“16–22 diciembre. Li Ralankil: “Tinye eere jun chaab’il esilal, ut a’an jun xnimal sahil ch’oolej” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“16–22 diciembre. Li Ralankil,” Kim, Taaqehin—Choq’ reheb’ li komon ut li junkab’al: 2019
Sa’ xna’ajeb’ li xul, xb’aan laj Dan Burr
16–22 diciembre
Li Ralankil
“Tinye eere jun chaab’il esilal, ut a’an jun xnimal sahil ch’oolej”
Wankeb’ li jwal laatz’eb’ ru sa’ xkutankil li Ralankil. K’oxla chan ru naq xtzolb’al li Ak’ Chaq’rab’ naru chixk’amb’al sa’ laa yu’am jun musiq’ej re tuqtuukilal ut santilal. K’oxla chan ru naq lix yo’lajik ut lix k’anjel li Jesukristo xjal laa yu’am, ut tz’iib’aheb’ li musiq’anb’il na’leb’ li neke’chal.
Xtz’iib’ankil li nakak’oxla
K’a’ut naq k’a’jo’ nasaho’ qach’ool naq naqil chi yo’laak jun li k’uula’al? Maare xb’aan naq jun li ak’ k’uula’al a’an jun reetalil li yo’onink. Rik’in naq wan ani toja’ xyo’la, wan jun li ak’ yu’am, maji’ k’amb’il lix b’e, ut rik’in a’an noko’ok chixk’oxlankil k’a’ru tixk’ul li ch’ina al malaj xqa’al, ut k’a’ru li chaab’ilal tixb’aanu. Maak’a’jo’ wi’chik naq yaal a’in sa’ xyo’lajik li Jesukristo, li Ralal li Dios. Maajun wa wanjenaq xnimal li yo’ob’tesink chirix jun li k’uula’al, ut maajo’q’e yo’lajenaq junaq k’uula’al li xk’ul xkomon li nimla yeechi’ihom li kixk’ul a’an.
Naq jun li anjel kixb’oqeb’ laj ilol karneer chirilb’al jun li k’uula’al li toja’ xyo’la sa’ jun xwa’leb’aal xul, kixye ajwi’ resil li k’uula’al a’an. A’an jun esil re yo’onink—naq chalenaq li k’uula’al a’an sa’ li ruchich’och’ re xb’aanunkil jun loq’laj k’anjel. Eb’ laj ilol karneer “ke’xseraq’i li k’a’ru yeeb’il reheb’ ... ut chixjunileb’ li ke’ab’ink re ke’sachk xch’ool xb’aan li neke’xye eb’ laj k’aak’alenel ketomq. Li xMaria naxk’uula sa’ xch’ool chixjunil a’in, yoo chixk’oxlankil rix” (Lukas 2:17–19). Maare us raj xb’aanunkil sa’ li Ralankil jo’ li kixb’aanu li xMaria, ut xk’oxlankil rix sa’ aach’ool li k’a’ru xatzol chirix li Kolonel chiru li chihab’ a’in. Chan ru naq kixb’aanu lix k’anjel re xtojb’al qix, sa’eb’ li hu xawil ru? Ut chi mas nim wi’chik, chan ru naq xjale’ laa yu’am rik’in lix k’anjel?
Li na’leb’ re xtzolb’aleb’ li loq’laj hu aajunes.
Mateo 1:18–25; 2:1–12; Luke 1:26–38; 2:1–20
Li Jesukristo kixkub’si rib’ re yo’laak sa’ qayanq sa’ li ruchich’och’.
Us ta ak xawil ru malaj xawab’i k’iila sut resil lix yo’lajik li Jesukristo, tzol a’an sa’ li chihab’ a’in rik’in xk’oxlankil li na’leb’ a’in: “Li Ralankil maawa’ ka’ajwi’ xninq’ehinkil chan ru naq li Jesus kik’ulun chaq sa’ ruchich’och’, a’b’an xnawb’al ajwi’ ani a’an—li Qaawa’ ut laj Kolol qe, li Jesukristo—ut k’a’ut naq kik’ulun chaq” (Craig C. Christensen,” “Lix tz’aqalil li esilal chirix li Ralankil” [Xch’utam li Xb’eenil Awa’b’ejil re li Ralankil, 4 diciembre, 2016], broadcasts.lds.org).
K’a’ru nakanaw chirix ani li Jesukristo naq maji’ nayo’la chaq? (chi’ilmanq, jo’ eetalil, Jwan 17:5; Mosiah 3:5; Tz. ut S. 76:13–14, 20–24; Moises 4:2). Chan ru naq li na’leb’ a’in naxjal k’a’ru nakaweek’a chirix a’an naq nakawil ru resil lix yo’lajik?
K’a’ru nakanaw chirix k’a’ut naq kichal li Jesukristo sa’ li ruchich’och’? (chi’ilmanq, jo’ eetalil, Lukas 4:16–21; Jwan 3:16–17; 3 Nefi 27:13–16; Tz. ut S. 20:20–28). Chan ru naq li na’leb’ a’in naxjal k’a’ru nakaweek’a chirix li Kolonel? Chan ru naq naxjal chan ru naq wankat sa’ laa yu’am?
Chi’ilmanq ajwi’ 2 Korintios 8:9; Hebreos 2:7–18; 1 Nefi 11:13–33; Alma 7:10–13; “El nacimiento” (video, LDS.org).
1 Korintios 15:21–26; Kolosenses 1:12–22; 1 Pedro 2:21–25
Li Jesukristo kixtz’aqob’resi ru lix k’anjel, ut xkawresi li b’e re tinruuq chireechaninkil li junelik yu’am.
Us ta ke’wan li sachb’a-ch’oolej sa’ xyo’lajik li Kristo, a’an yal jun chik raj li k’uula’al li kiyo’la wi ta ink’a’ kixb’aanu lix nimal ru k’anjel moqon sa’ lix yu’am. Jo’ kixye li Awa’b’ej Gordon B. Hinckley, “Li k’uula’al Jesus aran Belen yal junaq chi k’uula’al kiwan raj wi ta ink’a’ kiwan li Kristo aj Tojol-ix sa’ Getsemani ut sa’ Calvario, ut wi ta ink’a’ ki’uxman li xnimal ru wakliik chi yo’yo” (Li esil chaq’al ru ut yaal chirix li Ralankil,” Liahona, diciembre 2000, 6).
Getsemani, xb’aan laj J. Kirk Richards
Natawman reetalil lix nimal ru k’anjel li Kolonel, ut xnimal lix rahom choq’ reheb’ li ras riitz’in sa’ chixjunil li Ak’ Chaq’rab’. K’a’ru li raqal malaj li esil li nachal sa’ laa k’a’uxl? Us naq taanumsi wi’chik li k’utleb’ aatin a’in, malaj laa ch’ina hu re tzolok, ut taawil wi’chik junjunq li na’leb’ xatz’iib’a. Naru ajwi’ taawil ru 1 Korintios 15:21–26; Kolosenses 1:12–22; 1 Pedro 2:21–25 ut taak’oxla chan ru naq li Kolonel ut lix k’anjel xrosob’tesi laa yu’am. K’a’ru eek’asinb’ilat chixjalb’al sa’ laa yu’am? Chan ru naq taak’ul lix wankilal li Kolonel?
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Chan ru naq nakatru chixninq’ehinkil lix yo’lajik li Jesukristo rik’in laa junkab’al? Arin wan junjunq li na’leb’, ut wan chik naru nakak’oxla laa’at:
-
Yaab’asihomaq malaj k’utb’esihomaq sa’ komonil resil li Ralankil.
-
Ilomaq li video “El nacimiento” (LDS.org).
-
Naru teeril junjunq li k’anjeleb’aal sa’ christmas.mormon.org; jesuschrist.lds.org; malaj “Jesukristo: Resil lix yu’am,” K’utul Raqal reheb’ li Loq’laj Hu.
-
Ilomaq jun Xch’utam li Xb’eenil Awa’b’ejil re li Ralankil (broadcasts.lds.org).
-
B’ichahomaq sa’ komonil li b’ich re Ralankil, malaj ula’anihomaqeb’ lee rech kab’al malaj lee ramiiw, ut b’ichanqex choq’ reheb’ (chi’ilmanq Eb’ li B’ich, 123–132).
-
B’aanu junaq k’anjel choq’ re anihaq.
-
Patz’ reheb’ li komon sa’ li junkab’al chirix k’a’ru sa’ resil lix yo’lajik li Jesus te’ruuq chixyiib’ankil re rutz’u’ujinkil li ochoch re te’xk’oxla li Jesukristo.
K’a’ut naq naqab’antioxi naq kiyo’la li Jesus? K’a’ru li maatan xk’e qe? Chan ru naru naqak’ut chiru naq naqab’antioxi?
“Li Yo’yookil Kristo: Lix Ch’olob’ahomeb’ li Apostol”
Wi nakawaj xtenq’ankileb’ li wankeb’ sa’ laa junkab’al chixk’oxlankil li Kolonel sa’ Ralankil, maare taaruuq teenumsi li hoonal rik’in rilb’al ru ut xtzolb’al sa’ komonil “Li Yo’yookil Kristo: Lix Ch’olob’ahomeb’ li Apostol” (LDS.org). Maare taaruuq teekanab’ sa’ lee k’a’uxl li ch’ol aatin sa’ “Li Yo’yookil Kristo,” malaj teesik’ sa’ li Ak’ Chaq’rab’ li aatin chirix lix yu’am li Kolonel li naxk’am rib’ rik’in li raatinul. Taaruuq ajwi’ taak’e xb’oqb’al li junjunq komon sa’ li junkab’al chixtz’iib’ankil lix nawom xch’ool chirix li Jesukristo, ut wi eek’asinb’il chi jo’kan, chixyeeb’al re li junkab’al.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’ li Jesukristo. Sa’eb’ li loq’laj hu naxye naq chixjunil li k’a’aq re ru wan naxch’olob’ xyaalal li Jesukristo (chi’ilmanq Moises 6:62–63), ut chi jo’kan tento raj taqasik’ a’an sa’ chixjunil li k’a’aq re ru. Naq yookat chirilb’aleb’ ru li loq’laj hu, k’oxla xk’eeb’al reetalil eb’ li raqal li neke’xk’e aana’leb’ chirix a’an. Numsi li hoonal sa’ xkutankil li Ralankil re xsik’b’al li k’a’ru wan chasutam li naxch’olob’ xyaalal li Jesukristo.
Li Ralankil, xb’aan laj Brian Call