li k’uula’al Jesus sa’ xwa’leb’aal li xul

Sa’ xna’ajeb’ li xul, xb’aan laj Dan Burr

16–22 diciembre

Li Ralankil

“Tinye eere jun chaab’il esilal, ut a’an jun xnimal sahil ch’oolej”

Li ch’ol a’in a’an jun li hoonal re xtenq’ankileb’ li kok’al nakatzoleb’ chixninq’ehinkil lix yo’lajik, lix yu’am, ut lix k’anjel li Kolonel chiruheb’ lix kutankil li Ralankil. Naq yooqat chixkawresinkil aawib’ re k’utuk, wanq a’in sa’ laa k’a’uxl.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’ut li jalam-uuch wan sa’ li tusleb’ aatin re li xamaan a’in re Kim, Taaqehin—Choq’ reheb’ li komon ut li junkab’al, ut kanab’eb’ li kok’al chixwotzb’al li neke’xnaw chirix lix yo’lajik li Kolonel.

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Mateo 2:1–12; Lukas 2:1–14

Li Jesukristo kik’ulun sa’ ruchich’och’ jo’ jun k’uula’al.

Li resilal lix yo’lajik li Jesukristo nawulak chiruheb’ li kok’al. K’a’ruheb’ li yaalil tzol’leb’ nakawil laa’at sa’ li esil a’an li nakaweek’a naq tento te’xtaw ru li kok’al?

Kok’ k’anjel naru chi b’aanumank

• Il ru Lukas 2:1–14 choq’ reheb’ li kok’al, malaj re xch’olob’ankileb’ li kik’ulman sa’eb’ li raqal a’an, il sa’ li “Ch’ol 5: Nayo’la li Jesukristo,” Eb’ li Esilal sa’ li Ak’ Chaq’rab’, 13–15, malaj li video sa’ LDS.org. Kanab’eb’ li kok’al chixyiib’ankileb’ xjalam-uucheb’ li hoonal a’an ut chiroksinkileb’ re naq a’aneb’ ajwi’ te’xseraq’i li esil. K’a’ut naq na’saho’ aach’ool xb’aan naq li Jesus kik’ulun sa’ ruchich’och’ jo’ jun k’uula’al?

• Patz’ reheb’ li kok’al naq te’xseraq’i aawe li esil naq eb’ laj q’e ke’xtaaqe li chahim re xtawb’al li Jesus. Wi neke’raj ru naq taajultikamanq li esil reheb’, chi’ilmanq Mateo 2:1–12 malaj “Ch’ol 7: Eb’ aj q’e,” Eb’ li Esilal sa’ li Ak’ Chaq’rab’, 18, malaj li video sa’ LDS.org. Muq jun xjalam-uuch li Jesus sa’ li tzoleb’aal. Yiib’ xjalam-uuch malaj set jun li chahim ut chap chi kutankil. Kanab’eb’ li kok’al chixk’oxlankil naq a’aneb’ laj q’e li neke’k’amok maatan, ut k’ameb’ xb’e sa’ li tzoleb’aal re xtawb’al li Jesus. B’ar wankeb’ junjunq reheb’ li maatan naru naqak’e re li Jesus sa’ li qayu’am anajwan?

• B’ichaheb’ junjunq li b’ich re Ralankil rik’ineb’ li kok’al, jo’ “Sahaq eech’ool, li Qaawa’ xchal” ut “Santil q’ojyin” (Eb’ li B’ich, ajl 123, 127) malaj “Sa’ choxa xlemtz’un taq’a,” “Sa’ xwa’leb’aal xul” ut “Ab’i, k’uula’al” (B’ichleb’aal choq’ reheb’ li Kok’al, 24, 26–27, 30).

Jwan 3:16

Sa’ xk’ab’a’ li Jesukristo naru ninwan wi’chik rik’in lin Choxahil Yuwa’ sa’ jun kutan.

Ma neke’xtaw ru li kok’al nakatzoleb’ k’a’ut naq li Jesukristo kichal sa’ li ruchich’och’? K’e aahoonal re xk’oxlankil k’a’ru xb’aanuhom li Kolonel choq’ aawe ut chan ru naru nakatenq’aheb’ li kok’al chixtawb’al ru li xb’aanuhom a’an choq’ reheb’.

Kok’ k’anjel naru chi b’aanumank

• K’am jun li maatan chi lanb’il sa’ li tzoleb’aal rik’in jun xjalam-uuch li Jesukristo chi sa’. K’e jun reetalil li maatan li tixye “Jwan 3:16“ ut ye reheb’ li kok’al naq a’an li tenq’ re xnawb’al k’a’ru li maatan. Il ru Jwan 3:16 rik’ineb’ li kok’al ut kanab’eb’ chixq’ehinkil k’a’ru li maatan ut chixteeb’al. K’a’ut naq li Dios kixtaqla chaq qe li Ralal?

• Sik’eb’ ru jalam-uuch sa’ Libro de obras de arte del Evangelio (jo’eb’ li ajl 1, 30, 35–66, 84) li neke’xk’utb’esi junjunq chan ru naq li Jesus kirosob’tesiheb’ li kristiaan naq kiwan sa’ li ruchichoch’. Kanab’eb’ li kok’al chixchapb’al li jalam-uuch naq yooqat chixseraq’inkil li seraq’. Naru nakasik’eb’ ru li jalam-uuch neke’xk’ul rib’ rik’ineb’ li raatinul li b’ich “Kixtaqla li Ralal” ut “Ye we resil li Jesus” (B’ichleb’aal choq’ reheb’ li Kok’al, 20–21, 36) ut kanab’eb’ li kok’al chixchapb’aleb’ li jalam-uuch naq te’xb’icha li b’ich.

• Kanab’eb’ li kok’al chixwotzb’aleb’ li esil jwal neke’wulak chiruheb’ chirix li Jesus. Chirix naq xseraq’iman li esil, tenq’aheb’ li kok’al chixtz’aqob’resinkil li ch’ol aatin: “Li Jesukristo kichal sa’ li ruchich’och’ chi .” Chirix a’an k’uteb’ jalam-uuch neke’xk’ul rib’ rik’in lix mayej re xtojb’al rix li maak, lix kamik, ut lix waklijik chi yo’yo li Kolonel (chi’ilmanq Libro de obras de arte del Evangelio, ajl 56, 57, 58, 59) ut aatinan chirixeb’ li ke’k’ulman. Ch’olob’ xyaalal naq li Jesukristo kichal sa’ li ruchich’och’ re kamk choq’ qe ut re naq taawakliiq chi yo’yo re naq tooruuq chi q’ajk rik’in li qaChoxahil Yuwa’.

  li Jesus chi wiq’wo sa’ li Awimq Getsemani

  Getsemani, xb’aan laj J. Kirk Richards

reetalil li k’utuk

Xk’utb’al li tzol’leb’

Kok’al ak ninqeb’

Mateo 1:18–25; 2:1–12; Lukas 1:26–38; 2:1–20

Li Jesukristo kik’ulun sa’ ruchich’och’ jo’ jun k’uula’al.

Chan ru naru nakatenq’aheb’ li kok’al chixjayalinkileb’ rib’ rik’in li Jesukristo sa’ li Ralankil a’in?

Kok’ k’anjel naru chi b’aanumank

• Kanab’ jun reheb’ li ch’ina al chirilb’al ru li kik’ulman naq kiyo’la li Kolonel sa’ Mateo 1:18–25; 2:1–12; Lukas 1:26–38; 2:1–20. Kanab’eb’ xkomoneb’ li kok’al chixk’eeb’al xhoonaleb’ chixyiib’ankileb’ xjalam-uuch li neke’xch’olob’ li loq’laj hu sa’ li pizarron. K’a’ru neke’xk’ut chiqu li seraq’ a’an chirix li Jesukristo?

• K’ut li video “Nuevas de gran gozo: El nacimiento de Jesucristo” (LDS.org). Kanab’eb’ li kok’al chixtz’iib’ankil chixjunil li te’rab’i li taatenq’anq reheb’ chixjayalinkileb’ rib’ rik’in li Jesukristo chiru xq’ehil li Ralankil. Chirix li video, kanab’eb’ chixwotzb’al li xe’xtz’iib’a.

• Kanab’eb’ li kok’al chixtz’iib’ankil chiru k’iila kok’ hu li naru neke’xb’aanu li te’tenq’anq reheb’ chixjayalinkil rib’eb’ rik’in li Kolonel chiru lix kutankileb’ li Ralankil. K’eheb’ lix hu sa’ b’oolx malaj sa’ k’a’ruhaq chik re te’xk’am sa’ rochocheb’. Sa’ xyanqeb’ li na’leb’ naru neke’ok rilb’aleb’ ru li loq’laj hu, xb’ichankileb’ b’ich re Ralankil, ut xb’aanunkileb’ kok’ k’anjel re rahok.

• B’ichahomaqeb’ li b’ich re Ralankil chirix li Kolonel (che’ilmanq B’ichleb’aal choq’ reheb’ li Kok’al, 20–33; Eb’ li B’ich, ajl 123–134), ut kanab’eb’ li kok’al chixwotzb’al li ch’ol aatin jwal nawulak chiruheb’ sa’ li b’ich.

Jwan 3:16

Sa’ xk’ab’a’ li Jesukristo naru ninwan wi’chik rik’in lin Choxahil Yuwa’ sa’ jun kutan.

Chan ru naru nakatenq’aheb’ li kok’al chixnumsinkil wi’chik li xe’xtzol chiru li chihab’ a’in ut chixtawb’al ru k’a’ut naq neke’raj ru li Jesukristo sa’ lix yu’ameb’?

Kok’ k’anjel naru chi b’aanumank

• Tz’iib’a Ani li Jesukristo? chiru jun li hu ut K’a’ut naq kichal sa’ li ruchich’och’? chiru jun chik li hu; chirix a’an k’eheb’ li hu sa’ jalan jalanq na’ajej sa’ li tzoleb’aal. Kanab’eb’ li junjunq chi kok’al chirilb’al ru jun reheb’ li raqal a’in sa’eb’ li loq’laj hu: Mateo 16:15–16; Jwan 3:16; 1 Nefi 10:4; Mosiah 3:8; Alma 7:10–13; 3 Nefi 27:14–15. Kanab’eb’ li kok’al chixsik’b’al xsumenkileb’ li wiib’ chi patz’om wankeb’ sa’ li tzoleb’aal sa’eb’ li raqal te’ril ru. Kanab’eb’ chixtz’iib’ankil lix sumehomeb’ chiruheb’ perel hu ut chixletzb’aleb’ chixk’atq li patz’om. Chan ru naru naqak’ut li qab’antioxihom xb’aan lix b’aanuhom li Jesukristo choq’ qe?

• Kanab’eb’ li kok’al chixyiib’ankil jun xtusulaleb’ li k’ab’a’ej malaj li nak’ab’a’in wi’ li Jesus li naru neke’jultiko’ reheb’ sa’ li pizarron (chi’ilmanq li K’utul Raqal reheb’ li Loq’laj Hu, “Jesukristo”). K’a’ru neke’xk’ut chiqu li k’a’b’a’ej a’an chirix li Jesukristo ut lix k’anjel? K’a’ut naq naqaj ru li Jesukristo sa’ li qayu’am? Re xtenq’ankileb’ chixsumenkil li patz’om a’an, k’ut li video “Por qué necesitamos un Salvador—Un mensaje de Navidad acerca de nuestro Salvador Jesucristo” (LDS.org).

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixtawb’al us ta yal jun ajwi’ chan ru naru neke’k’anjelak chiru anihaq malaj chan ru naru neke’nach’o’k rik’in li Jesukristo sa’ li Ralankil a’in.

Xchaab’ilob’resinkil li qak’utum

Li kok’al nawulak chiruheb’ xwotzb’al li yookeb’ chixtzolb’al. Jo’eb’ ajwi’ li kok’al toj ka’ch’ineb’ xyu’am naru neke’xkawob’resi li komon sa’eb’ lix junkab’al. Waklesiheb’ xch’ool li kok’al nakatzoleb’ chixwotzb’al rik’ineb’ lix junkab’al k’a’ruhaq xe’xtzol sa’ li Tzoleb’aal choq’ reheb’ li Kok’al. (Chi’ilmanq Li k’utuk jo’ li Kolonel 30.)

perel re kok’ k’anjel: li Jesukristo kik’ulun sa’ ruchich’och’ jo’ jun k’uula’al