“21–27 octubre. 1 ut 2 Tesalonicenses: “Meejal eek’a’uxl sa’ junpaat, chi moko chexib’e eerib’ ” ” Kim, Taaqehin—Choq’ reheb’ li komon ut li junkab’al: 2019 (2019)
“21–27 octubre. 1 ut 2 Tesalonicenses” Kim, Taaqehin—Choq’ reheb’ li komon ut li junkab’al: 2019
21–27 octubre
1 ut 2 Tessalonicenses
“Meejal eek’a’uxl sa’ junpaat, chi moko chexib’e eerib’ ”
Wi ink’a’ naqatz’iib’a li na’leb’ naqak’ul rik’in li Musiq’ej, naru nasach sa’ qach’ool. K’a’ru nakatreek’asi li Musiq’ej chixtz’iib’ankil naq nakawil ru 1 ut 2 Tesalonicenses?
Xtz’iib’ankil li nakak’oxla
Sa’ Tesalonika, ke’xye naq laj Pablo ut laj Silas “ke’xpo’ xch’ool chixjunil li ruchich’och’ ” (Hechos 17:6). Ke’josq’o’ junjunq aj jolominel sa’ xyanqeb’ laj Judio, ut eb’ laj jolominel a’in ke’xpoqoqi li tenamit chirixeb’ (chi’ilmanq Hechos 17:1–10). Xb’aan a’an, kiyehe’ re laj Pablo ut laj Silas naq te’elq chaq sa’ Tesalonika. Laj Pablo kichal xk’a’uxl chirixeb’ li toja’ xe’paab’an sa’ Tesalonika, ut chirix li rahob’tesink yookeb’ chixk’ulb’al, a’ut ink’a’ kiru chi sutq’iik re rula’aninkileb’. “Laa’in ajwi’ ink’a’ chik xinkuy,” kixtz’iib’a laj Pablo, “ut xintaqla laj Timoteo re rab’inkil resil lee paab’aal.” Ut laj Timoteo, laj tenq’anel chiru laj Pablo li yoo chaq chi k’anjelak rochb’een sa’ Tesalonika, “chaab’il resil lee paab’aal ut lee rahom xk’am chaq” (1 Tesalonicenses 3:5–6). Jo’kan ajwi’, eb’ laj santil paab’anel sa’ Tesalonika ke’wan “choq’ aj k’utul chaab’il b’e chiruheb’ chixjunil laj paab’anel” (1 Tesalonicenses 1:7, ut kipuukan resil lix paab’aleb’ toj sa’eb’ li najtil tenamit. Naru naqak’e reetal chan ru xk’ojla xch’ool laj Pablo naq kixk’e reetal naq lix k’anjel sa’ xyanqeb’ “moko xkanaak ta chi maak’a’ rajb’al” (1 Tesalonicenses 2:1). A’b’anan laj Pablo kixnaw naq us ta wankeb’ chi paab’ank, a’an ink’a’ naraj naxye naq junelik te’wanq chi jo’kan, ut kixxuwa naq te’ruuq chi jalb’ehiik xb’aaneb’ li b’alaq’il aj k’utunel sa’ xyanqeb’ laj santil paab’anel (chi’ilmanq 2 Tesalonicenses 2:2–3). Li esil kixtaqla reheb’ a’an, ut qe laa’o, a’an naq ink’a’ taqakanab’ “xtz’aqob’resinkil jo’ nimal chik naraj li qapaab’aal,” ut naq “q’axal wi’chik toorahoq” (chi’ilmanq 1 Tesalonicenses 3:10; 4:10).
Li na’leb’ re xtzolb’aleb’ li loq’laj hu aajunes
Eb’ laj k’anjenel chirix li evangelio neke’xjultika li aatin rik’in x’anchalileb’ xch’ool ut rik’in rahok.
Sa’ 1 Tesalonicenses, li aatin kixye laj Pablo naxk’ut chan ru lix k’oxlahom jo’ ajwi’ lix sahil xch’ool li ani xq’axtesi rib’ chi tz’aqal re k’anjelak chiruheb’ li ralal xk’ajol li Dios. Sa’eb’ li wiib’ ch’ol sa’ xtiklajik 1 Tesalonicenses, taataweb’ li aatin ut li ch’ol aatin li neke’xk’ut chan ru naq jun li tz’aqal aj k’anjenel naxk’ut li evangelio. K’a’ru eek’asinb’ilat chixb’aanunkil re xchaab’ilob’resinkil laa k’utum chirix li evangelio?
Naq nintaaqe li Jesukristo, naru nintaw insantilal.
Chiqajunil naqayo’oni naq “sa’ xk’ulunik li Qaawa’ Jesukristo,” taaruuq tooxaqliiq chiru chi “kawresinb’il qach’ool sa’ santilal, chi maak’a’aq qaq’usb’al chiru li Dios” (1 Tesalonicenses 3:13). K’a’ru kixk’ut laj Pablo chirix chan ru xtawb’al li santilal sa’ 1 Tesalonicenses 3:9–13; 4:1–12?
Chi’ilmanq ajwi’ Moroni 10:32–33; K’utul Raqal reheb’ li Loq’laj Hu, “Santilal”; Carol F. McConkie, “Lix chaq’alil ru li santilal,” Jolomil ch’utub’aj-ib’ re abril 2017.
1 Tesalonicenses 4:16–18; 5:1–10; 2 Tesalonicenses 1:4–10
Wi chaab’ilin chi paab’ank ut wankin chi aj’o wu, tinwanq chi kawresinb’il choq’ re li xkab’ xk’ulunik li Kolonel.
Sa’ 1 Tesalonicenses 5:1–10, laj Pablo kiroksi junjunq li jaljookil ru aatin re xk’utb’al li xninqal ru yaalil na’leb’ chirix li kutan taasutq’iiq wi’ li Jesus sa’ li ruchich’och’. Naq nakatzoleb’ li jaljookil ru aatin a’in, k’oxla xtz’iib’ankil li musiq’anb’il na’leb’ li nachal aawik’in chirix li xkab’ xk’ulunik li Jesukristo.
“Junaq aj elq’ chi q’eq”:
“Xrahil li alank sa’ xb’een li ixq”:
Xkomoneb’ chik li jaljookil ru aatin nakataw:
K’a’ chik ru li yaalil na’leb’ nakatzol chirix li xkab’ xk’ulunik li Jesukristo sa’ 1 Tesalonicenses 4:16–18; 5:1–10; 2 Tesalonicenses 1:4–10? K’a’ru eek’asinb’ilat chixb’aanunkil re yo’leek ut re xkawresinkil aawib’ choq’ re li xkab’ xk’ulunik?
Chi’ilmanq ajwi’ Dallin H. Oaks, “La preparación para la segunda venida,” Liahona, mayo 2004, 7–10.
Kiyeeman resil chi junxilaj naq taawanq jun li q’etok paab’ank, malaj jun xkanab’ankil li yaal.
Rik’in li nimla rahob’tesink yookeb’ chixk’ulb’al, naab’al reheb’ laj santil paab’anel aj Tesalonika neke’xk’oxla naq ak nach’ wan li xkab xk’ulunik li Kolonel. A’b’anan laj Pablo kixnaw naq chi maji’aq taasutq’iiq li Jesukristo sa’ li ruchich’och’, taawanq jun li q’etok paab’ank—jun po’ok ch’oolej, malaj jun “xtz’eqtaanankil li paab’aal” (chi’ilmanq 2 Tesalonicenses 2:1–4). Naru taataw chik aana’leb’ chirix li nimla q’etok paab’aal—jo’ ajwi’ aab’antioxihom chirix lix k’ojob’ankil wi’chik li evangelio—rik’in rilb’aleb’ ru li na’leb’ a’in:
-
Eb’ li raqal sa’ li Santil Hu li ke’xye xyaalal chi junxilaj naq taawanq jun q’etok paab’ank: Isaias 24:5; Amos 8:11–12; Mateo 24:4–14; 2 Timoteo 4:3–4
-
Eb’ li raqal sa’ li Santil Hu li neke’xk’ut naq ak yoo chi tiklaak li q’etok paab’aal sa’ xkutankil laj Pablo: Hechos 20:28–30; Galatas 1:6–7; 1 Timoteo 1:5–7
-
Eb’ li aatin chirix li nimla q’etok paab’aal xb’aaneb’ li ke’raj raj xchaab’ilob’resinkil li paab’aal junxil:
Martin Lutero: “Laa’in yal xinsik’ xchaab’ilob’resinkil li Iglees re tixk’am rib’ rik’in li Santil Hu. ... Yal tinye naq li Kristianil xkanab’ wank sa’ xyanqeb’ li ani tento raj xe’xk’uula” (sa’ G. Schweibert, Luther and Hist Times: The Reformation from a New Perspective [1950], 590).
Roger Williams: “Li q’etok paab’ank ... q’axal naq xpo’ok, jo’kan naq ink’a’ naru nak’ira li q’etok paab’ank a’an toj reetal naq li Kristo tixtaqlaheb’ li ak’ apostol re xyiib’ankil wi’chik eb’ li iglees” (sa’ Philip Schaff, The Creeds of Christendom [1877], 851).
Erasmo: “Chixjunil anajwan k’a’jo’ naq wan chik chi tz’uklenb’il rik’ineb’ li patz’om ut yehom a’in [chirix li tzol’leb’], jo’kan naq ink’a’ naru yal ta xyo’oninkil naq taqak’am wi’chik li ruchich’och’ sa’ li tz’aqal Kristianil” (The Praise of Folly, jaltesinb’il ru sa’ ingles xb’aan laj Clarence H. Miller, xkab’ xk’uub’lajik [2003], 155–156).
Chi’ilmanq ajwi’ 2 Nefi 28; “Q’etok paab’ank,” K’utul Raqal reheb’ li Loq’laj Hu.
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ ru li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ tex’aatinaq wi’ a’ yaal jo’ li ajb’il ru xb’aan laa junkab’al. Aʼin junjunq li naʼlebʼ naru taabʼaanu:
K’a’ru naxtoch’ aach’ool chirix li k’a’ru kireek’a laj Pablo choq’ reheb’ lix komon? Chan ru naru naru naqeek’a xkomon li eek’ahom a’in choq’ re li qajunkab’al, eb’ li qamiiw, ut li qech aj santil paab’anel?
Chan ru naru naqoksiheb’ li raqal a’in re xk’ojob’ankil qach’ool malaj xch’ool jalan chik naq nakam ani raaro?
Tz’il rix li na’leb’ k’eeb’il xb’aan laj Pablo sa’ 1 Tesalonicenses 5:14–25, ut taw jun ch’ol aatin teeraj xyu’aminkil jo’ junkab’al. Naru teetz’iib’a chiru jun nimla hu re taawanq chi k’utk’u sa’ lee rochoch. Eb’ li komon sa’ li junkab’al te’ruuq chixtz’iib’ankil li aatin chiru li nimla hu naq neke’ril jun li komon chixyu’aminkil li k’a’ru tz’iib’anb’il chiru li hu.
Ma naqeek’a naq wan naq “nokotitz’ chixb’aanunkil li us”—maare naq ch’a’aj chiqu li k’a’ru na’ajman re wank choq’ tzolom? K’a’ru naru chiqatenq’ankil naq naqeek’a chi jo’kan? (Chi’ilmanq Galatas 6:9; Tz. ut S. 64:33.) Chan ru naru taqatenq’a qib’ chiqib’il qib’ naq nak’ulman a’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok qajunes
Sik’ li k’utb’esinb’il na’leb’ wulaj wulaj. K’iila sut li k’utb’esinb’il na’leb’ nachal “chi junjunqil li raqal” (2 Nefi 28:30), ink’a’ sa’ jun chalik. ... Maak’oxla li [tzolok chirix li evangelio] jo’ jun k’anjel taak’e xhoonal chixb’aanunkil, a’b’anan jo’ jun k’anjel junelik yookat chixb’aanunkil (chi’ilmanq Li k’utuk jo’ li Kolonel, 12).
Li Kristo chi waklijenaq chi yo’yo, xb’aan laj Robert T. Barrett