« 14–20 nō ’Ātopa. Philipi ; Kolosa : ‘E ti’a iā’u te mau mea ato’a nei i te Mesia, tei tauturu mai iā’u ra’ » Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 14–20 nō ’Ātopa. Philipi ; Kolosa », Mai, pe’e mai—nō te ta’ata hō’ē ’e te ’utuāfare : 2019
14–20 nō ’Ātopa
Philipi ; Kolosa
« E ti’a iā’u te mau mea ato’a nei i te Mesia, tei tauturu mai iā’u ra »
Afea te taime hope’a ’outou i tai’o ai i te mau mana’o tā ’outou i pāpa’i i roto i tā ’outou tuatāpapara’a o te Faufa’a ’Āpī ? Penei a’e e ’ohipa tauturu rahi te hi’o-fa’ahou-ra’a i te mau muhumuhu tā ’outou i fāri’i.
Pāpa’i i tō ’oe mau mana’o
’Ua pāpa’i Paulo i tāna mau ’episetole i tō Philipi ’e i tō Kolosa ’a mau ai ’oia i roto i te fare tāpe’ara’a. ’Ia tai’o rā ’oe, ’aita e hōho’a ra nō te ta’ata e pāpa’i ra i roto i te fare tāpe’ara’a. ’Ua parau rahi atu Paulo nō ni’a i te ’oa’oa, te poupou ’e te māuruuru, i te ’ati ’e te mau tāmatara’a, ’ua nā ’ō ’oia : « ’O te Mesia tei parauhia nei ; ’o tā’u ïa e ’oa’oa nei , ’e e ’oa’oa ho’i au » (Philipi 1:18). « Ta’a ’ē noa atu ā tā’u tino nei, tei ’ō ’outou ā tau vārua, i te ’oa’oara’a i te hi’ora’a atu i tā ’outou ha’apa’o maita’i, ’e te pāpū o tō ’outou fa’aro’o i te Mesia ra » (Kolosa 2:5). Pāpū roa ē, « te hau o te Atua » tā Paulo i fa’aruru i roto i tōna mau ’ati, ’ua « hau ’ē atu [ïa] i te ’ite » (Philipi 4:7), e ’ohipa pāpū rā. I roto i tā tātou iho mau tāmatara’a, e nehenehe tā tātou e ’ite ato’a i te reira hau ma te « ’oa’oa i te Fatu, ’eiaha e fa’aea » (Philipi 4:4). E nehenehe tā tātou, mai ia Paulo, e tūru’i hope roa i ni’a ia Iesu Mesia, « nōna i noa’a ai tō tātou ora » (Kolosa 1:14). E ti’a ia tātou ’ia parau mai ia Paulo : « E ti’a iā’u te mau mea ato’a nei i te Mesia, tei tauturu mai iā’u ra » (Philipi 4:13 ; hi’o ato’a Kolosa 1:11).
Mau mana’o nō tā ’oe iho tuatāpapara’a pāpa’ira’a mo’a
Te « rave fa’aoti hua [ānei tātou] i tō [tātou] ora » ?
Tē fa’a’ohipa nei te tahi mau ta’ata i teie parau ē, « rave fa’aoti hua i tō [tātou] ora » nō te turu i te mana’o ē, e fa’aorahia tātou maoti tā tātou iho mau tauto’ora’a. E hi’ora’a tā’ōti’a rā te reira, mai te hi’o-tā’ōti’a-ra’a i te ha’api’ira’a a Paulo ē—« i ora ho’i ’outou i te aroha mau i te fa’aro’o » ē (Ephesia 2:8)—’aita e ’ohipa i tītauhia ’ia ora mai tātou. Tē ha’api’i pāpū nei te mau pāpa’ira’a mo’a, ’e tae noa atu te mau pāpa’ira’a a Paulo, i te tītaura’a nō te aroha a Iesu Mesia ’e te tauto’ora’a a te ta’ata hō’ē nō te fāri’i i te ora. Mai tā Nephi i parau : « Nō roto i te aroha e ora ai tātou, hope noa atu tō tātou itoito ato’a » (2 Nephi 25:23). ’E tae noa atu i roto i tā tātou mau tauto’ora’a ’ia noa’a te ora, « ’o te Atua tei ’ohipa i roto ia ’outou » (Philipi 2:13 ; hi’o ato’a Philipi 1:6).
E mea ho’ona te fa’atusiara’a ato’a nō te ’evanelia a Iesu Mesia
E rave rahi mea tā Paulo i fa’atusia i tōna fāriura’a i te ’evanelia a Iesu Mesia, mai tōna pārahira’a ti’ara’a rahi i roto i te sōtaiete a te ’āti Iuda ’ei pharisea. I roto i te Philipi 3:5–14, e ’imi i te mau mea tā Paulo i ’āpī nō tōna ineine e fa’atusia nō te ’evanelia. E aha tōna mana’o nō ni’a i tāna mau fa’atusiara’a ?
E feruri atu ai i tō ’oe iho ti’ara’a pipi. E aha tā ’oe i fa’atusia nō te ’evanelia a Iesu Mesia ? E aha tā ’outou i fāri’i ? Tē vai ra ānei te tahi atu ā fa’atusiara’a tā ’oe e mana’o ra e ti’a ’ia rave nō te riro ’ei pipi pūpū rahi atu ā iāna i te Fa’aora ?
Hi’o ato’a 3 Nephi 9:19–20 ; Te Parau Ha’api’ira’a ’e te mau Parau Fafau 58:2–5 ; Robert C. Gay, « ’E e aha tā te ta’ata nei e ’ore e hōro’a ’ei ho’o i tōna iho ora ? » Ensign ’aore rā Liahona, Novema 2012, 34–36.
E nehenehe tā’u e ’oa’oa i roto i te Mesia noa atu te mau fifi i ni’a iā’u.
’Ua riro te orara’a o Paulo ’ei fa’ahi’ora’a rahi nō te parau tā te peresideni Russel M. Nelson i parau ē : « Tei ni’a te fa’atumura’a o tō tātou orara’a ia… Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna te ’oa’oa e tae mai ai » (« Te ’oa’oa ’e te oraora pae vārua », Ensign ’aore rā Liahona, Novema 2016, 82).
’Ia tai’o ’oe i te Philipi—te pene 4 iho ā rā—e ’imi i te mau fa’ahitira’a e nehenehe e tauturu ia ’oe ’ia ’ite i te ’oa’oa noa atu ā te mau fifi o te orara’a. I te hea taime fifi rahi tō ’oe ’itera’a i « te hau o te Atua » ? (’īrava 7). Ahea tō ’oe ’itera’a i te pūai « i te Mesia » nō te rave i te mau ’ohipa pa’ari ? (’īrava 13). I tō ’oe mana’o, nō te aha e mea faufa’a ’ia « vai ’oa’oa » noa atu ā te mau fifi ? (’īrava 11). Nāhea te fa’a’ohipara’a i te mau huru i fa’ahitihia i roto i te ’īrava 8 e nehenehe ai e tauturu ia ’oe ’ia ’ite i te ’oa’oa i roto i tā ’oe mau fifi ?
Hi’o Alama 33:23 ; Dieter F. Uchtdorf, « ’Ia māuruuru i roto i te mau huru ato’a o te orara’a », Ensign ’aore rā Liahona, Mē 2014, 70–77.
’Ua niuhia tō’u fa’aro’o i ni’a ia Iesu Mesia.
Teie te tahi huru tuatāpapara’a tā ’oe e nehenehe e tāmata ’e te mau pene ato’a i roto i te mau pāpa’ira’a mo’a, e tano maita’i rā nō te Kolosa 1:12–23. E ’imi i roto i te mau ’īrava i te mau mea ato’a e ha’api’i mai ’oe nō ni’a ia Iesu Mesia, ’a hāmani atu ai i te hō’ē tāpura nō te reira. ’Ia mana’o ’oe, nō te aha e mea faufaʼa ’ia ʼite i teie mau mea nō ni’a i te Fa’aora ?
’Ua riro te mau pipi a Iesu Mesia ’ei ta’ata « ’āpī » ’ia ora rātou i tāna ’evanelia.
Nāhea ’oe i te ’ite ē, tē tauturu ra te ’evanelia a Iesu Mesia ia ’oe ’ia riro ’ei hō’ē « ta’ata ’āpī [’aore rā te hō’ē vahine ’āpī] » ? Hō’ē rāve’a nō te ’ite mai, ’o te tai’ora’a ïa i te Kolosa 3:1–17 ’a hāmani atu ai i te hō’ē tāpura nō te peu, te huru ’e te ’ohipa a terā « ta’ata tahito », ’e i ni’a i te tahi atu tāpura, ’o te peu ïa, te huru ’e te mau ’ohipa a te « ta’ata ’āpī ».
Tē fa’auru ra ānei tā ’oe tuatāpapara’a i teie mau ’īrava nō ni’a i te huru te ’evanelia e taui ai ia ’oe ? ’A pāpa’i i tō ’oe mau mana’o ’ia ti’a ia ’oe ’ia hi’o fa’ahou i te reira i muri iho nō te feruri i tō ’oe haerera’a i mua.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
’Ua ’ite paha tō ’outou ’utuāfare i te mau ta’o ’oa’oa ’aore rā pōpou tei fa’ahiti-pinepine-hia i roto i te Philipi. I te taime tāta’itahi e tae ’outou i ni’a i te reira nau ta’o, e nehenehe tā ’outou e tāpe’a nō te ’āparaura’a i tā Paulo i ha’api’i nō ni’a i te rāve’a ’ia ’ite i te ’oa’oa.
Nāhea tātou ’ia « ’ana’ana… mai te mau ti’arama o te ao nei » ?
E nehenehe tō ’outou ’utuāfare e hi’o mai i te mau mea e « feruri atu » ’o te tano i te mau tātarara’a i roto i teie ’īrava (hi’o ato’a Hīro’a fa’aro’o 1:13). E aha te mau ha’amaita’ira’a a tō ’outou ’utuāfare nō te pe’e i te parau a’o a Paulo ?
E aha tā tātou e nehenehe e rave nō te fa’arahi « i tō [tātou] ’ite i te Atua » ? E aha te mau « tao’a ra o te pa’ari ’e te ’ite » tā tātou e ’ite nei i roto i te ’evanelia ?
Penei a’e e nehenehe tō ’outou ’utuāfare ’ia tai’o i teie mau ’īrava ma te pārahi ’ati a’e i te hō’ē tumu rā’au, ’aore rā ma te hi’o i te hōho’a o te hō’ē tumu rā’au (mai terā i ’āpitihia i roto i teie arata’i ha’api’ira’a). E aha te aura’a o nā parau « tātumu » ’e « a’ahia » i roto i te Mesia ? Nāhea tātou i te tauturu te tahi i te tahi ’ia ha’apūai i tō tātou mau a’a pae vārua ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Haʼamaitaʼiraʼa i tā tātou haʼapiʼiraʼa
Ora mai te au i tō ’oe ’itera’a pāpū. ’Ua ha’api’i Elder Neal A. Maxwell, « Te mea ’ua riro ’outou, te mea ïa e ha’api’i atu ’outou ». « E ha’amana’ohia tō ’outou huru… hau atu i te hō’ē noa a’e parau mau i roto te hō’ē ha’api’ira’a » (i roto Ha’api’ira’a mai tā te Fa’aora, 13).
’Ua ha’api’i Paulo ē, ’ia « a’ahia » tō tātou fa’aro’o i roto ia Iesu Mesia (Kolosa 2:7).