li Kristo yoo chixk’aak’alenkil jun teep chi karneer

Li chaab’il aj k’aak’alenel, xb’aan laj Del parson

9–15 diciembre

Apokalipsis 1–11

“Li Karneer, chiwanq taxaq xnimal xloq’al ut xkawilal”

K’oxla xtz’iib’ankileb’ laa patz’om chirix li k’a’ru nakawil ru sa’ Apokalipsis. Chirix a’an, sik’ xsumenkileb’ laa patz’om, malaj tat-aatinaq chirix rik’in jun komon sa’ laa junkab’al, malaj sa’eb’ li tzoleb’aal re li Iglees.

Xtz’iib’ankil li nakak’oxla

Ma xch’a’ajko’ chawu jun sutaq xch’olob’ankil chiru anihaq k’a’ru xaweek’a naq xak’ul chi kaw li Musiq’ej? Wan naq li aatinob’aal re wulaj wulaj moko tz’aqal ta re xch’olob’ankil xyaalal li musiq’ejil eek’ahom ut na’leb’. Maare xb’aan a’in naq laj Jwan kiroksi li chaq’al ru eetalil ut aatin re xyeeb’al resil li nimla k’utb’esink kixk’ul. Kiru raj kixye naq kiril li Jesukristo, a’b’anan re qatenq’ankil chixtawb’al ru li k’a’ru kireek’a, kixye xyaalal li Kolonel rik’in aatin jo’ a’in: “Lix sa’ ru kama’ li raq’ xam,” “sa’ re na’elk jun jutz’ ch’iich’ ka’pak’al xq’esnal,” ut “lix naq’ ru kama’ li saq’e naq nalemtz’unk chi k’a’jo’ xtiqwal” (Apokalipsis 1:14–16). Naq yookat chirilb’al ru li hu Apokalipsis, yal aaq’e chixtawb’al li esil kiraj laj Jwan naq taatzol ut taaweek’a, us ta ink’a’ nakataweb’ ru chixjunileb’ li eetalil. K’a’ut naq kixjuntaq’eeta li jar ch’utam re li Iglees rik’in lix na’aj li xam, laj Satanas rik’in jun nimla k’anti’, ut li Jesukristo rik’in jun karneer? Ink’a’ na’ajman ru naq taataw ru chixjunileb’ li eetalil sa’ li hu Apokalipsis re taanaweb’ xnimal li na’leb’ li wankeb’ chi sa’, ut li q’axal nim a’an a’in: li Jesukristo ut eb’ li neke’taaqenk re te’numtaaq sa’ xb’eeneb’ li awa’b’ejihom reheb’ li winq ut re laj Satanas.

reetalil li tzolok aajunes

Li na’leb’ re xtzolb’aleb’ li loq’laj hu aajunes.

Apokalipsis

Chan ru naru tintaw ru li hu Apokalipsis?

Ch’a’aj xtawb’al ru li hu Apokalipsis, a’ut mich’inan aach’ool. Lix yeechi’ihom laj Jwan tixk’e aakawilal chixyalb’al aaq’e: “Osob’tesinb’ileb’ chixjunileb’ li neke’ilok ru, ut eb’ li neke’ab’ink re ut neke’xtaw ru li aatin re li profeetil yehom a’in, ut neke’xpaab’ li k’a’aq re ru tz’iib’anb’il chi sa’, xb’aan naq taanach’oq chaq xhoonal lix k’ulunik li Qaawa’ ” (JJS, Apokalipsis 1:3, tiqb’il xkawil li aatin).

Eb’ li patz’om ut li k’anjeleb’aal a’in naru te’xk’e aana’leb’ naq nakatzol li hu Apokalipsis:

• Ani laj Jwan? (Chi’ilmanq 1 Nefi 14:18–27; K’utul Raqal reheb’ li Loq’laj Hu, “Jwan, ralal laj Sebedeo.”)

• Chan ru naq k’uub’anb’il li hu a’in, ut k’a’ruheb’ li na’leb’ li tento taasik’? Chi’ilmanq K’utul raqal reheb’ li loq’laj hu, “Apokalipsis.”)

• K’a’ru xyaalalileb’ li eetalil li wankeb’ sa’ Apokalipsis? (Chi’ilmanq Tzol’leb’ ut Sumwank 77; Nuevo Testamento Manual del alumno [Manual del Sistema Educativo de la Iglesia, 2014], 525–568.)

Maare us ajwi’ xsik’b’al li na’leb’ sa’ li jar raqal re Apokalipsis li jaltesinb’il ru xb’aan laj Jose Smith. (Chi’ilmanq JJS sa’ li roxichal chi loq’laj hu.)

Apokalipsis

Lix k’utb’esinb’il matk’ laj Jwan naxk’ut chan ru naq li qaChoxahil Yuwa’ naxkoleb’ li ralal xk’ajol.

Naq nakat-ok chixtzolb’al li hu Apokalipsis, k’oxla chan ru naq li k’a’ru nakawil ru naxk’am rib’ rik’in li k’a’ru nakanaw chirix lix k’uub’anb’il na’leb’ li qaChoxahil Yuwa’ choq’ re lix kolb’aleb’ ut lix taqenaqil loq’aleb’ chixjunileb’ li ralal xk’ajol. Naru xtikib’ankil rik’in xnumsinkil li k’uub’anb’il na’leb’ re li kolb’a-ib’, jo’ k’utb’il sa’ Predicad mi Evangelio (eb’ li perel 47–59). Chirix a’an, sa’ rilb’al lix tz’iib’ahom laj Jwan chirix lix k’utb’esinb’il matk’, patz’ aawib’ li patz’om jo’ a’in: K’a’ru li yaalil na’leb’ nintzol sa’ Apokalipsis chirix k’a’ru xb’aanu lin Choxahil Yuwa’ re intenq’ankil chi sutq’iik rik’in a’an? Chan ru naq a’in tinixtenq’a chixtawb’al ru lix k’uub’anb’il na’leb’ li Dios choq’ we?

Maare tatxtenq’a chixtawb’al a’in:

• Naab’al li wan sa’ li ch’ol 12 li na’aatinak chirix li k’a’ru kik’ulman naq maji’ nokoyo’la (chi’ilmanq ajwi’ “Yu’am naq maji’ nokoyo’la,” K’utul Raqal reheb’ li Loq’laj Hu).

• Sa’eb’ li ch’ol 6–11, 13–14, 16–19, yeeb’il resil li yu’am a’in ut li k’a’ru xk’ulman sa’ li ruchich’och’ (chi’ilmanq ajwi’ “Wank li kamk sa’ xb’een,” K’utul Raqal reheb’ li Loq’laj Hu).

• Sa’eb’ li ch’ol 2–3, 15, 20–22, yeeb’il resil li raqb’a-aatin sa’ roso’jik, ut li loq’alil te’xk’ul li tiikeb’ chi paab’ank sa’ li junelikil eechanihom (chi’ilmanq ajwi’ “Kamk re tz’ejwalej,” “Wakliik chi yo’yo,” K’utul Raqal reheb’ li Loq’laj Hu).

Apokalipsis 2–3

Li Jesukristo naxnaw wu ut tinixtenq’a chixq’axb’al ru lix yalb’al wix.

Li raatin li Kolonel sa’ Apokalipsis 2–3 naxk’ut naq a’an naxtaw ru lix chaab’ilaleb’ ut lix ch’a’ajkilaleb’ li junjunq chi teep sa’ li Iglees sa’ xkutankil laj Jwan. A’an kixye reheb’ laj santil paab’anel sa’ li junjunq ch’utam naq a’an naxnaw ru li yoo chi k’ulmank sa’ xyanqeb’, jo’ lix “b’aanuhomeb’,” lix “nimal lix rahilaleb’,” lix “neb’a’ileb’,” ut lix “rahomeb’ ” (Apokalipsis 2:2, 9, 19)—ut jo’kan ajwi’ chan ru naq te’ruuq chixchaab’ilob’resinkil rib’.

Eb’ li ch’ol a’in naru neke’xk’e chanaw naq li Kolonel naxtaw ru laa kawilal ut laa majelal, ut naraj naq taaq’axeb’ ru laa ch’a’ajkilal re li ruchich’och’ a’in. K’a’ru naxyeechi’i li Jesukristo reheb’ li neke’q’axok-u? K’a’ru li jalaak nakaweek’a naq tento taab’aanu re xq’axb’al ru laa ch’a’ajkilal?

Apokalipsis 5

Ka’ajwi’ li Jesukristo kiru chixk’eeb’al chi uxmank lix k’uub’anb’il na’leb’ li qaChoxahil Yuwa’.

Us ta ink’a’ chik jultik aawe, naru naq laa’at xatwan aran chirilb’al li yeeb’il resil xb’aan laj Jwan sa’ Apokalipsis 5. Naq nakawileb’ ru li na’leb’ a’in, k’oxla k’a’ru tana’ kiqeek’a naq xqak’e reetal naq li Jesukristo (li “Karneer”) tixk’e chi uxmank lix k’uub’anb’il na’leb’ li qaChoxahil Yuwa’ (naq kixte li hu ut kixteheb’ li wuqub’ tz’apleb’). K’a’ut naq ka’ajwi’ li Jesukristo kiru chixb’aanunkil a’in? Chan ru naq nakatru chixk’utb’al laa paab’aal chirix a’an jo’ laa Kolonel?

Chi’ilmanq ajwi’ Job 38:4–7; “Xtojb’al rix li maak,” K’utul Raqal reheb’ li Loq’laj Hu.

Apokalipsis 6–11

Lix k’ojob’ankil wi’chik li evangelio kichal xb’een wa chiru li sachok li taak’ulmanq rub’elaj li xkab’ xk’ulunik li Jesukristo.

Sa’ Apokalipsis 6–11, yeeb’il resil li k’a’ru taak’ulmanq chiru lix kanajik li ruchich’och’ (chi’ilmanq Tz. ut S. 77:6), jo’ lix k’ojob’ankil wi’chik li evangelio sa’ roso’jikeb’ li kutan (chi’ilmanq Apokalipsis 7). Naq nakawil ru li k’a’ru kixye laj Jwan jo’ profeet, ut naq nakawil chi uxmank junjunq reheb’, k’a’ru eek’asinb’ilat chixb’aanunkil re xkawresinkil aawib’ ut eb’ laj junkab’al choq’ re li xkab’ xk’ulunik li Qaawa’?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Apokalipsis 2–3

B’aanuhomaq jo’ raj xpatz’man re laj Jwan naq tixk’e jun esil re laa junkab’al, chanchan li kixk’e reheb’ li iglees sa’ xkutankil a’an. K’a’ raj ru tixye naq us? Chan raj ru texruuq chi usaak?

Apokalipsis 3:20

K’ut li jalam-uuch wan wi’ li Kolonel chi toch’ok chiru li okeb’aal (chi’ilmanq li jalam-uuch li na’ochb’eenink re li tusleb’ aatin a’in). Patz’ reheb’ laa junkab’al naq te’ril ru Apokalipsis 3:20, ut te’aatinaq chirixeb’ li patz’om jo’ a’in: “K’a’ut naq li Jesus nab’oqok, ut ink’a’ yal naxte li okeb’aal? Chan ru naru naqoksi lix wankil a’an sa’ li qochoch?

Apokalipsis 7:9, 13–14

K’a’ru neke’xk’ut li raqal a’in chiqu chirix k’a’ut naq naqak’e saqi aq’ej chiqix choq’ reheb’ li k’ojob’anb’il k’anjel sa’ li santil ochoch?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Kanab’eb’ chi patz’ok. Eb’ li patz’om neke’xk’ut naq eb’ li komon sa’ laa junkab’al wankeb’ xch’ool chi tzolok, ut neke’xk’e aana’leb’ chirix chan ru yookeb’ chixk’ulb’al li k’a’ru yookeb’ chixtzolb’al. K’ut chiru laa junkab’al chan ru xtawb’al xsumenkil li patz’om sa’eb’ li loq’laj hu. (Chi’ilmanq Li k’utuk jo’ li Kolonel, 25–26.)

li Kristo yoo chi toch’ok chiru jun okeb’aal

Kanab’ chi ok, xb’aan laj Greg K. Olsen