21–27 nō ’Ātopa

1 ’e 2 Tesalonia

« ʼIa ’ore tō ’outou ’ā’au ’ia ’āueue vave, ’ia ’ore ’ia hitima’ue »

’A taiʼo ai ’outou nā roto i te pure i te 1 ʼe 2 Tesalonia ma te haʼamanaʼo i te mau tamariʼi, ʼe ʼite ’outou i te mau tumu parau e tiʼa ia rātou ʼia māramarama.

E pāpa’i i tō ʼoutou mau mana’o

E ani ’ia fa’a’ite mai i te mana’o

I te haʼapiʼiraʼa i te hepetoma i maʼiri aʼenei, ʼua ani ānei ʼoutou i te mau tamariʼi ’ia faʼaʼohipa i te mea tā rātou i haʼapiʼi mai ma te rāve’a huru rau ? E vaiiho i te mau tamariʼi ’ia faʼaʼohipa i te mau minuti mātāmua nō te fa’a’ite mai i te mau mea tā rātou i rave i teie hepetoma.

Ha’api’i i te ha’api’ira’a tumu

Te mau tamari’i ’āpī a’e

1 Tesamonia 5:1–6

ʼIa peʼe anaʼe vau i te mau faʼaueraʼa a te Atua, e ineine ïa vau nō te Tae Pitiraʼa mai o Iesu Mesia.

E nehenehe te aʼo a Paulo e tauturu ia tātou ʼia ineine ʼe ’ia tiaʼi i taua mahana rahi ra ʼia ho’i faʼahou mai te Faʼaora i niʼa i te fenua nei.

Mau ’ohipara’a e nehenehe e rave

• E ani i te hōʼē metua vahine ’ia fa’ati’a mai nō niʼa i te huru nō te tīaʼiraʼa ’ia fānau mai tāna ʼaiū ma te ʼite ʼore ahea te fānauraʼa e tupu ai. E taiʼo i te 1 Tesalonia 5:2–3, ʼe e parau atu i te mau tamariʼi ʼe ho’i faʼahou mai Iesu Mesia i niʼa i te fenua nei, ʼaita te taʼata i ʼite pāpū i te taime—mai te hōʼē metua vahine tei ʼore i ʼite ʼahea tāna ʼaiū e fānau mai ai.

• E ani i te mau tamariʼi ʼia faʼaʼite mai i te hōʼē taime e faʼaineine ai rātou nō te hōʼē tere ʼaore rā ʼōroʼa. E aha tā rātou i rave nō te fa’aineine ? E hōpoi mai i te hōʼē ʼāfata ʼahu ʼaore rā hō’ē pute e vaiiho i te mau tamariʼi ’ia faʼahua ʼe te faʼaineine nei rātou i te reira nō te hōʼē tere ʼaore rā hō’ē ʼōroʼa. E haʼamāramarama atu ē e faʼaineine tātou nō te ho’i-faʼahou-raʼa mai o Iesu Mesia nā roto i te pure, te taiʼoraʼa i te mau pāpaʼiraʼa moʼa, te peʼeraʼa i te peropheta, ʼe te ora parau-tia-raʼa i te mau mahana atoʼa. E ani i te mau tamariʼi ’ia pāpaʼi i te mau hōhoʼa e nāhea e nehenehe ai ia rātou ʼia faʼaineine i te reira ʼe ’ia tuʼu atu i te reira mau hōhoʼa i roto i te ʼāfata ʼahu.

• E taiʼo i te 1 Tesalonia 5:6 i te mau tamariʼi ʼe e fa’ata’a atu ē mai te mea eʼita tātou e faʼaineine nō te ho’iraʼa mai o Iesu, mai te mea ra ïa ʼe ʼua vareʼa tātou i te taʼoto ʼe eʼita ïa tātou e ʼineine nōna. E ani i te mau tamari’i ’ia faʼahua vareʼa taʼoto rātou. E tātara atu ē mai te mea e faʼaʼineine tātou, mai te mea rā ïa ē ʼua ’ara’ara tātou ʼe te tīa’i nei tātou iāna. E ani ia rātou ʼia ara mai. E hīmene ʼāmui « Quand Jésus reviendra » (Chants pour les enfants, 46–47).

2 Tesalonia 2:1–3

ʼUa haʼapiʼi Paulo ē e tupu mai te hōʼē tāivara’a hou te ho’ira’a mai o Iesu Mesia.

ʼUa maʼiri te ʼĒkālesia tā Iesu Mesia i haʼamau i roto i te tāiva, ʼoia hoʼi ʼua rave-’e-hia atu te mana autahuʼaraʼa ʼe te mau parau mau o te ʼevanelia mai niʼa atu i te fenua. ʼUa tohu Paulo ē ʼe tupu teie tāivara’a, ʼaore rā « hahi-ʼē-raʼa », hou te Tae Pitiraʼa mai o te Faʼaora.

Mau ’ohipara’a e nehenehe e rave

• I muri aʼe i te taiʼoraʼa i te 2 Tesalonia 2:3 ʼe te mau tamariʼi, e pātu i te hōʼē pātu ’e te mau ʼāuʼa ʼūrina ʼaore rā ʼōfaʼi. E parau atu i te mau tamariʼi ē tā faʼahōhoʼa nei te mau ʼāuʼa ʼaore rā te mau ʼōfaʼi te mau tufaʼa faufaʼa rahi o te ʼĒkālesia mau, mai te mau parau tumu o te ʼevanelia, te autahuʼaraʼa, te mau tāʼatiraʼa hiero, ʼe te mau peropheta. I muri aʼe i te poheraʼa o Paulo ʼe te tahi atu mau ʼāpōsetolo, ʼua moʼe teie mau mea, ʼe ʼaita faʼahou te ʼĒkālesia mau i niʼa i te fenua nei e rave rahi mau matahiti. E ani i te hōʼē tamariʼi ’ia tūparari i te pātu, ʼe e fa’ata’a atu ē ʼua parauhia te reira te Tāivara’a ʼaore rā te « hahi-ʼē-raʼa ». I tō Iesu Mesia faʼahoʼiraʼa mai i tāna ʼĒkālesia, ʼua piʼihia te reira te Faʼahoʼi-fa’ahou-raʼa mai. (Hiʼo « Taiva », Mau māite i te faʼaroʼo, 13–14.)

• E faʼaʼite i te Buka a Moromona ʼe te mau hōhoʼa o te peropheta ʼe te hōʼē hiero. E ani i te mau tamariʼi ’ia parau « Tāiva » ʼia huna anaʼe ʼoutou i te mau mea i roto i te hōʼē pute ʼe te « Faʼahoʼi-fa’ahou-raʼa mai » ʼia ʼīriti anaʼe ʼoutou i te mau mea i rāpae au.

• E hīmene i te mau hīmene ’o tē haʼapiʼi nei i te mau parau mau tei rave-ʼē-hia atu i roto i te Tāivara’a ʼe tei faʼahoʼi-fa’ahou-hia mai i tō tātou nei tau, mai « Je suis enfant de Dieu », « L’Eglise de Jésus-Christ », ʼe « Oh, j’aime voir le temple » ʼe (Chants pour les enfants, 2–3, 48, 99).

Ha’api’i i te ha’api’ira’a tumu

Te mau tamari’i pa’ari a’e

1 Tesalonia 5:1–6

ʼIa peʼe anaʼe vau i te mau faʼaueraʼa a te Atua, e ineine ïa vau nō te Tae Pitiraʼa mai o Iesu Mesia.

E nehenehe te aʼo a Paulo e tauturu ia tātou ʼia ineine ʼe ’ia tīaʼi i taua mahana rahi ra ʼia ho’i faʼahou mai te Faʼaora i niʼa i te fenua nei.

Mau ’ohipara’a e nehenehe e rave

• E ani i te hōʼē tamariʼi ’ia taiʼo 1 Tesalonia5:1–6 ’a pe’e mai ai te tahi atu mau tamariʼi nō te taiʼo. I muri aʼe i te ʼīrava tātaʼitahi, e ani i te hōʼē tamariʼi ʼia haʼapoto mai e aha tōna mana’o i te mea tā te ʼīrava e parau nei. E hinaʼaro paha ʼoutou i te tātara i te auraʼa o « te mahana au o te Fatu » o te Tae Pitiraʼa mai ïa o Iesu Mesia. Nō te aha te mau tamariʼi e manaʼo ai ē ʼua faʼaauhia te Tae Pitiraʼa i te hōʼē taʼata ʼeiā i te pō ʼaore rā te hōʼē vahine ’o te fātata i te fānau ?

• E parau atu i te mau tamariʼi ʼia feruei ē e haere mai te Faʼaora i roto i tā ʼoutou piha i te tahi taime i teie mahana. Nāhea tātou e faʼaineine ai i tā tātou piha nō tōna tere fārerei ? E tauturu i te mau tamariri ’ia feruri i te mau mea e nehenehe tā tātou e rave nō te faʼaineine ia tātou iho nō te mahana e hoʼi mai ai Iesu Mesia. ʼEi hiʼoraʼa, e nehenehe tātou e tātarahapa, e faʼaʼore i tā vetahi ʼē hapa, e haʼamaitaʼi i tō tātou mau auraʼa ʼutuāfare, e peʼe i te peropheta, ʼe haʼapaʼo i tā tātou mau fafauraʼa. E faʼaitoito i te mau tamariʼi ʼia māʼiti i te hōʼē mea tā rātou e rave nō te faʼaineine ia rātou iho nō te fāri’i i te Faʼaora i tōna ho’iraʼa mai.

2 Tesalonia 2:1–3

ʼUa haʼapiʼi Paulo ē e tupu mai te hōʼē tāivara’a hou te ho’ira’a mai o Iesu Mesia.

Mai te mea ’ua taʼa i te mau tamariʼi ē ’ua rave-ʼē-hia atu te ʼĒkālesia a Iesu Mesia ʼe tāna ʼevanelia mai te fenua atu i te tau o te Tāivaraʼa, ʼe mea māramarama ïa te tumu nō te Faʼahoʼi-fa’ahou-raʼa mai nō rātou.

Mau ’ohipara’a e nehenehe e rave

• E ani i te hōʼē o te mau tamariʼi ’ia taiʼo i te 2 Tesalonia 2:1–3. Mai te au i teie mau ʼīrava, e aha te mea e tiʼa ʼia tupu hou « te mahana o te Mesia », ʼoia hoʼi te Tae Pitiraʼa mai ? ʼUa ʼite ānei te mau tamariʼi i te auraʼa o te « hōʼē-hahi-’ē-raʼa » ? E haʼapāpū ē ʼua taʼa i te mau tamariʼi te auraʼa o te Tāivaraʼa Rahi, tei tupu i muri aʼe i te poheraʼa o te mau ʼāpōsetolo a te Faʼaora. E hinaʼaro paha ʼoutou i te hōroʼa i te haʼamāramaramaraʼa nō roto mai i te « Taivaraʼa », Mau Māite i te Faʼaroʼo, 13–14.

• E tauturu i te mau tamariʼi ’ia tāpaʼo i niʼa i te ʼiri pāpaʼiraʼa te tahi o te mau parau mau ʼe te mau haʼamaitaʼiraʼa tā tātou e ʼoaʼoa nei maoti te ʼevanelia. (Te tahi mau hiʼoraʼa e nehenehe e tu’u atu, te mau hiero, te mau peropheta, te autahuʼaraʼa, ʼe te hōroʼaraʼa a te Vārua Maitaʼi.) E tūmā tātaʼitahi teie mau mea, ʼe e ani i te mau tamariʼi e nāhea tō rātou oraraʼa e ta’a ’ē ai ’ia ʼore teie nei mau mea. E haʼamāramarama atu ē ʼua moʼe teie mau parau mau i roto i te Tāivaraʼa Rahi. Nō te aha e mea faufaʼa rahi ʼia faʼahoʼi-fa’ahou-hia mai te ’Ēkālesia a Iesu Mesia i te fenua nei i teie mau mahana hope’a nei ? E ani i te mau tamariʼi ʼia « faʼahoʼi faʼahou mai » ʼaore rā ʼia pāpaʼi faʼahou i te mau parau mau ʼe te mau haʼamaitaʼiraʼa i niʼa i te ʼiri pāpaʼiraʼa.

2 Tesalonia 3:7–13

ʼUa hinaʼaro te Metua i te Ao ra e ʼia rave au i te ʼohipa.

Nāhea e nehenehe ai ia ʼoutou ʼia tauturu i te mau tamariʼi ʼia hiʼo i te ʼohipa mai te hōʼē haʼamaitaʼiraʼa, e ʼere rā te tahi mea e ʼāpehia ?

Mau ’ohipara’a e nehenehe e rave

• E ani i te mau tamariʼi ’ia taiʼo tātaʼitahi mai i te mau ʼīrava i roto i te 2 Tesalonia 3:7–13 ʼe e ʼimi i te fifi tā te feiā moʼa e faʼaruru nei. Nō te aha te Metua i te Ao ra e hinaʼaro ai ʼia rave tātou i te ʼohipa ? E aha te tupu mai ʼia ʼore roa atu tātou e haʼapiʼi mai i te rave itoito i te ʼohipa ? E vaiiho i te mau tamariʼi ’ia rave tātaʼitahi i te mau ʼohipa-riʼi-’ōhie ’a ʼimi ai te tahi atu mau tamariʼi ʼe aha rā tā rātou e rave ra.

• E ani i te mau tamariʼi ’ia ’āparau nō niʼa i te taime ’a rave itoito ai rātou nō te tahi ʼohipa, te hōʼē ʼōpuaraʼa, ʼaore rā hō’ē fā. E aha tō rātou huru i muri aʼe i te otiraʼa taua ʼohipa ra ? E aha te aura’a o te parau ē « ʼeiaha e tōʼaruʼaru i te raveraʼa i te parau maitaʼi » ? (2 Tesalonia 3:13).

E faʼaitoito i te haʼapiʼiraʼa mai i te fare.

E ani i te mau tamariʼi ’ia parau atu i te hōʼē melo o te ʼutuāfare ʼaore rā te hōʼē hoa te tumu i māuruuru ai rātou e tei ia tātou ra te ʼevanelia i niʼa i te fenua nei i teie mahana (e nehenehe te ʼapi ʼohiparaʼa nō teie hepetoma e tauturu ia rātou ʼia haʼamanaʼo.

Ha’amaita’iraʼa i tā tātou ha’api’ira’a

E pāturu i te mau metua o te mau tamari’i. « ’O te mau metua te mau ’orometua ha’api’i ’evanelia faufa’a rahi roa a’e nō tā rātou mau tamari’i—tei ia rātou ra te hōpoi’a tumu ’e te mana rahi roa a’e nō te fa’auru i tā rātou mau tamari’i (hi’o Deuteronomi 6:6-7). E ha’api’i ai ’outou i te mau tamari’i i te fare purera’a, ’a imi nā roto i te pure i te mau rāve’a nō te turu i tō rātou nau metua i roto i tō rātou ti’ara’a faufa’a rahi ».(Ha’api’ira’a mai tā te Fa’aora, 25).