Rāʼau i Gileada, nā Annie Henrie

4-10 nō Novema

Hebera 1:6

Iesu Mesia, « ʼei tumu nō te ora mure ʼore »

E aha te mau parau mau tā ʼoutou i ʼite i roto i te Hebera 1–6 i faʼauruhia ʼoutou ʼia haʼapiʼi atu i te mau tamariʼi ? E haʼapaʼo maitaʼi atu i te mau muhumuhuraʼa a te Vārua ’o te tae mai ’a faʼaineine ai ʼoutou, ʼe e haʼapāpū i te pāpaʼi i te reira.

E pāpa’i i tō ʼoutou mau mana’o

E ani ’ia fa’a’ite mai i te mana’o

ʼUa fāriʼi ānei te mau tamariʼi i te aniraʼa i te hopeʼa o te hepetoma i maʼiri aʼenei ’ia ʼimi i te hōʼē ʼīrava e nehenehe ia rātou ʼia faʼaʼite mai ? Mai te mea ʼē, e hōroʼa atu ia rātou te taime nō te faʼaʼite mai i te reira. Mai te mea ʼaita, e tauturu ia rātou ʼia feruri i te tahi mea tā rātou i haʼapiʼi mai nā roto mai i te mau pāpaʼiraʼa moʼa e nehenehe rātou e faʼaʼite mai.

Ha’api’i i te ha’api’ira’a tumu

Te mau tamari’i ’āpī a’e

Hebera 1:2–10 ; 2:8–10, 17–18

Tē tiʼaturi nei au ia Iesu Mesia.

E nehenehe teie mau ʼīrava e tauturu i te mau tamariʼi ʼia haʼapiʼi rahi atu ā nō niʼa ia Iesu Mesia ʼe ʼia haʼapūʼai i tō rātou mau auraʼa ʼe ōna.

Mau ’ohipara’a e nehenehe e rave

• Ma te faʼaʼohiparaʼa i tā ʼoutou iho mau parau, e pāpaʼi atu i niʼa i te mau huʼahuʼa ’api parau te mau parau mau nō niʼa ia Iesu Mesia tei ʼitehia e ʼoutou i roto i te Hebera 1:2–10 ; 2:8–10, 17–18, ʼe e huna atu i te reira nā roto i te piha. E ani i te mau tamari’i ’ia ’imi i te mau ʼapi parau. E tauturu atu ia rātou ʼia taiʼo i te mau parau mau tei pāpaʼihia i niʼa i te mau ʼapi parau, ʼe e parau atu e aha te auraʼa o teie mau parau mau. Mai te mea e tītauhia, e faʼataʼa atu ē ’ua piʼihia Iesu te Tamaiti a te Atua nō te mea ’o te Metua i te Ao ra te metua nō tōna vārua ʼe tōna tino.

• E faʼahaere atu i te hōʼē hōhoʼa nō te Faʼaora nā roto i te mau pīahi, ʼe e vaiiho i te tamariʼi tātaʼitahi ʼia faʼaʼite mai nō te aha ʼoia i māuruuru ai ia Iesu Mesia ’a tāpeʼa noa ai ʼoia i te hōhoʼa.

Hebera 3:8

ʼUa hinaʼaro te Metua i te Ao ’eiaha tātou e « faʼaetaʼeta i tō [tātou] ʼāʼau ».

Tē hōroʼa mai nei te Hebera 3 i te hōhoʼa o te mau ’āti Iūda i te faʼaʼetaʼetaraʼa i tō rātou ʼāʼau ʼe te pātoʼiraʼa i te mau haʼamaitaʼiraʼa a te Fatu. E faʼaararaʼa atoʼa ia tātou pā’ātoʼa ʼeiaha ʼia faʼaʼetaʼeta i tō tātou ʼāʼau.

Mau ’ohipara’a e nehenehe e rave

• E hopoi mai i te hōʼē faretōau (ʼaore rā tamaro ʼahu) ʼe te hōʼē ʼōfaʼi i te piha haʼapiʼiraʼa. E ani i te mau tamariʼi ʼia tāpeʼa i te mau taoʼa ʼe ʼia faʼaʼite mai i te huru o te mau taoʼa. E tuʼu maʼa topata pape i niʼa i te taoʼa tātaʼitahi, ʼe e faʼaʼite atu ē ’ua rahi aʼe te pape i tomo atu i roto i te faretōau i te pape i roto i te ʼōfaʼi. E tātara atu ē e tiʼa i tō tātou mau ʼāʼau ’ia tamarūhia ʼeiaha ’ia ’eta’eta ’ia nehenehe ia tātou ʼia fāriʼi i te mau parau mau a te Metua i te Ao ra i roto i tō tātou ʼāʼau.

• E pāʼoti atu i te tahi māfatu i roto i te mātēria marū, mai te ʼahu, ʼe te hōʼē mātēria paʼari aʼe, mai te ʼāfata parau. E parau atu i te mau tamariʼi ē ʼia faʼaroʼo ʼe ʼia haʼapaʼo anaʼe tātou e māfatu marū ïa tō tātou ʼe ’ia ʼore anaʼe tātou e faʼaroʼo ʼe e haʼapaoʼo e māfatu ʼetaʼeta ïa tō tātou. Nā roto i tā ʼoutou iho mau parau, e faʼaʼite mai i te tahi mau hiʼoraʼa i roto i te mau pāpaʼiraʼa moʼa o te mau taʼata tei tamarū i tō rātou ʼāʼau ʼaore rā tei faʼaʼetaʼeta i tō rātou ʼāʼau (mai ia Nephi, Lamana, ʼe Lemuela [1 Nephi 2:16–19], Paulo [Te mau ’Ohipa 9:1–22], ʼaore rā Iosepha Semita [Iosepha Semita—Te ʼĀʼamu 1:11–20]). E faʼaʼite ai ʼoutou i te mau hiʼoraʼa, e ani i te mau tamariʼi ’ia hiʼo atu i te ʼāʼau marū ʼaore rā te ʼāʼau ʼetaʼeta.

ʼUa piʼi Mose ia Aarona i roto i te tāviniraʼa, nā Harry Anderson

Hebera 5:4

ʼUa piʼihia te mau taʼata tei mau i te autahuʼaraʼa e te Atua.

ʼUa riro te Hebera 5:4 ’ei hōʼē ʼīrava faufaʼa rahi nō te mea te haʼamāramarama mai nei te reira ē ʼua piʼihia te mau taʼata tei mau i te autahuʼaraʼa—ʼe te tahi atu feiā ’o te tāvini nei i roto i te ʼĒkālesiia—e te Atua.

Te mau ʼohipara’a e nehenehe e rave

• E taiʼo i te Hebera 5:4 i te mau tamariʼi. E ani i te hōʼē tei mau i te autahuʼaraʼa ’ia tātara mai e aha te autahuʼaraʼa ʼe ʼia faʼaʼite mai i te huru nō tōna fāriʼiraʼa i te autahuʼaraʼa.

• E tauturu i te mau tamari’i ’ia tāmau ’ā’au i te Hiro’a Fa’aro’o pae. E faʼaʼite i tō ʼoutou ʼiteraʼa pāpū ē te mau taʼata tei piʼihia e te Atua nō te rave i te ʼohipa a te Atua, ʼua piʼihia rātou e te Atua nā roto i te heheuraʼa.

Ha’api’i i te ha’api’ira’a tumu

Te mau tamari’i pa’ari a’e

Hebera 1:2–10 ; 2:8–10, 17–18

Tē tiʼaturi nei au ia Iesu Mesia.

ʼUa pāpaʼihia te ʼepisetole i tō Hebera nō te haʼapūai i te faʼaroʼo ia Iesu Mesia o te feiā moʼa nō Hebera. E nehenehe atoʼa te reira e nā-reira-hia nō te mau tamariʼi tā ʼoutou e haʼapiʼi nei.

Mau ’ohipara’a e nehenehe e rave

• E faʼataʼa atu i te tamariʼi tātaʼitahi te tahi mau ʼīrava i roto i te Hebera 1:2–10 ; 2:8–10, 17–18, ʼe e ani i te mau tamariʼi ’ia ʼimi i roto i taua mau ʼīrava ra te mau parau mau nō niʼa ia Iesu Mesia. E vaiiho ia rātou ʼia faʼaʼite mai ʼaore rā ʼia pāpa’i atu i ni’a i te ’iri pāpa’ira’a i te mea tā rātou i ʼite. E aha atu ā tā tātou i ʼite nō niʼa ia Iesu Mesia ? E nehenehe i te mau tamariʼi ʼia ʼimi i te tahi mau manaʼo i roto i te mau hīmene mai « ʼUa ʼIte Au ʼe te Ora nei Tōʼu Fatu » (Te mau Hīmene, Nūmera 69 ʼaore rā « ʼIl envoya son fils aimé » (Chants pour les enfants, 20–21).

• E ani i te mau tamariʼi ʼia pāpaʼi i tō rātou iho mau hōhoʼa ʼe tō rātou mau metua. E ani ia rātou ʼia faʼaʼite mai e aha te mau mea e vai nei i roto ia rātou iho ʼe tō rātou iho mau metua. E faʼataʼa atu ē ’ia parau anaʼe te Hebera 1:3 ē ʼua riro Iesu Mesia « te hōhoʼa mau nō te [Atua] iho », te auraʼa o te reira hōʼē ā ïa tō Iesu ʼe tō te Metua i te Ao ra huru ’e mau ’aravihi. E faʼaʼite pāpū atu ē ʼua haʼapiʼi mai tātou nō niʼa i te Metua i te Ao ra nā roto i te haʼapiʼiraʼa mai ʼe te peʼeraʼa ia Iesu Mesia.

• E tauturu i te mau tamariʼi ʼia feruri i te mau taʼata e nehenehe ia rātou ʼia faʼaʼite atu i tō rātou ʼiteraʼa pāpū nō Iesu Mesia. E feruri i te ani ia rātou ʼia haʼapiʼi i te faʼaʼiteraʼa atu i te mea tā rātou e parau atu i taua mau taʼata nō niʼa ia Iesu.

Hebera 3:7–19

Nō te fāriʼi i te arataʼiraʼa ʼe te mau haʼamaitaʼiraʼa a te Metua i te Ao ra, e tiʼa ’ia tātou ’eiaha « e faʼaʼetaʼeta i tō [tātou] ʼāʼau ».

I roto i te Hebera 3, ʼua faʼaʼohipahia te ʼāʼamu o te mau ’āti ’Īseraēla i roto i te medebara nō te haʼapiʼi atu i te faufaʼa ’eiaha ʼe faʼaʼetaʼeta i tō tātou ʼāʼau. Nāfea e ti’a ai ia ’outou ’ia fa’a’ohipa i teie ’ā’amu nō te ha’api’i i te mau tamari’i i roto i tā ʼoutou piha i teie parau tumu ?

Mau ’ohipara’a e nehenehe e rave

• E ani i te mau tamariʼi ’ia feruri i te mau mea paʼari ʼe te mau mea marū. (E hinaʼaro paha ʼoutou i te ’āfaʼi mai i te tahi mau hōhoʼa nō te faʼaʼite atu.) E taiʼo ʼāmui i te Hebera 3:8. E aha te auraʼa ’ia vai te ʼāʼau ʼetaʼeta ? Nō te aha te Atua e hinaʼaro ai ʼia marū tō tātou ʼāʼau ?

• Nā roto i tā ʼoutou iho mau parau, e faʼati’a atu i te ʼāʼamu o te mau ’āti ’Īseraēla i te faʼaʼetaʼetaraʼa i tō rātou ʼāʼau i te Fatu i roto i te medebara ra (hiʼo Nūmera 14:1–12 ; Hebera 3:7–19). E ani i te mau tamariʼi ’ia ha‘uti mai i te ʼāʼamu. E aha te tupu mai mai te mea e faʼaʼetaʼeta tātou i tō tātou ʼāʼau i te Fatu ʼe i tāna ʼevanelia ?

• E ani i te mau tamariʼi ʼia taiʼo i te Mataio 13:15 ; Hebera 3:15 ; Mosia 11:29 ; ʼe Mose 6:27. E ani ia rātou ’ia pāpaʼi atu i niʼa i te ʼiri pāpaʼiraʼa te mau tuhaʼa o te tino tei faʼahitihia i roto i teie mau ʼīrava. E aha te auraʼa ’ia fāriʼi i te mau tariʼa, te mau mata tei matapō, ʼe te mau ʼāʼau ʼetaʼeta i te pae vārua ? Nāhea e nehenehe ai ia tātou ʼia haʼapāpū ē ʼua ineine tō tātou mau tariʼa, mau mata, ʼe te ʼāʼau ’ia fāriʼi i te mau haʼamaitaʼiraʼa a te Atua ?

Hebera 5:1–4

ʼUa piʼihia te mau taʼata tei mau i te autahuʼaraʼa e te Atua.

Tē hōroʼa mai nei te Hebera 5 i te taime nō te tuatāpapa e aha te autahuʼaraʼa—te puāi ʼe te mana nō te rave i te iʼoa o te Atua—e nāhea te reira e fāriʼihia ai. E riro te reira ʼei tautururaʼa nō te mau tamāroa e faʼaineine ra ’ia faʼatōroʼahia i te autahuʼaraʼa.

Mau ’ohipara’a e nehenehe e rave

• E faʼaʼite atu i te hōhoʼa Tē hōroʼa nei Mose i te autahuʼaraʼa ia Aarona (Buka hōhoʼa nō te ʼEvanelia, nūmera 15) ’a taiʼo ai te hōʼē tamariʼi i te Hebera 5:4. E riro paha ’ei tautururaʼa ’ia tātara atu ʼe nō te mea hoʼi o Aarona te taʼata mātāmua tei mau i te autahuʼaraʼa a Aarona, ʼua piʼihia ïa te reira i tōna ra iʼoa. E tauturu i te mau tamariʼi ʼia feruri i te mau ʼohipa tā te mau taʼata tei mau i te autahuʼaraʼa a Aarona e rave (mai te bāpetizoraʼa, te haʼamaitaʼiraʼa ʼe te ʼōpereraʼa i te ʼōroʼa, ʼe te aniraʼa ia vetahi ʼē ’ia haere mai i te Mesia ra).

• E tauturu i te mau tamariʼi ʼia feruri i te mau rāveʼa huru rau e nehenehe ai te taʼata ’ia fāriʼi i te mana. Ei hiʼoraʼa, nāhea te hōʼē ʼorometua haʼapiʼi, te taʼote, ʼaore rā te faʼatere poritita e fāri’i ai i te mana ? Nāhea te Atua e hōroʼa ai i tōna mana ? E ani i te mau tamariʼi ʼia feruri i teie uiraʼa ’a taiʼo ai rātou i te Hebera 5:4 ʼe te pae o te Hiroʼa Faʼaroʼo.

E faʼaitoito i te haʼapiʼiraʼa mai i te fare

E ani i te mau tamariʼi ’ia faʼaʼite atu i tō rātou mau ʼutuāfare i roto i te hōʼē pureraʼa pō ʼutuāfare te hōʼē pāpaʼiraʼa moʼa, te hōʼē hīmene, ʼaore rā hō’ē ʼohiparaʼa tā rātou i haʼapiʼi i roto i te piha haʼapiʼiraʼa i teie mahana.

Haʼamaitaʼiraʼa i tā tātou haʼapiʼiraʼa

E nehenehe i te mau tamariʼi ʼia ʼite i te mana o te Vārua. E ha’api’i i te mau tamari’i ē, te mau mana’o nō te hau, nō te here ’e nō te tāmāhanahana tā rātou e fāri’i, ’ia ’āparau ana’e rātou ’e ’aore rā, ’ia hīmene ana’e rātou nō ni’a ia Iesu Mesia ’e tāna ’evanelia, nō roto mai ïa i te Vārua Maita’i. E nehenehe teie mau mana’o e pātu i tō rātou ’itera’a pāpū.