li ro’ raqalil li paab’aal.

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’ineb’ lix junkab’al, sa’ junaq q’ojyin re junkab’al, jun li raqal reheb’ li loq’laj hu, jun li b’ich, malaj jun ch’ina k’anjel xe’xtzol sa’ li tzoleb’aal sa’ li kutan a’in.

Xchaab’ilob’resinkil li qak’utum

Eb’ li kok’al naru neke’xnaw ru lix wankil li Musiq’ej. K’ut chiruheb’ li kok’al naq eb’ li eek’ahom re tuqtuukilal, rahok, ut q’ixnal neke’reek’a naq neke’aatinak malaj neke’b’ichan chirix li Jesukristo ut lix evangelio neke’chal rik’in li Santil Musiq’ej. Eb’ li eek’ahom a’an naru neke’xwaklesi lix nawom xch’ooleb’.