“11–17 noviembre. Hebreos 7–13: “Lix yuwa’il aj tij re li sahilal chalel” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2019 (2019)
“11–17 noviembre. Hebreos 7–13,” Kim, Taaqehin—Choq’ reheb’ li komon ut li junkab’al: 2019
Laj Melkisedek narosob’tesi laj Abram, xb’aan laj Walter Rane
11–17 noviembre
Hebreos 7–13
“Lix yuwa’il aj tij re li sahilal chalel”
Naq yookat chirilb’al ru Hebreos 7–13, naru naq taak’ul li na’leb’ rik’in li Santil Musiq’ej. K’oxla chan ru nakatru chixtz’iib’ankil; qayehaq, taaruuq taatz’iib’a sa’ li tusleb’ aatin a’in, chireheb’ li perel sa’eb’ laa loq’laj hu, malaj sa’ li aplicación Biblioteca del Evangelio.
Xtz’iib’ankil li nakak’oxla
Eb’ laj santil paab’anel, us ta tiikeb’ chi paab’ank, wan naq “neke’hob’e’ ut neke’rahob’tesiik,” ut naru neke’laj xkawileb’ xch’ool (chi’ilmanq Hebreos 10:32–38). Laj Pablo kixnaw naq eb’ laj Judio li ke’ok sa’ li Kristianil yookeb’ chixk’ulb’al xnimal li rahob’tesink sa’ xk’ab’a’ lix ak’ paab’aaleb’. Re xwaklesinkileb’ xch’ool re te’kanaaq chi tiik sa’ lix nawomeb’ xch’ool, kixjultika reheb’ xk’ihaleb’ li chaab’il aj paab’anel li wanjenaqeb’ sa’ resil lix tenamiteb’: laj Abel, laj Enok, laj Abraham, li xSarah, laj Jose, laj Moises—”numtajenaq xk’ihaleb’ ” li ke’xch’olob’ xyaalal naq tz’aqal yaal li k’a’ru kixyeechi’i li Dios, ut naq us royb’eninkil (Hebreos 12:1). Li paab’aal a’in eechaninb’il xb’aan chixjunileb’ li neke’ril li Jesus jo’ “li nayoob’ank ut nab’eresink re lix paab’aal toj reetal toxtz’aqloq ru” (Hebreos 12:2). Sa’ xk’ab’a’ a’an, naq laj tza naraj naq “taqakanab’ xpaab’ankil,” laa’o nokoru chi “jilok chi anchal qach’ool, chi anchal qapaab’aal” (Hebreos 10:22, 38). Choq’ qe laa’o, jo’ choq’ reheb’ laj santil paab’anel najter, li Jesukristo a’an “yuwa’il aj tij re li sahilal chalel” (Hebreos 9:11).
Li na’leb’ re xtzolb’aleb’ li loq’laj hu aajunes
Li Tijonelil re Melkisedek a’an li taqenaqil tijonelil.
Chiru k’iila cient chihab’, eb’ laj Judio ke’k’anjelak rik’in li tijonelil reheb’ laj Levita, a’an li Tijonelil re Aaron yeeb’il re. A’ut rik’in lix tz’aqalil lix evangelio li Jesukristo kichal li Tijonelil re Melkisedek, li naxyeechi’i li osob’tesink q’axal nim wi’chik ru. K’a’ru nakatzol chirix li Tijonelil re Melkisedek sa’ Hebreos 7? A’in junjunq li yaalil na’leb’ naru nakataw:
-
JJS, Hebreos 7:3:Eb’ li k’ojob’anb’ileb’ sa’ li Tijonelil re Melkisedek “k’eeb’ileb’ chanchan li Ralal li Dios,” ut wankeb’ choq’ aj tij chi junelik.
-
Hebreos 7:11:Li tijonelil reheb’ laj Levita ink’a’ naxyeechi’i li k’a’ru “tz’aqal re ru,” jo’kan naq li Tijonelil re Melkisedek kixk’ul xna’aj (chi’ilmanq Tz. ut S. 84:18–22).
-
Hebreos 7:20–21:Li Tijonelil re Melkisedek nak’ule’ rik’in jun xaqab’anb’il aatin, malaj “juramento” (chi’ilmanq Tz. ut S. 84:19–44).
K’a’ru li osob’tesink xak’ul xb’aan li Tijonelil re Melkisedek ut li k’ojob’anb’il k’anjel li wankeb’ rik’in?
Chi’ilmanq ajwi’ Alma 13:1–13; Tzol’leb’ ut Sumwank 121:36–46; K’utul Raqal reheb’ li Loq’laj Hu, “Tijonelil re Melkisedek,” “Melkisedek,”; Henry B. Eyring, “La fe y el juramento y convenio del sacerdocio,” Liahona, mayo 2008, 61–64; Dallin H. Oaks, “Eb’ li laaw ut wankilal re li tijonelil,” Jolomil ch’utub’aj-ib’ re abril 2014.
Eb’ li k’ojob’anb’il k’anjel sa’ najter kutan ut sa’ li kutan a’in neke’k’amok b’e rik’in li Kristo.
Eb’ laj Hebreo li ke’ril ru li hu a’in najter neke’xnaw ru li loq’laj muheb’aal ut eb’ li k’ojob’anb’il k’anjel li yeeb’ileb’ resil xb’aan laj Pablo. A’ut wankeb’ li ink’a’ neke’xtaw ru naq lix yaalalileb’ li k’ojob’anb’il k’anjel a’in, a’an xk’utb’al xyaalal lix mayej li Jesukristo re xtojb’al rix li maak.
Sa’ najter kutan kiwan jun ninq’e rajlal chihab’, lix kutankil lix tojb’al rix maak, naq li taqenaqil aj tij na’ok chaq sa’ li na’ajej q’axal sant sa’ li santil ochoch sa’ Jerusalen, ut naxmayeja jun chib’aat malaj jun karneer re xtojb’al rixeb’ xmaak Israel. Laj Pablo kixch’olob’ naq li Jesukristo a’an jun taqenaqil aj tij li kixmayeja jun sut ajwi’ li mayej—a’an ajwi’ lix yu’am—re xtojb’al rix lix maak li ruchich’och’ (chi’ilmanq Hebreos 9:24–10:14).
K’oxlaheb’ li k’ojob’anb’il k’anjel nakak’ul sa’eb’ li kutan a’in. Chan ru naq eb’ li k’ojob’anb’il k’anjel a’in neke’xk’am aab’e rik’in li Jesukristo?
Re xtzolb’al chik li na’leb’ chirixeb’ li najteril k’ojob’anb’il k’anjel reheb’ laj Judio, ut eb’ li eetalil li wankeb’ chi sa’, che’ilmanq li video “El tabernáculo” ut “El sacrificio y la Santa Cena” (LDS.org).
Rik’in li paab’aal, aajel ru xkanab’ankil qib’ chiru lix yeechi’ihom li Dios.
Wi tixpatz’ anihaq aawe, k’a’ru xyaalalil li paab’aal, k’a’ raj ru taaye? Li Hermana Anne C. Pingree, li xwan junxil jo’ jun komon sa’ li jolomil awa’b’ejil re li Komonil re Tenq’ank, kiroksi li aatin sa’ Hebreos 11 re xch’olob’ankil xyaalalil: “Li paab’aal, li musiq’ejil wankilal chixpaab’ankileb’ li yeechi’ink li “neke’ril toj chi najt,” ut li maare ink’a’ te’k’ule’q sa’ li yu’am a’in, a’an li nawb’ileb’ wi’ ru li ani neke’paab’ank chi yaal” (“Mirando de lejos lo prometido,” Liahona, noviembre 2003, 14).
K’oxla k’a’ru xyaalalil li paab’aal choq’ aawe laa’at naq nakak’oxlaheb’ li na’leb’ sa’ Hebreos 11. K’a’ru nakatzol chirix li paab’aal rik’in lix b’aanuhomeb’ li ani yeeb’ileb’ resil sa’ li ch’ol a’in? (Chi’ilmanq ajwi’ Eter 12:6–22.)
Chi’ilmanq ajwi’ Alma 32:21, 26–43; Jeffrey R. Holland, “Sumo sacerdote de los bienes venideros,” Liahona, enero 2000, 42–45; K’utul Raqal reheb’ li Loq’laj Hu, “Paab’ank, xpaab’ankil.”
Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:
Naru taapatz’ reheb’ li komon sa’ li junkab’al naq te’xwotz jun hoonal naq ke’reek’a naq “xe’xk’ul lix kutanob’resinkil” rik’in li yaal. Chan ru naq eb’ li k’ulum a’in nokohe’xtenq’a re naq “kawaq qach’ool sa’ li qapaab’aal” sa’ xkutankil lix yalb’al qix malaj naq xkab’ rix qach’ool?
Chan ru naru taatenq’aheb’ li komon sa’ laa junkab’al re te’xtaw xna’leb’ rik’ineb’ li chaab’il b’aanuhom li yeeb’ileb’ resil sa’ Hebreos 11? Maare te’raj xb’aanunkil jun k’utb’esink chirixeb’ li esilal li yeeb’ileb’ resil aran. Malaj ut taaruuq tex’aatinaq sa’ junkab’al chirix xkomoneb’ chik li chaab’il kristiaan li nawb’ileb’ ru eeb’aan—maare jun lee xe’ eetoon, jun aj b’eresinel sa’ li Iglees, malaj ani nekenaw ru sa’ lee tenamit.
Jo’ chanru naxye li raqal a’in, k’a’ut naq li Jesus kiwan xch’ool chixnumsinkil li rahilal ut li kamk chiru li krus? K’a’ru naxk’ut a’in chiqu chiqajunilo chirix chan ru nokoru chixkuyb’al lix yalb’al qix? Li Awa’b’ej Russell M. Nelson kixk’e junjunq li chaab’il na’leb’ chirix li jun raqal a’in sa’ li raatin, “Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016.
K’a’ut naq li Qaawa’ nokoxtij ut nokoxq’us? K’a’ru neke’ril li komon sa’ li junkab’al chirix chan ru naq li Dios naril li q’usuk, naq neketzol sa’ komonil eb’ li raqal a’in? Chan ru naq eb’ li raqal a’in neke’xjal chan ru naq laa’ex texq’usuq, malaj naq teek’ul li q’use’k?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Oksi li b’ich re xb’oqb’al chaq li Musiq’ej ut re xtzolb’al li tzol’leb’. Li Xb’eenil Awa’b’ejil ke’xye, “Li b’ichank k’a’jo’ naq wan xwankil [chiqeek’asinkil re too’ok] sa’ xnimal chik li musiq’ejil wank” (“Xtikib’ankil xb’aan li xb’eeil awa’b’ejil,” Eb’ li B’ich, x). Maare jun li b’ich chirix li paab’aal, jo’ “Xaqxo toowanq” (Eb’ li B’ich, 164), chaab’ilaq xb’ichankil sa’ aatinak sa’ komonil chirix Hebreos 11.
Eb’ li eetalil li neke’tawman sa’ li najter santil ochoch ut sa’eb’ li k’ojob’anb’il k’anjel li neke’b’aanuman chi sa’, ke’xk’ut xyaalal lix k’anjel li Jesukristo.