“25 noviembre–1 diciembre. 1 ut 2 Pedro: “K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“25 noviembre–1 diciembre. 1 ut 2 Pedro,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019
Li Kristo kijultikan aatin sa’ li ruchich’och’ reheb’ li musiq’ej, xb’aan laj Robert T. Barrett
25 noviembre–1 diciembre
1 ut 2 Pedro.
“K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an”
Naq yookat chirilb’aleb’ ru lix hu laj Pedro, naru naq tat-eek’asiiq naq wan k’a’ru tento taab’aanu. Tz’iib’aheb’ li eek’asink a’in “naq toj nakatwan sa’ li Musiq’ej” (Tz. ut S. 76:80) re naq taaruuq taajultiko’q aawe k’a’ru tz’aqal li xattzole’ wi’.
Xtz’iib’ankil li nakak’oxla
Ka’ch’in chik chirix lix waklijik chi yo’yo, li Kolonel kixye jun li profeetil aatin li maare kichal wi’ xk’a’uxl laj Pedro. A’an kixye naq chirix naq taatixq laj Pedro, a’an taak’ame’q “b’ar wi’ ink’a’ taaraj xik ... ; rik’in a’in kixye xyaalal chanru naq taakamsiiq re xnimankil xloq’al li Dios” (Jwan 21:18–19). Naq laj Pedro kixtz’iib’aheb’ lix hu, kixnaw naq taanach’o’q chaq xkamsinkil: “Ninnaw naq chi seeb’ tinq’ajq tinsutq’iiq, jo’ tz’aqal xk’utb’esi chiwu li Qaawa’ Jesukristo” (2 Pedro 1:14). K’iila sut kik’ulman xkomon li rahob’tesiik a’in sa’ xyanqeb’ laj santil paa’banel li ke’k’uluk re lix tz’iib’ahom laj Pedro, sa’eb’ li tenamit reheb’ laj Romano (chi’ilmanq 1 Pedro 1:1). A’b’anan sa’ li raatin a’an maak’a’ li xiw chi moko li rahil ch’oolejil. Kixye b’an reheb’ laj santil paab’anel naq “k’a’jo’ xsahil eech’ool, us ta toj texrahob’tesiiq chiru jarub’aq kutan rik’in k’iila pay xyalb’al rix lee paab’aal.” Kixye reheb’ naq “li paab’aal li naxkuy li yale’k” tixk’am sa’ “xnimankil lee k’ab’a’, jo’ ajwi’ lee loq’al ut lee roxloq’inkil sa’ lix k’utb’esinkil rib’ li Jesukristo,” ut tixk’am chaq “lee kolb’al” (1 Pedro 1:6–7, 9). Ch’olch’o naq lix paab’aal laj Pedro kixk’ojob’eb’ xch’ool li najteril aj santil paab’anel a’an, jo’ naxk’ojob’eb’ xch’ool laj santil paab’anel sa’ li kutan a’in, xb’aan naq laa’o ajwi’ “yooko chi tz’aqonk sa’ lix rahilal li Kristo, re naq sa’ lix k’utb’esinkil rib’ lix nimal xloq’al, k’a’jo’aq ajwi’ xsahil sa’ qach’ool” (1 Pedro 4:13).
Li na’leb’ re xtzolb’aleb’ li loq’laj hu aajunes.
1 Pedro 1:3–9; 2:19–24; 3:14–17; 4:12–19
Naru nintaw sahil ch’oolejil sa’ xkutankil lix yalb’al wix ut li rahilal.
Sa’ xtiklajik, maare chanchan jun jalanil na’leb’ naq laj Pedro kiroksi li aatin jo’ k’a’jo’ xsahil eech’ool, q’axal loq’, chexsaho’q, ut k’a’jo’aq ajwi’ xsahil sa’ eech’ool naq yoo chi aatinak chirix li k’a’ru naqak’oxla naq ch’a’aj: texrahob’tesiiq, k’iila paay xyalb’al rix lee paab’aal, rahilal, li xam xlochman sa’ eeyanq, ut xrahilal li Kristo (chi’ilmanq 1 Pedro 1:6; 2:19; 4:12–13). Li raatin laj Pedro reheb’ laj santil paab’anel najter, a’an ajwi’ li yeeb’il xb’aan li Awa’b’ej Russell M. Nelson: “Eb’ laj Santil Paab’anel naru te’wanq chi sa sa’ xch’ooleb’ a’ yaal chanru lix wanjikeb’. ... Naq naqajayali li qayu’am rik’in lix k’uub’anb’il na’leb’ li kolb’a-ib’ re li Dios ... jo’ ajwi’ li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut b’antiox re a’an. A’an lix yo’leb’aal chixjunil li sahil ch’oolejil” (“Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016).
Naq nakawil ru 1 Pedro 1:3–9; 2:19–24; 3:14–17; 4:12–19, k’a’ru naxk’e aayo’onihom naq naru taataw li sahil ch’oolejil, us ta sa’ xyanqeb’ li ch’a’ajkilal?
Najultikaman li evangelio reheb’ li kamenaq re taaruuq taaraqe’q aatin chi tiik sa’ xb’eeneb’.
Sa’ junaq kutan, li junjunq chi kristiaan taawanq chi xaqxo chiru li raqleb’aal aatin ut “toxe’xq’axtesi lix yehom xb’aanuhomeb’ chiru li yo’oon wan chaq chi raqok aatin sa’ xb’eeneb’ li yo’yookeb’ ut li kamenaqeb’ ” (1 Pedro 4:5). Wankeb’ li ink’a’ neke’xtaw ru chan ru naq li Dios naru chi raqok aatin chi tiik sa’ xb’eeneb’ chixjunil li tenamit, us ta jalan jalanq naq kik’eeman chiruheb’ xk’ulb’al ut xpaab’ankil li evangelio. K’e reetal li tzol’leb’ kixk’ut laj Pedro sa’ 1 Pedro 3:18–20; 4:6 re xtenq’ankileb’ laj santil paab’anel sa’ lix kutankil a’an chixtawb’al ru naq tiikaq ru lix raqb’a-aatin li Dios. Chan ru naq eb’ li raqal a’in neke’xkawob’resi laa paab’aal chirix naq tiik ru li Dios?
Re xtawb’al chik aana’leb’ chirix li tzol’leb’ a’in, naru taatz’il rix Tzol’leb’ ut Sumwank 138, jun k’utb’esink kixk’ul laj Joseph F. Smith naq yoo chaq chixk’oxlankil lix tz’iib’ahom laj Pedro. K’a’ruheb’ li osob’tesink li neke’chal rik’ineb’ li ani neke’xk’e chi uxmank li k’ojob’anb’il k’anjel re li evangelio choq’ reheb’ lix komoneb’ li xe’kam, li toj yookeb’ chiroyb’eninkileb’ li k’ojob’anb’il k’anjel a’an?
Chi’ilmanq ajwi’ “Kolb’a-ib’ choq’ reheb’ li kamenaq” sa’ li K’utul Raqal reheb’ li Loq’laj Hu.
Rik’in lix wankil li Jesukristo, naru nintz’aqonk sa’ lix yu’am li Dios.
Ma wan naq nakak’oxla naq ink’a’ naru li wank jo’ li Jesukristo, ut xtawb’al lix na’leb’ a’an? Li Elder Robert D. Hales kixye li aatin a’in chirix chan ru naru naqak’ul lix na’leb’ li Kristo: “Eb’ lix na’leb’ li Kolonel ... kemb’ileb’ rib’ chirib’ileb’ rib’, li jun rik’in li jun chik, ut neke’k’anjelak sa’ komonil. Sa’ jalan chik aatin, ink’a’ naru taqak’ul junaq xna’leb’ li Kristo chi ink’a’ taqak’ul ut taqeek’asi jalan chik. Naq li jun naxk’ul xmetz’ew, naab’aleb’ chik neke’xk’ul ajwi’ ” (“Li wulak jo’ xtzolom li Qaawa’ Jesukristo,” Jolomil ch’utub’aj-ib’ re abril 2017.
Li junjunq xna’leb’ li Kristo li naqak’ul nokoxtenq’a chixkemb’al jun musiq’ejil t’ikr li wanko wi’ choq’ tzolom.
Naru taawil ru 2 Pedro 1:1–11 rochb’een li raatin li Elder Hales. K’a’ru nakatzol rik’ineb’ li wiib’ chi apostol a’in, li nakatxtenq’a naq nakayal aaq’e chi wank jo’ li Kristo?
Chi’ilmanq ajwi’ 1 Pedro 4:8; David A. Bednar,“Eb’ li yeechi’ihom q’axaleb’ ninq ut loq’,” Jolomil ch’utub’aj-ib’ re octubre 2017.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Naq nakawileb’ ru li raqal a’in sa’ junkab’al, k’oxla roksinkileb’ li pek re xtenq’ankileb’ li komon sa’ li junkab’al chixtawb’al ru li raatin laj Pedro, naq laj Kolonel wan choq’ “jun li pek re rub’elankil li kab’l.” Chan ru naq wanko laa’o jo’ “yo’yookil pek,” li yoo li Dios chiroksinkil re xkab’lankil lix awa’b’ejihom? K’a’ru naqatzol rik’in laj Pedro chirix li Kolonel, ut chirix li qak’anjel sa’ lix awab’ejihom? K’a’ru xyaalalil li raatin laj Pedro choq’ re laa junkab’al?
Chan ru naru naq “yo’oon wanqo chi junelik re xsumenkil chixjunileb’ ” li te’patz’oq chirix li qapaab’aal? Eb’ li wankeb’ sa’ laa junkab’al maare taawulaq chiruheb’ xk’utb’esinkil k’a’ru te’xb’aanu wi wan ani napatz’ok reheb’ chirix li evangelio.
K’a’ru naru teeb’aanu jo’ junkab’al re tzolok chirix lee xe’ eetoon li kamenaqeb’? Maare sa’ xninq’e jun lee xe’ eetoon kamenaq, texruuq chixk’uub’ankil jun wa li xwulak chiru a’an, malaj teek’ut li jalam-uuch, malaj teeye resil lix yu’am lee xe’ eetoon. Wi naru cheru, naru ajwi’ teek’oxla xk’ulb’al li k’ojob’anb’il k’anjel sa’ xk’ab’a’ li xe’ toon a’an sa’ li santil ochoch.
Sa’eb’ li raqal a’in, laj Pedro naxjultika reheb’ laj santil paab’anel li k’a’ru kixk’ul chaq sa’ xb’een li tzuul ki’ux wi’ li jaltesiik u (chi’ilmanq ajwi’ Mateo 17:1–9). K’a’ru naqatzol rik’ineb’ li raqal a’in chirix li raatineb’ li profeet? (chi’ilmanq ajwi’ Tz. ut S. 1:38). K’a’ru naxk’e xkawil qach’ool chixtaaqenkil li qayo’yookil profeet anajwan?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
“Yo’oon wanqat junelik.” Li hoonal re k’utuk moko k’uub’k’uukeb’ ta neke’nume’ sa’ junpaat, jo’kan naq aajel ru roksinkileb’ chi us naq neke’chal. Chan ru naru taakawresi aawib’ re naq “yo’oon wanqat chi junelik” re xk’utb’al li yaalil na’leb’ chiruheb’ li komon sa’ laa junkab’al, ut taawotz “li oyb’enink li wan aawik’in” (1 Pedro 3:15) naq nawulak li hoonal re k’utuk? (Chi’ilmanq Li k’utuk jo’ li Kolonel, 16.)
Us ta maak’a’jo’ li rahob’tesiik ut li hob’e’k kixk’ul laj Pedro, a’an kiwan chi xaqxo junelik sa’ xch’olob’ankil xyaalal li Kristo.