Li junelikil tenamit, xb’aan laj Keith Larson

23–29 diciembre

Apokalipsis 12–22

“Ani taaq’axoq u, taareechani chixjunil a’ k’a’aq re ru a’in”

Naq yooqat chixkawresinkil aawib’ re k’utuk, jultika laa numsihom xak’ul naq xatzol Apokalipsis 12–22 aajunes malaj rik’in laa junkab’al. K’a’ru li mas xwulak sa’ laa ch’ool? K’a’ru li na’leb’ xak’ul? Chijultiko’q aawe naq eb’ li kok’ k’anjel neke’yeeman arin naru neke’oksiman choq’ reheb’ chixjunil li kok’al a’ yaal jarub’ chihab’ reheb’.

Xtz’iib’ankil li nakak’oxla

Xkanab’ankileb’ chi wotzok

Kanab’eb’ li kok’al chixwotzb’al k’a’ut naq neke’raj wulak wi’chik rik’in li qaChoxahil Yuwa’. Sa’ chixjunil li tzolok, tenq’aheb’ chixtawb’al li k’a’ru naru neke’xb’aanu re xkawresinkileb’ rib’ re q’ajk rik’in a’an.

Xk’utb’al li tzol’leb’

Kok’al toj ka’ch’ineb’ xyu’am

Apokalipsis 12:7–11

Xink’ut inpaab’aal chirix li Jesukristo sa’ li yu’am naq maji’ nikinyo’la.

Sa’ li pleetik sa’ choxa, eb’ li alal k’ajolb’ej tiikeb’ chixpaab’ankil li Dios ke’xq’ax ru laj Satanas rik’in “li aatin xe’xye chi yaal” ut naq ke’xk’ut xpaab’aaleb’ chirix li Jesukristo (Apokalipsis 12:11).

Kok’ k’anjel naru chi b’aanumank

• Re xtenq’ankileb’ li kok’al chixtawb’al ru li naraj naxye xtaaqenkil lix b’aanuhom anihaq, sik’ ru jun ch’ina al re naq a’anaq laj “jolominel,” ut kanab’eb’ xkomoneb’ li kok’al chixtaaqenkil rik’in xb’aanunkil li k’a’ru tixb’aanu a’an. Chirix a’an kanab’eb’ jalaneb’ chik li kok’al chi wank jo’ aj jolominel. Il ru Apokalipsis 12:7–11 choq’ reheb’ li kok’al ut ch’olob’ naq rub’elaj naq kooyo’la, xqasik’ chaq ru xtaaqenkil li Jesus ut ink’a’ laj Satanas.

• B’ichahomaq sa’ komonil jun li b’ich li na’aatinak chirix li yu’am naq maji’ nokoyo’la, jo’ “Tintaaqe li kixk’uub’ choq’ we” malaj “Sa’ li choxa chaq kinwan” (B’ichleb’aal choq’ reheb’ li Kok’al, 86–87, 139). Yeheb’ patz’om jo’eb’ a’in: K’a’ru kik’ulman chaq sa’ choxa naq maji’ nokoyo’la? K’a’ru xqasik’ ru xb’aanunkil? (Chi’ilmanq ajwi’ “Xtikib’ankil: Lix k’uub’anb’il na’leb’ li qaChoxahil Yuwa’,” Eb’ li Esilal sa’ li Ak’ Chaq’rab’, 1–5, malaj li video sa’ LDS.org.)

Apokalipsis 19:7

Naq ninsik’ ru li k’a’ru us, naru ninkawresi wib’ choq’ re li xkab’ xk’ulunik li Jesukristo.

Chan ru naru nakatenq’aheb’ li kok’al chixtawb’al ru naq li xkab’ xk’ulunik li Qaawa’ a’anaq jun hoonal re sahil ch’oolej choq’ qe laa’o wi naqapaab’eb’ lix taqlahom li Jesus?

Kok’ k’anjel naru chi b’aanumank

• K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut il ru Apokalipsis 19:7. Ch’olob’ naq “li xsumlajik li Karneer” nareetali li xkab’ xk’ulunik li Jesukristo. K’a’ut naq ke’saho’ xch’ool li kristiaan? Patz’ reheb’ li kok’al ma wulajenaqeb’ sa’ junaq sumlaak. Chan ru xe’xnumsi? K’a’ut naq saheb’ chaq xch’ool li kristiaan?

• Wotz rik’ineb’ li kok’al k’a’ut naq nakawoyb’eni rik’in sahil ch’oolejil li xk’ab’ xk’ulunik li Jesus. Naru ajwi’ nekeb’icha sa’ komonil jun li b’ich na’aatinak chirix li xkab’ xk’ulunik li Qaawa’, jo’ “Naq taak’ulunq li Kolonel” (B’ichleb’aal choq’ reheb’ li Kok’al, 46–47).

• Kanab’eb’ li kok’al chixwotzb’al li neke’xb’aanu re xkawresinkileb’ rib’ re xik sa’ li iglees rajlal domingo. K’a’ut naq neke’qab’aanu li k’a’aq re ru a’an rub’elaj naq tooxik sa’ li iglees? K’a’ut naq tento taqakawresi qib’ choq’ re li xkab’ xk’ulunik li Kristo? Sa’ li perel re kok’ k’anjel re li xamaan a’in, kanab’eb’ li kok’al chixyiib’ankil xjalam-uuch li naru neke’xb’aanu re xkawresinkileb’ rib’ choq’ re li xkab’ xk’ulunik li Qaawa’.

Apokalipsis 21:1, 3–4, 22–27; 22:1–2

Naru ninwan wi’chik sa’ li choxahil awa’b’ejihom rik’in li qaChoxahil Yuwa’ ut rik’ineb’ li kristiaan ninraheb’.

Sa’ lix raqikeb’ li wiib’ chi ch’ol sa’ Apokalipsis, laj Jwan kiroksi xchaq’al ru aatin re xch’olob’ankil li choxahil awa’b’ejihom te’wulaq wi’ li tiikeb’ chi paab’ank.

Kok’ k’anjel naru chi b’aanumank

• Kanab’eb’ li kok’al chixyiib’ankil xjalam-uuch li toon che’ sa’ li pizarron li nayeeman resil sa’ Apokalipsis 22:2. Ch’olob’ naq li che’ a’an, a’an li che’ re li yu’am ut naq li ru nareetali lix rahom li Dios (chi’ilmanq 1 Nefi 11:21–22). K’e reheb’ li kok’al kok’ hu setb’il jo’ ru ki’il q’een ut kanab’eb’ chixyiib’ankil jun jalam-uuch chiru li taatenq’anq reheb’ chireek’ankil lix rahom li qaChoxahil Yuwa’. Ch’olob’ naq li ani tiikaqeb’ chi paab’ank te’wanq rik’in li qaChoxahil Yuwa’ sa’ li choxahil awa’b’ejihom.

• Wotz rik’ineb’ li kok’al junjunqeb’ jalam-uuch malaj k’a’aq re ru kiroksi laj Jwan re xch’olob’ankil li choxahil awa’b’ejihom (chi’ilmanq Apokalipsis 21:1, 3–4, 22–27; 22:1–2), ut kanab’eb’ li kok’al chixyiib’ankileb’ xjalam-uuch li k’a’aq re ru a’an.

• B’ichahomaq sa’ komonil jun li b’ich na’aatinak chirix lix k’uub’anb’il na’leb’ li Dios, jo’ “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 86–87). Kanab’eb’ li kok’al chixjayalinkileb’ rib’ sa’ li naru neke’xb’aanu re wank wi’chik rik’in li qaChoxahil Yuwa’.

Xk’utb’al li tzol’leb’

Kok’al ak ninqeb’

Apokalipsis 12:7–11

Xink’ut inpaab’aal chirix li Jesukristo sa’ li yu’am naq maji’ nikinyo’la.

Eb’ li kok’al nakatzoleb’ wankeb’ sa’ li ruchich’och’ xb’aan naq ke’wan xpaab’aal chirix li Jesukristo sa’ li yu’am naq maji’ neke’yo’la ut ke’xsik’ ru xtaaqenkil.

Kok’ k’anjel naru chi b’aanumank

• Ilomaq ru sa’ komonil Apokalipsis 12:7–11 ut tz’iib’aheb’ sa’ li pizarron li aatin nimla k’anti’, pleetik sa’ choxa, kute’k taq’a, aatin ke’xye chi yaal ut Karneer. Kanab’eb’ li kok’al chixk’osb’aleb’ ru li raqal a’an rik’in roksinkileb’ li aatin wankeb’ sa’ li pizarron. K’a’ru naqatzol sa’eb’ li raqal a’an chirix li Jesukristo (li Karneer)? K’a’ru naqatzol chirix li k’a’ru xqasik’ ru sa’ li qayu’am naq maji’ nokoyo’la?

• K’e oxib’ li juch’ sa’ li pizarron ut tz’iib’aheb’ li aatin a’in jo’ xjolomil li na’leb’: Rub’elaj li yu’am a’in, Chiru li yu’am a’in ut Sa’ li wiib’. Kawresiheb’ kok’ setb’il hu tz’iib’anb’ilaqeb’ wi’ li yaal chirix li yu’am naq maji’ nokoyo’la ut li yu’am sa’ ruchich’och’, jo’ Wan qajunxaqalil, Maak’a’ qajunxaqalil, Wanko b’ar wi’ wan li Dios, Wanko sa’ jun yalok q’e rik’in laj Satanas, Naqak’anjela qapaab’aal chirix li Jesukristo, ut Naqataaqe lix k’uub’anb’il na’leb’ li Dios. Kanab’eb’ li kok’al chixk’eeb’al xhoonaleb’ re xsik’b’al ru jun li ch’ina hu ut xsik’b’al ru b’ar reheb’ li juch’ nakana. Wotz xkawil aach’ool chirix naq eb’ li kok’al naru naq toj yooqeb’ chixk’utb’al xpaab’aaleb’ chirix li Kristo.

Apokalipsis 19:7–8

Naq ninsik’ ru li k’a’ru us, naru ninkawresi wib’ choq’ re li xkab’ xk’ulunik li Jesukristo.

Chan ru naru nakatenq’aheb’ li kok’al nakatzoleb’ chixtawb’al ru naq li xkab’ xk’ulunik li Jesukristo a’an jun hoonal re sahil ch’oolejil choq’ reheb’ li tiik chi paab’ank?

Kok’ k’anjel naru chi b’aanumank

• Ilomaq ru sa’ komonil Apokalipsis 19:7–8 ut tenq’aheb’ li kok’al chixtawb’al ru li neke’reetali li raqal a’an: eb’ li sumlaak a’aneb’ li xkab’ xk’ulunik li Kolonel, li Karneer a’an li Kolonel, ut li rixaqil a’an li Iglees (naraj naxye, naq laa’o chiqajunilo). Chan ru neke’xkawresi rib’ li kristiaan choq’ re junaq sumlaak? K’a’ raj ru naru naqab’aanu laa’o re naq kawresinb’ilaqo naq taak’ulunq wi’chik li Kolonel?

• Numsi wi’chik ut k’uulahomaq sa’ eek’a’uxl Eb’ lix Raqalil li Paab’aal 1:10. Ch’olob’ naq lix raqalil li paab’aal a’an naxch’olob’ li sahil ut choxahil k’a’aq re ru te’k’ulmanq naq taak’ulunq wi’chik li Jesus. K’e chi kutankil jun li jalam-uuch re li xkab’ xk’ulunik li Jesus natawman sa’ Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixyiib’ankil jun jalam-uuch re chan ru neke’xk’oxla naq taawanq li xkab’ xk’ulunik li Jesus.

Apokalipsis 21:1, 3–4, 22–27; 22:1–2, 17

Naru ninwan wi’chik sa’ li choxahil awa’b’ejihom rik’in lin Choxahil Yuwa’ ut rik’ineb’ li kristiaan ninraheb’.

Naq nakakawresi aawib’ re k’utuk chirix li choxahil awa’b’ejihom, k’oxlan chirix k’a’ru naraj naxye li choxahil awa’b’ejihom choq’ aawe. Chan ru naru nakawotz lix nawom aach’ool rik’ineb’ li kok’al nakatzoleb’?

Kok’ k’anjel naru chi b’aanumank

• Kanab’eb’ li kok’al chixsik’b’aleb’ sa’eb’ li raqal a’in junjunqeb’ li eetalil malaj k’a’aq re ru kiroksi laj Jwan re xch’olob’ankil li choxahil awa’b’ejihom: Apokalipsis 21:1, 3–4, 22–27; 22:1–2. Kanab’eb’ chixsik’b’al ru jun li jalam-uuch malaj k’a’aq re ru nawulak raj chiruheb’ xyiib’ankil sa’ jalam-uuch. Chirix a’an naru neke’aatinak chirixeb’ lix jalam-uuch sa’ li tzoleb’aal. Waklesiheb’ xch’ool chixk’utb’al lix jalam-uucheb’ reheb’ lix junkab’al sa’ kab’l.

• Ilomaq ru sa’ komonil Apokalipsis 22:17 ut ch’olob’ naq li ixaqilb’ej li naxye “Chalqat,” a’an ajwi’ li Iglees. K’a’ru naqaj wi’ xb’oqb’aleb’ li qas qiitz’in “chi chalk” chixb’aanunkil? B’ar wankeb’ junjunq li chaab’il na’leb’ re xb’oqb’aleb’ li kristiaan “chi chalk”?

Xb’oqb’aleb’ chi tzolok sa’ kab’l

Re xtenq’ankileb’ li kok’al chixkawresinkileb’ rib’ re rilb’al ru lix Hu laj Mormon sa’ li chihab’ jun chik, kanab’eb’ chixpatz’b’al re junaq komon sa’eb’ lix junkab’al malaj re junaq ramiiweb’ naq tixwotz junaq raqal malaj junaq esil jwal nawulak chiru sa’ lix Hu laj Mormon.

Xchaab’ilob’resinkil li qak’utum

K’ut chiruheb’ li kok’al naq te’xtz’iib’aheb’ li na’leb’ neke’xk’ul. Wi eb’ li kok’al neke’xtzol xtz’iib’ankil li na’leb’ neke’xk’ul, te’tenq’aaq xb’aan a’an chixnawb’al ru ut chixtaaqenkil li Musiq’ej. Re naq te’xtz’iib’a li na’leb’ neke’xk’ul, eb’ li kok’al naru neke’xjuch’ li raqal sa’eb’ li loq’laj hu malaj naru neke’xtz’iib’a kok’ na’leb’ sa’eb’ lix hu. (Chi’ilmanq Li k’utuk jo’ li Kolonel, 30.)