li Kristo chi xaqxo rik’in jun xqa’al ut jun winq

Li b’an re Galahad, xb’aan xAnnie Henrie

4–10 noviembre

Hebreos 1–6

Li Jesukristo, “xyo’leb’aal li kolb’a-ib’ ”

Wi nakatz’iib’aheb’ li musiq’ejil na’leb’ nakak’ul, tatxtenq’a chixk’eeb’al reetal li k’a’ru naraj xk’utb’al chawu li Santil Musiq’ej. Wi nakak’anjela li musiq’ejil na’leb’, a’an naxk’ut laa paab’aal naq tz’aqal yaaleb’ li na’leb’ a’an.

Xtz’iib’ankil li nakak’oxla

Chiqajunil wan k’a’ru tento taqaq’axtesi re xk’ulb’al lix evangelio li Jesukristo—jo’ maare li k’a’ru ink’a’ us k’aynaqo chixb’aanunkil, malaj li k’a’ru paab’anb’il li moko yaal ta, malaj li wank sa’ komonil rik’in ani ink’a’ us, malaj jalan chik li na’leb’. Eb’ laj Gentil naq ke’paab’an, k’iila sut ki’ajman ru xkanab’ankileb’ li jalanil dios. Choq’ reheb’ laj Hebreo (a’eb’ laj Judio), wan chik li k’a’ru kich’a’ajko’ chiruheb’ chirix li paab’ank. Eb’ a’an ak wank k’a’ru paab’anb’il xb’aaneb’ ut li na’leb’ kanab’anb’il reheb’ chalen najter, jo’ xloq’oninkil li tz’aqal Dios ut li raatineb’ lix profeet chalen chaq k’iila mil chihab’. A’ut eb’ li apostol ke’xk’ut naq lix chaq’rab’ laj Moises ak tz’aqlojenaq ru rik’in li Jesukristo, ut naq ak wan jun li chaq’rab’ taqenaq wi’chik xwankil choq’ reheb’ laj paab’anel. Naq eb’ laj Hebreo ke’xk’ulub’a li Kristianil, ma taa’ajmanq raj ru naq te’xkanab’ lix najteril na’leb’, ut li esilal chirix lix tenamiteb’? Li hu reheb’ laj Hebreo kixsik’ xsumenkileb’ li patz’om a’in rik’in xk’utb’al naq wan xwankil lix chaq’rab’ laj Moises, eb’ li profeet, ut eb’ li k’ojob’anb’il k’anjel, a’b’anan nim wi’chik xwankil li Jesukristo (chi’ilmanq Hebreos 1:1–4; 3:1–6; 7:23–28). Relik chi yaal, chixjunileb’ li na’leb’ a’in neke’xjayali ut neke’xch’olob’ xyaalal li Jesukristo jo’ Ralal li Dios, ut jo’ li Mesias li yeechi’inb’il chaq reheb’ laj Judio, ut li yookeb’ chaq chiroyb’eninkil. Li esil choq’ reheb’ laj Hebreo, ut choq’ qe chiqajunil, a’an naq wan naq tento taqakanab’eb’ li najteril na’leb’ re taawanq li Jesukristo choq’ xch’oolil li qapaab’aal ut li qayu’am—xb’aan naq a’ sa’ xk’ab’a’ li Jesukristo naq “toxqataw li uxtaan” (Hebreos 4:16).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Hebreos

Ani kitz’iib’ank re li hu reheb’ laj Hebreo?

Wankeb’ laj tzolonel li neke’xye naq maare maawa’ laj Pablo li kitz’iib’ank re li hu reheb’ laj Hebreo. Jalan wi’ lix k’uub’ankil li hu Hebreos rik’in li jun ch’ol chik chi hu tz’iib’anb’il xb’aan laj Pablo, ut sa’ junjunq reheb’ li najteril tz’iib’ahom, ink’a’ nak’utun ani kitz’iib’ank re. A’b’anan, rik’in naq li na’leb’ yeeb’il sa’ Hebreos naxk’am rib’ rik’in li jun ch’ol chik xk’utum laj Pablo, eb’ laj Santil Paab’anel sa’ Roso’jikeb’ li Kutan, jo’ chanru lix na’leb’eb’ laj Kristiano chalen najter, neke’xk’ulub’a naq laj Pablo kitenq’an chixtz’iib’ankil li hu a’in.

Chi’ilmanq ajwi’ sa’ li K’utul Raqal reheb’ li Loq’laj Hu, “Pablo, eb’ lix hu.”

Hebreos 1–5

Li Jesukristo a’an “xjalam u lix Diosilal” li qaChoxahil Yuwa’.

Naab’al reheb’ laj Judio ch’a’aj choq’ reheb’ xk’ulub’ankil li Jesukristo jo’ li Ralal li Dios. Li hu reheb’ laj Hebreo kixk’ut naq chixjunil li kixk’ul li Jesus naxch’olob’ resil ut naxk’ut xyaalal lix Yuwa’. Naq nakawil li oob’ ch’ol sa’ xtiklajik li hu Hebreo, maare us raj taatz’iib’a chi tustu eb’ lix k’ab’a’, lix wankil, lix chaab’ilal, ut lix k’anjel li Jesukristo li tz’iib’anb’ileb’ aran. K’a’ru neke’xk’ut li na’leb’ a’in chawu chirix li Kolonel? K’a’ru neke’xk’ut chawu chirix laa Choxahil Yuwa’?

Chan ru naq li aatin a’in xb’aan li Elder Jeffrey R. Holland nakatxtenq’a chixtawb’al ru li k’a’ru k’utb’il sa’eb’ li ch’ol a’in? “Li Jesus ... kichal re xchaab’ilob’resinkil li rilomeb’ li winq chirix li Dios, ut chixtz’aamankil chiruheb’ naq te’xra lix Choxahil Yuwa’ jo’ chanru naq raab’ileb’ xb’aan a’an, ut jo’ chanru naq a’an junelik tixraheb’. ... Chi jo’kan, rik’in xk’eeb’al tzakemq reheb’ li te’tz’okaaq, rik’in xk’irtesinkileb’ li yaj, rik’in xch’iilankileb’ laj ka’pak’al-u, rik’in xtz’aamankil naq chiwanq li paab’aal—rik’in a’in li Kristo yoo chixk’utb’al li b’e rik’in li Yuwa’b’ej” (“La grandiosidad de Dios,” Liahona, noviembre 2003, 72).

Hebreos 2:9–18; 4:12–16; 5:7–8

Li Jesukristo kixk’ul li aaleek ut li yajel re taaruuq tixtaw wu ut tinixtenq’a.

Ma nakaweek’a naq nakatru chi “jilok chi tuqtu aach’ool rub’el roq li wan wi’ li usilal” ut taasik’ li uxtaan? (Hebreos 4:16). Jun esil li natawman sa’ li hu reheb’ laj Hebreo, a’an naq us ta wan qamaak ut qamajelal, naru li jilok rik’in li Dios, ut naru xk’ulb’al li rusilal. K’a’ru nakataw sa’ Hebreos 2:9–18; 4:12–16; 5:7–8 li naxkawob’resi laa ch’ool naq li Jesukristo tatxtenq’a rik’ineb’ li ch’a’ajkilal nakak’ul sa’ li yu’am a’in? K’oxla xtz’iib’ankil sa’ jun li hu li k’a’ru nakak’oxla ut nakaweek’a chirix li k’a’ru xb’aanu li Kolonel choq’ aawe.

Chi’ilmanq ajwi’ Mosiah 3:7–11; Alma 7:11–13; 34.

Hebreos 3:7–4:11

Re taaruuq tink’ul li rosob’tesihom li Dios, tento naq “ink’a’ tinkawob’resi inch’ool.”

Us ta ak ke’paab’an sa’ li Kristianil, wankeb’ laj paab’anel aj Judio li ch’a’aj choq’ reheb’ xk’ulb’al chi tz’aqal lix evangelio li Jesukristo, ut li osob’tesink li naxk’am chaq. Rik’in xyeeb’al resileb’ li najter aj Israelita, laj Pablo kiraj xq’unb’esinkileb’ xch’ool laj Judio naq ink’a’ te’xb’aanu li k’a’ru ke’xb’aanu lix xe’ xtooneb’—a’an xtz’eqtaanankil li rosob’tesihom li Dios xb’aan xmaak’a’il li paab’aal. (Naru nakawil ru li esilal li kixye resil laj Pablo sa’ Numeros 14:1–12, 26–35.)

K’oxla chan ru naq Hebreos 3:7–4:11 naru chatenq’ankil. Re xb’aanunkil a’in, naru taak’oxlaheb’ li patz’om jo’ a’in:

• Chan ru naq eb’ laj Israelita ke’xb’oq xjosq’il li Qaawa’? (chiʼilmanq Hebreos 3:8–11). K’a’ru nak’ulman naq kawob’resinb’il qach’ool?

• Jo’q’e xinkanab’ inch’ool chi kawob’resiik? Ma wankeb’ li osob’tesink li naraj li Dios xk’eeb’al we, a’ut ink’a’ yookin chixk’ulb’al xb’aan xmaak’a’il inpaab’aal?

• K’a’ru naru tinb’aanu re naq q’unaq ut tuulanaq inch’ool? (chi’ilmanq Eter 4:15; Proverbios 3:5–6; Alma 5:14–15).

Chi’ilmanq ajwi’ 1 Nefi 2:16; 15:6–11; Jakob 1:7–8; Alma 12:33–36.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li Q’ojyin re Junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu:

Hebreos 1:8–9

Chan ru naq li Jesus kixk’ut naq naxra li tiikilal, ut naq xik’ naril li maa’usilal? Wi wan rajom li qach’ool li ink’a’ us, k’a’ru naru taqab’aanu re xjalb’al?

Hebreos 2:1–4

Ma naru nakak’oxla jun ch’ina k’anjeleb’aal naru taawoksi re xtenq’ankil laa junkab’al chixtawb’al ru k’a’ru xyaalalil chapok chi kaw chiruheb’ li yaalil na’leb’ li xqab’i? Maare taaruuq taak’ut a’in rik’in jun li ch’ina k’anjeleb’aal li ch’a’aj xchapb’al. Chan ru naq xchapb’al li k’anjeleb’aal a’in, chanchan xyalb’al qaq’e chixnimob’resinkil lix nawom qach’ool? Chan ru naru naqak’e reetal naq li “k’a’ru xqab’i” ink’a’ nasach chiqu? (raqal 1).

Hebreos 2:9–10

Re aatinak chirix li ch’ol aatin “aj k’amol b’e sa’ li kolb’a-ib’,” naru nekextikla rik’in aatinak chirix k’a’ru jun aj k’amol b’e. K’a’ru naxb’aanu jun aj k’amol b’e? Chan ru naq li Jesukristo wan choq’ aj k’amol b’e choq’ qe laa’o, ut choq’ re li qakolb’al?

Hebreos 5:1–5

Eb’ li raqal a’in naru texxtenq’a chi aatinak chirix k’a’ru xyaalalil li b’oqe’k xb’aan li Dios xb’aan li ani wan xwankil, re xk’ulb’al li tijonelil, malaj re xb’aanunkil junaq qab’oqb’al. Rik’in li k’a’ru kixb’aanu li Kristo, k’a’ru naru naqatzol chirix xk’ulb’al ut xb’aanunkil li qab’oqb’al?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Jalan jalanq li na’leb’ naru nakawoksi. Ink’a’ na’ajman ru naq junelik taatzoleb’ li loq’laj hu chi juntaq’eet ru; naru taayal jalan jalanq li na’leb’ re tzolok. Re xtawb’al junjunq li na’leb’, naru taawil “Li na’leb’ re xchaab’ilob’resinkil lix tzolb’aleb’ li loq’laj hu aajunes” sa’ xtiklajik li hu a’in.

li Kristo naq kixk’ut rib’ chiruheb’ laj Nefita

Li Kristo kirula’ani li ch’och’ America, xb’aan laj Walter Rane