28 nō ’Ātopa–3 nō Novema

1 e 2 Timoteo ; Tito ; Philemona

« ʼEi ha’apa’ora’a rā ʼoe nā tei faʼaroʼo ra »

E taiʼo ma te pure i te 1 ʼe 2 Timoteo ; Tito ; ʼe Philemona nō te haʼapiʼi mai e nāhea e nehenehe ai ia ʼoutou ʼia faʼaʼohipa i teie mau ʼepisetole nō te haʼapiʼi i te mau tamariʼi i roto i te parau-tiʼa (hiʼo 2 Timoteo 3:16).

E pāpa’i i tō ʼoutou mau mana’o

E ani ’ia fa’a’ite mai i te mana’o

E ani i te mau tamariʼi ’ia paraparau mai nō niʼa i te tahi taʼata tei riro nō rātou ʼei hōʼē « haʼapaʼoraʼa nā tei faʼaroʼo ». E aha tā rātou e rave nei nō te riro ʼei mau hiʼoraʼa maitaʼi nō vetahi ʼē ?

Ha’api’i i te ha’api’ira’a tumu

Te mau tamari’i ’āpī a’e

1 Timoteo 3:1–2 ; Tito 1:7–9

Tē arataʼi nei te mau ʼepisekōpo i te pāroita ʼei mau tāvini nā te Atua.

ʼUa haʼapiʼi Paulo ia Timoteo ʼe ia Tito i te faufaʼa rahi o te mau ʼepisekōpo. Nāhea e nehenehe ai ia ʼoutou ’ia haʼapiʼi atu i te mau tamariʼi e aha tā te ʼepisekōpo e rave ? (Hōʼē ā te hōʼē peresideni ʼāmaʼa ʼe te hōʼē ʼepisekōpo.)

Mau ’ohipara’a e nehenehe e rave

• E pāpaʼi i te hōʼē hōhoʼa ʼōhie nō tō ʼoutou ʼepisekōpo i niʼa i te ʼiri pāpaʼiraʼa. E ani i te mau tamari’i ’ia fa’a’ite mai e aha tā rātou i ’ite nō ni’a i te ʼepisekōpo. E aha tōna ra huru ? E aha tāna e rave ? Nāhea ʼoia e haʼamaitaʼi ai i te pāroita ? (E nehenehe tā ʼoutou e ʼite i te tahi mau tāpaʼo nō te hōʼē ʼepisekōpo i roto i te 1 Timoteo 3:1–2 ʼe Tito1:7–9.) ’A faʼaʼite mai ai te mau tamariʼi i tō rātou mau manaʼo, e pāpaʼi atu i niʼa i te mau ʼapi parau tō rātou mau manaʼo ʼe e vaiiho i te mau tamariʼi ’ia tuʼu atu i te reira i niʼa i te ʼiri pāpaʼiraʼa i pīha’i iho i te hōhoʼa.

  

  ʼUa piʼihia te mau ’episekōpo nō te hōro’a i te arata’ira’a vārua i te mau melo o te pāroita.

• E pāpaʼi i te mau ʼohipa a te hōʼē ʼepisekōpo i niʼa i te mau ʼāpi parau—mai te fāriʼiraʼa i te tufaʼa ʼahuru ʼe te mau moni haʼapaeraʼa māʼa, te hōroʼaraʼa i te mau piʼiraʼa, te uiuiraʼa i te mau melo, te tautururaʼa i te feiā vēvē ʼe te navaʼi ʼore, ʼe te pureraʼa nō vetahi ʼē. E tuʼu atu teie mau ʼapi parau i roto i te hōʼē ʼāuʼa, ʼe e ani i te tamari’i tātaʼitahi ’ia rave mai i te hōʼē ʼapi parau. I muri iho e tauturu i te tamariʼi ʼia haʼuti mai i teie mau ʼohipa i mua ia ʼoutou. E faʼaʼite i tō ʼoutou ʼiteraʼa pāpū ē ʼua piʼihia tō ʼoutou ʼepisekōpo e te Atua.

• E ani i te mau tamariʼi ’ia nīnoʼa i te hōʼē hōhoʼa nō te ʼepisekōpo e tāvini ra i te mau melo nō te pāroita. E parau atu ē e hōroʼa ʼoutou i tā rātou mau hōhoʼa i te ʼepisekōpo nō te haʼamāuruururaʼa iāna. E aha tā ’outou e nehenehe e rave nō te tauturu iāna ?

1 Timoteo 4:12

E nehenehe au e riro « ʼei haʼapa’oraʼa nō tei faʼaroʼo ».

E aha tā ʼoutou e nehenehe e rave nō te faʼauru i te mau tamariʼi ’ia tiʼaturi i tō rātou ʼaravihi ’ia riro « ʼei [mau] haʼapa’ora’a nō tei faʼaroʼo » ?

Mau ’ohipara’a e nehenehe e rave

• E hīmene ʼe te mau tamariʼi « Do as I’m Doing » (Children’s Songbook, 276). E ani i te mau tamariʼi ’ia peʼe i tō ʼoutou hiʼoraʼa nā roto i te raveraʼa i te mau ʼohipa tā ʼoutou e rave nei. E vaiiho i te mau tamariʼi ’ia arataʼi i te toeʼa o te piha i te peʼeraʼa i tā rātou mau ʼohipa. E taiʼo i te 1 Timoteo 4:12, ʼe e ani i te mau tamariʼi e aha tā rātou e nehenehe e rave nō te riro ʼei mau hiʼoraʼa maitaʼi nō vetahi ʼē.

• E faʼaʼite atu i te hōʼē ’itera’a ’a tamata ai ʼoutou i te riro ʼei hiʼoraʼa maitaʼi nō te tahi taʼata ʼaore rā i te taime ’a riro ai te tahi taʼata ʼei hiʼoraʼa maitaʼi nō ʼoutou. E tauturu i te mau tamariʼi ’ia taʼa ē ’ia riro anaʼe rātou ʼei mau hiʼoraʼa maitaʼi, e nehenehe tā rātou e tauturu i te mau melo o tō rātou ʼutuāfare ʼe te mau hoa.

2 Timoteo 3:14–17

E tauturu mai te mau pāpa’ira’a mo’a iāʼu ʼia ha’api’i i te parau mau.

Mai te mea e nehenehe ʼoutou e tauturu i te mau tamariʼi ʼia haʼapiʼi i te here i te mau pāpaʼiraʼa moʼa, e haʼamaitaʼi ïa ʼoutou i tō rātou oraraʼa i roto i te mau matahiti i mua nei.

Mau ’ohipara’a e nehenehe e rave

• E faʼaʼite atu i te tahi mau pāpaʼiraʼa moʼa, ʼe e tauturu i te mau tamariʼi ’ia haʼamātau atu i te reira nā roto i te faʼaʼiteraʼa ia rātou te mau ʼapi upoʼo parau o te Biblia, te Buka a Moromona, te Parau Haʼapiʼiraʼa ʼe te mau Parau Fafau, ʼe te Poe Taoʼa Rahi. E ani i te hōʼē tamariʼi ’ia tāpeʼa i teie mau buka ’a taiʼo ai ʼoutou i te 2 Timoteo 3:15-17. E haʼamāramarama atu ē, ʼua faʼaue te Metua i te Ao ra i te mau peropheta i roto i te ʼāʼai ʼia pāpaʼi i te mau parau mau tāna i heheu atu ia rātou. E nehenehe tā tātou e haʼapiʼi mai i teie mau parau mau ’a taiʼo ai tātou i te mau pāpaʼiraʼa moʼa.

• E ani i te mau tamariʼi ’ia paraparau mai nō niʼa i tā rātou taoʼa faufaʼa rahi roa. E aha tā rātou e rave i teie taoʼa ? E vaiiho ia rātou ’ia tāpeʼa i te mau pāpaʼiraʼa moʼa ʼe ʼia huri haʼapaʼo maitaʼi i te mau ʼapi. E aha tā tātou e rave nō te faʼaʼohipa i te mau pāpaʼiraʼa moʼa ? Nō te aha e tiʼa ia tātou ʼia haʼapaʼo maitaʼi atu i te reira ? E tauturu i te mau tamariʼi ’ia faʼanaho i te mau ʼohipa e tano i te mau hīmene nō niʼa i te mau pāpaʼiraʼa moʼa, mai « Quand je lis l’Ecriture sainte » ʼaore rā « Dans le Livre de Mormon » (Chants pour les enfants, 66, 62).

Ha’api’i i te ha’api’ira’a tumu

Te mau tamari’i pa’ari a’e

1 Timoteo 4:12

E nehenehe au e riro « ʼei haʼapa’oraʼa nō tei faʼaroʼo ».

E mea ʼāpī roa Timoteo nō te hōʼē taʼata faʼatere o te ʼĒkālesia, ʼua hinaʼaro rā Paulo ʼia ʼite ʼoia ē nehenehe ’oia ʼia riro noa ā ʼei hiʼoraʼa maitaʼi. E nehenehe tā ʼoutou e tauturu i tā ʼoutou mau pīahi ʼia tiʼaturi i tō rātou ’aravihi nō te hōroʼa i te hiʼoraʼa maitaʼi.

Mau ’ohipara’a e nehenehe e rave

• E taiʼo ʼāmui i te 1 Timoteo 4:12, ʼe e ani i te mau tmariʼi ’ia ʼimi e ono rāveʼa tā Paulo i parau e nehenehe ai ia tātou ʼia riro « ʼei haʼapaʼoraʼa nō tei faʼaroʼo ». E vāhi pea te mau tamari’i ’e ’a ani i te pea tātaiʼtahi ’ia feruri i te tahi hiʼoraʼa e nehenehe ai rātou e riro ʼei hiʼoraʼa maitaʼi nō tei faʼaroʼo ra. E ani ia rātou ’ia haʼuti mai i tō rātou hiʼoraʼa i mua i te mau pīahi.

• E ani i te mau tamariʼi mai te mea e hinaʼaro rātou i te faʼaʼite mai i te mau taime e tamata ai rātou ʼia riro ʼei hiʼoraʼa maitaʼi nō vetahi ʼē. E parau atu ia rātou e nāhea rātou e riro ai ʼei mau hiʼoraʼa nō tei faʼaroʼo ra nō ʼoutou e nāhea tō ʼoutou ʼiteraʼa i tō rātou hōroʼaraʼa i te hiʼoraʼa maitaʼi nō vetahi ʼē.

1 Timoteo 6:7–12

E tiʼa iāʼu ’ia here rahi atu i te mau mea mure ʼore i te moni.

I roto i te hōʼē ao ’o te hau noa atura i te mea mātēria, nāhea e nehenehe ai ia ʼoutou ’ia tauturu i te mau tamariʼi ’ia tāpeʼa i tō rātou tūtonura’a ʼe te here i niʼa i te Metua i te Ao ra ʼe ia Iesu Mesia ?

Mau ’ohipara’a e nehenehe e rave

• E ani i te mau tamariʼi ’ia parau mai e aha tā rātou e hoʼo mai ʼahani tei ia rātou ra te tāʼātoʼaraʼa o te moni i te ao nei. E ani i te hōʼē tamariʼi ʼia taiʼo 1 Timoteo 6:7–12, ʼe e ani i te tahi atu mau tamariʼi ʼia haʼapoto mai i te mea tā Paulo i haʼapiʼi ia Timoteo nō niʼa i te moni. E ani i muri iho i te mau tamariʼi ʼia taiʼo faʼahou i te mau ʼīrava, ma te ʼimi i te mau mea hau atu i te faufaʼa i te moni tā Paulo i faʼahiti.

• E hōhora atu i te mau hōhoʼa o te mau mea nō teie nei ao (mai te moni, te mau haʼuti, ʼaore rā faʼaʼoaʼoaraʼa) ʼe te mau mea mure ʼore (mai te mau ʼutuāfare ʼaore rā te mau hiero). E ani i te mau tamariʼi ’ia faʼataʼa i te mau hōhoʼa i roto i na puʼeʼa ʼe piti—te mau mea o te tāpiri atu ia tātou i te Mesia ʼe te mau mea e nehenehe e faʼahahi ʼē atu i te Mesia mai te mea ʼua rahi aʼe tō tātou here i te reira i tō tātou here iāna. Nō te aha « te nounou moni i riro ai … te tumu o te mau ’ino ato’a » ?

2 Timoteo 3:14–17

ʼUa hōroʼa mai te Metua i te Ao ra ia tātou te mau pāpaʼiraʼa moʼa nō te tauturu ia tātou ʼia ʼite te parau mau i te hape.

E nehenehe te mau tamariʼi ’ia ʼite i te mau haʼamaitaʼiraʼa nō te taiʼoraʼa i te mau pāpaʼiraʼa moʼa. E haʼapiʼi ai ʼoutou i te mau tamariʼi nō niʼa i te mau pāpaʼiraʼa moʼa, e ʼimi i te mau rāveʼa nō te faʼaitoito ia rātou ʼia ʼite i tō rātou iho mau ʼiteraʼa ma te te parau a te Atua.

Mau ’ohipara’a e nehenehe e rave

• E ani i te mau tamari’i ’ia tai’o i te 2 Timoteo 3:15–17. E hopoi mai i te hōʼē hōhoʼa o te faʼaʼite mai i te hōʼē ʼāʼamu nō nā pāpaʼiraʼa moʼa e maha, ’e e tuʼu te mau hōhoʼa i roto i te hōʼē ʼafata tei tāpoʼihia. E ani i te mau tamariʼi ’ia tiʼi atu i te hōʼē hōhoʼa ʼe ʼia faʼaʼite mai i te ʼāʼamu. E ani i te mau tamariʼi mai te mea e nehenehe rātou e faʼaʼite mai i te tahi ʼē atu mea nō niʼa i taua buka pāpaʼraʼa moʼa ra. Nāhea e nehenehe ai i te mau pāpaʼiraʼa moʼa « i te haʼapaʼari ia [tātou] e tae noa atu i te fa’aorara’a » ?

• E ani i te mau tamariʼi ʼia faʼaʼite mai i tā rātou ʼirava au-roa-hia e rātou ʼaore rā te hōʼē ʼohipa i tupu ’a tauturu ai te hōʼē parau mau i roto i te mau pāpaʼiraʼa moʼa ia rātou. E hinaʼaro paha ʼoutou e faʼaʼite i tā ʼoutou iho ʼīrava ʼaore rā ʼitera’a.

• E ani i te hōʼē tamariʼi ’ia tai’o i te Moroni 10:4-5. E aha tā Moroni i fafau mai i roto i teie mau ʼīrava ? E ani i te mau tamariʼi e aha tā rātou i rave nō te fāri’i i te hōʼē ʼiteraʼa pāpū ē parau mau te mau pāpaʼiraʼa moʼa. E ani ia rātou ʼia taiʼo ʼaore rā ʼia faʼaroʼo i te mau pāpaʼiraʼa moʼa i te mau mahana atoa.

E faʼaitoito i te haʼapiʼiraʼa mai i te fare.

E ani i te mau tamariʼi ’ia faʼaʼite i tō rātou mau ʼutuāfare e aha tā rātou i haʼapiʼi mai nō niʼa i te mau pāpaʼiraʼa moʼa ʼe ʼia ʼimi i te hōʼe ʼīrava tā rātou e nehenehe e faʼaʼite atu i te mau pīahi i te hepetoma i mua (ma te tautururaʼa a te mau metua, ’ia hinaʼarao-anaʼe-hia).

Haʼamaitaʼiraʼa i tā tātou haʼapiʼiraʼa

E faʼatano i te mau ʼohiparaʼa nō te pāhono atu i te mau hinaʼaro. ʼEiaha e faʼariro i teie mau faʼanahoraʼa ʼei mau arataʼiraʼa e tiʼa ia ʼoutou ʼia peʼa atu, e faʼaʼohipa rā i te reira ʼei mau manaʼo nō te faʼatupu i tō ʼoutou iho manaʼo ’a feruri ai ʼoutou i te mau hinaʼaro o te mau tamariʼi tā ʼoutou e haʼapiʼi nei. E nehenehe tā ʼoutou e faʼatano i te mau ʼohiparaʼa nō te haʼapiʼi i te mau tamariʼi nō te mau huru fāito matahiti atoʼa.