laj Abraham naq kitijok chirix lix muheb’aal t’ikr

Laj Abraham sa’ li helhookil ch’och’ Mamre, xb’aan laj Grant Romney Clawson

18–24 noviembre

Santiago

“B’aanuhomaq li naxye li aatin, ut ink’a’ chik’ojlaaq eech’ool ka’ajwi’ rik’in rab’inkil”

Sa’ li hu kixtz’iib’a laj Santiago wankeb’ naab’aleb’ li yaal li naru narosob’tesiheb’ li kok’al nakatzoleb’. Taaqe li musiq’ej re xk’uub’ankil b’ar wan li yaal taawotz rik’ineb’. Eb’ li na’leb’ sa’ li tusleb’ aatin a’in naru nakate’xtenq’a.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al jun li na’leb’ re li evangelio li jultik reheb’ naq xe’xtzol rik’ineb’ lix junkab’al chiru li xamaan xnume’ malaj sa’ li Tzoleb’aal choq’ reheb’ li Kok’al sa’ li domingo xnume’. Chirix naq li junjunq chi kok’al ak xe’wotzok, kanab’ jun chik li ch’ina al chixk’osb’al ru li xwotzman.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Santiago 1:5–6

Naru ninpatz’ re lin Choxahil Yuwa’ naq tinixtenq’a chixtzolb’al li k’a’ru yaal.

Tenq’aheb’ li kok’al nakatzoleb’ chixtawb’al ru naq naru neke’xsik’ li qaChoxahil Yuwa’ re xtawb’aleb’ xna’leb’. Naq te’xb’aanu te’osob’tesiiq chi nim naq neke’wan xpatz’omeb’ ch’a’aj.

Kok’ k’anjel naru chi b’aanumank

• Tenq’aheb’ li kok’al chixtzolb’al li ch’ol aatin “Wi wank junaq eere yoo chi majelo’k xna’leb’, chixtz’aamaq re li Dios” (Santiago 1:5). Chan ru naq naqayeheb’ li qapatz’om re li Dios? Chan ru naq nokoxsume?

• K’ut jun xjalam-uuch li Xb’een K’utb’esink (Libro de obras de arte del Evangelio, ajl 90) ut wotz chan ru naq rik’in rilb’al ru Santiago 1:5 laj Jose Smith kiraj xpatz’b’al re li qaChoxahil Yuwa’ xtenq’ankil rik’in jun lix patz’om (chi’ilmanq Jose Smith—Resilal 1:1–15). Ye lix nawom aach’ool chirix naq li Dios naxsumeheb’ li tij ut ch’olob’ xyaalal naq eb’ li kok’al naru neke’tijok chiru naq wankeb’ xpatz’om. Kanab’eb’ li kok’al chixyiib’ankileb’ xjalam-uuch laj Jose Smith naq yoo chirilb’al ru Santiago 1:5 ut naq yoo chi tijok chiru li qaChoxahil Yuwa’.

Santiago 3:1–13

Naru nekeb’inye k’a’aq re ru chaab’il.

Jo’ kixch’olob’ xyaalal laj Santiago, li xtzolb’al xyeeb’aleb’ ka’ajwi’ k’a’aq re ru chaab’il reheb’ li qas qiitz’in tooxtenq’a chi wulak jo’ li Jesukristo (chi’ilmanq Santiago 3:2).

Kok’ k’anjel naru chi b’aanumank

• K’am k’a’ruhaq ki’ ut k’a’ruhaq k’a re naq eb’ li kok’al te’xyal. Tenq’aheb’ chixtawb’al ru naq tento taqoksi li ru’uj qaq’ re xyeeb’aleb’ k’a’aq re ru jwal ki’eb’ (malaj chaab’ileb’) ut ink’a’ re xyeeb’aleb’ k’a aj k’a’aq re ru (malaj ink’a’ chaab’il) (chi’ilmanq Santiago 3:10). Tenq’aheb’ chixk’oxlankileb’ li k’a’aq re ru chaab’il naru naqaye reheb’ li qas qiitz’in.

• K’e reheb’ li junjunaq chi kok’al xjalam-uuch jun kristiaan yoo chi aatinak. Kanab’eb’ li kok’al chixchapb’al chi kutankil naq laa’at taaye k’a’ruhaq chaab’il naru naqab’aanu rik’in li ru’uj qaq’ (jo’ xyeeb’al li yaal, b’antioxink, ut xyeechi’inkil xtenq’ anihaq), ut chixkub’sinkil naq laa’at taaye k’a’ruhaq ink’a’ tento taqaye (jo’ yehok tik’ti’, xhob’b’aleb’ li qas qiitz’in, ut ink’a’ ab’ink chiru qana’ qayuwa’).

• Jultika wi’chik li esil kixk’e laj Santiago sa’ Santiago 3:1–13 rik’in xb’ichankil sa’ komonil jun li b’ich na’aatinak chirix li rahok, jo’ “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83). Ye naq eb’ li kok’al te’xkawresi jun li “sek’ re chaab’ilal” li naru te’xnujob’resi rik’ineb’ kok’ pek malaj k’a’ruhaq chik k’a’aq re ru rajlal naq te’xye k’a’ruhaq rik’in rahok re anihaq.

Santiago 5:7–11

Junjunq reheb’ li rosob’tesihom li Dios naraj ru li kuyum.

Wan naq li kuyum ch’a’aj b’ayaq, ut k’a’jo’ wi’chik choq’ reheb’ li kok’al. K’e reetal chan ru naru nakawoksi li na’leb’ kixk’e laj Santiago re xtenq’ankileb’ li kok’al nakatzoleb’ chixtzolb’al kuyuk.

Kok’ k’anjel naru chi b’aanumank

• Tenq’aheb’ li kok’al chixjultikankileb’ hoonal b’ar wi’ tento ke’royb’eni k’a’ruhaq li jwal xe’raj. Ch’olob’ naq royb’eninkil k’a’ruhaq naqaj chi ink’a’ nokowech’in, a’an li kuyuk nayeeman re.

• K’os ru Santiago 5:7 rik’ineb’ laa waatin ut k’ut xjalam-uuch jun iyaj malaj jun li ch’ina che’. K’a’ut naq naqaj ru li kuyuk naq naqak’eheb’ chi k’iik li che’? K’a’ raj ru taak’ulmanq wi ta naqayu’ roq’ li ch’ina che’ re xk’eeb’al chi k’iik sa’ junpaat? Ch’olob’ xyaalal naq li Dios naraj xk’eeb’al qe naab’aleb’ li osob’tesihom, a’b’an junjunqeb’ neke’raj ru li kuyuk.

• Wotz li esil chirix laj Job, li nayeeman sa’ Santiago 5:11 jo’ jun eetalil re li kuyuk (chi’ilmanq “Ch’ol 46: Job,” Esilal sa’ li Najter Chaq’rab’, 165–169, malaj li video sa’ LDS.org). Chan ru ki’osob’tesiik laj Job xb’aan naq ki’ab’in?

reetalil li k’utuk

Xk’utb’al li tzol’leb’

Kok’al ak ninqeb’

Santiago 1:5–6

Lin Choxahil Yuwa’ tinixtenq’a chixtzolb’al li yaal wi ninsik’ lix tenq’.

Us ta eb’ li kok’al nakatzoleb’ chanchan naq toj kok’eb’, ka’ajwi’ wiib’ oxib’ chihab’ toj kok’eb’ chiru laj Jose Smith naq kiril ru Santiago 1:5 ut kireek’a naq tento tixsik’ li qaChoxahil Yuwa’ sa’ li tijok. K’e reetal chan ru naru nakatenq’aheb’ li kok’al nakatzoleb’ chixkab’lankil lix paab’aaleb’ naq li Dios tixtenq’aheb’ naq te’raj ru xna’leb’.

Kok’ k’anjel naru chi b’aanumank

• Kanab’eb’ li kok’al chixseraq’inkil li resilal li Xb’een K’utb’esink re laj Jose Smith rik’ineb’ ajwi’ li raatin a’an (chi’ilmanq Jose Smith—Resilal 1:5–19; chi’ilmanq ajwi’ li video “La Primera Visión de Jose Smith” sa’ LDS.org). Chan ru naq kitenq’aak laj Jose xb’aan Santiago 1:5? Tenq’aheb’ li kok’al chixk’oxlankileb’ jalaneb’ chik kristiaan sa’eb’ li loq’laj hu li ke’xk’ul xsumenkil lix tijeb’ (jo’ laj Nefi [1 Nefi 11:1–6] ut li riitz’in laj Jared [Eter 2:18–3:9]). B’ar wankeb’ junjunq li k’a’aq re ru naru neke’qapatz’ re li qaChoxahil Yuwa’ sa’ jun li tij?

• Il ru rik’ineb’ li kok’al Jose Smith—Resilal 1:10–14. Kanab’eb’ li kok’al chixtawb’al k’a’ru kixb’aanu laj Jose re xk’ulb’aleb’ xsumenkil lix patz’om. Chan ru naru naqataaqe lix b’aanuhom laj Jose Smith naq wanqeb’ qapatz’om?

Santiago 1:22–27; 2:14–26

“Li paab’aal, wi maak’a’ xb’aanuhom, relik chi yaal a’an kamenaq.”

Chan ru taatenq’aheb’ li kok’al chirilb’al chan ru neke’xk’am rib’ li neke’xpaab ut li neke’xb’aanu li naxye li aatin?

Kok’ k’anjel naru chi b’aanumank

• K’ut chiruheb’ li kok’al jun li pook maak’a’ xbateriiy, jun li tz’iib’leb’ li maak’a’ ru’uj, malaj k’a’ruhaq chik maak’a’ chik aj-e malaj “kamenaq.” Kanab’eb’ li kok’al chirilb’al ru Santiago 2:14–17. Chan ru naq eb’ li k’a’aq re ru a’in neke’reetali li yaal wankeb’ sa’ li raqal a’an?

• Kanab’eb’ li kok’al chirilb’al ru sa’ xch’ooleb’ Santiago 1:22–27; 2:14–26. Kanab’eb’ chixwotzb’al li naru neke’xb’aanu re xk’utb’al naq neke’xb’aanu li naxye li aatin. Qayehaq, ma neke’xnaw ru anihaq yaj malaj nareek’a naq xjunes wan li naru neke’rula’ani, malaj naru neke’xk’e xch’ool chi k’anjelak chiruheb’ lix junkab’al? Naru ajwi’ nakajultika reheb’ li aatin xe’rab’i chiru li ch’utam re li loq’laj wa’ak sa’ li kutan a’in. Chan ru naru naq laa’aqo aj b’aanuhom re li naxye li aatin?

Santiago 3:1–13

Naru nawan inwankil sa’ xb’een li ninye.

Li k’a’ru naqaye chiqib’il qib’ chanchan naq maak’a’ aj-e, a’b’an jo’ kixch’olob’ laj Santiago, naru naxb’aanu xnimal xk’anjel, chi chaab’il malaj chi yib’ ru.

Kok’ k’anjel naru chi b’aanumank

• Ma wan anihaq sa’ li teep, maare jun reheb’ li kok’al nakatzoleb’, li nak’anjelak rik’ineb’ kawaay malaj li naxnaw b’ayaq chirixeb’ jukub’? Naru nakakanab’ chi k’utuk b’ayaq chirixeb’ lix k’utum laj Santiago sa’ Santiago 3:3–4 chirix roksinkileb’ aatin rik’in rahok, malaj, laa’at naru nakayeheb’ laa k’a’uxl. K’a’ru naqatzol chirix xb’eresinkil li ru’uj qaq’ rik’ineb’ li eetalil a’an?

• Kanab’eb’ li kok’al chirilb’al ru Santiago 3:1–13 ut chixyiib’ankil xjalam-uuch li k’a’aq re ru te’xtaw li naxk’ut chan ru roksinkil chi us li ru’uj qaq’. K’eheb’ xhoonal re xwotzb’al lix jalam-uucheb’ ut li k’a’ru xe’xtzol.

• Chirix xnumsinkil wi’chik Santiago 3:1–13 sa’ komonil, numsihomaq wi’chik li k’a’ru k’ojob’anb’il chirix li aatinak sa’ Para la Fortaleza de la Juventud (20–21). Tenq’aheb’ li kok’al chixk’oxlankil k’a’ruhaq naru neke’xb’aanu re xchaab’ilob’resinkil chan ru neke’raatina li ras riitz’in, ut waklesiheb’ xch’ool chixkanab’ankileb’ xjayalihom.

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chi tijok chiru li qaChoxahil Yuwa’ rik’in junaq lix patz’omeb’, malaj re naq te’xyal xq’e chi wank rik’ineb’ xkuyum chiru li xamaan chal re. Kanab’eb’ chixwotzb’al lix numsihomeb’ sa’ li tzolok chal re.

Xchaab’ilob’resinkil li qak’utum

Tenq’aheb’ li kok’al chi wank chi aj aj. “Naq nakatzoleb’ li kok’al, k’anab’eb’ chi yiib’ank, chi b’onok, chi tz’iib’ak, ut chi yo’ob’tesink. Eb’ li k’a’aq re ru a’in maawa’ ka’ajwi’ re sahob’resink ch’oolej—aajeleb’ b’an ru choq’ re li tzolok” (Li k’utuk jo’ li Kolonel, 25).

perel re kok’ k’anjel: naru ninwan rik’in rahok rik’ineb’ li was wiitz’in