Tz’aqal rahok, xb’aan laj Del Parson

2–8 diciembre

1–3 jwan; Judas

“Li Dios a’an rahok”

Eb’ lix hu laj Jwan ut laj Judas neke’k’utuk chirix lix rahom ut lix saqen li qaChoxahil Yuwa’. Naq tattzoloq chiru li xamaan a’in, k’oxla k’a’ut naq eb’ li kok’al nakatzoleb’ neke’raj ru lix saqen ut lix rahom li qaChoxahil Yuwa’ sa’ lix yu’ameb’. Chak’oxla roksinkileb’ chixjunil li kok’ k’anjel re li tusleb’ aatin a’in, ut ink’a’ ka’ajwi’ li wankeb’ rub’el li ch’uut nakatzoleb’ laa’at.

Xtz’iib’ankil li nakak’oxla

Xkanab’ankileb’ chi wotzok

Kanab’eb’ li kok’al chixwotzb’al chan ru neke’reek’a xrahom li qaChoxahil Yuwa’ malaj k’a’ut neke’xk’oxla naq li qaChoxahil Yuwa’ a’an chanchan jun li saqen.

Xk’utb’al li tzol’leb’

Kok’al toj ka’ch’ineb’ xyu’am

1 Jwan 1:5–7; 2:8–11

Xtaaqenkil li Jesukristo naxk’e xsaqenkil lin yu’am.

Chan ru naru nakatxtenq’a xjuntaq’eetinkil li saqen rik’in li q’ojyin re xk’utb’al chiruheb’ li kok’al chirix li saqen naxk’e li qaChoxahil Yuwa’ sa’ lix yu’ameb’ a’an?

Kok’ k’anjel naru chi b’aanumank

• Kanab’eb’ li kok’al chixyeeb’aleb’ k’a’aq re ru neke’xk’e saqen. Tenq’aheb’ chixtawb’al ru lix chaab’ilal li saqen, jo’ xtenq’ankileb’ li che’ chi k’iik, qatenq’ankil chi ilok ,ut xk’eeb’al qatiqwal. Kanab’eb’ li kok’al chixk’eeb’al xhoonaleb’ chixkutanob’resinkil ru jun xjalam-uuch li Jesukristo rik’in jun pook rajlal sut naq te’xye “Li Dios a’an li saqen” (1 Jwan 1:5). Ch’olob’ xyaalal naq li qaChoxahil Yuwa’ ut li Jesukristo naru neke’xk’e xsaqenkil li qayu’am naq naqapaab’eb’ lix taqlahom.

• Kanab’ sa’ q’ojyin li tzoleb’aal ut kanab’eb’ li kok’al chixyeeb’al chan ru naru nak’ame’ li saqen sa’ li tzoleb’aal. Tenq’aheb’ chixk’oxlankil chan ru naru naqak’am lix saqen li Jesukristo sa’ li qayu’am. Naq yooqeb’ chixyeeb’al lix sumenkil, loch li saqen malaj teheb’ li rokeb’aal li saqen re naq li saqen taa’ok chi timil timil sa’ li tzoleb’aal.

1 Jwan 4:10–11, 20–21

Nink’ut lin rahom choq’ re li Dios naq nink’ut lin rahom choq’ reheb’ li was wiitz’in.

Tenq’aheb’ li kok’al chirilb’al chan ru neke’xk’am rib’ li rahom neke’reek’a choq’ re li qaChoxahil Yuwa’ ut li rahom neke’xk’ut choq’ reheb’ li ralal xk’ajol a’an.

Kok’ k’anjel naru chi b’aanumank

• Il ru 1 Jwan 4:11 choq’ reheb’ li kok’al ut b’ichahomaq jun li b’ich li na’aatinak chirix lix rahom li Dios, jo’ “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 6–17). Kanab’eb’ junjunq li kok’al chixwotzb’al chan ru neke’xnaw naq neke’rahe’ xb’aan li qaChoxahil Yuwa’. Chirix li junjunq chi sumenk, kanab’eb’ li kok’al chixq’alunkileb’ rib’ ut chixyeeb’al: “Li Dios a’an rahok ut li Dios nikinixra.”

• Il ru 1 Jwan 4:21 choq’ reheb’ li kok’al. Kanab’eb’ chixwotzb’al malaj chixk’utb’esinkil jalan jalanq xk’utb’al qarahom choq’ re junaq qamiiw, jo’ xk’eeb’al junaq xq’alunkil malaj xyiib’ankil junaq li ch’ina utz’u’ujinb’il hu. K’a’ru naxk’e chireek’aheb’ li qamiiw li k’a’aq re ru a’an? K’a’ru nareek’a li qaChoxahil Yuwa’ naq naqab’aanuheb’ a’an choq’ reheb’ li qas qiitz’in?

1 Jwan 2:3–5; 5:3

Nink’ut lin rahom choq’ re li Dios naq ninpaab’eb’ lix taqlahom.

Eb’ li kok’al naru neke’xtzol naq toj kok’eb’ chaq naq eb’ lix “taqlahom li Dios, moko aaleb’ ta” ut naq wi naqapaab’eb’, naqak’ut li qarahom choq’ re a’an.

Kok’ k’anjel naru chi b’aanumank

• Il ru 1 Jwan 5:3 ut kanab’eb’ li kok’al chi ab’ink re te’xk’e reetal k’a’ru naxye li raqal a’an chirix chan ru naru naqak’ut naq naqara li Dios. Kanab’eb’ li kok’al chixyeeb’aleb’ yal ta jarub’ li taqlahom te’ruuq chixyeeb’al. K’a’ru nareek’a li qaChoxahil Yuwa’ naq naqapaab’eb’ lix taqlahom?

• Kanab’eb’ li kok’al chixyiib’ankil jun jalam-uuch li naxk’ut chan ru naru neke’xk’ut lix rahom choq’ re li qaChoxahil Yuwa’. Qayehaq, naru neke’xyiib’ jun xjalam-uucheb’ a’an naq yookeb’ chixpaab’ankil jun reheb’ li taqlahom. B’ichahomaq sa’ komonil jun li b’ich na’aatinak chirix li paab’ank, jo’ “Tinsik’ ru li us” (B’ichleb’aal choq’ reheb’ li Kok’al, 82–83). K’a’ru naqeek’a naq noko’ab’in?

Xk’utb’al li tzol’leb’

Kok’al ak ninqeb’

1 Jwan 2:8–11; 4:7–8, 20–21

Nink’ut lin rahom choq’ re li Dios naq nink’ut lin rahom choq’ reheb’ li was wiitz’in.

Chan ru naru nakatenq’aheb’ li kok’al chixtawb’al ru naq xraab’al li Dios a’an ajwi’ xraab’aleb’ li wankeb’ chiqasutam, jo’kan ajwi’ li jalaneb’ chiqu laa’o malaj li ch’a’aj xraab’aleb’?

Kok’ k’anjel naru chi b’aanumank

• Kanab’eb’ li kok’al chixk’oxlankil naq jun li kristiaan toj ak’ x’ok chi wulak sa’ li tzoleb’aal malaj sa’ li teep ut toj maa’ani naxnaw ru sa’ li na’ajej a’an. K’a’ raj ru taareek’a li kristiaan a’an? Kanab’ jun li ch’ina al chirilb’al ru 1 wan 4:7–8. K’a’ru naxye li raqal a’an chirix chan ru tento toowanq rik’in li kristiaan a’an? Wotz resileb’ hoonal chanchaneb’ ajwi’ a’an malaj kanab’eb’ li kok’al chixk’oxlankileb’ hoonal b’ar wi’ te’wanq raj xhoonaleb’ re xk’utb’al xrahomeb’.

• Kanab’eb’ li kok’al chirilb’al ru 1 Jwan 4:7–8, 20–21, ut kanab’eb’ chixtz’iib’ankil jun li ch’ol aatin li naxk’os ru li neke’xk’oxla naq a’an jun na’leb’ aajel ru sa’eb’ li raqal a’an. Naq ak xe’xwotz li ch’ol aatin xe’xtz’iib’a, naru nakaseraq’i reheb’ li esil chirix li xChy Johnson sa’ li raatin li Hermano David L. Beck, “Tu sagrado deber de ministrar” (Liahona, mayo 2013, 55). Chan ru naq eb’ li kok’al naru neke’xtaaqe lix b’aanuhomeb’ li saaj sa’ li seraq’ a’an li ke’xk’ut xrahom choq’ re xChy? Kanab’eb’ li kok’al chixwotzb’al jalaneb’ chik na’leb’ re chan ru naru neke’xk’ut xrahomeb’ choq’ reheb’ li wankeb’ chixsutameb’.

1 wan 2:3–6; 4:17–18; 5:2–5

Nink’ut lin rahom choq’ re li Dios naq ninpaab’eb’ lix taqlahom.

Xpaab’ankileb’ li taqlahom moko ch’a’ajaq ta naq naqataweb’ ru li yaal neke’k’utman sa’ 1 Jwan 5:3. Chan ru naru nakatenq’aheb’ li kok’al chirilb’aleb’ li taqlahom jo’ moko iiq ta, jo’ b’an hoonal re xk’utb’al lix rahomeb’ choq’ re li Dios?

Kok’ k’anjel naru chi b’aanumank

• Kanab’eb’ li kok’al chixyiib’ankil jun xtusulal sa’ li pizarron chan ru naru neke’xk’ut chiru li Dios naq neke’xra. Chirix a’an ilomaq ru sa’ komonil 1 Jwan 2:5–6; 5:2–5 re xtawb’al xkomoneb’ eena’leb’. Chan ru naq xpaab’ankileb’ li taqlahom naxk’ut naq naqara li qaChoxahil Yuwa’?

  

  Us ta ch’a’aj, naru naqsik’ ru xpaab’ankileb’ li taqlahom.

• Il ru 1 Jwan 4:17, ut ch’olob’ chiruheb’ li kok’al “naq kawaq qach’ool sa’ xkutankil li raqb’a-aatin” naraj naxye reek’ankil tuqtuukilal naq wanqeb’ chiru li Dios re naq te’raqe’q aatin chirixeb’. K’a’ru naxk’ut li raqal a’an naq tento taqab’aanu re naq kawaq li qach’ool? B’ar wan junjunqeb’ li k’a’aq re ru naru neke’qab’aanu chalen anajwan re naq kawaq qach’ool chiru li Dios?

Judas 1:18–22

Naru ninwan chi tiik inpaab’aal us ta nikine’reetz’u li was wiitz’in.

Eb’ li kok’al maare chan naq te’majewaaq xb’aan lix paab’aaleb’ malaj xb’aan chan ru neke’wan jo’ xtzolom li Jesukristo. Sa’eb’ li raqal a’an wankeb’ li na’leb’ kixk’e laj Judas chirix chan ru wank chi tiik aapaab’aal sa’eb’ li hoonal a’an.

Kok’ k’anjel naru chi b’aanumank

• Kanab’eb’ li kok’al chixwotzb’al resilal xk’ulumeb’ b’ar wi’ xe’eetz’uuk xb’aan anihaq xb’aan xb’aanunkil li us. Kanab’eb’ li kok’al chirilb’al ru Judas 1:18–22 re xsik’b’al chan ru naru nokowan chi tiik chi paab’ank naq nokomajewaak malaj naq anihaq nokoreetz’u. Tz’iib’a li te’xtaw sa’ li pizarron ut aatinanqex chirix chan ru naru neke’taaqeman li na’leb’ a’an.

• Re xk’osb’al ru lix matk’ laj Lehi (chi’ilmanq 1 Nefi 8:1–35), kanab’eb’ li kok’al chirilb’al junjunqeb’ li raqal sa’ 1 Nefi 8:26–28, 33. K’oxlahomaq chan ru naq eb’ li kristiaan li wankeb’ sa’ li kab’l nim ut paapo xsa’ chanchaneb’ li neke’eetz’un li ki’aatinak wi’ laj Judas. K’a’ru naru naqab’aanu re naq ink’a’ taqak’e qaxik chirab’inkileb’ li neke’eetz’un qe malaj li ink’a’ neke’k’ulub’an re li naqapaab’? (chi’ilmanq 1 Nefi 8:30, 33).

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixyiib’ankil jun xk’uub’anb’il na’leb’ re xb’aanunkil k’a’ruhaq re xwotzb’al lix saqeneb’ rik’in lix junkab’aleb’.

Xchaab’ilob’resinkil li qak’utum

Eb’ li kok’al aj ajeb’ ru. Maare wan naq taaweek’a naq lix ajikeb’ ru li kok’al a’anaq jun ramleb’ re te’tzoloq. A’b’anan, naru nakawoksi lix ajikeb’ ru ut xkanab’ankileb’ chixb’aanunkil junaq k’utb’esink malaj xjalam-uuch junaq li na’leb’ re li evangelio, malaj chixb’ichankil junaq li b’ich na’aatinak chirix li evangelio. (Chi’ilmanq Li k’utuk jo’ li Kolonel, 25–26.)