« 30 nō Setepa–13 nō ’Ātopa. Ephesia : ‘’Ei fa’aau i te feiā mo’a i te ’ohipa ra’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 30 nō Setepa–13 nō ’Ātopa. Ephesia », Mai, pe’e mai—nō te ta’ata hō’ē ’e te ’utuāfare : 2019
30 nō Setepa–13 nō ’Ātopa.
Ephesia
« ’Ei fa’aau i te feiā mo’a i te ’ohipa ra »
Tē ’ite ra ānei ’outou i te mau tū’atira’a i roto i te mau poro’i i te ’āmuira’a rahi ’e te ’episetole a Paulo i tō Ephesia ?
Pāpa’i i tō ’oe mau mana’o
I te pararera’a te ’evanelia i Ephesia, e ’ere « te ti’arepu… i te mea iti » (Te mau ’Ohipa 19:23) i rotopū i tō Ephesia. Nō te mau rima’ī i reira e hāmani ra i te hō’ē vāhi mo’a nō te tahi ruahine ’ētene, ’ua hi’o rātou i te ha’apa’ora’a keresetiano ’ei fa’ataupupura’a i tā rātou ’imira’a, ’āria « ’ī a’era rātou i te riri… ’Ua ’ārepurepu atura taua ’oire ato’a ra » (hi’o Te mau ’Ohipa 19:27–29). E feruri na ’āhani e melo fa’afāriu ’āpī ’outou i terā taime. E rave rahi ta’ata nō Ephesia tei fāri’i ’e tei ora i te ’evanelia i roto i te reira « mea rahi ’auē » (Te mau ’Ohipa 19:40), ’e ’ua ha’apāpū atu Paulo ia rātou ē, ’o « te Mesia… tō tātou hau » (Ephesia 2:13–14). E au ē tāna mau parau ’e tāna anira’a « ’ia ha’apae-roa-hia te māmahu ’ore, ’e te ’iriā, ’e te riri, ’e te ’āvau ’e te fa’a’ino, ’e te tairoiro, ’eiaha roa ato’a ïa » (Ephesia 4:31) e mea tano ’e mea tāmāhanahana i teienei mai i terā ra tau. Nō tō Ephesia, mai nō ’outou, e noa’a mai te pūai nō te fa’aruru i te ’ati « i te Fatu, ’e i tōna ra pūai rahi » (Ephesia 6:10–13).
Mau mana’o nō tā ’oe iho tuatāpapara’a pāpa’ira’a mo’a
’Ua « mā’iti » ’aore rā ’ua « ha’apa’o ātea » ānei te Atua i te tahi o tāna mau tamari’i ’ia noa’a te ora ?
’Ua parau Paulo nō te feiā mo’a ’ei ta’ata tei « ha’apa’o-ātea-hia » e te Atua ’e tei « [mā’itihia]… hou teie nei ao ra » nō te riro ’ei ta’ata nōna. Mai tā te peresideni Henry B. Eyring i fa’a’ite, nō te mea e rave rahi ta’ata i ora ’e i pohe ma te ’ore e fāna’o i te rāve’a nō te fāri’i i te ’evanelia, ’ua mana’o ïa te ta’ata ē « ’ua faʼaoti ātea te Atua ʼo vai tāna mau tamariʼi tāna e faʼaora ma te hōroʼa atu i te ʼevānelia ia rātou, te tahi tei ʼore roa atu i faʼaroʼo i te ʼevanelia ’aita ïa rātou i ‘māʼitihia’. [Tērā rā]… e mea hau atu te here ʼe te tiʼa o te ʼōpuaraʼa a te Atua. E hinaʼaro rahi tō tō tātou Metua i te Ao ra i te haʼaputuputu ʼe i te haʼamaitaʼi i te tāʼātoʼaraʼa ʼo tōna ʼutuāfare » (« Haʼaputuputuraʼa i te ʼutuāfare ʼo te Atua », Ensign ’aore rā Liahona, Mē 2017, 20–21). E ti’a i te tā’āto’ara’a o te mau tamari’i a te Atua i te fāri’i i te ’evanelia ’e tō te reira mau ’ōro’a maoti te ’ohipa e ravehia ra nō te feiā i pohe i roto i te mau hiero mo’a.
Noa atu ā ’aita hō’ē i ha’apa’o-ātea-hia ’ia fa’aorahia ’aore rā ’ia ’ore ’ia fa’aorahia, tē ha’api’i nei te heheura’a i teie nei ’anotau ē, tē vai ra te ta’ata tei mā’itihia ’aore rā tei « fa’atōro’a-ātea-hia » i roto i te ao hou te tāhuti nei nō te amo i te tahi mau hōpoi’a i ni’a i te fenua nei. Tei roto i te reira te hōpoi’a i ni’a i te tā’āto’ara’a o te feiā mo’a i te mau mahana hope’a nei ’ia fa’a’ite i te ’evanelia ’e ’ia tauturu i te mau tamari’i a te Atua i nā pae e piti o te pāruru, ’ia haere mai i te Mesia.
« E ’āmui [te Atua] i te mau mea ato’a i te Mesia ra »
’Ua uiui a’enei tō ’outou mana’o e aha te « tu’ura’a parau i te hopera’a mau o te mau tau ra » ’aore rā e aha te aura’a ’ia « ’āmui… i te mau mea ato’a i te Mesia ra » ? ’A feruri ai ’oe i teie mau parau, ’a tai’o i te mau ’īrava i muri nei : Ephesia 4:13 ; 2 Nephi 30:7–8 ; Te Parau Ha’api’ira’a ’e te mau Parau Fafau 110:11–16 ; 112:30–32 ; 128:18–21. E fa’auruhia paha ’oe ’ia pāpa’i i tā ’oe iho tātarara’a nō teie mau parau.
’Ua niuhia te ’Ēkālesia i ni’a i te mau ’āpōsetolo ’e te mau peropheta, ’e ’o Iesu Mesia te tihi rahi.
E nehenehe te tai’ora’a i te mau ha’api’ira’a a Paulo nō ni’a i te mau ’āpōsetolo ’e te mau peropheta e fa’aineine ia ’oe ’ia fa’aro’o i te poro’i a te mau ’āpōsetolo ’e te mau peropheta i te ’āmuira’a rahi. ’Ia au i tei pāpa’ihia i roto i te Ephesia 2:19–22 ; 4:11–16, nō te aha e mau peropheta ’e e mau ’āpōsetolo tā tātou ? Nāhea tā rātou mau ha’api’ira’a i tauturu ia ’oe ’ia « ’ore… ’ia ’āueue noa i te mata’i ra, i terā parau, i terā parau » ?
Hi’o ato’a Te mau ’Ohipa 4:10–12.
Tē pi’i nei te Fatu i te mau peropheta ’e te mau ’āpōsetolo nō te fa’atere i tāna ’Ēkālesia.
E ti‘a iā’u ia ha’apūai i te mau aura’a ’utuāfare.
’Ia tai’o ’oe i te Ephesia 5:21–6:4, e aha te mau mana’o e tae mai ia ’oe nō ni’a i te huru e ha’apūai i te mau aura’a ’utuāfare ?
E mea faufa’a ’ia fa’a’ite ē, te mau parau a Paulo i roto i te Ephesia 5:22, ’ua pāpa’ihia ïa mai te au i te mau peu i terā ra tau. Tē ha’api’i nei te mau peropheta ’e te mau ’āpōsetolo i teie nei tau ē, ’aita te mau tāne i ni’a atu i te mau vahine ’e ’ua riro rāua e « mau hoa ’aifāito » (hi’o « E poro’i i to te Ao nei », Ensign ’aore rā Liahona, Mē 2017, 145). ’Ātīrā noa atu, e nehenehe e ’ite mai i te parau a’o au i roto i te Ephesia 5:23–33, mai te peu iho ā rā ’ua fa’aipoipohia ’oe ’aore rā tē fa’aineine ra nō te fa’aipoipora’a. ’Ei hi’ora’a, nāhea te Mesia e fa’a’ite ai i tōna here i te feiā mo’a ? E aha ïa te aura’a nō te huru o te tāne fa’aipoipo i ni’a i tāna vahine ? E aha te mau poro’i tā ’oe e ’ite ra e tano nō ’oe i roto i teie mau ’īrava ?
Nā te ’ahura’a i « te ha’ana tama’i ato’a a te Atua ra » e pāruru iā’u i te ’ino ?
’Ia tai’o ’oe i te Ephesia 6:10–18, e feruri nō te aha Paulo i topa ai te i’oa o te mau tuha’a ha’ana tama’i mai tāna i rave. E pāruru « te ha’ana tama’i ato’a a te Atua ra » ia tātou i te aha ? E aha tā ’oe e nehenehe e rave nō te ’ahu hope roa i te tuha’a tāta’itahi o te ha’ana tama’i, i te mau mahana ato’a ?
Hi’o ato’a 2 Nephi 1:23 ; Te Parau Ha’api’ira’a ’e te mau Parau Fafau 27:15–18.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
Nā roto i te fa’aho’i-fa’ahou-ra’a mai i te mau mahana hope’a nei, tē putuputu nei te Atua i te mau mea ato’a ’ei hō’ē, ’o te mau parau tumu ato’a ïa ’e te mau ’ōro’a o te ’evanelia. ’Ei tūra’ira’a i teie mana’o, e nehenehe tā ’outou e fa’atāpuni haere i te tahi mau tao’a ’aore rā te tahi mau parau nā roto i te fare, e mau mea tei fa’aho’i-fa’ahou-hia mai i tō tātou nei tau (mai te mau tāviri autahu’ara’a, te mau ’ōro’a hiero, te mau pāpa’ira’a mo’a, ’e te mau hōro’a pae vārua). E nehenehe te mau melo o te ’utuāfare e ’imi haere ia rātou ’a ha’aputuputu ai i te vāhi hō’ē. Nō te aha tātou e māuruuru ai i te ora i roto i te «tu’ura’a parau i te hopera’a mau o te mau tau ra » ?
E ani i te mau melo o te ’utuāfare ’ia fa’a’ite mai i te tahi ’ohipa i tupu ’e ’ua putapū rātou i te here ’e te aroha o te Atua ’e o Iesu Mesia, mai tei fa’a’itehia i roto i teie mau ’īrava.
E au paha i tō ’outou ’utuāfare ’ia hāmani i te hō’ē patu ma te tahi tūru’a ’aore rā te tahi mau tao’a e vai ra i te fare ’a vāvahi atu ai i te reira. E aha te mau huru patu e fa’ata’a ’ē nei i te ta’ata i teie mahana ? Mai te aha te huru tō Iesu Mesia « [hurira’a] i raro te patu fa’ata’a ’ē i rōpū » ia tātou ’e te Atua ?
E nehenehe tō ’outou ’utuāfare e hāmani i tāna iho « ha’ana tama’i » ma te fa’a’ohipa i te mau tauiha’a i te fare. Nāhea te tuha’a tāta’itahi o te ha’ana tama’i e pāruru ai ia tātou i te pae vārua ? E aha tā tātou e nehenehe e rave nō te tauturu i te tahi ’e te tahi ’ia « ’ahu i te ha’ana tama’i ato’a a te Atua » (Ephesia 6:11), i te mau mahana ato’a ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
E vaiiho i te Vārua ’ia arata’i i tā ’outou tuatāpapara’a. E vai ara i te Vārua e arata’i ia ’outou i te mau mea tei tītauhia ia ’outou ’ia ha’api’i i te mahana tāta’itahi, noa atu ā te reira, e arata’i ia ’outou i te tuatāpapara’a i te hō’ē tumu parau ’aita ’outou i ’ōpua i te ha’amatara’a.
Nā te ’ahura’a i te ha’ana tama’i a te Atua e pāruru ia tātou i te pae vārua.