30 nō Tetepa–13 nō{5}ʼĀtopa 

Ephesia

« ‘Ei faʼaau i te feiā mo’a i te ʼohipa ra »

’A taiʼo ai ʼoutou i te ʼepisetole i tō Ephesia, e feruri i te mau tumu parau e nehenehe tā ʼoutou e haʼapūai nō te haʼamaitaʼi i te mau tamariʼi tā ʼoutou e haʼapiʼi nei. E pāpaʼi i te mau manaʼo atoʼa e tae mai i tō ʼoutou feruriraʼa ’a taiʼo ai ʼoutou.

E pāpa’i i tō ʼoutou mau mana’o

E ani ’ia fa’a’ite mai i te mana’o

E ani i te mau tamariʼi ʼia tiʼa mai i niʼa i te hōʼē rēni. E ani i te tamariʼi mātāmua ’ia faʼaʼite mai i te tahi mea tāna i haʼapiʼi mai i roto i te hōʼē taiʼoraʼa ʼutuāfare i te pāpaʼiraʼa moʼa, i roto i te Paraimere, ʼaore rā i te tahi ʼē atu vāhi. E ani i te tamariʼi i muri mai ’ia tāpiti i te parau mai i te mea tā te tamariʼi nā mua atu i faʼaʼite mai ʼe ’ia parau mai i te tahi ’ē atu mea tāna i haʼapiʼi mai. E nā reira noa ʼe tae noa atu ʼua noaʼa i te mau tamariʼi atoʼa te taime nō te faʼaʼite mai.

Ha’api’i i te ha’api’ira’a tumu

Te mau tamari’i ’āpī a’e

Ephesia 2:19

E tiʼa i te mau melo o te ʼĒkālesia ʼia riro ʼei mau hoa ʼe ’ei « mau tino huira’atira ».

ʼUa riro ānei te mau tamariʼi i roto i tā ʼoutou piha haʼapiʼiraʼa mai ’ei taʼata « ʼeʼē » ʼaore rā e « mau tino huira’atira » i te tahi ʼe te tahi ʼe te tahi atu mau melo o te pāroita ? E tauturu ia rātou ’ia taʼa ē noa atu tē vai nei tō rātou ta’a-’ē-raʼa, tē tauturu nei te Faʼaora ia tātou ’ia vai hōʼē ʼe ’ia here te tahi i te tahi.

Mau ’ohipara’a e nehenehe e rave

• E tuʼu i te hōʼē hōhoʼa nō te Faʼaora i ropū i te piha. E ani i te mau tamariʼi ’ia tiʼa mai i te mau tufaʼa huru rau o te piha nō te faʼahōhoʼaraʼa i te mau « taʼata ’ē » ʼaore rā te mau « taʼata ʼeʼē ». ’Ia taiʼo anaʼe ʼoutou i te Ephesia 2:19, e ani ia rātou ʼia nuʼu atu i pīha’i iho i te hōhoʼa o te Mesia e tae noa atu ʼua piri ʼāmui atu rātou. E parau atu ia rātou ē ’a haʼafātata atu ai rātou i te Faʼaora, e nehenehe tātou e riro ’ei hōʼē ’ia vetahi ʼē ei mau hoa ʼe e mau « tino huira’atira ».

• E ʼimi i te mau hōhoʼa nō te mau tamariʼi nō te mau tuhaʼa ta’a ’ē nā te ao, ʼe e huna atu i te reira nā roto i te piha. E tuʼu i te hōʼē hōhoʼa nō te Faʼaora i ropū i te piha. E ani i te mau tamariʼi ʼia pea atu mai te mau misiōnare ʼe ’ia ʼimi i te hōʼē hōhoʼa nō te hōʼē « taʼata ʼeʼē » nō te tuʼu atu i pīha’i iho i te hōhoʼa o te Faʼaora. E tauturu ia rātou ’ia ʼite ē ’ia bāpetizo-anaʼe-hia te mau taʼata, e riro mai rātou ʼei tuhaʼa nō te ʼufuāfare nō tā tātou nei ʼĒkālesia, ʼaore rā te « fetiʼi o te Atua ». Nāhea e nehenehe ai ia tātou ʼia tauturu i te tahi taʼata ʼāpī ’ia ’ite te fāriʼi-poupou-hia nei ʼoia.

Ephesia 6:1–3

Tē hina’aro nei te Metua i te Ao ra ’ia faʼaroʼo vau i tōʼu mau metua.

ʼIa taiʼo anaʼe ʼoutou i te Ephesia 6:1–3, e feruri i te mau rāveʼa e nehenehe ai ia ʼoutou ʼia tauturu i te mau tamariʼi ’ia ʼite i te faufaʼa rahi ʼia faʼaroʼo i te mau metua.

Mau ’ohipara’a e nehenehe e rave

• E taiʼo i te Ephesia 6:1 i te mau pīahi, ʼaore rā e tauturu i te hōʼē o te mau tamariʼi ʼia taiʼo i te reira. E ani ia rātou ʼia haʼuti mai i te mau taime e faʼaroʼo ai rātou i tō rātou mau metua. E aha ïa te tupu mai ʼahani ʼaita rātou i faʼaroʼo ?

• E hīmene ʼāmui i te hōʼē hīmene nō niʼa i te haʼapaʼoraʼa, mai « Je veux obéir » (Chants pour les enfants, 71). E faʼaea i muri aʼe i te ʼirava mātāmua, ʼe e ani i te hōʼē tamariʼi ’ia parau mai i te tahi mea tā te hōʼē metua i ani iāna ’ia rave ; ʼe e faʼaoti i te hīmene. E na reira noa ʼia nehenehe i te mau tamariʼi ʼia faʼaʼite mai i tō rātou mau manaʼo.

• E faʼaʼite atu i te hōʼē taime ’a faʼaroʼo ai ʼoutou i tō ʼoutou mau metua ʼe e haʼamaitaʼihia ʼoutou. ʼAore rā e faʼatiʼa atu i te ʼāʼamu nō Chloe i roto i te aʼoraʼa a te tuahine Carole M. Stephens « Mai te mea ʼua here ʼoe iāʼu, e haʼapaʼo ïa i tāʼu mau faʼaueraʼa » (Ensign ʼaore rā Liahona, Novema 2015, 118–20) ʼaore rā e faʼaʼite i te video « Haereraʼa iō māma rūʼau ra » (LDS.org).

Ephesia 6:10–18

E nehenehe te ha’ana tama’i a te Atua e pāruru iāʼu.

Nāhea ʼoutou e tauturu ai i te mau tamariʼi ʼia taʼa ē te raveraʼa i te mau mea parau-tiʼa mai te ʼōʼomoraʼa ïa i te haʼana tamaʼi ?

Mau ’ohipara’a e nehenehe e rave

• E faʼaʼite i te hōhoʼa nō te hōʼē taʼata e ʼōʼomo ra i te haʼana tamaʼi, mai te hōhoʼa i roto i te ʼapi ʼohiparaʼa nō teie hepetoma ʼaore rā i roto i te faʼanahoraʼa nō teie hepetoma i roto i te Mai, pe’e mai—nō te taʼata hōe ʼe te ’utuāfare. E haʼapoto ai ʼoutou i te Ephesia 6:10-18, e faʼaʼite atu i te mau tamariʼi e nāhea te mau huru tuhaʼa haʼana tamaʼi e pāruru i te mau huru vāhi o te tino. (Hiʼo « The Whole Armor of God », Friend, Tiunu 2016, 24–25.)

• E hōpoi mai i te mau taoʼa i te piha e nehenehe e faʼahōhoʼa i te mau tuhaʼa nō te haʼana tamaʼi tei faʼahitihia i roto i te Ephesia 6:14–17 (ʼei hiʼoaraʼa, te hōʼē taupoʼo ʼaore rā pāruru), ʼaore rā e hāmani i te mau huʼahuʼa haʼana tamaʼi ’ōhie i roto i te ʼapi parau. E vaiiho i te mau tamariʼi ’ia ʼōʼomo mai i te « haʼana tamaʼi ». E ’āparau e aha te auraʼa ’ia pāruruhia i te ʼino ’e nāhea te tuʼuraʼa i te tuhaʼa tātaʼitahi o te haʼana tamaʼi e nehenehe ai e pāruru ia rātou. Nāhea tātou e ʼōʼomo ai i te haʼana tamaʼi a te Atua ? (ʼEi hiʼoraʼa, nā roto i te taiʼoraʼa i te mau pāpaʼiraʼa moʼa, te tāviniraʼa ia vetahi ʼē, te pureraʼa, te haʼapaʼoraʼa, ʼe te tahi atu).

Ha’api’i i te ha’api’ira’a tumu

Te mau tamari’i pa’ari a’e

Ephesia 2:13–19

E mau tino huira’atira tātou i roto i te fare o te Atua.

E faʼaitoitohia te mau tamariʼi e mau hoa maitaʼi anaʼe tō rātou i roto i te ʼevanelia. Nāhea e nenehenehe ai ia ’outou ’ia tauturu i te faʼatupu i te mau auhoraʼa maitaʼi aʼe i te tahi ’e te tahi ?

E « mau tino huira’atira » tātou ʼe te feiā moʼa o te Atua.

Mau ’ohipara’a e nehenehe e rave

• E taiʼo ʼāmui i te Ephesia 2:19 ʼe e tau’aparau i te auraʼa ’ia riro ’ei hōʼē taʼata ʼeʼē ʼaore rā te hōʼē taʼata ʼē. E faʼaʼite atu i te hōʼē ’itera’a i riro ai ʼoutou mai te hōʼē taʼata ʼeʼē ’e ’aore rā e ta’ata ’ē e ʼua tauturu mai te tahi taʼata ia ʼoutou ’ia ’ite ’ua fāri’i-poupou-hia ’outou. E ani i te mau tamari’i ’ia fa’a’ite mai i teie huru ’itera’a i tupu ia rātou. E aha tā tātou e nehenehe e rave ʼia riro ʼei « tino huira’atira » ʼeiaha rā ʼei mau taʼata ʼeʼē ? Tē vai ra ānei te mau tamariʼi i roto i tā ʼoutou piha ’o te ʼore e tae pinepine mai nei, penei aʼe ʼua riro rātou mai te mau taʼata ʼeʼē ? E tauturu i te mau tamariʼi ’ia haere mai ʼe te hōʼē faʼanahoraʼa nō te tauturu i taua mau melo ’ia fāriʼi-poupou-hia ʼe ’ia herehia.

• Nō te tauturu i tā ʼoutou mau pīahi ’ia haʼafātata atu ā i te tahi ʼe te tahi, e pāpaʼi i te tahi mau uiraʼa i niʼa i te ʼiri pāpaʼiraʼa nō te turaʼi ia rātou ’ia faʼaʼite i te tahi mea nō niʼa ia rātou iho, mai I nāhea ra tā ʼoutou pure i te pāhonora’ahia mai ? ʼaore rā E aha te mea e au-roa-hia e ʼoutou i te rave ʼe tō ʼoutou ʼutuāfare ? E vāhi i te mau tamariʼi i roto i te mau pea, ʼe e ani ia rātou ʼia ui i te tahi ʼe te tahi i te mau uiraʼa. E aha tā rātou i ha’api’i mai nō niʼa i te tahi ʼe te tahi ?

Ephesia 6:1–3

Tē hina’aro nei te Metua i te Ao ra ’ia faʼaroʼo ʼe ’ia faʼatura vau i tōʼu mau metua.

E feruri i te mau rāveʼa e nehenehe ai ia ʼoutou ʼia tauturu i te mau tamariʼi ’ia ʼite i te faufaʼa rahi ʼia faʼaroʼo i te mau metua.

Mau ’ohipara’a e nehenehe e rave

• E ani i te mau tamariʼi ʼia taiʼo rātou iho i te Ephesia 6:1–3 ʼe ʼia ʼimi i te mau pereota faufaʼa rahi nō rātou. E ani ia rātou ’ia faʼaʼite mai i teie mau pereota ʼe nō te aha rātou i manaʼo ai e mea faufaʼa teie mau parau.

• E ani i te mau tamariʼi ’ia faʼaʼite mai i te mau hiʼoraʼa o te mau taʼata i roto i te mau pāpaʼiraʼa moʼa tei faʼaroʼo ʼe tei faʼatura i tō rātou mau metua, mai te Faʼaora (hiʼo Luka 2:42–52), Ruta (hiʼo Ruta 1), ʼaore rā Nephi (hiʼo 1 Nephi 3:1–8). Nō te aha e mea faufa’a ’ia faʼaroʼo ʼe ’ia faʼatura i tō tātou mau metua ?

• E hōroʼa i te tamariʼi tātaʼitahi i te hōʼē ʼapi parau ma te tāʼo faʼatura i niʼa aʼe. E tuatāpapa i te auraʼa o taua tāʼo ra. E ani i te mau tamariʼi ʼia pāpaʼi ʼaore rā ʼia nīnoʼa i niʼa i tā rātou mau ʼapi parau te tahi mea e nehenehe ia rātou ʼia faʼaʼite ʼe tē faʼatura nei rātou i tō rātou mau metua.

Ephesia 6:10–18

E nehenehe te ha’ana tama’i a te Atua e pāruru iā’u i te ’ino.

’Ia taiʼo anaʼe ʼoutou i te Ephesia 6:10–18, e feruri i te tahi o te mau ʼati vārua e faʼaruruhia nei e te mau tamariʼi e nāhea e nehenehe ai ia ʼoutou ’ia tauturu i te haʼapūai i te mau tamariʼi i mua i te reira mau ʼati.

Mau ’ohipara’a e nehenehe e rave

• ’Ia taiʼo anaʼe te hōʼē tamariʼi i te Ephesians 6:10–18, e ani i te tahi atu tamariʼi ’ia pāpaʼi i niʼa i te ʼiri pāpaʼiraʼa te mau tuhaʼa o te haʼana tamaʼi tei faʼahitihia. Nō te aha e mea faufaʼa te hōʼē haʼana tamaʼi i roto i te hōʼē ʼaroraʼa ? Nāhea tātou e ʼōʼomo ai i te haʼana tamaʼi pae vārua i te mau mahana atoʼa ?

• E faʼataʼa i te tamariʼi tātaʼitahi ʼia pāpaʼi ʼe ’ia tāpaʼo i te hōʼē tuhaʼa o te haʼana tamaʼi tei faʼaʼitehia i roto i te Ephesia 6:14–17. Nāhea e nehenehe ai i teie mau tuhaʼa o te ha’ana tama’i e pāruru ai ia tātou i te ’ino ? E aha tā te Fatu i fafau mai i te feiā ’o te ʼōʼomo i te haʼana tamaʼi a te Atua ? (hiʼo Ephesia 6:13). E aha te auraʼa nō te « pātoʼi i te ʼenemi i te mahana ʼino ra » ?

E faʼaitoito i te haʼapiʼiraʼa mai i te fare

E ani i te mau tamariʼi ’ia hiʼo atu i teie hepetoma i te tahi taʼata ’o tei manaʼo ē e taʼata ʼeʼē ʼoia. E tītau atu ia rātou ʼia rave i te tahi mea nō te haere atu e tauturu i taua taʼata ra.

Ha’amaita’iraʼa i tā tātou ha’api’ira’a

E tauturu i te mau tamari’i ’āpī ’ia ha’api’i mai roto mai i te mau pāpa’ira’a mo’a. Nō te tauturu i te mau tamari’i ’āpī ’ia ha’api’i mai nā roto mai i te mau pāpa’ira’a mo’a, ’a fa’atumu i ni’a i te hō’ē noa iho ’īrava o te pāpa’ira’a mo’a ’e ’aore rā, hō’ē noa a’e pereota tumu. E nehenehe tā ʼoutou e ani i te mau tamariʼi ʼia tiʼa mai i niʼa ʼia faʼaroʼo anaʼe rātou i te hōʼē tāʼo ʼaore rā pereota ta’a ’ē. (E hi’o Ha’api’ira’a mai tā te Fa’aora,, 25–26.)