“2–8 diciembre. 1–3 Jwan; Judas: “Li Dios a’an rahok” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“2–8 diciembre. 1–3 Jwan; Judas,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019
Li tz’aqal rahok, xb’aan laj Del Parson
2–8 diciembre
1–3 Jwan; Judas
“Li Dios a’an rahok”
Naq nakawileb’ lix hu laj Jwan ut laj Judas, sik’ li musiq’anb’il na’leb’ chirix chan ru naq tatruuq chixk’utb’al aarahom choq’ re li Dios. Tz’iib’aheb’ li musiq’anb’il na’leb’ a’an, ut b’aanuheb’.
Xtz’iib’ankil li nakak’oxla
Naq laj Jwan ut laj Judas ke’xtz’iib’aheb’ lix hu, li q’etok paab’ank li yeeb’il chaq resil chi junxilaj ak yoo chi k’ulmank, xb’aan li nimla rahob’tesiik jo’ ajwi’ li po’b’il tzol’leb’. Ke’wan b’alaq’il aj tzolonel li ke’xye naq maare moko yaal ta naq kichal li Jesukristo “sa’ li tz’ejwalej” (jo’ jun eetalil, chi’ilmanq 1 Jwan 4:1–3; 2 Jwan 1:7). Jo’kan naq li apostol aj Jwan kixtikib’ li xb’een lix taqlanb’il hu rik’in xyeeb’al resil li kiril chirix li Kolonel: “A’in li naqak’ut xyaalal, li kiwan chalen chaq sa’ xtiklajik, li qab’ihom, li qilom rik’in li qu, li xqaka’ya ut xqach’e’ rik’ineb’ li quq’, li Aatin re li yu’am” (JJS, 1 Jwan 1:1 ). A’ut maare li esil q’axal nim xwankil sa’eb’ lix hu laj Jwan a’an li rahok: lix rahom li Dios choq’ qe, ut li rahok li tento taawanq qe choq’ re a’an ut choq’ reheb’ chixjunil li ralal xk’ajol. Naqak’e reetal naq laj Jwan ajwi’ kixk’ul lix rahom li Kolonel (chi’ilmanq Jwan 13:23; 20:2), ut kiraj naq eb’ laj santil paab’anel te’reek’a ajwi’ li rahok a’an sa’ li ch’a’ajkilal ut li rahob’tesiik wankeb’ wi’, xb’aan naq kixye, “naq wank li rahok, maak’a’ li xiw. Li tz’aqal rahok narisi li xiw” (1 Jwan 4:18).
Li na’leb’ re xtzolb’aleb’ li loq’laj hu aajunes.
Li Dios a’an li saqenk, ut li Dios a’an rahok.
Wi ta taasik’ jun malaj wiib’ aatin re xch’olob’ankil xyaalal li Dios, k’a’ raj ru li aatin a’an? Sa’eb’ lix hu, laj Jwan kiroksiheb’ li aatin “saqenk” ut “rahok” 1 Jwan 1:5; 4:8, 16). Naq yookat chirilb’al ru 1 Jwan, k’oxla li k’a’aq re ru kixk’ul laj Jwan jo’ tz’iib’anb’il sa’ li evangelio xb’aan laj Jwan, ut k’oxla chan ru naq rik’in xk’ulb’al li k’a’aq re ru a’in laj Jwan kitzolok chirix lix saqenkil ut lix rahom li Dios. K’a’ru li xak’ul laa’at li xk’ut chawu naq li Dios a’an saqenk ut rahok?
Chi’ilmanq ajwi’ Jwan 3:16–21; 15:9–17; 2 Nefi 26:24; Tzol’leb’ ut Sumwank 50:24; 88:6, 12–13; 93:36–37.
Naru ninwan jo’ li Jesukristo.
Ma chanchan q’axal ch’a’aj choq’ aawe li jayalihom re wank jo’ li Kristo? K’oxla li raatin laj Jwan re xwaklesinkil aach’ool: “Ex inkok’al, chexwanq rik’in li Kristo chi junelik re naq, jo’q’e tixk’ut rib’, chiwanq xkawub’ qach’ool ... ut jo’q’e taak’utunq a’an, chanchanaqo ajwi’ li Dios” (1 Jwan 2:28; 3:2). K’a’ru nakataw sa’ 1 Jwan 2:24–3:3 li naxk’e xkawil aach’ool ut naxk’ojob’ aach’ool jo’ xtzolom li Jesukristo? Naq nakatzoleb’ lix hu laj Jwan, sik’eb’ chik li na’leb’ malaj aatin li te’tenq’anq aawe sa’ xyalb’al aaq’e chi wank jo’ li Kristo.
Chi’ilmanq ajwi’ Moroni 7:48; Tzol’leb’ ut Sumwank 88:67–68; “Winq: Winq, naru chi wank jo’ lix Choxahil Yuwa’,” sa’ li K’utul Raqal reheb’ li Loq’laj Hu.
Ma yaal naq “Li Dios maajun sut ki’ile’ xb’aan anihaq”?
JJS, 1 Jwan 4:12, natawman naq “maajun winq x’ilok re li Dios jun sutaq, ka’ajeb’ wi’ li neke’paab’an“ (sa’ 1 Jwan 4:12; chi’ilmanq ajwi’ Jwan 6:46; 3 Jwan 1:11). Eb’ li loq’laj hu neke’xye resil junjunq sut naq li Dios Yuwa’b’ej kixk’ut rib’ chiru anihaq li tiik chi paab’ank, ut chiru ajwi’ laj Jwan (chi’ilmanq Apokalipsis 4; chi’ilmanq ajwi’ Hechos 7:55–56; 1 Nefi 1:8; Tzol’leb’ ut Sumwank 76:23; Jose Smith—Resilal 1:16–17).
Naq nink’anjela lin paab’aal chirix li Jesukristo ut ninyo’la wi’chik, naru ninq’ax ru li ruchich’och’.
Li na’leb’ chirix xq’axb’al ru li ruchich’och’ nak’utun junjunq sut sa’ lix tz’iib’ahom laj Jwan. Laj Jwan kixtz’iib’a li raatin li Jesus: “Sa’ li ruchich’och’ teek’ul li rahilal, a’b’anan kawaq eech’ool! Laa’in xinq’ax ru xwankil li ruuchich’och’ ” (Jwan 16:33). Ut sa’ Apokalipsis 2–3, laj Jwan kixtz’iib’a resil lix yeechi’ihom li Qaawa’ choq’ reheb’ li te’xq’ax ru li ruchich’och’. K’a’ru kixye laj Jwan chirix xq’axb’al ru li ruchich’och’ sa’ 1 Jwan 5:3–5? Naq nakawil ru 1 Jwan 5, sik’ li k’a’ru tento taqab’aanu re xq’axb’al ru li ruchich’och’ ut xk’ulb’al li junelik yu’am. K’a’ru xyaalalil xq’axb’al ru li ruchich’och’ sa’ laa yu’am? Naru taataw xsumenkil li patz’om a’in, ut xkomon chik li na’leb’, sa’ li raatin li Elder Neil L. Andersen, “Numtaak sa’ xb’een li ruchich’och’,” (Jolomil ch’utub’aj-ib’ re abril 2017).
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Re xtenq’ankileb’ li wankeb’ sa’ laa junkab’al chixk’oxlankil lix k’utum laj Jwan, ch’utub’omaq eerib’ sa’ jun warib’aal chi chupchu li saqen, ut kanab’eb’ li komon chireek’ankil chan ru li “b’eek sa’ q’ojyin” chiru li “b’eek sa’ saqen.” Chan ru naq li xik’ ilok nokoxk’e chi b’eek sa’ q’ojyin ut chi tichk’ok? Chan ru naq xraab’al qib’ chiqib’il qib’ naxk’am chaq li saqenk sa’ li qayu’am?
K’a’ru wan sa’eb’ li raqal a’in li naxnimob’resi lix “kawub’ qach’ool” chirix li Dios, ut chirix naq nokoru chixk’ulb’al xsumenkil li qatij? Naru ajwi’ texsik’oq sa’ “Tijok” sa’ li K’utul Raqal reheb’ li Loq’laj Hu.
Ma wankeb’ li taqlahom li “aaleb’,” malaj ch’a’aj xpaab’ankil? Chan ru naq li qarahom choq’ re li Dios naxjal li k’a’ru naqeek’a chirixeb’ lix taqlahom?
Naq naqapaab’eb’ lix taqlahom li Dios, nokoxtenq’a chixq’axb’al ru li ruchich’och’.
Ma wankeb’ li musiq’ejil rahilal li “xe’xch’ik rib’ ” sa’ li qayu’am ut sa’ li qajunkab’al? (Judas 1:4). Chan ru naru taqataaqe li raatin laj Judas naq “taqayal qaq’e chixkolb’al rix li paab’aal” ut taqayal qu rik’ineb’ li rahilal a’in? (Judas 1:3). K’a’ru naru taqab’aanu re naq “taawanq qik’in li uxtaanal, li tuqtuukilal, ut li rahok chi numtajenaq” sa’ li qajunkab’al? (Judas 1:2).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Xtawb’al lix rahom li Dios. Li Elder M. Russell Ballard kixye, “Li evangelio a’an jun evangelio re rahok—rahok choq’ re li Dios ut choq’ re li qas qiitz’in” (“El amor de Dios y sus creaciones,” Liahona, julio 1988, 58). Naq nakawileb’ ru li loq’laj hu, k’oxla xk’utb’al malaj reetalinkileb’ li aatin ut li ch’ol aatin li neke’xk’ut xyaalal lix rahom li Dios.
B’ehen wochb’een, xb’aan laj Greg K. Olsen