“23–29 diciembre. Apokalipsis 12–22: “Ani taaq’axoq u, taareechani chixjunil a’ k’a’aq re ru a’in” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“23–29 diciembre. Apokalipsis 12–22,” Kim, Taaqehin—Choq’ reheb’ li komon ut li junkab’al: 2019
Li junelikil tenamit, xb’aan laj Keith Larson
23–29 diciembre
Apokalipsis 12–22
“Ani taaq’axoq u, taareechani chixjunil a’ k’a’aq re ru a’in”
Naq yookat chirilb’al ru Apokalipsis 12–22, sik’ k’a’ru kiril laj Jwan li chanchan ajwi’ li nakawil sa’ li ruchich’och’ anajwan. Sik’ aatenq’ankil rik’in li Musiq’ej re xtawb’al aana’leb’ naq nakawil ru li k’iila eetalil sa’ li raatin laj Jwan.
Xtz’iib’ankil li nakak’oxla
K’oxla jun li ixq li “q’axal ra wank xb’aan li alank.” Anajwan, k’oxla “jun li nimla k’anti’ kaq rix, wank wuqub’ xjolom ut lajeeb’ xxukub’,” li xaqxo chiru li ixq, “re naq jo’q’e taayo’laaq lix k’uula’al, tixnuq’ raj” (Apokalipsis 12:2–4). Re xtawb’aleb’ ru li raqal a’in sa’ lix k’utb’esinb’il matk’ laj Jwan, k’e reetal naq li k’utb’esinb’il arin, a’an reetalil li Iglees ut lix awa’b’ejihom li Dios, ut li rahilal li te’nume’q wi’. Choq’ reheb’ laj santil paab’anel li yookeb’ chaq chixk’ulb’al li nimla rahob’tesink sa’ xkutankil laj Jwan, maare kich’a’ajko’k chiruheb’ xk’oxlankil naq te’xq’ax ru li maa’usilal. Ch’a’aj ajwi’ xk’oxlankil naq taqaq’ax ru sa’ li kutan wanko wi’, naq laj xik’ ilonel “nayalok rik’ineb’ laj santil paab’anel,” ut wan “xwankil sa’ xb’een chixjunileb’ lix teepal ut xtenamit li ruchich’och’ ” (Apokalipsis 13:7). A’ut sa’ roso’jik lix k’utb’esinb’il matk’ laj Jwan, k’utk’u naq li chaab’il taanumtaaq sa’ xb’een li ink’a’ us. Taat’ane’q Babilonia. Taataqlanq li Jesukristo jo’ xReyeb’ li rey. Li Dios “tixchaqihob’resi chixjunil lix ya’aleb’ ru,” ut eb’ li tiikeb’ chi paab’ank te’awa’b’ejinq rochb’een a’an, ut “te’reechani chixjunil li k’a’aq re ru” (Apokalipsis 21:4, 7).
Li na’leb’ re xtzolb’aleb’ li loq’laj hu aajunes.
Li pleet saʼ choxa toj yoo chi pleetimank saʼ li ruchichʼochʼ.
Ink’a’ mas naqanaw chirix li pleet sa’ choxa, a’ut yeeb’il xka’ch’inal li aatin chirix sa’ Apokalipsis 12:7–11. Naq nakawileb’ li raqal a’an, k’oxla aawib’ jo’ aj tz’aqonel sa’ li nimla pleet a’an naq maji’ natikla li ruchich’och’. K’a’ru neke’xk’ut li raqal a’in chirix chan ru naq li Dios ut eb’ li ralal xk’ajol li tiikeb’ xch’ool ke’xq’ax ru laj Satanas? K’a’ru naxk’ut a’in chirix chan ru naq nakatru chi numtaak sa’ xb’een a’an sa’ li kutan a’in, naq toj “naxyal xmetz’ew rik’ineb’ li neke’paab’ank re lix chaq’rab’ li Dios ut neke’xk’uula sa’ xch’ool lix ch’olob’ahom li Jesus”? (raqal 17).
Chi’ilmanq ajwi’ 1 Nefi 14:12–14; K’utul Raqal reheb’ li Loq’laj Hu, “Miguel,” “Pleet sa’ choxa.”
Ani li anjel kiril laj Jwan chixjultikankil li evangelio?
Jun xtz’aqlojik ru li profeetil aatin sa’eb’ li raqal a’in kik’ulman naq laj Moroni kixk’ut rib’ chiru laj Jose Smith ut kixk’ut chiru li hu li kixjaltesi ru ut kixpuktesi jo’ lix Hu laj Mormon. Sa’ li hu a’an wan li “li chaab’il esilal li maak’a’ roso’jik” li taqlanb’ilo chixpuktesinkil “rik’ineb’ li wankeb’ sa’ ruchich’och’ jo’ ajwi’ rik’ineb’ chixjunil li amaq’ ut tenamit, yalaq chan re ru neke’ilok ut neke’aatinak” (Apokalipsis 14:6).
Li Qaawa’ nikinixb’oq chi eelelik chaq chiru Babilonia ut li maak wan chi sa’.
Sa’ Apokalipsis 17–18, yeeb’il resil li maak, li rahok eechej, ut li atawank li natawman sa’ Babilonia—a’an reetalil li ruchich’och’il na’leb’ ut li maa’usilal. K’oxla li k’a’aq re ru li chanchan Babilonia sa’ li ruchich’och’ sa’ li kutan wanko wi’, ut k’oxla k’a’ru nakatru chixb’aanunkil re “elk chaq Babilonia” ut re ink’a’ “tat-okenq sa’ lix maakeb’ ” (Apokalipsis 18:4).
Chixjunileb’ li ralal xk’ajol li Dios taaraqmanq aatin sa’ xb’eeneb’ jo’ chanru tz’iib’anb’il sa’ xhuhil li yu’am.
K’oxla li taak’ulmanq raj wi ta jun aj tz’iib’anel tixye naq tixtz’iib’a jun li hu chirix laa yu’am. K’a’ raj ru li na’leb’ ut li k’a’ru xak’ul li taawaj raj naq taayeemanq resil? Wi ta xanaw naq taatz’iib’amanq resil li k’a’ru toj taab’aanu, chan raj ru naq taajal laa b’aanuhom sa’ laa yu’am? K’oxla a’in naq nakawil ru resil lix kutankil li raqb’a-aatin sa’ Apokalipsis 20:12–15. K’a’ru taawaj naq taatz’iib’amanq chawix sa’ xhuhil li yu’am?
Chi’ilmanq ajwi’ li K’utul Raqal reheb’ li Loq’laj Hu, “Xhuhil li yu’amej.”
Wi wankin chi tiik, tink’ul li choxahil loq’al.
Chi junpak’al li yeeb’il chirix Babilonia, sa’ Apokalipsis 21–22 yeeb’il resil li choxahil loq’alil li te’xk’ul li ani tiikeb’ chixtaaqenkil li Kristo. K’a’ruheb’ li na’leb’, li ch’ol aatin, ut li yeechi’ink sa’eb’ li ch’ol a’in li neke’eek’asink aawe chi wank chi tiik, us ta ch’a’aj?
Ma naraj naxye li raqal a’in naq ink’a’ taaruuq taawanq chik li loq’laj tz’iib’ahom chirix li Santil Hu?
Wankeb’ li neke’roksi Apokalipsis 22:18–19 re xtz’eqtaanankil lix Hu laj Mormon, ut xkomoneb’ chik li loq’laj hu re roso’jikeb’ li kutan. A’b’anan li Elder Jeffrey R. Holland kixk’ut:
“Anajwan, chixjunileb’ laj tzolol re li Santil Hu neke’xnaw naq li raqal a’in ka’ajwi’ na’aatinak chirix li hu Apokolipsis, ink’a’ chirix chixjunil li Santil Hu. Eb’ laj tzolol re li Santil Hu sa’ li kutan wanko wi’ neke’xnaw naq wankeb’ chik li hu sa’ li Ak’ Chaq’rab’ li ke’tz’iib’aman chirix naq kik’ule’ lix k’utb’esinb’il matk’ laj Jwan sa’ li ch’och’ Patmos sa’ xyi palaw. ...
“A’ut wan chik xsumenkil li patz’om a’in. ... Chixjunil li Santil Hu li nawb’il ru qab’aan—eb’ li k’iila hu li yiib’anb’ileb’ sa’ junaj chi hu—moko kiwan ta naq kitz’iib’aman li raqal a’an” (“...mis palabras...jamás cesan,” Liahona, mayo 2008, 91–92).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Maare wankeb’ li komon sa’ li junkab’al li te’wulaq chiru xyiib’ankil jun jalam-uuch re junjunq li k’utb’esink li yeeb’il resil sa’ Apokalipsis. Jo’ jun eetalil, xyiib’ankil li jalam-uuch chirix li k’a’ru natawman sa’ Apokalipsis 12 naru naxtikib’ li aatinak chirix li pleet sa’ choxa (chi’ilmanq li raqal 7–11). Eb’ li jalam-uuch chirix li wan sa’ Apokalipsis 21 maare texxtenq’a chi aatinak chirix li choxahil awa’b’ejihom. Naru ajwi’ taak’ut li jalam-uuch li narochb’eeni li tusleb’ aatin a’in, ut taapatz’ reheb’ li komon sa’ li junkab’al naq te’xtaweb’ li raqal sa’ Apokalipsis 19 li neke’xye resil li k’utb’il sa’ li jalam-uuch.
K’a’ru xyaalalil “li aatin xe’xye chi yaal” sa’ li raqal a’in? Chan ru naq xch’olob’ankil lix nawom qach’ool chirix li Jesukristo nokoxtenq’a laa’o ut eb’ li qas qiitz’in chixq’axb’al ru laj Satanas?
K’a’ru neke’xk’oxla li komon sa’ laa junkab’al chirix li josq’ xul aj b’alaq’? Chan ru naru naqanaweb’ ru ut naqatz’eqtaanaheb’ li b’alaq’il na’leb’ li naqil sa’ li ruchich’och’ anajwan?
Chan ru naq 1 Nefi 22:26; Tzol’leb’ ut Sumwank 43:30–31 nokoxtenq’a chixnawb’al k’a’ru xyaalalil naq “b’ak’b’il” laj Satanas?
K’a’ru xyaalalil naq wan xk’ab’a’ li Kolonel “chiqapeekem”? (Apokalipsis 22:4; chi’ilmanq ajwi’ Apokalipsis 13:16–17).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Patz’on chirixeb’ li b’oqb’al chi k’anjelak. “Naq nakatpatz’ok chirix jun b’oqb’al chi k’anjelak, nakak’ut chiruheb’ li komon [sa’ laa junkab’al] naq yookat chixk’oxlankileb’, ut chixk’oxlankil chanru neke’osob’tesiik xyu’ameb’ xb’aan li evangelio. Jo’kan ajwi’ nakakanab’eb’ chixwotzb’al li k’a’ru xe’xk’ul sa’ xyu’am, li nakawob’resink re xk’eek’ookilaleb’ xch’ool ut naxkanab’eb’ chixtenq’ankil rib’ chirib’ileb’ rib’ sa’ xyu’aminkil li evangelio” (Li k’utuk jo’ li Kolonel, 35).
Li Kristo tiqto chi kaq, k’ojk’o chirix jun saqi kawaay.