“28 octubre–3 noviembre. 1 ut 2 Timoteo; Tito, Filemon: “Chayal aaq’e chixk’amb’al xb’eheb’ laj paab’anel” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“28 octubre–3 noviembre. 1 ut 2 Timoteo; Tito, Filemon,” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019
28 octubre–3 noviembre
1 ut 2 Timoteo; Tito; Filemon
“Chayal aaq’e chixk’amb’al xb’eheb’ laj paab’anel”
Wan naq chaab’il xtzolb’aleb’ li loq’laj hu rik’in jun malaj wiib’ oxib’ li patz’om sa’ laa k’a’uxl. K’e xb’oqb’al li Musiq’ej re aatenq’ankil chixsumenkil naq yookat chi tzolok, ut tz’iib’a li musiq’anb’il na’leb’ nakak’ul.
Xtz’iib’ankil li nakak’oxla
Sa’eb’ li hu kixtz’iib’a laj Pablo re laj Timoteo, laj Tito, ut laj Filemon, naqak’e reetal chan ru xch’ool jun lix moos li Qaawa’. Li jun siir chik chi hu tz’iib’anb’ileb’ xb’aan laj Pablo, ke’wan chi taqlanb’il rik’ineb’ laj paab’anel sa’ komonil, a’ut eb’ li hu a’in ke’tz’iib’aman choq’ re jun ajwi’ li kristiaan—a’aneb’ xkomon laj Pablo li ke’rochb’eeni sa’ lix k’anjel li Dios—ut naq naqileb’ ru, chanchan rab’inkil jun li seraq’. Aran naqil chan ru naq laj Pablo kixwaklesi xch’ool laj Timoteo ut laj Tito, aj jolomineleb’ sa’ xb’eeneb’ li ch’utam, sa’ lix k’anjeleb’ sa’ li Iglees. Naqil chan ru naq kixtz’aama chiru laj Filemon li ramiiw naq tixkuy xmaak jun rech aj santil paab’anel, ut naq tixk’ul jo’ ras riitz’in sa’ li evangelio. Li raatin laj Pablo ink’a’ tz’aqal tz’iib’anb’il choq’ qe laa’o, ut maare a’an maajo’q’e xk’oxla naq te’ile’q ru xb’aan k’iila tenamit. A’ut sa’eb’ li hu a’in naqataw li chaab’il na’leb’ ut li waklesink ch’oolej choq’ qe laa’o, maak’a’ naxye k’a’ru li qab’oqb’al sa’ lix k’anjel li Kristo.
Li na’leb’ re xtzolb’aleb’ li loq’laj hu aajunes
Ani laj Timoteo ut laj Tito?
Laj Timoteo ut laj Tito ke’k’anjelak rochb’een laj Pablo naq kiwan chi b’eek jo’ taqlanb’il aj k’anjel. Sa’ xb’aanunkil lix k’anjel, laj Pablo kiril lix chaab’ilaleb’ a’an, ut kixkanab’ rib’ chiruheb’. Laj Timoteo moqon kib’oqe’ jo’ aj b’eresinel sa’ li Iglees sa’ Efeso, ut laj Tito jo’ aj b’eresinel sa’ Kreta. Sa’eb’ li taqlanb’il hu a’in, laj Pablo kixk’e xna’leb’eb’ ut kixwaklesiheb’ xch’ool laj b’eresinel a’in chirix lix k’anjeleb’, sa’ li kiwan wi’ xjultikankil li evangelio ut xb’oqb’aleb’ li ani te’k’anjelaq choq’ obiisp.
Chi’ilmanq ajwi’ li K’utul Raqal reheb’ li Loq’laj Hu, “Pablo, eb’ lix hu,” “Timoteo,” “Tito.”
Eb’ li obiisp b’oqb’ileb’ chixk’eeb’al musiq’ejil b’eresink reheb’ li komon sa’ jun teep.
Rik’in aatin, rik’in inyu’am, ut rik’in li rahok, ninru “chixk’amb’al xb’eheb’ laj paab’anel” rik’in li Kolonel ut lix evangelio.
Laj Timoteo toj saaj kiwan, a’ut laj Pablo kixnaw naq taawanq choq’ chaab’il aj b’eresinel sa’ li Iglees, maak’a’ naxye lix saajil. K’a’ru li na’leb’ kixk’e laj Pablo re laj Timoteo sa’ 1 Timoteo 4:10–16? Chan ru naq li na’leb’ a’in naru chatenq’ankil laa’at ut xkomoneb’ chik chi k’amok b’e rik’in li Kolonel ut rik’in lix evangelio?
Chii’ilmanq ajwi’ Alma 17:11.
“Xb’aan naq moko li xiwak ta xqamaatani chaq rik’in li Dios, a’b’an lix kawub’ qach’ool, li rahok ut kuyuk-ib’.”
K’oxlanb’il naq 2 Timoteo a’an roso’jik li hu kixtz’iib’a laj Pablo, ut nak’eeman reetal naq a’an kixnaw naq ak taanach’o’q chaq roso’jik lix yu’am (chi’ilmanq 2 Timoteo 4:6–8). Naq nakawil ru li hu a’in, k’oxla k’a’ru maare kireek’a laj Timoteo rik’in xnawb’al naq sa’ junpaat chik maa’anihaq chik laj tzolol re ut laj k’amol xb’e. K’a’ru kixye laj Pablo re xwaklesinkil xch’ool? K’a’ru naxk’ut li raatin laj Pablo chawu chirix xnumsinkil li ch’a’ajkilal ut li xiw sa’ laa yu’am?
Xpaab’ankil li evangelio tixk’e xkolb’al qix chiru li musiq’ejil rahilal sa’ roso’jikeb’ li kutan.
Laa’o wanko sa’ “roso’jikeb’ li kutan” li yeeb’il resil xb’aan laj Pablo, li “q’axal ch’a’ajkaq xnumsinkil” (2 Timoteo 3:1). Naq nakawil ru 2 Timoteo 3, tz’iib’a k’a’ruheb’ li rahilal li yeeb’ileb’ resil sa’ roso’jikeb’ li kutan (chi’ilmanq ajwi’ 1 Timoteo 4:1–3):
Ma nakak’e reetal naq wankeb’ li rahilal a’in sa’ li ruchich’och’ sa’ laa sutam—malaj sa’ tz’aqal laa yu’am? Chan ru naq eb’ li rahilal a’in, jo’eb’ li ani yeeb’ileb’ resil sa’ li raqal 6, “neke’xch’ik rib’ chire kab’lal ut nekexxchap”? K’a’ru li na’leb’ nakataw chi k’eeb’il sa’ 2 Timoteo 3, ut b’araq chik sa’eb’ li taqlanb’il hu a’in, li taakoloq re laa junkab’al chiruheb’ li musiq’ejil rahilal a’in? (jo’ jun eetalil, chi’ilmanq 1 Timoteo 1:3–11; 2 Timoteo 2:15–16; Tito 2:1–8).
Ani laj Filemon?
Laj Filemon a’an jun aj Kristiano li kixpaab’ li evangelio naq kitzole’ xb’aan laj Pablo. Kiwan jun lix loq’b’il moos, laj Onesimo xk’ab’a’, li ki’eelelik chaq chiru preexil, kixnaw ru laj Pablo, ut kixpaab’ ajwi’ li evangelio. Sa’ lix hu choq’ re laj Filemon, laj Pablo kixtz’aama chiru li ramiiw naq tixkuy xmaak laj Onesimo ut tixk’ul, “ink’a’ chik jo’ loq’b’il aj k’anjel, jo’ b’an chik li naq’axok ru li loq’b’il aj k’anjel, jo’ jun li qiitz’in q’axal raaro” (raqal 16).
Eb’ li neke’taaqenk re li Kristo neke’xkuy xmaak chirib’ileb’ rib’.
Ma xak’ul jun sutaq naq wan ani xpatz’ xkuyb’al lix maak aawik’in? K’oxla a’an naq nakawil ru li hu re laj Filemon. K’a’ru kixk’ut laj Pablo chiru laj Filemon chirix k’a’ut naq tento tixkuy xmaak laj Onesimo? Ma wan jun esil choq’ aawe sa’ li hu a’in?
Chi’ilmanq ajwi’ 1 Nefi 7:16–21; Mosiah 26:30–31; K’utul Raqal reheb’ li Loq’laj Hu, “Kuyuk maak.”
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Sa’ li kutan wanko wi’, wan junjunq li na’leb’ kixk’e laj Pablo chirix li raq’eb’ li ixq li ink’a’ chik nab’aanuman, a’ut chiqajunilo nokoru chi tzolok rik’in li na’leb’ kixk’e chirix “xtiqib’ankil qib’ rik’in chaab’il b’aanuhom.” Maare teeraj xb’aanunkil jun k’utb’esink sa’ laa junkab’al, ut li junjunq komon tixtiqib’ rib’ rik’in aq’ej malaj rik’in q’ol, tz’iib’anb’il wi’ li jar paay chi chaab’il b’aanuhom. K’a’ru junjunq li chaab’il b’aanuhom li taaruuq tixb’aanu laa junkab’al sa’ li xamaan a’in?
Re xtenq’ankileb’ li komon sa’ laa junkab’al re te’raj “xk’amb’al xb’eheb’ laj paab’anel,” naru taapatz’ reheb’ naq te’xk’ut rik’in yiib’anb’il jalam-uuch chan ru naq jalan chik xk’ut li chaab’il b’aanuhom chiruheb’ a’an. Chan ru naq eb’ li kristiaan a’in xoohe’xtenq’a chixtaaqenkil li Jesukristo? Li raatin li Awa’b’ej Thomas S. Monson, “Chexwanq jo’ jun eetalil ut jo’ jun saqen” (Jolomil ch’utub’aj-ib’ re octubre 2015) maare tixk’e aana’leb’.
K’a’ut nakak’oxla naq yeeb’il naq li “xrahinkil ru li tumin” wan choq’ “xxe’ chixjunil li maa’usilal”? Chan ru naq xiw xiw choq’ qe xjayalinkil li qayu’am rik’in li tumin? Chan ru naru nokowan chi k’ojk’o qach’ool rik’in li osob’tesink li ak xqak’ul?
Jo’ chanru yeeb’il sa’eb’ li raqal a’in, k’a’ru li osob’tesink li nachal rik’ineb’ li neke’xnaweb’ ut neke’xtzoleb’ li loq’laj hu? Maare eb’ li komon sa’ li junkab’al te’ruuq chixwotzb’al li jar raqal sa’eb’ li loq’laj hu li “nak’anjelak” choq’ reheb’.
K’a’ru kiwan xch’ool laj Pablo chixb’aanunkil choq’ re laj Onesimo? Chan ru naq a’in chanchan li kixb’aanu li Kolonel chi anchal xch’ool choq’ qe laa’o? (chi’ilmanq ajwi’ 1 Timoteo 2:5–6; Tz. ut S. 45:3–5). Chan ru naru naqab’aanu jo’ kixb’aanu laj Pablo ut li Kolonel?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
K’ut li tzol’leb’ chi ch’olch’o ru ut chi saqen ru. Li evangelio ch’ina us xb’aan naq saqen ru (chi’ilmanq Tz. ut S. 133:57). Ruuchil xyalb’al aaq’e chirajtesinkil ru laa junkab’al rik’ineb’ li tzolom chi q’axal kawresinb’il, yal aaq’e chixk’utb’al li tzol’leb’ chi ch’olch’o ut chi saqen ru (chi’ilmanq 1 Timoteo 1:3–7).
Xtzolb’aleb’ li loq’laj hu naxkol qix chiru li musiq’ejil rahilal re roso’jikeb’ li kutan.