“30 septiembre–13 octubre. Efesios: “Re xtz’aqob’resinkileb’ ru laj santil paab’anel” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“30 septiembre–13 octubre. Efesios,” Kim, Taaqehin—Choq’ reheb’ li komon ut li junkab’al: 2019
30 septiembre–13 octubre
Efesios
“Re xtz’aqob’resinkileb’ ru laj santil paab’anel”
Ma nakawil chan ru naq lix hu laj Pablo reheb’ laj Efesio na’aatinak chirix li aatin na’ab’iman sa’ li jolomil ch’utub’aj-ib’?
Xtz’iib’ankil li nakak’oxla
Naq kiwulak li evangelio aran Efeso, “maaka’ch’in li mululij-ib’ ” (Hechos 19:23) kiwan sa’ xyanqeb’ laj Efesio. Eb’ laj yiib’anel ch’iich’ li neke’yiib’ank re kok’ ochoch ch’iich’ choq’ re jun pak’b’il dios ke’xk’oxla naq xb’aan li Kristianil te’oso’q lix trab’aaj, ut sa’ junpaat “k’a’jo’ naq ke’josq’o’k, ... ut li tenamit q’axal ke’xtzukle rib’ lix k’a’uxleb’ ” (chi’ilmanq Hechos 19:27–29). K’oxla chan ru li wank jo’ ak’ aj paab’anel sa’ li evangelio naq yoo chi k’ulmank a’an. Naab’aleb’ laj Efesio ke’xk’ul ut ke’xyu’ami li evangelio sa’ xyi li “mululij-ib’ ” a’in (Hechos 19:40), ut laj Pablo kixye reheb’ naq “li Kristo a’an li qatuqtuukilal” (Efesios 2:13–14). Li aatin a’in, jo’ ajwi’ li raatin laj Pablo naq “chixjunil li k’ahink, josq’il, po’ok ch’oolej, choqink, majewank, isinb’ilaq taxaq eerik’in” (Efesios 4:31) toj wankeb’ xwankil sa’ li kutan a’in, jo’ chanru ajwi’ sa’ najter kutan. Choq’ reheb’ laj Efesio, jo’ ajwi’ choq’ aawe laa’at, li wankilal re xyalb’al aawu rik’in li maa’usilal nachal rik’in “lix nimal xwankil li Qaawa’ ” (Efesios 6:10–13).
Li na’leb’ re xtzolb’aleb’ li loq’laj hu aajunes
Ma “kixsik’ ru” malaj kixxaqab’ li Dios chi junxilaj junjunq reheb’ li ralal xk’ajol re te’kole’q?
Laj Pablo ki’aatinak chirix naq eb’ laj santil paab’anel “sik’b’ileb’ ru chi junxilaj jo’ chanru ki’alaak sa’ xch’ool li Dios ... rub’elaj xk’ojlajik li ruchich’och’,” re te’wanq choq’ xtenamit. Jo’ kixye li Awa’b’ej Henry B. Eyring, wanjenaq xk’ihaleb’ li kristiaan li ke’wan xyu’am ut ke’kam chi ink’a’ ke’rab’i li evangelio, ut maare wankeb’ li te’yehoq re “naq li Dios ak xye chi junxilaj aniheb’ li tixkol ut kixtaqla li evangelio choq’ reheb’, ut naq li jun siireb’ chik li ink’a’ xe’rab’i maawa’eb’ li “sik’b’ileb’ ru.” A’ut ... lix na’leb’ li Dios jwal nim wi’chik xrahom ut xtiikilal. Li qaYuwa’ naraj xch’utub’ankil ut rosob’tesinkil chixjunil lix junkab’al” (“Xch’utub’ankil lix junkab’al li Dios,” Jolomil ch’utub’aj-ib’ re abril 2017). Chixjunileb’ li ralal xk’ajol li Dios neke’ru chixk’ulb’al li evangelio ut lix k’ojob’anb’il k’anjel, sa’ xk’ab’a’ li k’anjel nab’aanuman choq’ reheb’ li kamenaq sa’eb’ li santil ochoch.
Us ta maajun ak xaqab’anb’il re xk’ulb’al malaj re ink’a’ xk’ulb’al li kole’k, rik’in li na’leb’ k’utb’esinb’il sa’ roso’jikeb’ li kutan, nak’ute’ chiqu naq wankeb’ li “ke’k’ojob’aak chi junxilaj” naq maji’ neke’yo’la, re xb’aanunkil junaq k’anjel arin sa’ li ruchich’och’. Jun li k’anjel li wan sa’ xb’eeneb’ chixjunileb’ laj Santil Paab’anel sa’ Roso’jikeb’ li Kutan, a’an xwotzb’al li evangelio, ut xtenq’ankil chixjunileb’ li ralal xk’ajol li Dios, li yo’yo jo’ ajwi’ li kamenaq, chi chalk rik’in li Kristo. (Chi’ilmanq “K’ojob’ank chi junxilaj,” K’utul Raqal reheb’ li Loq’laj Hu.)
Li Dios “tixxaqab’ li Kristo chixjolominkil chixjunil li wank.”
Ma xak’oxla jun sutaq k’a’ru “xtz’aqlojikeb’ ru li kutan,” malaj k’a’ru xyaalal “xxaqab’ankil li Kristo chixjolominkil chixjunil li wank”? Naq yookat chixk’oxlankileb’ li ch’ol aatin a’in, il ru eb’ li raqal a’in: Efesios 4:13; 2 Nefi 30:7–8; Tzol’leb’ ut Sumwank 110:11–16; 112:30–32; 128:18–21. Maare musiq’anb’ilaqat chixtz’iib’ankil k’a’ru nakak’oxla chirixeb’ li ch’ol aatin a’in.
Li Iglees wan chi k’ojob’anb’il sa’ xb’eeneb’ li apostol ut li profeet, ut li Jesukristo wan sa’ xnimal ru pek sa’ xxuk.
Naq nakawil ru li raatin laj Pablo chirixeb’ li apostol ut li profeet, naru tatxkawresi chirab’inkil li raatineb’ li yo’yookil apostol ut profeet sa’ li jolomil ch’utub’aj-ib’. Jo’ chanru naxye sa’ Efesios 2:19–22; 4:11–16, k’a’ut naq wankeb’ qik’in li apostol ut profeet? Chan ru naq li raatineb’ a’an xate’xtenq’a re naq ink’a’ “k’amb’ilaqat xb’aan li iq’ yalaq b’ar xb’aan k’a’aq re ru chi na’leb’il”?
Chi’ilmanq ajwi’ Hechos 4:10–12.
Li Qaawa’ naxb’oqeb’ li profeet ut apostol re xjolominkil lix Iglees.
Naru ninnimob’resi li wank sa’ komonil sa’ lin junkab’al.
Naq nakawil ru Efesios 5:21–6:4, k’a’ruheb’ li na’leb’ neke’chal aawik’in chirix chan ru xnimob’resinkil li wank sa’ komonil sa’ laa junkab’al?
Aajel ru xk’eeb’al reetal naq li raatin laj Pablo sa’ Efesios 5:22 ke’tz’iib’aman jo’ chanru li na’leb’ sa’ li tenamit ut sa’ li kutan kiwan wi’. Eb’ li apostol ut li profeet sa’ li kutan a’in neke’xk’ut naq eb’ li winq moko ninqeb’ ta wi’chik xwankil chiruheb’ li ixq, ut naq li b’eelomej ut li ixaqilb’ej tento te’wanq “jo’ rochb’eeneb’ rib’ chi junaqikeb’ xwankil,” (chi’ilmanq “Li Junkab’al: Jun jek’inb’il aatin choq’ re li ruchich’och’,” LDS.org). A’ut toj wan li chaab’il na’leb’ sa’ Efesios 5:23–33, ut k’a’jo’ wi’chik wi sumsuukat, malaj wi yookat chixkawresinkil aawib’ choq’ re li sumlaak. Jo’ jun eetalil, chan ru naq li Kristo naxk’ut lix rahom choq’ reheb’ laj santil paab’anel? K’a’ru naxk’ut li na’leb’ a’in chirix chan ru naq eb’ li b’eelomej tento te’wanq rik’in li rixaqil? K’a’ru li na’leb’ nakatzol li taak’anjelaq choq’ aawe laa’at sa’eb’ li raqal a’in?
Wi nintiqib’ wib’ rik’in “chixjunil lix k’anjeleb’aal li Dios,” a’an tixkol wix chiru li maa’usilal.
Naq nakawil ru Efesios 6:10–18, k’oxla k’a’ut naq laj Pablo kixk’e xk’ab’a’ li junjunq cha’al re li kolb’a-ib’ aq’ej jo’ chanru wankeb’ aran. K’a’ru li tookole’q wi’ rik’in xtiqib’ankil qib’ rik’in “chixjunil lix k’anjeleb’aal li Dios”? K’a’ru naru nakab’aanu re xk’eeb’al chawix chi tz’aqal li junjunq cha’al re li kolb’a-ib’ aq’ej?
Chi’ilmanq ajwi’ 2 Nefi 1:23; Tzol’leb’ ut Sumwank 27:15–18.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Rik’in naq kik’ojob’aman wi’chik li evangelio sa’ roso’jikeb’ li kutan, li Dios yoo chixch’utub’ankil sa’ junajil chixjunil li k’a’aq re ru, jo’eb’ li na’leb’ ut li k’ojob’anb’il k’anjel re li evangelio. Re xk’utb’al xyaalal li na’leb’ a’in, naru taamuq sa’ laa wochoch li kok’ k’a’aq re ru, malaj kok’ hu tz’iib’anb’il wi’ li ch’ol aatin, reetalil li k’a’aq re ru k’ojob’anb’il wi’chik sa’ li kutan wanko wi’ (jo’ xlaawil li tijonelil, eb’ li k’ojob’anb’il k’anjel re li santil ochoch, eb’ li loq’laj hu, ut eb’ li musiq’ejil maatan). Eb’ li komon sa’ li junkab’al te’ruuq chixsik’b’aleb’ ut “chixch’utub’ankileb’ sa’ junajil.” K’a’ut naq naqab’antioxi li wank sa’ “xk’ojlajik li tz’aqal ru kutan”?
B’oqeb’ li komon sa’ li junkab’al chixwotzb’al jo’q’e xe’reek’a lix rahom ut li ruxtaan li Dios ut li Jesukristo, jo’ yeeb’il resil sa’eb’ li raqal a’in.
Maare te’wulaq chiru li kok’al sa’ laa junkab’al xyiib’ankileb’ li tz’ak rik’in sok, malaj k’a’aq chik re ru wan sa’ laa wochoch, ut xrumb’al wi’chik. K’a’ru paay chi tz’ak naxjacheb’ ru li kristiaan sa’eb’ li kutan a’in? Chan ru naq li Jesukristo “kixjuk’ li tz’ak li najachok qe” rik’in li Dios?
Maare eb’ li wankeb’ sa’ laa junkab’al te’ruuq chixyiib’ankil lix “k’anjeleb’aal li Dios” rik’in li k’a’aq re ru wan sa’ kab’l. Li video “Toda la armadura de Dios” (LDS.org) naru chixtenq’ankileb’ li komon chixtawb’al xyaalal li kolb’a-ib’ aq’ej a’in, ut naru te’xtaw ajwi’ li na’leb’ sa’ “Toda la armadura de Dios” Liahona, junio 2016, 70–71). Chan ru naq li junjunq cha’al re li kolb’a-ib’ aq’ej naxkol qix sa’ musiq’ej? K’a’ru naru taqab’aanu re xtenq’ankil qib’ “chixtiqib’ankil qib’ rik’in chixjunil lix k’anjeleb’aal li Dios” (Efesios 6:11) wulaj wulaj?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Kanab’ li Musiq’ej chixk’amb’al aab’e sa’ li tzolok. Ab’in chiru li Musiq’ej naq naxk’am aab’e rik’in li k’a’ru tento taatzol wulaj wulaj, us ta nakatxk’am sa’ jun na’leb’ li ink’a’ xak’oxla xtzolb’al.
Xtiqib’ankil qib’ rik’in lix k’anjeleb’aal li Dios naru naxkol rix li qamusiq’.