Li Kristo kijultikan aatin sa’ li ruchich’och’ reheb’ li musiq’ej, xb’aan laj Robert T. Barrett

25 noviembre–1 diciembre

1 ut 2 Pedro

“K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an”

Tikib’ xtzolb’al 1 ut 2 Pedro rik’in jun li tij. Chijultiko’q aawe naq lix chaab’ilal xkawresinkil aawib’ re k’utuk taachalq xb’aaneb’ laa numsihom sa’ li tzolok aajunes ut sa’ junkab’al.

Xtz’iib’ankil li nakak’oxla

Xkanab’ankileb’ chi wotzok

K’e chi kutankil jun li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al , ut kanab’eb’ li kok’al chixyeeb’al aawe k’a’ruhaq neke’xnaw chirix laj Pedro. Jultika reheb’ naq laj Pedro kiwan jo’ aj jolominel re li Iglees chirix naq li Jesus kiwakli chi yo’yo, ut ch’olob’ naq 1 Pedro ut 2 Pedro a’aneb’ hu kixtz’iib’a choq’ reheb’ li komon re li Iglees sa’ lix kutankil a’an.

Xk’utb’al li tzol’leb’

Kok’al toj ka’ch’ineb’ xyu’am

1 Pedro 1:6–7; 3:14

Naru nawan xsahil inch’ool sa’eb’ ajwi’ li hoonal ch’a’aj.

K’e reetal chan ru naru nakak’uteb’ li raqal a’an re naq tixtenq’aheb’ li kok’al chixq’ajsinkileb’ rib’ rik’in li Kolonel naq te’wanq xch’a’ajkilal.

Kok’ k’anjel naru chi b’aanumank

• Kanab’eb’ li kok’al chixwotzb’al k’a’aq re ru ch’a’aj kixk’ul li Jesus, jo’ naq kik’ehe’ chiru krus. Ch’olob’ naq toonume’q sa’eb’ li hoonal ch’a’aj sa’ li qayu’am. Ilomaq ru sa’ komonil 1 Pedro 1:6–7; 3:14 ut wotz jun aanumsihom b’ar wi’ xak’ul jun “xyalb’al rix laa paab’aal.” Malaj, naru nakawotz lix tij li profeet aj Jose Smith sa’ li tz’alam Liberty ut lix k’ojob’ankil xch’ool kixk’e li Dios (chi’ilmanq Tz. ut S. 121:1–8; 123:17). Chan ru naq li qapaab’aal chirix li Jesus nokoxtenq’a chixtawb’al sahil ch’oolejil sa’eb’ li hoonal ch’a’aj?

  

  Laj Jose Smith sa’ li tz’alam Liberty, xb’aan laj Greg K. Olsen.

• B’ichahomaq sa’ komonil jun li b’ich naxk’ut chan ru xtawb’al li sahil ch’oolejil, jo’ “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 86–87).

1 Pedro 2:9–12

Li qaChoxahil Yuwa’ naraj naq tinwanq jo’ jun eetalil choq’ reheb’ li was wiitz’in.

Laj Pedro kixk’ut naq laa’o “lix tenamit li Dios” ut naq li qachaab’il b’aanuhom naru “xnimankil xloq’al li Dios.”

Kok’ k’anjel naru chi b’aanumank

• Ch’olob’eb’ li k’a’aq re re mas neke’ile’ sa’ xyanqeb’ li wankeb’ wi’, malaj k’uteb’ xjalam-uucheb’ li k’a’aq re ru a’an. Qayehaq, jun santil ochoch mas na’ilman sa’ xyanqeb’ ninqi kab’l wankeb’ sa xsutam malaj jun li tzuul na’ilman sa’ xb’een li ru taq’a. Ch’olob’ naq rik’in naq naqapaab’eb’ li taqlahom, noko’ile’ chi us ut wankeb’ li kristiaan li naru neke’ril li qab’aanuhom. Aatinan chirix junjunqeb’ li “chaab’il b’aanuhom” nakawileb’ chixb’aanunkil li kok’al. Ch’olob’ naq eb’ li chaab’il b’aanuhom jo’eb’ a’an “neke’xnima xloq’al li Dios”—xb’aan naq naxtenq’aheb’ li qas qiitz’in chixraab’al li Dios ut chirajb’al k’anjelak chiru.

• Tz’aqob’resi ru li perel re kok’ k’anjel rik’ineb’ li kok’al. Chan ru naq eb’ li kristiaan wankeb’ sa’ li jalam-uuch yookeb’ chixnimankil xloq’al li Dios?

1 Pedro 3:18–20; 4:6

Eb’ li musiq’ej wankeb’ sa’ li xna’ajeb’ li musiq’ej neke’xtzol li evangelio.

Chirix naq kikam, li Jesus xko’o sa’ lix na’ajeb’ li musiq’ej ut kixtaqlaheb’ li musiq’ej li tiikeb’ xch’ool chixtzolb’aleb’ li musiq’ej li ink’a’ ke’xk’ulub’a li evangelio.

Kok’ k’anjel naru chi b’aanumank

• Aatinan rik’ineb’ li kok’al chirix anihaq nakanaw ru li xkam. Ch’olob’ naq rik’in lix kamikeb’ li kristiaan, lix musiq’eb’ neke’el sa’ lix tib’eleb’ ut neke’xik sa’ lix na’ajeb’ li musiq’ej. Il ru 1 Pedro 3:19 ut ch’olob’ naq chirix naq kikam li Jesus, xko’o chirula’aninkil lix na’ajeb’ li musiq’ej. Sa’ li na’ajej a’an, kixpatz’ reheb’ li musiq’ej tiikeb’ xch’ool naq te’xk’ut li evangelio chiruheb’ li musiq’ej li maji’ ke’xk’ulub’a li evangelio (chi’ilmanq Tz. ut S. 138:30).

• K’e jun tusul li ch’unleb’aal sa’ xyi li tzoleb’aal re naq te’xyiib’ jun ramleb’. Kanab’eb’ junjunqeb’ li kok’al chi xaqliik chixk’atqeb’ li chunleb’aal re reetalinkileb’ li musiq’ej wankeb’ sa’ lix na’ajeb’ li musiq’ej li ink’a’ ke’kub’e xha’ chiru lix yu’ameb’ sa’ ruchich’och’. K’e re jun reheb’ li kok’al jun li nimla huhil laaw li tz’iib’anb’ilaq chiru “kub’iha’ choq’ reheb’ li kamenaq” ut kanab’ chirisinkil li ramleb’. Chirix a’an ch’olob’ naq eb’ li komon re li Iglees li wankeb’ kab’laju chihab’ reheb’ malaj sa’ xb’een a’an naru neke’xik sa’ li santil ochoch ut naru neke’kub’e xha’ jo’ ruuchileb’ lix xe’toonal li ink’a’ ke’kub’siik xha’ naq wankeb’ sa’ li ruchich’och’. Eb’ li xe’toonal a’an naru ut naq te’xk’ulub’a li evangelio sa’ lix na’ajeb’ li musiq’ej.

• Tenq’aheb’ li kok’al chixtz’aqob’resinkil ru jun li che’ re junkab’al (chi’ilmanq jun eetalil sa’ “Hojas de historia familiar para colorear,” LDS.org).

Xk’utb’al li tzol’leb’

Kok’al ak ninqeb’

1 Pedro 3:12–17; 4:13–14, 16

Naru nintaw xsahil inch’ool ut tuqtuukilal sa’eb’ ajwi’ li hoonal ch’a’aj.

Maare naq eb’ li kok’al nakatzoleb’ k’eeb’ileb’ chaq xxutaan malaj neke’xnumsi eetz’uuk xb’aan li neke’xpaab’. Eb’ li raqal a’in naru neke’xtenq’aheb’ chiruheb’ li hoonal a’an.

Kok’ k’anjel naru chi b’aanumank

• K’os ruheb’ junjunq li esil b’ar wi’ li Jesus kirahob’tesiik, malaj kanab’eb’ li kok’al chirilb’al ru—che’ilmanq, jo’ eetalil, Mateo 12:9–14 malaj Lukas 22:47–54. Patz’ reheb’ li kok’al ma k’eeb’ileb’ xxutaan malaj eetz’unb’ileb’ xb’aan naq neke’xyu’ami lix k’utum li evangelio. Chirix a’an ilomaq ru sa’ komonil 1 Pedro 3:12–14; 4:13–14, 16 ut kanab’eb’ li kok’al chixsik’b’al li kixye laj Pablo chirix xk’ulb’al rahilal “sa’ xk’ab’a’ li tiikilal.” K’a’ut naq naru nawan xsahil qach’ool us ta wankeb’ li kristiaan nokohe’reetz’u xb’aan xb’aanunkil li us?

• B’oq jun li komon re li teep chixwotzb’al jun xnumsihom b’ar wi’ xtaw xsahil xch’ool malaj tuqtuukilal chiru junaq xyalb’al rix, malaj wotz chan ru naq li Profeet aj Jose Smith kixtaw tuqtuukilal naq kiwan chaq sa’ li tz’alam Liberty (chi’ilmanq Tz. ut S. 121:1–8; 123:17). Chan ru naq naqataw sahil ch’oolejil ut tuqtuukilal sa’eb’ lix yalb’al qix?

1 Pedro 3:15

Tento naq junelik kawresinb’ilaqin re xwotzb’al li evangelio.

Eb’ li kok’al nakatzoleb’ te’wanq naab’al lix hoonaleb’ chiru lix yu’ameb’ re xsumenkileb’ xpatz’om li kristiaan chirixeb’ lix paab’aal. K’e reetal k’a’ru naru nakab’aanu re xtenq’ankileb’ “chi wank chi kawresinb’ileb’ re sumenk.”

Kok’ k’anjel naru chi b’aanumank

• Aatinan chirix junaq li hoonal b’ar wi’ anihaq xye aawe junaq xpatz’om chirix li Iglees, ut ch’olob’ ma xaweek’a naq kawresinb’ilat re xsumenkil. Kanab’eb’ li kok’al chi aatinak chirix junaq hoonal b’ar wi’ xpatz’e’ reheb’ k’a’ruhaq chirix li Iglees. Read together 1 Peter 3:15. Chan ru naru naqataaqe li na’leb’ kixk’e laj Pablo sa’ li raqal a’an?

• Rik’in xtenq’eb’ li kok’al, k’oxlaheb’ junjunq li patz’om naru neke’xb’aanu li kristiaan chirix lix k’utum li Iglees. Kanab’eb’ li kok’al chixk’eeb’al xhoonaleb’ re xch’olob’ankil chan raj ru te’xsumeheb’ li patz’om a’an, re naq “yo’oon wanqeb’ chi junelik.”

1 Pedro 3:18–20; 4:6

Eb’ li musiq’ej wankeb’ sa’ li musiq’ejil tz’alam neke’xtzol li evangelio.

Tenq’aheb’ li kok’al chixtawb’al ru naq chirix naq eb’ li tiikeb’ xch’ool neke’kam, neke’xik sa’ lix na’ajeb’ li musiq’ej chixk’utb’al li evangelio reheb’ li ani ink’a’ ke’xk’ul li evangelio naq wankeb’ sa’ li ruchich’och’.

Kok’ k’anjel naru chi b’aanumank

• Yiib’ jun li sirso chiru li pizarron rik’in jun li juch’ sa’ xyi. Tz’iib’a Musiq’ejil hilob’aal na’ajej sa’ jun xjachal li sirso ut Musiq’ejil tz’alam sa’ li jun jachal chik. Kanab’ jun li ch’ina al chirilb’al ru 1 Pedro 3:18–20; 4:6. Ch’olob’ naq chirix naq kikam li Jesus, xko’o sa’ li hilob’aal na’ajej. Sa’ li na’ajej a’an kixtzoleb’ li musiq’ej tiikeb’ xch’ool re naq te’xk’ut li evangelio reheb’ li musiq’ej wankeb’ sa’ li musiq’ejil tz’alam.

• B’oq jun reheb’ lix na’ xyuwa’ malaj jun li raseb’ li kok’al chi aatinak chirix li xik sa’ li santil ochoch ut xb’aanunkil li k’ojob’anb’il k’anjel choq’ re jun reheb’ lix xe’toonal.

• Kanab’ jun li ch’ina al chixtz’aqob’resinkil ru jun li che’ re junkab’al (chi’ilmanq jun eetalil sa’ “Hojas de historia familiar para colorear,” LDS.org).

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al lix che’eb’ re junkab’al rik’ineb’ li komon sa’ lix junkab’aleb’ ut chixpatz’b’al xtenq’ankileb’ re naq te’xk’e xkomoneb’ li k’ab’a’ej.

Xchaab’ilob’resinkil li qak’utum

K’e aach’ool chixtawb’al ru xch’ooleb’ li kok’al nakatzoleb’. Laa’at nakanaweb’ ru li kok’al nakatzoleb’, jo’kan naq jaleb’ ru li na’leb’ re li tusleb’ aatin a’in, wi na’ajman ru, re xb’aanunkil li nak’anjelak choq’ reheb’. Naru nakawoksiheb’ a’ yaal b’ar wan reheb’ li kok’ k’anjel neke’yeeman sa’ li tusleb’ aatin a’in, ut ink’a’ ka’ajwi’ li tz’iib’anb’ileb’ choq’ reheb’ li kok’al li nakatzoleb’. (Chi’ilmanq Li k’utuk jo’ li Kolonel, 7.)