14–20 nō ’Ātopa. Philipi ; Kolosa: « E ti’a iā’u te mau mea ato’a nei i te Mesia, tei tauturu mai iā’u ra » Mai, pe’e mai—nō te Paraimere : Faufa’a ’Āpī 2019 (2019)
14–20 nō ’Ātopa. Philipi ; Kolosa », Mai, pe’e mai—nō te Paraimere : 2019
14–20 nō ’Ātopa.
Philipi ; Kolosa
« E ti’a iā’u te mau mea ato’a nei i te Mesia, tei tauturu mai iā’u ra »
E taiʼo i te Philipi ʼe te Kolosa ma te haʼamanaʼo i te mau tamariʼi tā ʼoutou e haʼapiʼi nei. E tūtava i te faʼaururaʼa e nāhea i te haʼapiʼi atu ia rātou te mau parau tumu i roto i teie mau ʼepisetole.
E pāpa’i i tō ʼoutou mau mana’o
E ani ’ia fa’a’ite mai i te mana’o
E ani i te mau tamariʼi e aha tā rātou i rave i teie hepetoma iho nei nō te haere atu i te tahi taʼata e hinaʼaro ra i te hōʼē hoa, mai tei ’āparauhia i roto i te haʼapiʼiraʼa i teie hepetoma i māʼiri aʼenei.
Ha’api’i i te ha’api’ira’a tumu
Te mau tamari’i ’āpī a’e
Tē here nei ʼe te pure nei te feiā faʼatere o te ʼĒkālesia nōʼu.
ʼUa haʼamata pinepine Paulo i tāna mau ʼepisetole ma te faʼaʼite i tōna aroha i te mau melo o te ʼĒkālesia ʼe ma te parau atu ia rātou ē ʼua pure ʼoia nō rātou. E feruri e nāhea ʼoutou e tauturu ai i te mau tamariʼi ’ia ʼite ē tē here nei tō rātou feiā faʼatere o te ʼĒkālesia ia rātou.
Mau ’ohipara’a e nehenehe e rave
-
E taiʼo pūai atu i te Philipi 1:3–4 ʼe te Kolosa 1:3, 9 ʼe, e ani i te mau tamariʼi ʼia tūfene i tō rātou rima ʼe ’ia piʼo i tō rātou upoʼo i te mau taime atoʼa e faʼaroʼo rātou i te mau tāʼo e pure nei, e pure ra, pure. E tātara ē ʼua pure te ʼāpōsetolo Paulo nō te mau melo o te ʼĒkālesia, mai tō tātou feiā faʼatere o te ʼĒkālesia e pure nei nō tātou i teie mahana.
-
E faʼaʼite i hōʼē hōhoʼa nō Iesu Mesia, ʼe e faʼaʼite atu i te mau hiʼoraʼa ’a pure ai ʼoia nō te tahi taʼata (hiʼo Luka 22:32 ; 3 Nephi 19:21, 23). E aha tā Iesu e ani ’ia pure anaʼe ʼoia nō vetahi ʼē ?
-
E tauturu i te mau tamariʼi ’ia parau i te iʼoa o te tahi o tō rātou taʼata faʼatere, mai te peresideni o te Paraimere, te ʼepisekopo, ʼe te peresideni o te ʼĒkālesia. E haʼamāramarama atu ē tē ani nei teie feiā faʼatere i te Metua i te Ao ra ʼia haʼamaitaʼi i te mau tamariʼi ʼe ʼia tauturu ia rātou ’ia ora parau-tiʼa. E feruri i te parau atu i te mau tamariʼi e aha tā ʼoutou e parau ʼia pure anaʼe ʼoutou nō rātou.
E nehenehe au e ʼoaʼoa i te Fatu.
ʼUa faʼaitoito Paulo i te feiā moʼa ’ia ʼoaʼoa—noa atu ē ʼua faʼaruru rātou i te mau tāmataraʼa fifi ʼe tei roto hoʼi Paulo iho i te fare tāpeʼaraʼa. Nāhea ʼoutou e tauturu ai i te mau tamariʼi ʼia ʼite ē e ’āfaʼi mai te oraraʼa i te ʼevanelia i te ʼoaʼoa ?
Mau ’ohipara’a e nehenehe e rave
-
E ani i te mau tamari’i ’ia fa’aro’o i te hōʼē parau tei tāpitihia i te parau ’a tai’o ai ’outou i te Philipi 4:4. E ani i te mau tamariʼi ’ia faʼaʼite mai ia ʼoutou e aha tā rātou e nehenehe e rave ʼia ʼoaʼoa anaʼe rātou. E tauturu atu ia rātou ’ia ʼite ē « ʼia ʼoaʼoa i te Fatu » ’o te riroraʼa ïa ʼei taʼata ʼoaʼoa nō te mea tei ia tātou ra te ʼevanelia ʼe nō te mea tē here nei Iesu Mesia ia tātou.
-
E hōpoi mai i te mau taoʼa ʼaore rā te mau hōhoʼa o te faʼahōhoʼa i te mau mea o te tauturu ia ʼoutou « ʼia ʼoaʼoa i te Fatu ». E nehenehe tā ʼoutou e hōpoi mai i te hōʼē hāmaniraʼa nehenehe a te Atua ʼaore rā te hōhoʼa nō te hōʼē hiero, te Faʼaora tei tiʼafaʼahou mai, ʼaore rā te hōʼē ʼutuāfare. E vaiiho i te mau tamariʼi ʼia māʼiti i te hōʼē hōhoʼa ʼaore rā taoʼa, ʼe e parau atu ia rātou i muri iho nō te aha e mea ’oa’oa te reira nō ʼoutou. E ani ia rātou ’ia faʼaʼite mai i te mau mea ’o te tauturu ia rātou ʼia ʼoaʼoa i te Fatu.
-
E taiʼo ʼāmui i te Philipi 4:8, ʼe e tauturu i te mau tamariʼi ʼia feruri i te mau mea ʼe tano i te mau faʼaʼiteraʼa i roto i te ʼīrava (hiʼo atoʼa i Te mau Hiroʼa Faʼaroʼo 1:13). E hōroʼa atu i te mau tamariʼi i te mau huʼahuʼa parau ʼe e vaiiho ia rātou ʼia pāpaʼi i te mau hōhoʼa nō te mau mea ’o te tauturu ia rātou ’ia « feruri » i te mau mea tā Paulo i faʼaʼite.
ʼE tiʼa i tōʼu faʼaroʼo ’ia « aʼahia » i niʼa ia Iesu Mesia.
Mai te mea e nehenehe i te mau tamariʼi ’ia pātu i tō rātou oraraʼa ʼe tō rātou faʼaroʼo i niʼa i te Faʼaora, e nehenehe ïa rātou e pātoʼi atu i te mau vero o te oraraʼa nei.
Mau ’ohipara’a e nehenehe e rave
-
E faʼaʼite i te hōhoʼa o te hōʼē tumu rāʼau i roto i te faʼanahoraʼa nō teie hepetoma i roto i te Mai, pe’e mai—nō te taʼata hō’ē ʼe te ʼutuāfare ’a taiʼo ai ʼoutou i te mau pereota tumu i roto i te Kolosa 1:23 ; 2:6–7. E aha te tupu mai i teie tumu rāʼau ’ia tae mai te hōʼē vero ʼe ʼaita tō teie tumu rāʼau ʼe mau aʼa paʼari ? E vaiiho i te mau tamariʼi ’ia tiʼa ʼe ʼia faʼahua ʼia riro ʼei tumu rāʼau ma te mau aʼa paruparu i roto i te hōʼē vero ʼe i muri iho i te hōʼē tumu rāʼau ma te mau aʼa paʼari. Nāhea e nehenehe ai i te faʼaroʼo ’ia tauturu ia tātou ʼia riro mai te hōʼē tumu rāʼau ma te mau aʼa paʼari ?
-
E ani i te hōʼē tamariʼi ’ia pāpa’i i te hōʼē tumu rāʼau i ni’a i te ’iri pāpa’ira’a. E ani i te mau tamari’i ’ia parau mai i te iʼoa o te tahi mau mea e nehenehe ia rātou e rave ’ia « aʼahia » i niʼa ia Iesu Mesia. ’Ia fa’a’ite mai te hōʼē tamari’i i te iʼoa o te tahi mea, e ani iāna ’ia tuʼu atu i te hōʼē aʼa i te hōhoʼa.
Ha’api’i i te ha’api’ira’a tumu
Te mau tamari’i pa’ari a’e
Mai te mea e faʼaroʼo tōʼu ia Iesu Mesia, e nehenehe au e ʼoaʼoa e tae noa atu i roto i te mau tau fifi.
ʼUa faʼaʼoromaʼi Paulo i te mau tāmataraʼa e rave rahi, ʼua ʼoaʼoa rā ʼoia nō tōna faʼaroʼo ia Iesu Mesia.
Mau ’ohipara’a e nehenehe e rave
-
E ani i te mau tamariʼi ’ia feruri ē tei roto rātou i te fare ʼāuri, mai te ʼāpōsetolo Paulo a pāpaʼi ai ʼoia i te ʼepisetolo i tō Philipi ma. E taiʼo i te Philipi 4:4–13 ʼe te mau tamariʼi ʼe e ani ia rātou ’ia ʼimi i teie mau tāʼo : ʼoaʼoa, hau, māuruuru. Nō te aha Paulo i ʼoaʼoa ai ʼe i ʼite ai i te hau noa atu i roto i te fare tāpe’ara’a ? E tauturu i te mau tamariʼi ʼia ʼimi i te mau tāʼo Fatu, Atua, ʼe Mesia i roto i teie mau ʼīrava. E tauturu ia rātou ʼia taʼa ē maoti tōna faʼaroʼo ia Iesu Mesia i nehenehe ai ia Paulo ’ia ʼoaʼoa.
-
E ani i te mau tamariʼi ʼia tauturu ia ʼoutou ’ia faʼahope i te mau pereota mai teie : E nehenehe au e pārahi i roto i te pōuri ʼe ʼia ʼite ē tē vai ra tōʼu . E nehenehe au e pārahi i rāpae au i te hōʼē mahana veʼaveʼa ʼe ’ia vai haumarū mai te mea tē vai nei tōʼu . E nehenehe au e ʼite i te mau taime fifi ʼe ’ia ʼite noa i te ʼoaʼoa mai te mea e . E tauturu atu i te mau tamariʼi ’ia feruri i te mau rāveʼa e nehenehe ai rātou e ʼoaʼoa ia Iesu Mesia ’ia faʼaruru anaʼe rātou i te mau tau fifi. E nehenehe tā rātou e hīmene, e taiʼo i te hōʼē pāpaʼiraʼa moʼa auhia e rātou, e tāvini i te tahi taʼata, ʼaore rā e parau i te hōʼē pure haʼamāuruuru. E aha tā Philipi 4:4–13 e parau mai nei ? E faʼaʼite atu i te mau tamariʼi i te tahi mau hīmene ʼaore rā pāpaʼiraʼa moʼa o tei tauturu ia ʼoutou ʼia ʼite i te ʼoaʼoa i te mau tau fifi.
E nehenehe tāʼu e manaʼo i te mau mea mau, parau-tiʼa ʼe te mā.
E mea pinepine te mau tamariʼi i te ʼite i te mau mea ʼino ʼe te viʼiviʼi. E nehenehe tā ʼoutou e tauturu i te ʼimiraʼa i te mau mea hanahana ʼe te paieti.
Mau ’ohipara’a e nehenehe e rave
-
E ani i te hōʼē tamariʼi ’ia taiʼo pūai mai i te Philipi 4:8 ’a ʼimi ai te tahi atu mau pīahi i te mau tāʼo mai te reira atoʼa i roto i Te mau Hiroʼa Faʼaroʼo 1:13. E ani i te hō’ē tamari’i ’ia pāpa’i i teie mau ta’o i ni’a i te ’iri pāpa’ira’a. E hōroʼa atu i te mau tātararaʼa ʼōhie nō teie mau taʼo ʼe ʼia faʼatūʼati atu te mau tamariʼi i te mau auraʼa nō te mau taʼo. Nō te aha e tiʼa ai ia tātou ʼia « feruri » i teie mau mea ? Nāhea e nehenehe ai ia tātou ʼia « ʼimi » i te reira mau mea ?
-
E ani i te mau tamariʼi ’ia parau i te iʼoa o te mau mea e tano i te mau faʼaʼiteraʼa i roto i te Philipi 4:8. E ani ia rātou ’ia tāpeʼa i te hōʼē tāpura i teie hepetoma nō te mau mea atoʼa tā rātou i ʼite e tano i teie mau faʼaʼiteraʼa. E faʼaitoito ia rātou ’ia hopoʼi mai i tā rātou mau tāpura i te Paraimere i te hepetoma i mua nei ʼe ’ia faʼaʼite mai i te mea tā rātou i ʼite.
E tiʼa i tōʼu faʼaroʼo ’ia « aʼahia » i niʼa ia Iesu Mesia.
Tē tāmata nei Sātane i te haʼaparuparu i te faʼaroʼo o te mau tamariʼi nā roto i te mau faʼahemaraʼa ʼe te mau haʼapiʼiraʼa hape. Nāhea e nehenehe ai ia ʼoutou ʼia faʼauru i te mau tamariʼi ʼia haʼapūai i tō rātou faʼaroʼo i te Faʼaora ʼia ore rātou e « ’āueue i te tiʼaturiraʼa o te ʼevanelia » ?
Mau ’ohipara’a e nehenehe e rave
-
E ani i te mau tamariʼi ’ia pāpaʼi i te mau hōhoʼa ’o te faʼahōhoʼa i te mau parau mau tā rātou i ʼite i roto i te Kolosa 1:23 ; 2:6–7. E vaiiho ia rātou ’ia faʼaʼite mai i tā rātou mau hōhoʼa i te mau pīahi ʼe ’ia tātara mai i te mau parau mau tā tā rātou mau hōhoʼa e faʼaʼite mai nei.
-
E faʼaʼite i te video « Mau mataʼi pūāhiohio ». E aha te tahi mau faʼahemaraʼa ʼe mau haʼapiʼiraʼa hape i roto i te ao nei i teie mahana ’o te nehenehe e haʼaparuparu i tō tātou faʼaroʼo ? E aha tā tātou e nehenehe e rave nō te haʼapūai i tō tātou faʼaroʼo ʼia « aʼahia » i niʼa ia Iesu Mesia ?
E faʼaitoito i te haʼapiʼiraʼa mai i te fare
E ani i te mau tamari’i ’ia fa’a’ite i tō rātou ’utuāfare e aha tā rātou i ’apo mai nō ni’a i te « aʼaraʼahia » i niʼa i te Mesia. E nehenehe tā rātou e faʼaʼohipa i te ʼapi ʼohiparaʼa nō teie hepetoma ʼaore rā te hōʼē pāpaʼiraʼa moʼa tā rātou i taiʼo i roto i te piha i teie mahana.
Haʼamaitaʼiraʼa i tā tātou haʼapiʼiraʼa
E mea ʼanaʼana tae roa te mau tamariʼi i te ʼimi ʼe i te haʼapiʼi nā roto i te mau ʼohipa ʼāpī huru rau. E fa’a’ohipa i te mau ’ohipara’a ’o te tauturu ia rātou ’ia haere i mua, ’ia fa’a’ohipa i tō rātou mau ’itetino ato’a, ’ia tuatāpapa ’e ’ia tāmata i te mau mea ’āpī. E nehenehe te mau manaʼo i roto i « Te pāhonoraʼa i te mau hinaʼaro o te mau tamariʼi ʼāpī aʼe » i teʼōmuaraʼa o teie rāvea e tauturu atu. (Hi’o ato’a Ha’api’ira’a mai tā te Fa’aora, 25–26